Nunavut Hansard — 3 June 2026 (Blues, Inuktitut)

2026-06-03 Blues Inuktitut

Nunavut — Debates (Hansard)

ᒪᓕᒐᓕᐅᕐᕕᒻᒥ ᑲᑎᒪᔾᔪᑎᒥᓃᑦ ᐋᖅᑭᒋᐊᖅᓯᒪᓐᖏᑦᑐᑦ ᓇᕿᑦᑕᖅᑕᐅᓯᒪᔪᑦ ᐱᖓᔪᐊ, ᔫᓂ 03, 2026 ᐃᖃᓗᐃᑦ, ᓄᓇᕗᑦ ᐋᖅᑭᒋᐊᕈᑎᑦ: ᐊᑏ ᐅᑎᖅᑎᓯᐅᒃ ᐋᖅᑭᒋᐊᖅᑕᐅᔪᐃᑦ ᑎᑎᕋᖅᑎᒧᑦ ᐅᕝᕙᓘᓐᓃᑦ ᑐᖏᓕᐊᓄᑦ ᒪᓕᒐᓕᐅᕐᕕᒻᒥ ᑲᑎᒪᔾᔪᑎᒥᓃᑦ ᓇᕿᔾᔪᑕᐅᓐᖏᓚᑦ ᑐᑭᓕᐊᖅᑕᐃᓐᓇᕆᓗᒋᑦ ᒪᓕᒐᓕᐅᖅᑏᑦ ᐊᐃᕙᓂᖏᑦ. ᓇᕿᑕᐅᓯᒪᑐᐃᓐᓇᖅᑐᐃᑦ ᐅᖃᐅᓯᐅᓪᓗᐊᑕᖅᑐᑦ. ᐅᖃᖅᑕᐅᒃᑲᓂᖅᑐᒥᒃ ᐊᓯᐊᑎᒍᓪᓘᓐᓃᑦ ᓲᕐᓗ ᓇᓗᓇᐃᖅᑕᐅᔪᖃᒃᑲᓐᓂᕆᐊᖃᖅᐸᑦ ᐋᖅᑭᒋᐊᖅᑕᐅᔪᓐᓇᖅᑐᑦ ᑭᓇᑐᐃᓐᓇᖅ ᒪᓕᒐᓕᐅᕐᕕᒻᒥ ᑲᑎᒪᔾᔪᑎᓂᑦ ᐅᖃᓕᒫᖅᑐᑦ ᓱᖅᑯᐃᒪᓂᐊᕐᒪᑦ ᐅᖃᖅᑕᒥᓂᕐᒥᒃ. ᑲᑎᒪᐅᑎᒥᓂᓕᕆᔪᑦ ᐅᖃᓕᒫᕋᓐᓂᑦᑎᑦᓯᔭᕆᐊᓖᑦ ᐊᔾᔨᒌᑉᐸᓐᖏᒻᒪᑎᒃ ᐅᖃᖅ ᑕᐅᔪᖅ ᑎᑎᕋᖅᓯᒪᔪᕐᓗ. ᐊᐃᕙᔾᔪᑎᒥᓃᑦ, ᓯᑎᐱᕆ 20, 1983, ᒪᑉᐱᑐᒐᖓ 27299. ᐴᓯᔅᓂᐅᑉ 6-ᖓᓐᓂᒃ ᓇᕿᑕᐅᔾᔪᑎᖓ, ᑎᓕᓯᔾᔪᑎᒃ 55

ᓄᓇᕗᑦ ᒪᓕᒐᓕᐅᕐᕕᖓ ᐅᖃᖅᑎ ᐊᖓᔪᖅᑳᖅ ᑕᐃᕕᑎ ᔪᐊᓇᓯ (ᕿᑭᖅᑖᓘᑉ ᓂᒋᐊ) ᐊᐅᓚᑦᑎᔩᑦ ᐊᓪᓚᑦᑎᐅᑲᐃᓐᓇᖅᑐᖅ ᐊᓪᓚᑦᑎᐅᑉ ᑐᓪᓕᐊ ᓯᑏᕙᓐ ᐃᓄᒃᓱᒃ ᕙᓐᑎ ᐱᐊᓐᔅ ᐊᓪᓚᑦᑎᐅᑉ ᐃᑲᔪᖅᑎᖓ ᖂᔪ ᓄᓱᑦᑕᖅ ᒪᓕᒐᓕᕆᔨ ᒪᐃᑯᓪ ᓵᓐᑐᓗ ᐃᖅᓱᖅᑎ ᒪᓕᒃᑐ ᓄᓱᑦᑕᖅ ᑲᑎᒪᐅᑎᓂᒃ ᐋᖅᑭᒃᓱᐃᔩᑦ ᐅᖃᐅᓯᕐᒥᒃ ᐅᖃᐅᓯᕐᒧᑦ ᑎᒥᖓᑦ ᑎᑎᖅᑲᒃᑯᕕᒃ 1200 ᐃᖃᓗᐃᑦ, ᓄᓇᕗᑦ X0A 0H0 ᐅᖄᓚᐅᑖ (867) 975-5000 ᓱᒃᑲᕈᑖ (867) 975-5190 ᐊᑭᖃᓐᖏᑦᑐᖅ (877) 334-7266 ᐊᖓᔪᖅᑳᖅ ᒍᐊᐃᓐ Hᐄᓕ ᐊᕿᐊᕈᖅ (ᐃᖃᓗᐃᑦ−ᒪᓂᕋᔭᒃ) ᒥᓂᔅᑕ ᐃᓄᓕᕆᔨᒃᑯᓐᓄᑦ;ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᑦ; ᒥᓂᔅᑕ ᑲᒪᒋᔭᖃᖅᑐᖅ ᐊᖏᕐᕋᖃᖏᓐᓂᕐᒥᒃ; ᒥᓂᔅᑕ ᑲᒪᒋᔭᖃᖅᑐᖅ ᐊᒃᖢᓂᕐᒥᒃ ᒥᒃᖠᒋᐊᖅᑎᑦᑎᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᐊᕐᓇᐃᑦ ᑲᑎᒪᔨᖏᓐᓂᒃ; ᐊᖓᔪᖅᑳᖅ ᑕᐃᕕᑎ ᐊᕿᐊᕈᖅ (ᐃᖃᓗᐃᑦ-ᓂᐊᖁᙴ) ᒐᕙᒪᒃᑯᑦ ᓯᕗᒃᑲᖅᑕᖅᑎᖓ; ᒥᓂᔅᑕ ᐃᓕᓐᓂᐊᖅᑐᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᒃ ᕼᐋᓇ ᐊᖑᑎᐊᓗᒃ (ᐊᐃᕕᓕᒃ) ᐃᐊᑦᕗᑦ ᐊᑕᒍᑦᑖᓗᒃ (ᐊᒡᒍ) ᐊᖓᔪᖅᑳᖅ ᔮᓂᑦ ᐳᕉᔅᑐ (ᐃᖃᓗᐃᑦ-ᓯᓈ) ᒥᓂᔅᑕ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐊᖓᔪᖅᑳᖅ ᔪᐊᔾ Hᐃᒃᔅ (ᐃᖃᓗᐃᑦ-ᑕᓯᓗᒃ) ᓄᓇᕗᒻᒧᑦ ᓯᕗᓕᖅᑎᐅᑦ ᑐᖓᓕᖓ; ᒥᓂᔅᑕ ᒪᓕᒐᓕᕆᓂᕐᒧᑦ; ᒥᓂᔅᑕ ᐃᖏᕐᕋᔪᓕᕆᓂᕐᒧᑦ ᒪᑭᒪᐅᑎᓄᓪᓗ; ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᓇᐃᔭᖅᑐᓕᕆᓂᕐᒧᑦ ᑲᑎᒪᔨᓂᒃ; ᒥᓂᔅᑕ ᑲᒪᒋᔭᖃᖅᑐᖅ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᓂᒃ ᔭᐃᒥ ᖃᑉᓗᑦᓯᐊᖅ (ᐊᕐᕕᐊᑉ ᓂᒋᐊ) ᕗᕆᐊᑦ ᐲᑕᓴᓐ (ᐃᖃᓗᒃᑑᑦᑎᐊᖅ) ᒍᐊᑕᓐ ᑲᐅᑕᒃ (ᐅᖅᑯᒻᒥᐅᑦ) ᐊᖓᔪᖅᑳᖅ ᐳᕋᐃᔭᓐ ᑯᓄ (ᑐᓄᓂᖅ) ᒥᓂᔅᑕ ᐃᓕᖅᑯᓯᓕᕆᔨᒃᑯᑦ; ᒥᓂᔅᑕ ᐅᖃᐅᓯᓕᕆᓂᕐᒧᑦ; ᒥᓂᔅᑕ ᐊᕙᑎᓕᕆᓂᕐᒧᑦ; ᒥᓂᔅᑕ ᐆᒻᒪᖅᑯᑎᓕᕆᓂᕐᒧᑦ ᓴᐃᒪᓐ ᖁᓕᒃᑖᓇ (ᖁᕐᓗᖅᑑᖅ) ᐊᖓᔪᖅᑳᖅ ᓯᓯᐅᓪ ᓂᐅᓪᕙᓇ ᓚᐃᔪᓪ (ᓇᑦᓯᓕᒃ) ᒥᓂᔅᑐ ᑲᒪᒋᔭᖃᖅᑐᖅ ᓄᓇᕘᑉ ᐃᒡᓗᓕᕆᔨᕐᔪᐋᒃᑯᖏᓂ ᐊᖓᔪᖅᑳᖅ ᐋᕐᓗᒃ ᒪᐃᓐ (ᐊᕐᕕᐊᑉ ᐅᐊᓐᓇᖓ-ᑎᑭᕌᕐᔪᐊᖅ) ᓯᕗᓕᖅᑎ ᓄᓇᕗᒻᒥ; ᒥᓂᔅᑕ ᓯᕗᓕᖅᑎᓄᑦ ᒐᕙᒪᐅᖃᑎᒌᒃᑐᓕᕆᔨᒃᑯᓐᓄᓪᓗ; ᒥᓂᔅᑕ ᑮᓇᐅᔭᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᓄᓇᖃᖅᑳᖅᓯᒪᔪᓕᕆᓂᕐᒥᒃ; ᒥᓂᔅᑕ ᑲᒪᒋᔭᖃᖅᑐᖅ ᑲᓇᑕᐅᑦ ᓯᓚᑖᓃᖖᒑᖅᑐᓄᑦ; ᒥᓂᔅᑕ ᑲᒪᒋᔭᖃᖅᑐᖅ ᐆᒻᒪᖅᑯᑎᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑦ; ᒥᓂᔅᑕ ᑲᒪᒋᔭᖃᖅᑐᖅ ᐃᓐᓇᕐᓂᒃ; ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓐᓇᖅᑐᓕᕆᓂᕐᒧᓪᓗ ᑲᒥᓴᓐ; ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓐᓇᖅᑐᓕᕆᓂᕐᒧᓪᓗ ᑲᑎᒪᔨᖏᓐᓄᑦ; ᔮᓂ ᒪᐃᒃ (ᐸᓐᓂᖅᑑᖅ) ᑕᐃᕕᑦ ᐳᐊᑐ (ᐅᖅᓱᖅᑑᖅ) ᐊᐃᕝᕙᓚᕼᐋ ᖃᒪᓂᖅ (ᐊᒥᑦᑐᖅ) ᐃᓄᖃᕈᓐᓃᖅᑐᖅ (ᑕᓯᐅᔭᕐᔪᐊᖅ) ᐋᓕᒃᓵᓐᑐ ᓴᒻᒧᖅᑐᖅ (ᑲᖏᖅᖠᓂᐅᑉ ᐅᐊᓐᓇᖓ-ᐃᒡᓗᓕᒑᕐᔪᒃ) ᐃᓐᓇᖓᔪᖅ ᖂᑭᐊᖅ (ᓇᑦᓯᓕᒃ) ᐋᓕᒃᓵᓐᑐ ᓴᒻᒧᖅᑐᖅ (ᑲᖏᖅᖠᓂᐅᑉ ᐅᐊᓐᓇᖓ-ᐃᒡᓗᓕᒑᕐᔪᒃ) ᐊᖓᔪᖅᑳᖅ ᑯᕋᐃᒃ ᓯᒪᐃᓚᒃ (ᖃᒪᓂᑦᑐᐊᖅ) ᒥᓂᔅᑕ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᖅᑎᒃᑯᑦ; ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐊᑐᖅᑐᐊᕐᕕᒃ; ᒥᓂᔅᑕ ᑲᒪᒋᔭᖃᖅᑐᖅ ᐅᔭᕋᖕᓂᐊᕐᓂᕐᒧᑦ; ᒥᓂᔅᑕ ᑕᐅᖅᓯᕋᕐᓂᕐᒥᒃ ᐱᓕᕆᐊᒃᓴᓕᒃ; ᐊᖓᔪᖅᑳᖅ ᐋᓂ ᑕᑦᑐᐃᓂ (ᑲᖏᖅᖠᓂᐅᑉ ᓂᒋᐊ) ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᓇᐃᔭᖅᑐᓕᕆᓂᕐᒧᑦ; ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᐊᒻᒪ ᓇᓪᓕᐊᒃᑯᒫᓂᒃ ᖃᐅᔨᓴᖅᑏᑦ ᓯᑏᕙᓐ ᑕᖅᑐ (ᖁᑦᑎᒃᑐᕐᒃ)

ᖃᕋᓴᐅᔭᑎᒍᑦ ᑐᕌᕈᑎᖓᑦ: www.assembly.nu.ca

ᐃᓗᓕᖏᑕ ᓇᓕᖅᑲᖏᑦ ᑐᒃᓯᐊᕐᓂᕐᒧᑦ ᒪᑐᐃᖅᑕᐅᓂᖓ ............................................................................................................................................... 1 ᐊᖓᔪᖅᑳᑦ ᐅᖃᐅᓯᖏᑦ .......................................................................................................................................................... 1 ᒪᓕᒐᓕᐅᖅᑏᑦ ᐅᖃᐅᓯᖏᑦ .................................................................................................................................................... 7 ᑭᐅᔾᔪᑎᑦ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᓄᑦ ..................................................................................................................... 8 ᐅᖃᐅᓯᒃᑯᑦ ᐊᐱᖅᑯᑎᑦ ......................................................................................................................................................... 10 ᐅᓂᒃᑳᖏᑦ ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᓪᓗ ᒪᓕᒐᒃᓴᓄᑦ ᐊᓯᖏᓄᓪᓗ ......................................................... 20 ᓴᖅᑭᑕᐅᓂᖏᑦ ᑎᑎᖅᑲᐃᑦ................................................................................................................................................... 20 ᑲᑎᒪᔨᕋᓛᑦ ᑲᑎᒪᑐᐃᓐᓇᖅᑎᓪᓗᒋᑦ ᐃᓱᒪᒃᓴᖅᓯᐅᖅᑕᐅᓂᖏᑦ ᒪᓕᒐᒃᓴᐃᑦ ᐊᓯᖏᓪᓗ ............................................. 20 ᑲᑎᒪᔨᕋᓛᑦ ᑲᑎᒪᑐᐃᓐᓇᓚᐅᖅᑎᓪᓗᒋᑦ ᐅᓂᒃᑳᖓᑦ ....................................................................................................... 37 ᑲᑎᒪᔾᔪᑎᒃᓴᐃᑦ ....................................................................................................................................................................... 38

ᐃ. ᖃᐅᑕᒫᒧᑦ ᖃᐅᔨᒋᐊᕈᑎᑦ ᐱᖓᔪᐊ, ᔫᓂ 03, 2026 ...................................................................................................................................................... 1 ᐅ. ᐊᖓᔪᖅᑳᑦ ᐅᓂᒃᑳᖏᑦ 56 - 7(2): ᐱᓕᒻᒪᒃᓴᕐᓂᒻᒧᑦ ᒪᑐᐃᕈᑎᔪᑦ ᐸᐃᑉᐹᖃᕆᐊᓕᑦ ᓴᓇᔨᒃᓴᖏᓄᑦ (ᕼᐃᓕ-ᐊᕿᐊᕈᖅ) ............................... 1 57 - 7(2): ᑐᒡᓕᕆᔭᕗᑦ ᐃᓕᓐᓂᐊᖅᑎᓐ ᐃᖅᑲᓇᐃᔮᖏᓄᑦ (ᑕᑦᑐᐃᓂ) ....................................................................... 2 58 - 7(2): ᐊᕐᕌᒍᒧᑦ ᓄᑖᕈᐃᔾᔪᑎᐅᔪᑦ ᐊᑎᓕᐅᒐᕐᒥᑦ ᑐᑭᓯᐅᒪᖃᑎᒌᖕᓂᕐᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓂᒃ (ᕼᐃᓕ-ᐊᕿᐊᕈᖅ) .......................................................................................................................... 3 59 - 7(2): ᐅᓇᑕᖅᑐᒃᓴᓕᕆᔨᒃᑯᑦ ᐱᓕᕆᕝᕕᐊ ᐃᑲᔪᖅᓱᐃᓂᖏᑦ ᓄᓇᕘᑉ ᒥᑦᑕᕐᕕᖏᓄᑦ ᐱᔭᒃᓴᑦᑎᓐᓂᒃ (ᕼᐃᒃᔅ) ............................................................................................................................................................................................ 4 60 - 7(2): ᓄᓇᕗᑦ-ᑲᓛᖠᑦ ᓄᓈ ᐃᑎᔪᒧᑦ ᐃᒪᐃᓐᒻᓇᕐᒥ ᐃᖃᓗᒐᓱᖕᓂᕐᒧᑦ ᖃᐅᔨᒪᓂᑦ ᑕᐅᖅᓰᔭᖅᑕᐅᓂᖏᓄᑦ (ᓯᒪᐃᓚᒃ) .......................................................................................................................................................................... 4 61 - 7(2): ᐊᖏᓕᒋᐊᕆᓂᖅ ᐃᓄᖕᓂᑦ ᐃᖅᑲᓇᐃᔭᖅᑎᖃᓐᓂᖅ ᖁᓪᓕᖅ ᐆᒻᒪᖅᑯᑎᓕᕆᔨᑦ ᑎᒥᖓᓂᒃ (ᕼᐃᓕ- ᐊᕿᐊᕈᖅ) ......................................................................................................................................................................... 6 ᐊ. ᒪᓕᒐᓕᐅᖅᑏᑦ ᐅᓂᒃᑳᖏᑦ 61 - 7(2): ᓗᐊᕋ ᒐᐅᑦᑎᔭᐃ ᐊᖅᓴᖅᑐᓐ ᕚᓕᐸᓪ ᐊᑭᑦᑐᕋᐅᑎᓂᐊ (ᑕᑦᑐᐃᓂ).......................................................... 7 62 - 7(2): ᓯᐅᓪᕕᔭ ᒍᕆᓂᐅᓪ ᒥᕐᖑᐃᖅᓯᕝᕕᕋᓛᖓ (ᐲᑕᓴᓐ) ...................................................................................... 7 ᐱ. ᑭᐅᔾᔪᑏᑦ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᓄᑦ 42– 7(2): ᐱᔪᓐᓇᐅᑏᓐ ᓅᑎᖅᑕᐅᓂᖏᓄᑦ (ᑕᑦᑐᐃᓂ) .................................................................................................. 8 45– 7(2): ᒪᓕᒐᓄᑦ ᐱᔨᑦᑎᖅᑕᓄᑦ ᑲᑎᒪᔨᖏᑦ (ᕼᐃᒃᔅ) .................................................................................................. 8 66– 7(2): ᐃᓐᓇᑐᖃᓄᑦ ᐸᖅᑭᔭᐃᕝᕕᑦ ᐃᒡᓗᕐᔪᐊᖏᓄᑦ (ᐳᕉᔅᑐ) .................................................................................. 8

34– 7(2): ᐱᓕᕆᓂᖏᑦ ᓄᓇᕘᑉ ᐃᒡᓗᓕᕆᔨᕐᔪᐊᒃᑯᑦ ᑎᒥᖓᑕ (ᓚᐃᔪᓪ) ................................................................... 9 ᐳ. ᐅᖃᐅᓯᒃᑯᑦ ᐊᐱᖅᑯᑎᑦ 78 – 72): ᑭᒃᑯᓕᒫᓄᑦ ᐊᒻᒪ ᖁᑭᐅᑎᓄᑦ ᐅᓗᕆᐋᓇᔾᔭᐃᒃᑯᑎᓄᑦ (ᑲᐅᑐᖅ) ............................................................. 10 79 – 72): ᐃᓐᓇᑐᖃᓄᑦ ᐸᖅᑭᔭᐃᕝᕕᑦ ᐃᒡᓗᕐᔪᐊᖏᓄᑦ (ᐊᑕᒍᑦᑖᓗᒃ) ...................................................................... 12 80 – 72): ᒥᑦᑕᕐᕕᑦᑎᓐᓂ ᐱᖁᑎᕐᔪᐋᖏᓄᑦ (ᖁᓕᒃᑖᓇ) ............................................................................................. 14 81 – 72): ᓄᓇᕘᑉ ᒥᕐᖑᐃᖅᓯᕝᕕᕋᓛᖏᓄᑦ (ᐲᑕᓴᓐ) ................................................................................................... 15 82 – 72): ᐋᓐᓂᐊᕕᓕᐊᖅᐸᒃᑐᓐ ᐊᐅᓪᓛᕈᑎᖏᓄᑦ (ᐊᖑᑎᐋᓗᒃ) .............................................................................. 16 83 – 72): ᐱᓕᕆᕝᕕᑦ ᐱᖁᑎᔾᔪᐋᖏᑦ ᐊᕐᕕᐋᓂᑦ (ᖃᑉᓗᑦᓯᐊᖅ) ............................................................................... 18 ᑭ. ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᓪᓗ ᒪᓕᒐᒃᓴᓂᑦ ᐊᓯᖏᓐᓂᓪᓗ ᐅᓂᒃᑳᖏᑦ ᑲᑎᒪᔨᕋᓛᑦ ᐅᓂᒃᑳᖓ 2 – 7(2): ᒪᓕᒐᒃᓴᖅ 4, ᒪᓕᒐᖅ ᐋᖅᑭᒋᐊᕆᔾᔪᑎᖓᓄᑦ ᐃᓐᑲᒪᑖᒃᔅᓄᑦ ᒪᓕᒐᓂᒃ (ᖃᑉᓗᑦᓯᐊᖅ) .................................................................................................................................................................. 20 ᑯ. ᓴᖅᑭᑕᐅᓂᖏᑦ ᑎᑎᖅᑲᐃᑦ 27 - 7(2): ᑎᑎᖅᑲᖓ ᒥᓂᔅᑑᑉ ᐋᓐᓂᐊᖅᑐᓕᕆᔨᒃᑯᑦ ᑭᖑᓂᐊᑕ ᑲᑎᒪᔨᑐᐃᓐᓇᐃᑦ ᕿᒥᕐᕈᔭᖃᓚᐅᖅᑎᓪᓗᒋᑦ 2026+-2027 ᓇᓚᐅᑦᑖᖅᑕᓄᑦ ᐊᑐᖅᑐᒃᓴᑦ ᑮᓇᐅᔭᖅᑑᑎᒃᓴᖏᑦ ᐱᓕᕆᕝᕕᐊ ᐋᓐᓂᐊᖅᑐᓕᕆᔨᒃᑯᑦ (ᐲᑕᓴᓐ) .......................................................................................................................................................................................... 20 ᑲ. ᒪᓕᒐᒃᓴᐃᑦ ᒪᓕᒐᒃᓴᖅ 1 - ᑮᓇᐃᔭᑦ ᐊᑐᖅᑕᐅᑲᐃᓐᓇᕐᓂᐊᖅᑐᑦ (ᐊᐅᓚᔾᔪᑏᑦ ᐋᖅᑭᐅᒪᐃᓐᓇᕈᑏᓪᓗ) ᒪᓕᒐᖅ, 2026-2027 – ᑲᑎᒪᔨᕋᓛᓄᑦ ᐃᓱᒪᒃᓴᖅᓯᐅᖅᑕᐅᓂᖓ ................................................................................................................. 21

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 1 ᐃᖃᓗᐃᑦ, ᓄᓇᕗᑦ ᐱᖓᔪᐊ, ᔫᓂ 03, 2026 ᒪᓕᒐᓕᐅᖅᑏᑦ ᐅᐸᒃᑐᑦ: ᐊᖓᔪᖅᑳᖅ ᒍᐃᐊᓐ ᕼᐄᓕ−ᐊᕿᐊᕈᖅ, ᒥᔅ ᕼᐋᓇ ᐊᖑᑎᐊᓗᒃ, ᒥᔅᑕ ᐃᐊᑦᕗᑦ ᐊᑕᒍᑦᑖᓗᒃ, ᐊᖓᔪᖅᑳᖅ ᔮᓂᑦ ᐱᑦᓯᐅᓛᖅ, ᐊᖓᔪᖅᑳᖅ ᔪᐊᔾ ᕼᐃᒃᔅ, ᐊᖓᔪᖅᑳᖅ ᑕᐃᕕᑎ ᔪᐊᓇᓯ, ᐊᖓᔪᖅᑳᖅ ᒍᐊᑕᓐ ᑲᐅᑐᒃ, ᐊᖓᔪᖅᑳᖅ ᐳᕋᐃᔭᓐ ᑯᓄᒃ; ᒥᔅᑕ ᓴᐃᒻᒪ ᑯᓕᒃᑖᓇ, ᐊᖓᔪᖅᑳᖅ ᓯᓯᐅᓪ ᓂᐅᓪᕚᓇ ᓚᐃᔪᓪ, ᐊᖓᔪᖅᑳᖅ ᐋᕐᓗᒃ ᒪᐃᓐ, ᒥᔅᑕ ᔮᓂ ᒪᐃᒃ, ᒥᔅᑕ ᕗᕆᐊᑦ ᐲᑕᓴᓐ, ᒥᔅᑕ ᑕᐃᕕᑦ ᐳᐊᑐ, ᒥᔅᑕ ᐊᐃᕙᓚᕼᐋᒻ ᖃᒪᓂᖅ, ᒥᔅᑕ ᑖᓂᐅᓪ ᖃᕝᕕᒃ, ᒥᔅᑕ ᐋᓕᒃᓵᓐᑐ ᓴᒻᒧᖅᑐᖅ, ᒥᔅᑕ ᓯᑏᕙᓐ ᑕᖅᑐ, ᐊᖓᔪᖅᑳᖅ ᐋᓂ ᑕᑦᑐᐃᓂ. >>ᑲᑎᒪᓯᒋᐊᖅᑐᑦ 13:29 ᑲᑎᒪᔾᔪᑎᒃᓴᖅ 1: ᑐᒃᓯᐊᕐᓂᕐᒧᑦ ᒪᑐᐃᖅᑕᐅᓂᖓ ᐅᖃᖅᑎ: ᑲᑎᒪᔾᔪᑎᑦᑕ ᓈᓴᐅᑎᖓ 1. ᑐᒃᓯᐊᕐᓂᒃᑯᑦ ᒪᑐᐃᖅᓯᓂᖅ. ᒥᔅᑕ ᐊᑕᒍᑦᑖᓗᒃ, ᐱᒋᐊᕈᑎᒋᓚᐅᕐᓗᒍ ᑐᒃᓯᐊᕐᓂᒃᑯᑦ. >>ᑐᒃᓯᐊᖅᑐᑦ ᐅᖃᖅᑎ: ᐃᖏᓪᓗᓯ. ᖁᔭᓐᓇᒦᒃ, ᒥᔅᑕ ᐊᑕᒍᑦᑖᓗᒃ. ᐅᓪᓗᒃᑯᑦ ᓄᓇᕗᒻᒥᐅᑦ, ᒪᓕᒐᓕᐅᖅᑏᑦ, ᑕᓚᕖᓴᒃᑯᓪᓗ ᑕᑯᓐᓇᖅᑐᐃᑦ, ᓈᓚᐅᑎᒃᑯᓪᓗ ᑐᓵᔪᑦ. ᑐᙵᓱᒋᑦᓯ ᒪᓕᒐᓕᐅᕐᕕᐅᑉ ᐱᖓᑦᓯᕐᒥ ᑲᑎᒪᓂᕆᔭᖓ ᐊᒻᒪᓗ ᐱᒋᐊᓚᐅᙱᓐᓂᑦᑎᓐᓂᒃ ᐃᖅᑲᐅᒪᖃᑎᒋᑦᓯᐊᕆᕙᒃᑲᑦᑕᐅᖅ ᐃᓚᙵᕋᑖᖅᑐᑦ ᑭᙵᕐᓂ, ᐃᓚᒌᒃᑐᐃᑦ ᐃᓱᒪᒋᑦᓯᐊᖅᐸᕗᑦ. ᑲᑎᒪᔾᔪᑎᑦᑖ ᓈᓴᐅᑎᖓ 2. ᒥᓂᔅᑕᐃᑦ ᐅᖃᐅᓯᖏᑦ. ᐃᓄᓕᕆᔨᒃᑯᓐᓄᑦ ᒥᓂᔅᑕ ᕼᐄᓕ ᐊᕿᐊᕈᖅ. ᑲᑎᒪᔾᔪᑎᒃᓴᖅ 2: ᐊᖓᔪᖅᑳᑦ ᐅᖃᐅᓯᖏᑦ ᐊᖓᔪᖅᑳᑉ ᐅᖃᐅᓯᖓ 56 - 7(2): ᐱᓕᒻᒪᒃᓴᕐᓂᒻᒧᑦ ᒪᑐᐃᕈᑎᔪᑦ ᐸᐃᑉᐹᖃᕆᐊᓕᑦ ᓴᓇᔨᒃᓴᖏᓄᑦ (ᕼᐃᓕ-ᐊᕿᐊᕈᖅ) ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᐅᓪᓗᒥ ᓇᓗᓇᐃᖅᓯᔪᒪᕗᖓ ᐃᓚᖏᓐᓂᒃ ᐊᔪᕈᓐᓃᖅᓴᒐᒃᓴᓂᑦ ᒪᓂᒪᑎᑕᐅᔪᓂᒃ ᓄᓇᕗᒻᒥᐅᓄᑦ ᐊᔪᕈᓐᓃᖅᑕᐅᕙᒃᑐᓄᑦ ᓴᓇᔪᓕᕆᓂᕐᒧᑦ. ᓄᓇᕗᓕᒫᒥ, ᐃᓄᐃᑦ ᐊᔪᙱᓐᓂᕐᒥᓂᒃ ᐊᑐᖅᖢᑎᒃ ᓄᓇᖅᑲᑎᒥᓄᑦ ᐱᓕᕆᑎᑦᑎᓪᓗᑎᒃ. ᕿᔪᓕᕆᔨ ᐃᒡᓗᒥᒃ ᐊᕙᓗᓕᐅᖅᑐᖅ ᓄᓇᖓᓂ. ᐅᐊᔭᓕᕆᔨ ᐅᐊᔭᓕᖅᓱᐃᔪᖅ ᐃᓕᓐᓂᐊᕐᕕᖕᒥ ᕿᑐᕐᖓᖏᑕ ᐅᐸᖃᑦᑕᖅᑕᖏᓐᓂᑦ. ᓱᓪᓗᓕᕆᔨ ᖃᓂᒋᔭᖓᑕ ᐃᒡᓗᖓᓂ ᐅᖅᑰᑎᑦᑎᕙᒃᖢᓂ ᐅᑭᐅᒃᑯᑦ. ᑖᒃᑯᐊ ᐱᓕᕆᐊᒃᓴᑦ ᓄᓇᕗᒻᒥᐅᓄᑦ ᐊᖅᑯᑎᒋᔭᐅᔪᓐᓇᖅᐳᑦ ᐃᖅᑲᓇᐃᔮᒃᓴᑦᑎᐊᕙᖕᒧᑦ, ᑮᓇᐅᔭᓕᐅᑦᑎᐊᕐᓗᑎᒃ, ᐊᒻᒪ ᐅᐱᒍᓱᑦᑎᐊᕐᓗᑎᒃ ᑕᑯᔭᕆᐊᒃᓴᖅ ᐱᓕᕆᐊᖏᓐᓂᑦ ᓄᓇᑦᑎᓐᓂ. ᐊᐃᕆᓕ 2026−ᒥ ᐱᒋᐊᖅᖢᓂ, 102 ᐃᓕᓐᓂᐊᖅᐸᓪᓕᐊᓪᓗᑎᒃ ᐃᖅᑲᓇᐃᔮᖅᑖᕋᓱᒃᑐᑦ ᐊᒻᒪ 12 ᓴᓇᔪᓕᕆᓂᕐᒧᑦ ᐊᔪᙱᔾᔪᑎᓖᑦ ᐊᑎᓕᐅᖅᑕᐅᓯᒪᔪᑦ 12−ᓂ ᓇᓗᓇᐃᖅᑕᐅᓯᒪᔪᓂ ᐃᖅᑲᓇᐃᔮᓂ ᓄᓇᕗᒻᒥ, ᐃᓚᒋᔭᐅᓪᓗᑎᒃ ᕿᔪᓕᕆᓂᖅ, ᐅᐊᔭᓕᕆᓂᖅ, ᐅᖁᒪᐃᑦᑐᓕᕆᓂᖅ, ᐃᒡᓗᓂᒃ ᐋᖅᑭᐅᒪᑎᑦᑎᓂᖅ, ᐅᖅᑰᓴᐅᑎᓕᕆᓂᖅ, ᐊᒻᒪ ᓱᓪᓗᓕᕆᓂᖅ. ᑕᐃᒃᑯᓄᖓᓗ ᐃᖅᑲᓇᐃᔭᓚᐅᖅᓯᒪᙱᑦᑐᓄᑦ ᓴᓈᖅᑖᕈᓐᓇᖅᓯᓂᕐᒧᑦ ᓯᕗᓂᐊᓂ, ᐊᔪᙱᓐᓂᖃᖅᑐᓄᑦ ᓴᓇᔪᓕᕆᓂᕐᒧᑦ ᐱᓕᕆᔨᐅᓂᕐᒧᑦ ᐱᓕᕆᐊᖑᕙᒃᑐᖅ ᒪᓂᒪᑎᑦᑎᕙᒃᐳᖅ ᐱᒋᐊᕐᕕᐅᔪᓐᓇᖅᑐᒥᒃ, ᓇᓗᓇᙱᑦᑎᐊᖅᑐᒥᒃ ᐊᖅᑯᑎᖃᖅᖢᑎᒃ ᓴᓇᔪᓕᕆᓂᕐᒧᑦ ᐊᔪᕈᓐᓃᖅᓴᒃᑲᓐᓂᕐᓂᕐᒧᑦ ᐅᕝᕙᓘᓐᓃᑦ ᐃᓕᓐᓂᐊᕐᓂᕐᒥᒃ ᐃᖅᑲᓇᐃᔮᒃᓴᒧᑦ ᓴᓇᔨᐅᓂᕐᒧᓪᓘᓐᓃᑦ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 2 ᐃᒡᓗᓕᐅᕐᓂᕐᒧᑦ ᓴᓇᔨᕈᕆᐅᖅᓴᓂᖅ ᑖᓐᓇᑐᐊᖑᙱᓚᖅ. ᐅᔭᕋᖕᓂᐊᕐᓂᖅ ᓄᓇᕗᒻᒥ ᐃᖅᑲᓇᐃᔭᖅᑎᑦᑎᔨᑦᑎᐊᕙᐅᓛᖑᖃᑕᐅᕗᖅ ᐃᖏᕐᕋᔾᔪᑕᐅᕐᔪᐊᖅᐸᒃᖢᓂᓗ ᒪᑭᒪᔾᔪᑎᒃᓴᑦᑎᓐᓄᑦ, ᐱᕕᒃᓴᐃᓪᓗ ᑖᒃᑯᓇᓂ ᐱᓕᕆᕝᕕᖕᓂ ᐅᓄᖅᓯᕙᓪᓕᐊᓪᓗᑎᒃ. ᑕᖅᑭᐅᓚᐅᖅᑐᒥ ᐃᖃᓗᖕᓂ ᑲᑎᒪᑎᑦᑎᓚᐅᕐᒪᑕ ᓄᓇᕗᒻᒥ ᐅᔭᕋᖕᓂᐊᕐᓂᕐᒧᑦ ᑲᑎᒪᕕᒡᔪᐊᕐᓂᕐᒥᑦ. ᑲᒪᒋᓪᖢᒋᑦ ᖃᐅᔨᒪᔭᐅᒋᐊᓕᑦ ᓄᓇᕗᒻᒥᐅᑦ ᐊᑐᕈᓐᓇᕋᓗᐊᕐᒪᖔᑕ ᐊᔪᕈᓐᓃᖅᓴᒐᒃᓴᓂᒃ ᓇᓗᓇᐃᒃᑯᑕᖅᑖᕆᔭᐅᕙᒃᑐᓂᒡᓗ ᐱᔭᐅᔭᕆᐊᓕᖕᓂᑦ ᐊᑭᓕᖅᓱᖅᑕᐅᑦᑎᐊᖅᑐᓄᑦ ᐃᖅᑲᓇᐃᔮᓄᑦ ᑕᒪᒃᑯᓄᖓ ᐊᐅᓚᑦᑎᓂᕆᔭᐅᕙᒃᑐᓄᑦ. ᑲᑐᔾᔨᖃᑎᒌᖕᓂᒃᑯᑦ ᐃᓄᓕᕆᔨᒃᑯᑦ ᐱᓕᒻᒪᒃᓴᐃᔨᓪᓗ, ᓴᖅᑭᑦᑎᓯᒪᕗᒍᑦ ᐅᔭᕋᖕᓂᐊᕐᓂᕐᒧᑦ ᐃᓕᓐᓂᐊᒐᒃᓴᓂᑦ: ᓄᓇᐅᑉ ᐊᑖᓂ ᐃᓕᓐᓂᐊᖅᑎᑦᑎᓂᕐᒧᑦ ᐊᒡᓃᑯ ᐄᒍᓪ ᐅᔭᕋᖕᓂᐊᕐᕕᖕᒥᑦ; ᓄᓇᐅᑉ ᐃᑭᐊᖓᓂ ᐅᔭᕋᖕᓂᐊᖅᑎᐅᓂᕐᒧᑦ ᐃᓕᓐᓂᐊᒐᒃᓴᖅ ᐊᕈᐊᕋ ᓯᓚᑦᑐᖅᓴᕐᕕᒃᑎᒍᑦ ᓄᓇᑦᑎᐊᒥ; ᖁᕝᕙᓯᖕᓂᓕᖕᒥᒃ 3−ᒥᒃ ᐳᓪᓚᓕᖕᓄᑦ ᓄᖅᑲᖅᑕᐅᑎᓕᖕᓄᑦ ᐊᔪᕈᓐᓃᖅᓴᕐᓂᖅ ᐊᕐᕕᐊᓂ; ᐅᖁᒪᐃᑦᑐᓂᒃ ᐊᖁᒋᐅᖅᓴᓂᕐᒧᑦ ᐊᔪᕈᓐᓃᖅᓴᕐᓂᖅ 9−ᓂ ᓄᓇᓕᖕᓂ; ᐊᒻᒪᓗ ᐱᒋᐊᓕᓵᖅᑎᓪᓗᒋᑦ ᐊᐅᓚᐅᓯᕆᔨᐅᓂᕐᒧᑦ ᐊᔪᕈᓐᓃᖅᓴᖅᑎᑕᐅᔪᑦ 8- ᑲᓐᓂᕐᓂ. ᐱᓕᕆᖃᑎᖃᕐᒥᔪᒍᑦ ᓄᓇᓕᖕᓂ ᐱᔨᑦᑎᖅᑎᓂᑦ ᐊᒻᒪᓗ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᑦ ᐊᑐᓕᖅᑎᑦᑎᕙᓪᓕᐊᓪᓗᑕ ᓄᓇᕗᑦ ᒐᕙᒪᒃᑯᖏᑕ ᐅᔭᕋᖕᓂᐊᕐᓂᕐᒧᑦ ᐃᓕᓐᓂᐊᒐᒃᓴᓂᑦ ᐸᕐᓇᐅᑎᓂᒃ. ᐅᖃᖅᑎᑦᑎᔩ, ᑎᓕᐅᖅᐸᒃᑲ ᑭᒃᑯᑐᐃᓐᓇᑦ ᐃᖅᑲᓇᐃᔮᖃᕈᒪᔪᑦ ᓴᓇᔨᐅᓂᕐᒥᑦ ᖃᐅᔨᒋᐊᖁᓪᓗᒋᑦ ᐃᓄᓕᕆᔨᒃᑯᑦ ᐃᖅᑲᓇᐃᔮᕆᔭᐅᔪᒪᔪᓕᕆᔨᖏᓐᓄᑦ. ᐃᖅᑲᓇᐃᔭᖅᑎᕗᑦ ᐊᑐᐃᓐᓇᐅᕗᑦ ᐃᓕᖕᓂᒃ ᐃᑲᔪᕈᒪᓪᓗᑎᒃ ᓯᕗᓂᒃᓴᕐᓂᒃ ᓇᓂᓯᓇᓱᒡᓗᑎᑦ ᐊᖏᕐᕋᔅᓯᓐᓂ. (ᑐᓵᔨᑎᒎᕈᓐᓂᖅᑐᖅ) ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᑦᑕᑐᖅᑐᑦ ᐅᖃᖅᑎ: ᒥᓂᔅᑕᐃᑦ ᐅᖃᐅᓯᒃᓴᖏᑦ. ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᒥᓂᔅᑕ ᑕᑦᑐᐃᓂ. ᐊᖓᔪᖅᑳᑉ ᐅᖃᐅᓯᖓ 57 - 7(2): ᑐᒡᓕᕆᔭᕗᑦ ᐃᓕᓐᓂᐊᖅᑎᓐ ᐃᖅᑲᓇᐃᔮᖏᓄᑦ (ᑕᑦᑐᐃᓂ) ᐊᖓᔪᖅᑳᖅ ᐋᓂ ᑕᑦᑐᐃᓂ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᓇᓗᓇᐃᖅᓯᔪᒪᓪᓗᖓ ᑐᒡᓕᕆᔭᕗᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐱᓕᕆᐊᖑᕙᒃᑐᖅ - ᐊᕐᕌᒍᓕᒫᖅ ᐱᓕᕆᐊᖑᕙᓪᓕᐊᔪᖅ ᐊᐅᓚᑕᐅᓪᓗᓂ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᐱᑎᑦᑎᕙᒃᖢᓂ ᒪᒃᑯᒃᑐᓂᒃ ᓄᓇᕗᒻᒥᐅᓂᒃ ᑐᑭᖃᑦᑎᐊᖅᑐᒥᒃ, ᐱᓕᕆᓪᓚᑦᑖᕈᓐᓇᖅᑐᒥᒃ ᐃᖅᑲᓇᐃᔭᓕᒻᒪᒃᓴᕐᓂᕐᒥᒃ. ᑐᒡᓕᕆᔭᕗᑦ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐊᒻᒪ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑎᓂᒃ, ᐊᒻᒪᓗᑦᑕᐅᖅ ᐃᓕᓐᓂᐊᖅᑕᒥᓂᒃ ᐊᓂᒍᐃᓵᖅᑐᓂᒃ, ᐱᓕᕆᓪᓚᑦᑖᕐᓗᑎᒃ ᐃᓕᓐᓂᐊᖅᑎᑕᐅᕙᒃᖢᑎᒃ, ᐊᔪᕆᖅᓱᖅᑕᐅᕙᒃᖢᑎᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ, ᐊᑭᓕᖅᓱᖅᑕᐅᑦᑎᐊᖅᐸᒃᖢᑎᒡᓗ. ᐃᑲᔪᖅᐸᒃᐳᖅ ᐃᓚᐅᔪᓂᒃ ᐊᔪᕈᓐᓃᖅᐸᓪᓕᐊᑎᑦᑎᓂᕐᒥᒃ, ᕿᒥᕐᕈᐊᖅᓯᓂᕐᒥᒃ ᐃᖅᑲᓇᐃᔮᕆᓛᕈᒪᔭᒥᓂᒃ, ᓇᓗᖅᑯᑎᙱᓐᓂᖅᓴᐅᓕᕐᓂᕐᒥᒡᓗ ᐃᖅᑲᓇᐃᔭᕐᕕᒋᔭᒥᓂᒃ. ᐊᕐᕌᓂ, 153−ᓂᒃ ᐃᓕᓐᓂᐊᖅᑎᓂᒃ 12−ᓂᒃ ᓄᓇᓕᖕᓂᙶᖅᑐᓂᒃ ᓄᓇᕗᓕᒫᒥ ᐃᓚᐅᔪᖃᓚᐅᖅᐳᖅ ᑕᒪᑐᒪᓂ ᐱᓕᕆᐊᖑᔪᒥ, ᐃᓚᒋᔭᐅᓪᓗᑎᒃ 120−ᖑᓪᓗᑎᒃ ᓄᓇᕗᒻᒥᐅᑦ ᐃᓄᐃᑦ. ᑕᒪᑐᒪᓂ ᐊᕐᕌᒍᒥ, ᐱᓕᕆᐊᖃᖅᐳᒍᑦ ᐅᓄᖅᓯᒋᐊᖅᑎᑦᑎᑐᐃᓐᓇᙱᖦᖢᑕ ᐃᓚᐅᕙᒃᑐᓂᒃ, ᑭᓯᐊᓂᓗᑦᑕᐅᖅ ᐊᖏᒡᓕᒋᐊᖅᑎᑦᑎᔪᒪᓪᓗᑕ ᐱᕕᒃᓴᓂᒃ ᐅᓄᕐᓂᖅᓴᓂ ᓄᓇᓕᖕᓂ ᐊᕕᒃᓯᒪᓂᕐᓂ ᑐᑦᑕᕐᕕᒋᔭᑦᑕ ᓯᓚᑖᓃᑦᑐᓂᒃ. ᐅᖃᖅᑎᑦᑎᔩ, ᑐᒡᓕᕆᔭᕗᑦ ᓴᙱᒃᑎᒋᐊᖅᑎᑦᑎᕗᖅ ᐱᓕᕆᐊᖃᓪᓚᕆᒍᒪᓂᑦᑎᓐᓂᒃ ᑎᑎᕋᖅᓯᒪᓂᓕᒃ 23−ᒧᑦ ᓄᓇᕗᒻᒥ ᐊᖏᖃᑎᒌᒍᑎᒥ ᓯᕗᓪᓕᖅᐸᐅᑦᑎᐅᔾᔨᓂᒃᑯᑦ ᓄᓇᕗᒻᒥ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒥᒃ. ᑎᓕᐅᖅᐸᒃᑲ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᓕᒫᖏᑦ ᑎᒥᖁᑎᓕᒫᖏᓪᓗ ᑖᔅᓱᒥᖓ ᐊᑐᑦᑎᐊᖁᓪᓗᒋᑦ, ᐊᒻᒪᓗ ᑎᓕᐅᖅᐸᒃᑲ ᐃᓕᓐᓂᐊᖅᑏᑦ ᑕᒪᑐᒥᖓ ᐱᒻᒪᕆᐅᔪᒥᒃ ᐊᓪᓗᕆᐊᖁᓪᓗᒋᑦ ᐊᒻᒪᓗ ᐱᓇᓱᐊᖁᓪᓗᒋᑦ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 3 ᐃᓕᓐᓂᐊᖅᑎᖁᑎᕗᑦ ᐃᓱᓕᑦᑎᔪᓪᓗ ᓯᕗᓂᒃᓴᕆᒐᑦᑎᒍᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᓯᕗᓂᒃᓴᑦᑎᓐᓂᓗ ᓯᕗᓕᖅᑎᒃᓴᕆᔭᐅᓪᓗᑎᒃ ᓄᓇᕗᒻᒥ. ᐅᓪᓗᒥ ᑮᓇᐅᔭᖃᖅᑎᖦᖢᑎᒍᑦ, ᐊᑐᖅᐸᒃᐳᒍᑦ ᓴᙱᓂᕆᔭᐅᔪᒧᑦ ᑲᔪᓯᓂᖃᑦᑎᐊᕈᓐᓇᕐᓂᖓᓄᓪᓗ ᐊᕕᒃᓯᒪᓂᕆᔭᑦᑕ ᐊᕐᕌᒍᒐᓴᖕᓄᑦ ᐊᒡᒋᖅᑐᓄᑦ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᑦᑕᑐᖅᑐᑦ ᐅᖃᖅᑎ: ᒥᓂᔅᑕᐃᑦ ᐅᖃᐅᓯᖏᑦ. ᓄᓇᕗᑦ ᓯᓚᑦᑐᓴᕐᕕᒃᑯᓐᓄᑦ ᒥᓂᔅᑕᐅᑲᐃᓐᓇᖅᑐᖅ, ᕼᐄᓕ−ᐊᕿᐊᕈᖅ. ᐊᖓᔪᖅᑳᑉ ᐅᖃᐅᓯᖓ 58 - 7(2): ᐊᕐᕌᒍᒧᑦ ᓄᑖᕈᐃᔾᔪᑎᐅᔪᑦ ᐊᑎᓕᐅᒐᕐᒥᑦ ᑐᑭᓯᐅᒪᖃᑎᒌᖕᓂᕐᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓂᒃ (ᕼᐃᓕ-ᐊᕿᐊᕈᖅ) ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᐅᖃᖅᑎᑦᑎᔩ, ᒫᑦᓯ 5, 2025−ᒥ, ᓄᓇᕗᒻᒥ ᓯᓚᑦᑐᖅᓴᕐᕕᒃ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᑎᓕᐅᓚᐅᖅᐳᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᓇᓗᓇᐃᖅᓯᓪᓗᑎᒃ ᑲᑐᔾᔨᖃᑎᒌᒡᕕᑦᑕ ᐊᖏᖅᓯᒪᓂᖏᓐᓂᒃ ᐃᑲᔪᖅᓱᐃᓂᕐᒥᒃ ᐱᓕᒻᒪᒃᓴᕐᓂᕐᒥᒃ ᐊᒻᒪ ᐃᓕᓐᓂᐊᕐᓂᕐᒧᑦ ᐱᕕᒃᓴᓂᒃ ᖁᑦᑎᒃᑐᒥ. ᖁᕕᐊᓱᒃᐳᖓ ᐱᒻᒪᕆᐅᔪᓂᒃ ᓄᑖᙳᕆᐊᖅᓯᒪᔪᓂᒃ ᑐᓴᖅᑎᑦᑎᔪᓐᓇᕋᒪ ᑕᒪᒃᑯᓄᖓ ᐱᓕᕆᐊᖑᔪᓄᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᒪᒋᔭᖃᐃᓐᓇᖅᐳᑦ ᓴᓇᔭᐅᓂᖓᓂᒃ ᒥᑦᑎᒪᑕᓕᖕᒥ ᖃᐅᔨᓴᕐᕕᒃ ᐊᒻᒪ ᐱᓕᒻᒪᒃᓴᕐᕕᒃ. ᑖᓐᓇ ᐱᔭᕇᖅᑕᐅᕕᒃᓴᖓ ᒫᓐᓇ ᐊᐅᔭᐅᑉ ᓄᙳᐊᓂ ᑕᒫᓂ ᐊᕐᕌᒍᒥ. ᑖᓐᓇ ᑐᓴᒐᒃᓴᖅ ᓇᓗᓇᐃᖅᑕᐅᓚᐅᖅᑎᓪᓗᒍ, ᓯᓚᑦᑐᖅᓴᕐᕕᒃ ᐸᖕᓇᐅᕗᖅ ᐱᓕᕆᐊᒃᓴᓂᒃ ᑲᔪᓯᑎᑦᑎᓛᕐᓂᕐᒥᒃ ᑕᕝᕙᓂ ᐃᓂᒥ, ᐱᒋᐊᕐᓗᓂ ᓯᑎᐱᕆ 2026−ᒥ. ᐱᓕᕆᐊᒃᓴᐃᑦ ᒫᓐᓇ ᓇᓗᓇᐃᖅᑕᐅᓯᒪᔪᑦ ᑲᔪᓯᑎᑕᐅᓂᐊᕐᓂᖏᓐᓂᒃ ᒥᑦᑎᒪᑕᓕᖕᒥ ᖃᐅᔨᓴᖅᓯᓂᕐᒧᑦ ᐊᔪᕈᓐᓃᖅᓴᕐᓂᕐᒧᓪᓗ ᐃᓂᒋᔭᐅᔪᒥ ᐱᒋᐊᕐᓗᓂ ᐅᑭᐅᒃᑯᑦ ᐃᓕᓐᓂᐊᕐᓇᒥ 2026/27−ᒥ ᐃᓕᓐᓂᐊᕐᓇᒥ ᐊᕐᕌᒍᒋᔭᐅᔪᒥ ᐅᑯᓂᖓ ᐃᓚᖃᖅᐳᑦ: • ᑐᓵᔨ/ᑐᑭᓕᐅᕆᔨ (ᐊᕐᕌᒍ 1) • ᐊᒥᓕᕆᓂᖅ ᐊᓐᓄᕋᔾᔨᐅᕐᓂᕐᓗ (ᐊᕐᕌᒍ 1) • ᐃᓄᖕᒧᑦ ᐃᑲᔪᖅᑐᐃᕙᖕᓂᕐᒧᑦ ᐃᖅᑲᓇᐃᔭᖅᑎᐅᓂᕐᒧᑦ ᐱᓕᕆᐊᖑᕙᒃᑐᖅ. ᑖᒃᑯᓄᖓ ᓯᕗᓪᓕᖅᐹᓄᑦ ᐃᓕᓐᓂᐊᖃᑕᐅᔪᓄᑦ, ᑖᒃᑯᐊ ᐱᓕᕆᐊᒃᓴᐃᑦ ᒪᓂᒪᑎᑕᐅᓂᐊᖅᐳᑦ ᓄᓇᓕᖕᒥᐅᓄᑦ ᒥᑦᑎᒪᑕᓕᖕᒥᐅᑕᑐᐊᓄᑦ. ᐱᓕᕆᐊᒃᓴᒃᑲᓐᓃᑦ ᓱᓕ ᐃᓱᒪᒃᓴᖅᓯᐅᕈᑕᐅᔪᑦ, ᐅᖃᐅᓯᐅᒃᑲᓐᓂᓛᖅᖢᑎᒡᓗ ᓇᓗᓇᐃᖅᑕᐅᕌᓂᒃᓯᒪᓕᕈᑎᒃ. ᑎᓕᐅᖅᐸᒃᑲ ᒥᑦᑎᒪᑕᓕᖕᒥᐅᑦ ᐃᓕᑦᑎᖁᓪᓗᒋᑦ ᑕᒪᒃᑯᓂᖓ ᐱᓕᕆᐊᒃᓴᓂᒃ, ᐃᓱᒪᒃᓴᖅᓯᐅᕐᓗᑎᒡᓗ ᐱᓇᔪᒍᓐᓇᕐᓂᕐᒥᒃ ᑕᒪᒃᑯᓄᖓ ᐱᓕᕆᐊᒃᓴᓄᑦ. ᓄᓇᕘᒥ ᓯᓚᑦᑐᕐᓴᖅᕕᒃᑯᑦ ᐸᕐᓇᒃᐸᓪᓕᐊᓂᐊᖅᑐᑦ ᐃᖅᑲᓇᐃᔭᖅᑎᑖᕋᓱᐊᕐᓂᕐᒧᑦ ᑕᒪᒃᑯᓄᖓ ᐃᓕᓐᓂᐊᒐᒃᓴᐅᔪᓄᑦ ᑕᖅᑭᐅᓂᐊᖅᑐᓂ. ᐱᔭᕇᖅᐸᓪᓕᐊᓕᕐᓗᖓ, ᖁᔭᓐᓇᒦᕈᒪᔭᕋ ᐊᖓᔪᖅᑳᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᐅᓛᔪᒃ ᐊᑭᓱᒃ, ᐊᒻᒪᓗ ᐃᖅᑲᓇᐃᔭᖅᑎᖏᑦ, ᐱᓕᕆᖃᑎᒌᑦᑎᐊᕐᒪᑕ ᑕᒪᑐᒧᖓ ᐱᓇᓱᐊᖅᑕᐅᔪᒧᑦ. ᐅᒃᐱᕈᓱᒃᐳᖓ ᑲᑐᔾᔨᓪᓗᑕ ᐱᓇᔪᖕᓂᕆᔭᕗᑦ ᐱᒻᒪᕆᐅᓪᓗᓂ ᐆᒃᑑᑎᑦᑎᐊᕙᐅᖕᒪᑦ ᓄᓇᕗᒻᒧᑦ. ᑲᑎᑎᕆᕗᒍᑦ ᓴᙱᓂᕆᔭᑦᑎᓐᓂᒃ ᑲᒪᒋᔭᖃᕈᒪᓪᓗᑕ ᐊᒥᖅᑳᕈᑕᐅᔪᒥᒃ ᐱᔭᐅᔭᕆᐊᓕᖕᒥᒃ. ᑕᒪᓐᓇ ᖁᕕᐊᓲᑕᐅᔭᕆᐊᖃᖅᐳᖅ. ᓄᓇᕗᒻᒥ ᓯᓚᑦᑐᖅᓴᕐᕕᒃ ᐱᒃᑯᒍᓱᒃᐳᖅ ᐱᓕᕆᖃᑎᒋᔭᐅᓂᕐᒥᓂᒃ ᑲᔪᓯᓂᖃᑦᑎᐊᕐᓂᕐᒧᑦ, ᐃᑲᔪᖅᑐᐃᓂᕐᒥᒡᓗ, ᒥᑦᑎᒪᑕᓕᖕᒥ ᖃᐅᔨᓴᖅᓯᓂᕐᒧᑦ ᐊᔪᕈᓐᓃᖅᓴᖅᑎᑦᑎᓂᕐᒧᓪᓗ ᐃᓂᒋᔭᐅᔪᒥᒃ. ᖁᔭᓐᓇᒦᒃ, ᐅᖃᖅᑎᑦᑎᔩ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 4 >>ᐸᑦᑕᑐᖅᑐᑦ ᐅᖃᖅᑎ: ᒥᓂᔅᑕᐃᑦ ᐅᖃᐅᓯᖏᑦ. ᐃᖏᕐᕋᔪᓕᕆᔨᒃᑯᓐᓄᑦ ᐊᐅᓚᔪᓐᓇᐅᑎᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᐊᖓᔪᖅᑳᑉ ᐅᖃᐅᓯᖓ 59 - 7(2): ᐅᓇᑕᖅᑐᒃᓴᓕᕆᔨᒃᑯᑦ ᐱᓕᕆᕝᕕᐊ ᐃᑲᔪᖅᓱᐃᓂᖏᑦ ᓄᓇᕘᑉ ᒥᑦᑕᕐᕕᖏᓄᑦ ᐱᔭᒃᓴᑦᑎᓐᓂᒃ (ᕼᐃᒃᔅ) ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᖃᖅᑎᑦᑎᔩ, ᒫᓐᓇ ᐱᕕᖃᕐᓂᓐᓂ ᑐᓴᖅᑎᑦᑐᒪᕙᒃᑲ ᒪᓕᒐᓕᐅᖅᑎᐅᖃᑎᒃᑲ ᐱᖓᓱᓂᒃ ᓄᓇᕗᒻᒥ ᒥᑦᑕᕐᕕᖕᓂᒃ ᐱᓕᕆᐊᖑᕙᓪᓕᐊᔪᓂᒃ ᐃᑲᔪᖅᓱᖅᑕᐅᓪᓗᑎᒃ ᐅᓇᑕᖅᑐᒃᓴᓕᕆᔨᒃᑯᓐᓂ. ᒫᔾᔨᒥ, ᐃᖏᕐᕋᔪᓕᕆᔨᒃᑯᑦ ᐊᐅᓚᑦᑎᔪᓐᓇᐅᑎᓕᕆᔨᒃᑯᓪᓗ ᓄᓇᕗᒻᒥ ᐊᑎᓕᐅᓚᐅᕐᒪᑕ ᑮᓇᐅᔭᖃᖅᑎᑦᑎᓂᕐᒧᑦ ᐊᖏᖃᑎᒌᒍᑎᓂᒃ $11-ᒥᓕᐊᓐ ᐅᖓᑖᓃᑦᑐᓂᒃ ᑎᑎᕋᐅᔭᖅᑕᐅᓂᖓᓄᑦ ᐊᓯᖏᓐᓄᓪᓗ ᑲᖏᖅᖠᓂᕐᒥ, ᐃᖃᓗᑦᑑᑦᑎᐊᕐᒥ ᐊᒻᒪᓗ ᖃᐅᓱᐃᑦᑐᒥ ᖃᖓᑕᓲᒃᑯᕕᖏᓐᓂ. ᑲᖏᖅᖠᓂᕐᒥ ᐃᖃᓗᑦᑑᑦᑎᐊᕐᒥᓗ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᖃᑎᒌᒍᑏᑦ ᐃᑲᔪᖅᑐᐃᕗᑦ ᐸᕐᓇᐃᓂᕐᒧᑦ ᐊᒻᒪᓗ ᑎᑎᕋᐅᔭᕐᓂᕐᒧᑦ ᐱᓕᕆᐊᖑᕙᓪᓕᐊᔪᓄᑦ ᐃᖏᕐᕋᔪᓕᕆᔨᒃᑯᑦ ᐊᐅᓚᔪᓐᓇᐅᑎᓕᕆᔨᒃᑯᓪᓗ ᓄᓇᕗᒻᒥ, ᐊᒻᒪᓗ ᐃᓕᓴᖅᓯᓪᓗᑎᒃ ᐱᒻᒪᕆᐅᓂᖏᓐᓂᒃ ᑖᒃᑯᐊ ᐊᕕᑦᑐᖅᓯᒪᔪᓂ ᒥᑦᑕᕐᕖᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᑦᑕᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᑲᓇᑕᒥᐅᑕᐅᓂᖓᓄᑦ. ᑲᓇᑕᐅᑉ ᐊᖓᔪᖄᕐᔪᐊᖓᓄᑦ ᑲᐅᕐᓂ ᐅᖃᐅᓯᐅᓚᐅᖅᑎᓪᓗᒍ ᒫᔾᔨᐅᑎᓪᓗᒍ, ᑲᖏᖅᖠᓂᖅ ᐊᒻᒪ ᐃᖃᓗᒃᑑᑦᑎᐊᖅ ᑎᒃᑯᐊᖅᑕᐅᓯᒪᓕᖅᐳᑦ ᐅᑭᐅᖅᑕᖅᑐᒥ ᐊᐅᓚᑦᑎᓂᕐᒧᑦ ᐃᑲᔪᖅᑐᐃᓂᕐᒧᑦ ᑐᑦᑕᕐᕕᒋᔭᐅᓂᐊᕐᓗᑎᒃ, ᑐᒡᓕᕆᔭᐅᓪᓗᑎᒃ ᐃᑲᔪᖅᓱᐃᓂᕐᒧᑦ ᐃᓂᒋᔭᐅᔪᑦ ᐱᔪᓐᓇᖅᑎᑦᑎᓪᓗᑎᒃ ᑲᓇᑕᒥ ᐅᓇᑕᖅᑐᒃᓴᓂᒃ ᐱᓕᕆᐊᒃᓴᓂᒃ ᑲᔪᓯᑎᑦᑎᔪᓐᓇᕐᓂᕐᒥᒡᓗ ᐅᓇᑕᖅᑐᒃᓴᓂᒃ ᐅᖓᓯᖕᓂᖅᓴᓄᑦ ᐅᑭᐅᖅᑕᖅᑐᒧᑦ. ᖃᐅᓱᐃᑦᑐᖅ ᓇᓗᓇᐃᖅᑕᐅᓯᒪᕗᖅ ᐅᑭᐅᖅᑕᖅᑐᒥᑦ ᐊᐅᓚᑦᑎᓂᕐᒧᑦ ᐃᑲᔪᖅᓲᑎᓄᑦ ᑐᑦᑕᕐᕕᐅᓂᖓᓄᑦ, ᐱᕐᔪᐊᖑᓂᖅᓴᐅᓪᓗᓂ ᐱᖁᑎᒋᔭᐅᓪᓗᓂ ᑐᕌᖓᑎᑕᐅᓪᓗᓂ ᐊᑐᐃᓐᓇᐅᑎᑦᑎᓂᕐᒧᑦ ᐱᓕᕆᐊᖑᔪᓄᑦ ᐃᑲᔪᖅᑐᐃᓂᕐᒥᑦ ᐅᓇᑕᖅᑐᒃᓴᒃᑯᑦ ᐊᐅᓚᓂᕆᕙᒃᑕᖏᓐᓄᑦ ᐅᑭᐅᖅᑕᖅᑐᒥᑦ. ᖃᐅᓱᐃᑦᑐᒥ ᖃᖓᑕᓲᒃᑯᕕᒃ ᐱᐅᓯᒋᐊᖅᑕᐅᓂᖓ ᐸᕐᓇᒃᑕᐅᕙᓪᓕᐊᑎᓪᓗᒍ ᑎᑎᕋᐅᔭᖅᑕᐅᑎᓪᓗᒍᓗ, ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓯᕗᒧᐊᒃᑎᑕᐅᖁᓪᓗᒍ ᓴᓇᔭᐅᕙᓪᓕᐊᓂᖓ ᑖᔅᓱᒪ ᐊᒃᓱᕉᑕᐅᒻᒪᕆᒃᑐᖅ ᐃᒡᓗᕐᔪᐊᖅ ᐃᑲᔫᑎᖃᑦᑎᐊᖁᓪᓗᒍ ᖃᐅᓱᐃᑦᑐᕐᒥᐅᓄᑦ ᐊᒻᒪ ᓄᓇᕗᒥᐅᓄᑦ ᖃᓂᒋᔭᖓᓃᑦᑐᓄᑦ ᐊᕐᕌᒍᒐᓴᖕᓄᑦ ᐊᒡᒋᖅᑐᓄᑦ. ᖁᔭᓐᓇᒦᒃ, ᐅᖃᖅᑎᑦᑎᔩ. >>ᐸᑦᑕᑐᖅᑐᑦ ᐅᖃᖅᑎ: ᒥᓂᔅᑕᐃᑦ ᐅᖃᐅᓯᒃᓴᖏᑦ. ᓄᓇᓕᓐᓂ ᐱᔨᑦᓯᖅᑎᒃᑯᓐᓄᑦ ᒥᓂᔅᑕ ᓯᒪᐃᓚᒃ. ᐊᖓᔪᖅᑳᑉ ᐅᖃᐅᓯᖓ 60 - 7(2): ᓄᓇᕗᑦ-ᑲᓛᖠᑦ ᓄᓈ ᐃᑎᔪᒧᑦ ᐃᒪᐃᓐᒻᓇᕐᒥ ᐃᖃᓗᒐᓱᖕᓂᕐᒧᑦ ᖃᐅᔨᒪᓂᑦ ᑕᐅᖅᓰᔭᖅᑕᐅᓂᖏᓄᑦ (ᓯᒪᐃᓚᒃ) ᐊᖓᔪᖅᑳᖅ ᑯᕋᐃᒡ ᓯᒪᐃᓚᒃ: ᒪ’ᓇ ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᒃ ᐊᒻᒪᓗ ᑕᐃᒃᑯᐊ ᓄᓇᑦᑎᓐᓂ ᖃᒪᓂᑦᑐᐊᕐᒥᐅᑦ ᐅᓪᓗᖃᑦᑎᐊᕐᓂᐊᖅᐳᓯ, ᒪᓐᓂᒃᓯᐅᖅᑐᐊᓘᖃᑦᑕᓕᕐᒪᑕ. ᐅᖃᖅᑎᑦᑎᔩ, ᐅᓪᓗᒥ ᓂᑯᕕᑦᑐᖓ ᓇᓗᓇᐃᖅᓯᒍᒪᓪᓗᖓ ᐱᒻᒪᕆᐅᔪᒥᒃ ᐱᒋᐊᖅᑎᑕᐅᓯᒪᔪᒥᒃ ᐃᑲᔪᖅᑐᐃᔪᒥᒃ ᓯᕗᓂᒃᓴᖓᓄᑦ ᓄᓇᕗᒻᒥ ᐃᖃᓗᓕᕆᓂᕐᒧᑦ, ᓴᙱᓕᖅᐹᓪᓕᖅᑎᑦᑎᔪᖅ ᐃᓄᐃᑦ ᖃᐅᔨᒪᓂᑐᖃᖏᓐᓂᒃ ᑕᐅᖅᓰᖃᑎᒌᓐᓂᕐᒥᒃ ᐅᑭᐅᖅᑕᖅᑐᓕᒫᒥ ᐊᒻᒪᓗ ᓴᖅᑮᓪᓗᓂ ᓄᑖᓂᒃ ᐱᕕᒃᓴᐅᔪᓂᒃ ᓄᓇᕗᒻᒥᐅᓄᑦ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 5 ᔫᓂ 3−ᒥᑦ 17−ᒧᑦ, 2026−ᒥ, ᖁᓕᑦ ᐃᖃᓗᒐᓱᒃᑏᑦ ᓄᓇᓕᖕᓂᙶᖅᑐᑦ ᕿᑭᖅᑕᓂ ᐊᐅᓪᓚᓛᖅᑐᑦ ᓅᒃ, ᑲᓛᖦᖡᑦ ᓄᓈᓐᓄᑦ, ᐃᓚᐅᔭᖅᑐᕐᓗᑎᒃ ᓄᓇᕗᒻᒥ−ᑲᓛᖦᖡᑦ ᓄᓈᓐᓂ ᐃᖃᓪᓕᐊᕐᓂᕐᒧᑦ ᖃᐅᔨᒪᔭᐅᔪᓂᒃ ᑕᐅᖅᓰᖃᑎᒌᖕᓂᕐᒧᑦ ᐱᓕᕆᐊᒧᑦ. ᑖᓐᓇ ᐊᕐᕌᒍᒐᓴᖕᓄᑦ ᐱᓕᕆᐊᖑᕙᓪᓕᐊᔪᒪᔪᖅ ᑕᐅᑐᒐᖃᓪᓗᐊᑕᖅᐳᖅ ᓴᙱᒃᑎᒋᐊᖅᑎᑦᑎᓂᕐᒥᒃ ᐃᖃᓗᒐᓱᒃᐸᖕᓂᕐᒧᑦ ᐊᔪᙱᓐᓂᕆᔭᐅᔪᒥᒃ ᓄᓇᕗᒻᒥ ᐃᒪᑐᐃᓐᓇᕐᒥ ᐊᐅᓚᓴᐅᑎᑯᑖᒃᑯᑦ ᐃᖃᓗᒐᓱᒃᐸᖕᓂᒃᑯᑦ ᖃᓕᕋᓕᖕᒥᒃ, ᖃᐅᔨᒪᔭᐅᖕᒥᔪᖅ ᑲᓛᖦᖡᑦ ᓄᓈᓐᓂ ᓇᑖᕐᓇᕐᓂᒃ. ᐃᓚᐅᔪᑦ ᐱᓕᒻᒪᒃᓴᖅᑎᑕᐅᓂᐊᖅᑐᑦ ᐱᖃᑎᖃᕐᓗᑎᒃ ᐊᑯᑭᑦᑐᒥᐅᑦ ᐃᖃᓗᒐᓱᒃᑎᖏᓐᓂᒃ ᐊᒻᒪ ᓴᓇᕝᕕᖕᒥ ᐱᓕᕆᖃᑎᖏᓐᓂᒃ. ᑖᓐᓇ ᐱᓕᕆᐊᖑᕙᓪᓕᐊᔪᒪᔪᖅ ᐊᒃᑐᐊᓂᖃᖅᐳᖅ ᐊᕐᕌᒍᒐᓴᖕᓄᑦ ᑲᑐᔾᔨᖃᑎᒌᖕᓂᕆᔭᐅᔪᒧᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᓴᓇᕝᕕᖕᓄᑦ ᐱᓕᕆᖃᑎᒌᒃᐸᒃᑐᓄᑦ, ᐊᖑᓇᓱᒃᑐᓕᕆᔨᒃᑯᓐᓄᓪᓗ ᑕᒫᓂᓕᒫᖅ ᐊᕕᒃᓯᒪᓂᕆᔭᐅᔪᒥ. ᐃᓚᐅᓂᐊᖅᑐᑦ ᓂᕈᐊᖅᑕᐅᓚᐅᖅᑐᑦ ᐸᖕᓂᖅᑑᒥᑦ, ᕿᑭᖅᑕᕐᔪᐊᒥᑦ, ᑲᖏᖅᑐᒑᐱᖕᒥᑦ, ᒥᑦᑎᒪᑕᓕᖕᒥᑦ, ᐃᒃᐱᐊᕐᔪᖕᒥᓪᓗ, ᑖᒃᑯᐊ ᓄᓇᓖᑦ ᐃᑲᔪᓚᐅᖅᑳᕋᑎᒃ ᐋᖅᑭᒃᓱᐃᓪᓗᑎᒃ ᑐᑭᒧᐊᒃᑎᑦᑎᓪᓗᑎᒡᓗ ᑕᒪᑐᒥᖓ ᐱᕕᒃᓴᒥᑦ ᐱᒋᐊᕐᓂᖓᓂᑦ. ᐱᓕᒻᒪᒃᓴᕐᓂᕐᒧᑦ ᐱᓕᕆᐊᖅ ᑲᑎᑎᑦᑎᔪᖅ ᐃᓕᓐᓂᐊᕐᕕᐊᕈᓯᕐᒥ ᐃᓕᓐᓂᐊᖅᑎᑦᑎᓂᕐᒥᒃ ᐃᒪᕐᒥ ᐱᓕᕆᖃᑦᑕᖅᓯᒪᓂᑰᓂᕐᒥᒃ ᐅᒥᐊᕐᔪᐊᑦ ᐊᐅᓚᓂᖏᓐᓂᒃ, ᐊᑦᑕᕐᓇᖅᑕᐃᓕᒪᓂᕐᒥᒃ, ᓇᒧᙵᐅᕙᓪᓕᐊᓂᕐᒥᒃ, ᐊᐅᓚᓴᐅᑎᑯᑖᓂᒃ ᐱᕙᒌᔭᐃᓂᕐᒥᒃ, ᐃᖃᓗᓕᕆᓂᕐᒥᒃ, ᐊᒻᒪ ᐃᖃᓗᒐᓱᑦᑎᐊᕐᓂᕐᒥᒃ. ᐅᖃᖅᑎᑦᑎᔩ, ᑖᓐᓇ ᐱᓕᕆᐊᖑᕙᓪᓕᐊᔪᒪᔪᖅ ᐱᕈᖅᐸᓪᓕᐊᑎᑦᑎᕗᖅ ᓴᙱᔪᒥᒃ ᐱᐅᓯᕆᔭᐅᕙᓚᐅᖅᑐᒥᒃ ᐃᓄᐃᑦ−ᐃᓄᖕᒧᑦ ᖃᐅᔨᒪᓂᕆᔭᐅᔪᓂᒃ ᐊᒥᖅᑳᖃᑎᖃᖅᐸᖕᓂᕐᒥᒃ ᐅᑭᐅᖅᑕᖅᑐᓕᒫᒥ. ᓯᕗᓂᐊᒍᑦᐊᐅᓚᓴᐅᑎᑯᑖᑦ ᑕᐅᖅᓰᖃᑦᑕᐅᑎᖃᑦᑕᓚᐅᖅᑐᑦ ᓴᙵᑎᑦᑎᕚᓪᓕᓚᐅᖅᐳᑦ ᐃᖃᓗᒐᓱᓐᓂᕐᒥᒃ ᓄᓇᕗᒻᒥ, ᐊᒻᒪ ᐊᒥᓱᑦ ᓄᓇᕗᒻᒥ ᐃᖃᓗᒐᓱᒃᑏᑦ ᓱᓕ ᐱᕚᓪᓕᕈᑎᖃᖅᐳᑦ ᑕᒪᑐᒥᖓ ᖃᐅᔨᒪᓂᕐᒥᒃ ᐅᓪᓗᒥ. ᑖᓐᓇ ᓄᑖᖅ ᐱᓕᕆᐊᖅ ᑲᔪᓯᓂᖃᑦᓯᐊᖅᑐᖅ ᑕᐅᑐᒐᖃᖅᓱᓂ ᐃᒪᕐᒥ ᐃᖃᓗᒐᓱᐊᕈᓯᕐᓂᒃ ᐃᑲᔪᖅᑐᕈᓐᓇᖅᑐᖅ ᐱᕈᖅᐸᓪᓕᐊᖏᓐᓇᖅᑐᒥᒃ ᓄᓇᕗᒻᒥ ᐃᖃᓗᓕᕆᓂᕐᒧᑦ. ᑐᕌᒐᕆᔭᐅᔪᖅ ᓇᓗᓇᙱᑦᑎᐊᖅᑐᖅ ᑭᓯᐊᓂ ᐱᒻᒪᕆᐅᕗᖅ: ᓄᓇᓕᖕᓂ ᐱᔪᓐᓇᕐᓂᖅᑖᖅᑎᑦᑎᕙᓪᓕᐊᓂᖅ ᐊᒻᒪ ᐱᕕᒃᓴᓂᒃ ᓴᖅᑭᑦᑎᓗᑎᒃ ᓄᓇᕗᒥᐅᓄᑦ ᐃᑲᔪᕈᒪᔪᓄᑦ ᓯᕗᓕᖅᑎᐅᓂᕐᒧᑦ ᓯᕗᓂᒃᓴᑦᑎᓐᓂ ᐃᖃᓗᓕᕆᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ ᓄᓇᕗᒻᒥ. ᑕᒪᓐᓇ ᐱᓕᕆᐊᖅ ᐃᑲᔪᖅᑐᐃᕗᖅ ᓂᕿᒃᓴᖃᑦᑎᐊᕐᓂᕐᒥᒃ, ᑮᓇᐅᔭᓕᐅᕋᓱᖕᓂᕐᒧᑦ ᐱᕕᒃᓴᐅᔪᓐᓇᖅᑐᓂᒃ, ᐊᒻᒪ ᐃᓄᐃᑦ ᐃᓚᐅᑎᑕᐅᓂᖅᓴᐅᓗᑎᒃ ᐃᖃᓗᓕᕆᓂᕐᒥ. ᐅᖃᖅᑏ, ᑕᒪᓐᓇ ᐱᓕᕆᐊᖑᔪᖅ ᐊᑦᑐᐊᓂᖃᕐᒥᔪᖅ ᐊᖏᓂᖅᓴᐅᔪᒥᒃ ᐃᖃᓗᒐᓱᓐᓂᑐᐃᓐᓇᐅᙱᑦᑐᒥᒃ. ᑕᑯᒃᓴᐅᑎᑦᑎᕗᖅ ᐃᓄᐃᑦ ᐃᖅᑲᓇᐃᔭᖃᑎᒌᖕᓂᖏᓐᓂᒃ ᐅᑭᐅᖅᑕᖅᑐᓕᒫᒥ, ᖃᐅᔨᒪᔭᒥᓂᒃ ᐊᒥᖅᑳᖃᑎᖃᖅᖢᑎᒃ, ᐱᓕᕆᖃᑎᒌᑦᑎᐊᒃᑲᓐᓂᖅᐸᒃᖢᑎᒃ, ᐃᑲᔪᖅᑎᒌᒃᐸᒃᖢᑎᒡᓗ ᐊᒥᖅᑳᖃᑎᒌᖕᓂᒃᑯᑦ ᐊᑐᖅᓯᒪᔭᒥᑎᒍᑦ. ᓂᕆᐅᒃᐳᖓ ᑐᓴᓛᕆᐊᒃᓴᖅ ᐊᑐᖅᓯᒪᔭᖏᓐᓂᑦ ᐃᓚᐅᔪᑦ ᐅᑎᕈᑎᒃ ᐊᖏᕐᕋᒥᓄᑦ ᑕᑯᓗᑎᒡᓗ ᖃᓄᖅ ᑕᒪᓐᓇ ᖃᐅᔨᒪᓂᖅ ᐃᑲᔪᖅᑐᐃᖏᓐᓇᖕᒪᖔᑦ ᓄᓇᕘᑉ ᐃᖃᓗᓕᕆᔨᖏᓐᓂᑦ ᐊᕐᕌᒍᓂ ᐊᒡᒋᖅᑐᓂᑦ. (ᑐᓵᔨᑎᒎᕈᓐᓃᖅᑐᖅ) ᒪ'ᓇ, (ᑐᓵᔨᑎᒎᓕᖅᑐᖅ) ᐅᖃᖅᑎᑦᑎᔩ. >>ᐸᖅᑕᑐᖅᑐᑦ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 6 ᐅᖃᖅᑎ: ᒥᓂᔅᑕᐃᑦ ᐅᖃᐅᓯᖏᑦ. ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᕼᐄᓕ−ᐊᕿᐊᕈᖅ. ᐊᖓᔪᖅᑳᑉ ᐅᖃᐅᓯᖓ 61 - 7(2): ᐊᖏᓕᒋᐊᕆᓂᖅ ᐃᓄᖕᓂᑦ ᐃᖅᑲᓇᐃᔭᖅᑎᖃᓐᓂᖅ ᖁᓪᓕᖅ ᐆᒻᒪᖅᑯᑎᓕᕆᔨᑦ ᑎᒥᖓᓂᒃ (ᕼᐃᓕ-ᐊᕿᐊᕈᖅ) ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᐅᓪᓗᒥ ᓇᖏᖅᓯᕗᖓ ᓇᓗᓇᐃᖅᓯᔪᒪᓪᓗᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑲᔪᓰᓐᓇᖅᑐᒥᒃ ᐱᓕᕆᐊᖃᓪᓚᕆᒍᒪᕙᖕᓂᖓᓂᒃ ᓴᙱᒃᑎᒋᐊᖅᑎᑦᑎᔪᒪᓪᓗᑎᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒥᒃ ᐋᖅᑭᒃᓱᐃᕙᓪᓕᐊᓂᕐᒥᒡᓗ ᐃᖅᑲᓇᐃᔭᖅᑎᓂᒃ ᐊᒃᑐᐊᓂᖃᖅᑐᓂᒃ ᓄᓇᓕᖕᓄᑦ ᐱᔨᑦᑎᕋᕐᕕᒋᕙᒃᑕᑦᑎᓐᓄᑦ. ᑖᓐᓇ ᐱᓕᕆᐊᖅ ᒪᓕᒃᐳᖅ ᑐᕌᒐᕆᔭᐅᔪᓂᒃ ᐊᒻᒪ ᑐᕌᒐᕆᔭᐅᔪᓂᒃ ᑎᑎᕋᖅᓯᒪᓂᓕᒃ 23-ᒥ ᓄᓇᕗᒻᒥ ᐊᖏᕈᑏᑦ ᐊᒻᒪᓗ ᐱᖁᔭᖅᑎᒍᑦ ᑎᒥᕈᖅᑎᑕᐅᓯᒪᔪᖅ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᖕᓇᐅᑎ 2024-2034. ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᖏᑦ ᐱᓕᕆᐊᖃᖅᓯᒪᕗᑦ ᐃᓄᐃᑦ ᐱᔪᓐᓇᕐᓂᖅᑖᖅᐸᓪᓕᐊᖁᓪᓗᒋᑦ ᑎᒥᐅᔪᓕᒫᓂ. ᑖᓐᓇ ᐊᖏᖅᓯᒪᓂᐅᔪᖅ ᐱᓕᕆᐊᖃᕐᓂᕐᒧᑦ ᑐᕌᖓᕗᖅ ᐆᒃᑐᕋᒐᒃᓴᐅᓪᓗᓂᓗ, ᑕᐅᑐᒐᖃᓪᓗᐊᑕᖅᖢᓂᓗ ᑎᓴᒪᓂᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐱᓕᕆᐊᒃᓴᓂᒃ, ᐊᑐᓂ ᐋᖅᑭᒃᓱᖅᑕᐅᓯᒪᓪᓗᑎᒃ ᑲᑎᙵᓪᓗᑎᒃ ᐊᖅᑯᑎᒋᔭᐅᓪᓗᑎᒃ ᐃᖅᑲᓇᐃᔭᖅᑎᒃᓴᖅᓯᐅᕐᓂᕐᒧᑦ, ᐊᔪᕈᓐᓃᖅᓴᕐᓂᕐᒧᑦ, ᐊᕗᖓᑲᓪᓚᒡᓗ ᐃᖅᑲᓇᐃᔮᕆᔭᐅᔪᒪᔪᓄᑦ ᑲᔪᓯᓂᖃᑦᑎᐊᕐᓂᕐᒧᑦ. ᑖᒃᑯᐊ ᓯᑕᒪᑦ ᐱᓕᕆᐊᖑᔪᑦ ᐱᖃᓯᐅᔾᔨᔪᑦ ᐃᓄᐃᑦ ᓯᕗᓕᖅᑎᐅᓂᕐᒧᑦ ᐱᕙᓪᓕᐊᓂᕐᒧᑦ ᐱᓕᕆᐊᖅ, ᐃᓄᐃᑦ ᐊᐅᔭᒃᑯᑦ ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑎᑕᐅᓂᖏᑦ, ᐃᓄᐃᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᖅ, ᐊᒻᒪᓗ ᐃᓄᐃᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔮᓂᒃ ᐱᕚᓪᓕᖅᑎᑦᑎᓂᕐᒧᑦ ᐸᕐᓇᐅᑎᑦ. ᐅᖃᖅᑎᑦᑎᔩ, ᑖᒃᑯᐊ ᐱᓕᕆᐊᒃᓴᐃᑦ ᑕᑯᒃᓴᐅᑎᑦᑎᕗᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐱᓇᔪᐃᓐᓇᕐᓂᕆᕙᒃᑕᖏᓐᓂᒃ ᐋᖅᑭᒃᓱᐃᕙᓪᓕᐊᔪᒪᓪᓗᑎᒃ ᑐᑭᖃᑦᑎᐊᖅᑐᓂᒃ ᐱᕕᒃᓴᓂᒃ ᐃᓄᖕᓄᑦ ᓇᐅᒃᑯᓕᒫᖅ ᑯᐊᐳᕇᓴᒋᔭᐅᔪᓂ, ᐱᒋᐊᓕᓵᕐᓂᖏᓐᓂ ᐱᕕᒃᓴᓂᒃ ᓯᕗᓕᖅᑎᐅᓂᕐᒧᑦ ᐃᓂᒋᔭᐅᕙᒃᑐᓄᑦ. ᖃᖓᑦᑎᐊᓵᖅ, ᒪᕐᕉᒃ ᐃᓅᒃ ᐃᖅᑲᓇᐃᔭᖅᑏᒃ ᐱᑖᓚᐅᖅᐳᑦ ᐱᓕᕆᔨᓪᓚᕆᐅᓂᕐᒧᑦ ᑎᓕᔭᐅᓂᕐᒥᒃ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᑮᓇᐅᔭᓕᕆᔨᒃᑯᓐᓂᓗ ᐃᓄᐃᑦ ᓯᕗᓕᖅᑎᙳᖅᐸᓪᓕᐊᓂᕐᒧᑦ ᐱᓕᕆᐊᖑᕙᒃᑐᑎᒍᑦ, ᐱᖓᔪᖓᓪᓗ ᐃᖅᑲᓇᐃᔭᖅᑎ ᒫᓐᓇ ᐃᓚᐅᓕᖅᖢᓂ. ᐊᕐᕌᒍᑦ ᑕᓪᓕᒪᑦ ᐊᓂᒍᖅᓯᒪᓕᖅᑐᑦ, ᑯᐊᐳᕇᓴᕗᑦ ᐃᖅᑲᓇᐃᔭᖅᑎᑦᑎᓯᒪᓕᖅᑐᑦ 62-ᓂᒃ ᐃᓕᓐᓂᐊᖅᑎᓂᒃ ᐃᓄᐃᑦ ᐊᐅᔭᒃᑯᑦ ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ, ᑖᓐᓇᓗ ᐊᕐᕌᒍᒃᑲᓂᕐᒧᑦ ᐱᒋᐊᖅᑎᓐᓂᐊᓕᖅᑕᕗᑦ. ᑎᓴᒪᑦ ᐃᖅᑲᓇᐃᔭᖅᑏᑦ ᐊᑎᓕᐅᖅᑕᐅᓯᒪᔪᑦ ᐃᓄᐃᑦ ᐃᓕᓐᓂᐊᕐᓂᕐᒥᒃ ᐃᖅᑲᓇᐃᔮᒃᓴᒧᑦ ᓴᓇᔨᐅᓂᕐᒧᓪᓘᓐᓃᑦ ᐱᓕᕆᐊᒧᑦ, ᐊᒻᒪᓗ ᐃᒪᐃᑉᐳᒍᑦ ᑕᐅᑐᒐᖃᓪᓗᐊᑕᕐᓗᑎᒃ ᐊᖏᒡᓕᒋᐊᖅᑎᑦᑎᒃᑲᓐᓂᕐᓂᕐᒥᒃ ᐱᕕᒃᓴᓂᒃ ᐊᔪᕈᓐᓃᖅᑕᐅᕙᒃᑐᓄᑦ ᐊᔪᕈᓐᓃᖅᓴᕐᓂᕐᒥᒃ ᐃᖅᑲᓇᐃᔮᒥᒡᓗ ᓯᕗᒻᒧᐊᖅᑎᑦᑎᕙᓪᓕᐊᓂᕐᒥᒃ. 80%-ᐸᓗᖏᑦ ᐃᓄᐃᑦ ᐃᖅᑲᓇᐃᔭᖅᑎᑦ ᒫᓐᓇ ᐃᖅᑲᓇᐃᔮᒧᑦ ᐱᕚᓪᓕᖅᑎᑦᑎᓂᕐᒧᑦ ᐸᕐᓇᐅᑎᖃᖅᑐᑦ, ᖃᔅᓯᐅᓂᖏᑦ ᐅᓄᖅᓯᕙᓪᓕᐊᖏᓐᓇᖅᖢᑎᒃ ᐃᖅᑲᓇᐃᔭᖅᑎᑦ ᐃᓚᐅᑎᓪᓗᒋᑦ ᐋᖅᑭᒃᓱᖅᑕᐅᓯᒪᔪᓂᑦ ᐱᕙᓪᓕᐊᔾᔪᑎᒃᓴᓂᑦ. %-ᖓ ᐃᓄᐃᑦ ᐃᖅᑲᓇᐃᔭᖅᑐᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ ᐊᖏᒡᓕᒋᐊᖅᓯᒪᓕᖅᑐᖅ 58 ᐳᓴᓐᑎᒧᑦ ᑕᖅᑭᑦ ᐊᕐᕕᓂᓕᑦ ᐃᓗᐊᓂ, 100% ᐃᓄᐃᑦ ᐃᖅᑲᓇᐃᔭᖅᑐᑦ 21-ᓂ 25-ᖑᑎᓪᓗᒋᑦ ᓄᓇᓖᑦ. ᐅᖃᖅᑎᑦᑎᔩ, ᐱᕕᖃᕐᓂᓐᓂ ᖁᕕᐊᓲᑎᒋᔪᒪᕙᒃᑲ ᓄᓇᕗᒻᒥᐅᑦ ᖃᐅᒻᒪᖅᑯᑎᓂᒃ ᐃᑯᒪᑎᑦᑎᕙᒃᑐᑦ ᓄᓇᕘᓕᒫᒥ ᐸᖕᓇᐃᓪᓗᑎᒡᓗ ᐆᒻᒪᖅᑯᑎᖃᕆᐊᖃᕐᓂᕐᒧᑦ ᓯᕗᓂᒃᓴᒥ − ᐱᓕᕆᐊᕆᕙᒃᑕᖏᑦ ᖃᐅᑕᒫᑦ ᑭᓱᓕᒫᓂᒃ ᓄᓇᓕᑦᑎᓐᓂ ᐊᔪᕐᓇᙱᑎᑦᑎᕙᒃᐳᖅ. ᐅᖃᖅᑎᑦᑎᔩ, ᓂᕆᐅᑦᑎᐊᖅᐳᒍᑦ ᑕᒪᒃᑯᐊ ᐱᓇᔪᒃᑕᐅᔪᑦ ᐃᓄᐃᑦ ᐃᖅᑲᓇᐃᔭᖅᑎᑦ ᐃᑲᔪᖅᓱᖅᑕᐅᑦᑎᐊᕐᓂᖏᓐᓂᒃ ᐊᑯᓂᐅᔪᒃᑯᑦ ᐃᖅᑲᓇᐃᔮᖃᕈᓐᓇᖁᓪᓗᒋᑦ, ᑐᑭᖃᑦᑎᐊᖅᑐᓂᒃ ᐃᖅᑲᓇᐃᔮᕆᔪᒪᔭᖏᓐᓂᒃ ᓇᐅᒃᑯᓕᒫᖅ ᐆᒻᒪᖅᑯᑎᓕᕆᕝᕕᑦᑎᓐᓂ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐅᖃᖅᑎᑦᑎᔩ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 7 >>ᐸᑦᑕᑐᖅᑐᑦ ᐅᖃᖅᑎ: ᑲᑎᒪᔾᔪᑎᑦᑎᓐᓄᑦ ᑲᔪᓯᒋᐊᕐᓗᑕ. ᑲᑎᒪᔾᔪᑎᒃᓴᖅ 3. ᒪᓕᒐᓕᐅᖅᑏᑦ ᐅᖃᐅᓯᖏᑦ. ᒪᓕᒐᓕᐅᖅᑎ ᑲᖏᖅᓯᓂᐅᑉ ᓂᒡᒋᐊᓄᑦ, ᒪᓕᒐᓕᐅᖅᑎ ᑕᑦᑐᐃᓂ. ᑲᑎᒪᔾᔪᑎᒃᓴᖅ 3: ᒪᓕᒐᓕᐅᖅᑏᑦ ᐅᖃᐅᓯᖏᑦ ᒪᓕᒐᓕᐅᖅᑎᐅᑉ ᐅᖃᐅᓯᖓ 61 - 7(2): ᓗᐊᕋ ᒐᐅᑦᑎᔭᐃ ᐊᖅᓴᖅᑐᓐ ᕚᓕᐸᓪ ᐊᑭᑦᑐᕋᐅᑎᓂᐊ (ᑕᑦᑐᐃᓂ) ᐊᖓᔪᖅᑳᖅ ᐋᓂ ᑕᑦᑐᐃᓂ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎᑦᑎᔩ. ᕼᐊᓘᑉᐸᒃᑲ ᑲᖏᖅᖠᓂᕐᒥᐅᑕᐃᑦ. ᒫᓐᓇ ᐅᖃᕈᒪᓪᓗᖓ ᓗᐊᕋ ᒎᑦᑎᐊᐃᒥ ᑲᖏᖅᖠᓂᕐᒥᒃ ᑮᓇᐅᔭᖅᑖᕈᑎᐅᖃᑦᑕᖅᑐᑦ ᔫᓐ 4-ᒥ 7-ᒧᑦ. 13-ᖑᔪᑦ ᐊᕐᓇᐃᑦ ᑕᐃᒃᑯᐊ 9-ᓗ ᐊᖑᑏᑦ ᐃᓚᐅᓂᐊᖅᑐᑦ ᑕᕝᕙᓂ ᐱᒃᑯᓯᖅᔪᐊᖅᑎᓪᓗᒋᑦ, ᐊᒻᒪᓗ ᓄᓇᕗᒻᒥ ᐱᙳᐊᒃᑯᓴᐅᑎᑎᓪᓗᒋᑦ ᑕᐃᒃᑯᐊ ᐃᓚᐅᔪᑦ ᖁᕕᐊᓱᑦᑎᐊᖁᕙᒃᑲ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᑦᑕᐅᖅ. ᒪᓕᒐᓕᐅᖅᑏᑦ ᐅᖃᐅᓯᖏᑦ. ᐃᖃᓗᒃᑑᑦᑎᐊᕐᒧᑦ ᒪᓕᒐᓕᐅᖅᑎ ᐲᑕᓴᓐ. ᒪᓕᒐᓕᐅᖅᑎᐅᑉ ᐅᖃᐅᓯᖓ 62 - 7(2): ᓯᐅᓪᕕᔭ ᒍᕆᓂᐅᓪ ᒥᕐᖑᐃᖅᓯᕝᕕᕋᓛᖓ (ᐲᑕᓴᓐ) ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓪᓗᒃᑯᑦ ᐃᓘᓐᓇᓯ ᑕᐃᒃᑯᐊᓗ ᖁᙱᐊᖅᑐᐃᑦ ᐃᖃᓗᒃᑑᑦᑎᐊᕐᒥ. ᐅᖃᓚᐅᕋᒪᐃᓛᒃ, ᐱᕕᖃᕋᑦᑕ ᑰᖓ ᐃᖃᓗᐃᑦ ᐳᓛᕆᐊᕈᓐᓇᓚᐅᕋᑦᑎᒍ ᐱᓇᓱᐊᕈᓯᐅᑉ ᓄᙳᐊᓂ. ᑭᓯᐊᓂ ᑕᑯᓚᐅᕋᒃᑭᑦ ᑕᐃᒃᑯᐊ ᐳᓚᕋᑦᑎᓄᑦ ᐅᐸᒃᑕᐅᔪᒃᓴᐃᑦ ᐃᒡᓗᖃᕐᒪᑕ. ᑕᐃᒃᑯᐊ ᑕᐃᓐᓇ ᓄᓇᓯᐅᑎᓂᑦ ᐃᓂᖃᑦᑎᐊᖅᑐᖅ ᐊᓇᕐᕕᖃᖅᑐᑎᓪᓗ ᐊᒻᒪᓗᑦᑕᐅᖅ ᑕᐃᒃᑯᐊ ᐃᖅᑲᓇᐃᔭᖅᑏᓪᓗ ᓄᓇᓯᐅᑎᒃᑯᕕᖃᖅᑐᑎᑦ ᑕᐃᑲᓂ. ᑕᑉᐸᐅᖓ ᐳᓚᕋᑦᑐᓕᕆᔨᒃᑯᑦ ᐅᐸᒐᖓᓂ ᐳᓚᕋᖅᑐᑦ ᑕᑯᔪᓐᓇᕐᒪᑕ ᐊᑐᖅᑕᐅᔪᓐᓇᖅᑐᑦ ᐆᒃᑎᕕᖃᖅᑐᓂ ᐳᓪᓚᖃᖅᑐᒧᑦ, ᑕᐃᒃᑯᐊᓗ ᑐᐱᕐᕕᖃᑦᑎᐊᖅᖢᑎᑦ ᐊᒻᒪᓗᑦᑕᐅᖅ ᑕᑯᕕᔅᓴᖃᖅᑎᐊᖅᑐᓂ ᓇᓯᕝᕕᒻᒥ. ᑕᐃᒪᓐᓇ ᐊᐳᒻᒧᑦ ᐊᕗᖓᐅᔨᒃᑲᓐᓂᕈᓐᓇᓚᐅᙱᓇᒃᑯ, ᐃᒡᓗᓂᑦ ᑕᐃᒃᑯᓂᖓ ᐅᐸᒃᑕᐅᖃᑦᑕᖅᑐᑦ ᐃᒡᓗ. ᖃᐅᔨᒪᙱᑦᑐᖓ ᐊᑯᓂᐅᑎᒋᔪᖅ ᑕᐃᓐᓇ ᒥᕐᖑᐃᓯᕐᕕᐅᓕᕐᒪᖔᖅ, ᑭᓯᐊᓂ ᓱᓇᒃᑯᑎᖃᑦᑎᐊᖅᑐᑦ ᐃᖃᓗᓐᓄᑦ ᖃᓂᔅᓴᖅᖢᓂ. ᐊᒻᒪᓗᑦᑕᐅᖅ ᐊᓯᖏᓐᓄᑦ ᒥᕐᖑᐃᓯᕐᕕᓐᓄᐊᖃᑦᑕᕋᒪ ᑕᐃᑲᓂ ᖁᕐᓗᖅᑐᖅ ᖁᕐᓗᖓᓂ ᑕᐃᒃᑯᐊ ᐅᕕᖓᔪᖅ ᒥᕐᖑᐃᓯᕐᕕᓪᓗ ᑕᐃᑲᓂ ᐃᖃᓗᒃᑑᑦᑎᐊᕐᒥ. ᑕᐃᒃᑯᐊ 10 ᑭᓛᒥᑐᔅ ᐅᖓᓯᓐᓂᖃᕐᒪᑕ ᓄᓇᓕᖕᓂ. ᐃᒡᓗᖁᑎᖃᙱᑦᑎᐊᖅᑐᑦ ᖃᓄᐃᑦᑐᓂᓪᓗ ᐊᑐᖅᑐᐊᒐᒃᓴᓂᑦ ᐱᑕᖃᙱᑦᑐᖅ. ᑐᐱᕐᕕᖃᖅᑑᒐᓗᐊᖅ, ᓂᕿᓕᐅᕐᕕᖃᖅᑐᖅ, ᐊᒻᒪ ᐊᓇᕐᕕᖃᖅᖢᑎ. ᐊᒡᓚᕝᕕᖃᙱᑦᑐᓪᓘᓐᓃᑦ ᒥᕐᖑᐃᓯᕐᕕᒻᒥ ᐃᖅᑲᓇᐃᔭᖅᑏᑦ ᐊᒻᒪᓘᓐᓂᑦ ᓄᓇᓯᐅᑎᑦ ᖃᓗᕋᐅᑏᑦ ᐊᖅᑯᑎᒥ ᐊᐳᑕᐃᔭᐃᔾᔪᑎᖃᙱᑦᑐᖅ, ᐊᒃᓱᐊᓗ ᑕᐃᒪᓐᓇ ᐅᖓᓯᑦᑐᐊᓘᒻᒪᑦ ᑕᐃᒪᐃᑦᑐᓇᙱᑦᑑᒐᓗᐊᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 8 ᐅᖃᖅᑏ, ᐊᐱᖅᑯᑎᒋᓂᐊᖅᑕᕋ ᐅᓐᓄᓴ ᒥᓂᔅᑕᖓᓐᓄᑦ ᐊᕙᑎᓕᕆᔨᒃᑯᑦ ᐅᑭᐅᖅᑕᖅᑐᒥ ᓄᓇᕗᒻᒥ ᒥᕐᖑᐃᓯᕖᑦ ᐱᓪᓗᒋᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᑦᑕᐅᖅ. ᒪᓕᒐᓕᐅᖅᑏᑦ ᐅᖃᐅᓯᖏᑦ. ᐊᑐᖁᑎᖃᕈᓐᓃᕋᒪ. ᑲᑎᒪᔾᔪᑎᒃᓴᖅ 4. ᐅᖃᐅᓯᒃᑯᑦ ᐊᐱᖅᑯᑎᕕᓂᕐᓄᑦ ᐃᓚᒋᐊᕈᑏᑦ. ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᒥᓂᔅᑕ ᑕᑦᑐᐃᓂ. ᑲᑎᒪᔾᔪᑎᒃᓴᖅ 4: ᑭᐅᔾᔪᑎᑦ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᓄᑦ ᑭᐅᔾᔪᑎ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᒧᓐ 42– 7(2): ᐱᔪᓐᓇᐅᑏᓐ ᓅᑎᖅᑕᐅᓂᖏᓄᑦ (ᑕᑦᑐᐃᓂ) ᐊᖓᔪᖅᑳᖅ ᐋᓂ ᑕᑦᑐᐃᓂ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑭᒡᒍᓯᖃᕋᒪ ᐊᐱᖅᑯᑕᐅᓚᐅᖅᑐᒧᑦ 42 – 7(2), ᐊᐱᖅᑯᑎᒋᓚᐅᖅᑕᖓ ᐊᒡᒍᕐᒧᑦ ᒪᓕᒐᓕᐅᖅᑎᖓᑕ ᒪᐃ 27, 2026-ᖑᑎᓪᓗᒍ ᐱᔾᔪᑎᒋᓪᓗᒍ ᓯᐊᒻᒪᒃᑎᕆᓂᖅ. ᐅᖃᖅᑏ, ᑖᓐᓇ ᑕᑭᔪᕈᓗᒻᒪᑦ ᑭᒡᒍᓯ, ᑐᓂᓚᐅᕋᒃᑯ ᑎᑎᕋᖅᑎᒧᑦ ᐃᓕᔭᐅᓂᐊᕐᒪᑦ ᑲᑎᒪᔾᔪᑎᕕᓂᕐᓄᑦ ᐊᒻᒪᓗ ᑐᓂᐅᖅᑲᖅᑕᐅᔪᓐᓇᕐᓂᐊᕐᒪᑦ ᑲᑎᒪᔨᓕᒪᓄᑦ ᐅᖃᓕᒫᖅᑕᐅᔪᓐᓇᖅᓯᓗᓂ ᑕᐃᑲᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᒥᓂᔅᑕ ᐊᐱᕆᒻᒪᑦ ᑭᐅᔾᔪᑎᒋᔭᒥᓂᒃ ᑲᑎᒪᔾᔪᑎᕕᓂᑦᑎᓐᓄᑦ ᑎᑎᕋᖅᑕᐅᒍᓐᓇᖁᓪᓗᒋᑦ. ᐊᖏᖅᐱᓰ? ᐃᓚᖏᑦ ᒪᓕᒐᓕᐅᖅᑏᑦ: ᐊᖏᖅᑐᑦ. ᐅᖃᖅᑎ: ᖁᔭᓐᓇᒦᒃ. ᑲᔪᓯᓗᑕ. ᐅᖃᐅᓯᒃᑯᑦ ᑭᐅᔾᔪᑎᕕᓂᕐᓄᑦ ᐃᓚᒋᐊᕈᑏᑦ. ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᑭᐅᔾᔪᑎ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᒧᓐ 45– 7(2): ᒪᓕᒐᓄᑦ ᐱᔨᑦᑎᖅᑕᓄᑦ ᑲᑎᒪᔨᖏᑦ (ᕼᐃᒃᔅ) ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓪᓗᒥ ᑭᐅᓂᐊᕐᓗᖓ ᐅᖃᖅᑐᖓ ᒪᓕᒐᓕᕆᔨᒃᑯᑦ ᑲᑎᒪᔨᖏᑕ ᐃᓄᖕᓂ ᐃᖅᑲᓇᐃᔭᖅᑎᖃᖅᑐᑦ ᐱᔾᔪᑎᒋᓪᓗᒋᑦ. ᐅᖃᖅᑏ, ᒪᓕᒐᓕᐅᖅᑎ ᑖᒃᑯᓂᖓ ᐃᓄᖕᓂᑦ ᐃᖅᑲᓇᐃᔭᖅᑎᓂᑦ ᐃᖅᑲᖅᑐᐃᕕᒻᒥ ᕿᑎᕐᒥᐅᓂ ᐊᐱᖅᑯᑎᖃᓚᐅᕐᒪᑦ. ᔫᓐ 1, 2026-ᒥ, ᑕᓪᓕᒪᐅᔪᑦ ᐃᖅᑲᖅᑐᐃᕕᖕᒥ ᐃᖅᑲᓇᐃᔭᖅᑐᑦ ᕿᑎᕐᒥᐅᓂ, ᐊᑐᓂ ᐊᒡᒍᑐᖅᓯᒪᔪᓂᑦ ᓄᓇᓕᖕᓃᑦᑐᑦ ᐃᓐᓄᒃᓯᒪᔪᐃᓐᓇᐃᑦ. ᐃᖅᑲᖅᑐᐃᕕᖕᒥ ᐃᖅᑲᓇᐃᔭᖅᑏᑦ ᑕᐃᒃᑯᓂᖓ ᐃᖅᑲᖅᑐᐃᕕᖕᒥ ᐃᖅᑲᓇᐃᔭᖅᑎᓄᑦ ᐊᒻᒪ ᒪᓕᒐᓕᕆᔨᖏᓐᓄᑦ ᐃᖅᑲᓇᐃᔭᖅᑎᑖᖅᑐᑦ ᓄᓇᕗᒻᒥᓗ ᒪᓕᒐᕐᓂᑦ ᑐᑭᓯᓂᐊᕐᕕᒃ ᑲᑎᒪᔨᖏᓐᓂ ᑕᐃᒃᑯᐊ ᐊᑐᖅᑕᐅᖃᑦᑕᖅᑐᑦ ᐃᓕᓐᓂᐊᑎᑦᑎᖃᑦᑕᕆᓪᓗᑎ ᑕᐃᑲᓂ. ᐅᖃᖅᑏ, ᒪᒥᐊᓇᖅ. ᐊᐱᖅᑯᑎᐅᓚᐅᖅᑐᖅ 45 – 7(2) ᒪᐃ 27-ᖑᑎᓪᓗᒍ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᑲᑎᒪᔾᔪᑎᒃᓴᖅ 4. ᐅᖃᐅᓯᒃᑯᑦ ᑭᐅᔾᔪᑎᕕᓂᕐᓄᑦ ᐃᓚᒋᐊᕈᑏᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐳᕉᔅᑐ. ᑭᐅᔾᔪᑎ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᒧᓐ 66– 7(2): ᐃᓐᓇᑐᖃᓄᑦ ᐸᖅᑭᔭᐃᕝᕕᑦ ᐃᒡᓗᕐᔪᐊᖏᓄᑦ (ᐳᕉᔅᑐ) ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 9 ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᑭᐅᔪᒪᓪᓗᖓ ᐊᐱᖅᑯᑎᒋᓚᐅᖅᑕᓐᓄᑦ ᔫᓂ 1, 2026−ᒥ, ᐱᔾᔪᑎᖃᖅᓱᓂ ᐃᓄᑐᖃᒃᑯᕕᓐᓂᒃ ᓄᓇᖃᖅᑳᖅᓯᒪᔪᓂᓪᓗ ᓄᓇᓕᓐᓂ ᐊᐅᓚᔪᓐᓇᐅᑎᓄᑦ ᑮᓇᐅᔭᖃᖅᑎᑕᐅᓂᕐᒧᑦ. ᓄᓇᕗᑦ ᑐᙵᕕᒃ ᑎᒥᖁᑖ ᑐᓴᖅ ᑮᓇᐅᔭᓕᐅᕋᓱᐊᖅᑐᑦ $15 ᒥᓕᐊᓐᓂᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐊᐅᓚᔪᓐᓇᐅᑎᓄᑦ ᑮᓇᐅᔭᓂᒃ ᐃᑲᔪᖅᑕᐅᖁᓪᓗᒋᑦ ᓄᑖᙳᕆᐊᖅᑕᐅᓂᖏᑦ ᑲᒪᒋᔭᐅᕝᕖᑦ ᓄᓇᕗᒻᒥ. ᑖᒃᑯᓇᙵᑦ $15 ᒥᓕᐊᓐᓂᒃ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᑐᓚᐅᖅᐳᑦ $500,000−ᓂ ᐃᑲᔫᓯᐊᖅᑎᑦᓯᓂᕐᒧᑦ ᐊᖏᖃᑎᒌᒍᑎᒧᑦ ᑲᔪᓯᑎᑦᑎᔪᒪᓪᓗᑎᒃ ᐃᓪᓗᕐᔪᐊᑦ ᖃᓄᐃᓕᖓᓂᖏᓐᓂᒃ ᖃᐅᔨᓴᕐᓂᕐᒧᒃ ᐅᖅᓱᖅᑑᒥ, ᐃᒡᓗᓕᒻᒥ ᐊᕐᕕᐊᓂᓗ ᓇᓗᓇᐃᖅᓯᔪᒪᓪᓗᑎᒃ ᐱᖁᑎᓂᒃ ᐊᓯᔾᔨᖅᑕᐅᔭᕆᐊᓕᓐᓂᒃ. ᐃᒡᓗᓕᒃ, ᐅᖅᓱᖅᑑᖅ ᐊᒻᒪᓗ ᐊᕐᕕᐊᑦ ᓴᓂᕐᕙᒃᑕᐅᓯᒪᕗᑦ $5-ᒥᓕᐊᓐ ᑐᖔᓂ ᐊᑐᓂ ᓴᓇᔭᐅᒃᑲᓐᓂᕈᑎᒃᓴᓄᑦ ᐸᕐᓇᐃᔾᔪᑎᓄᓪᓗ. ᐃᓪᓗᕐᔪᐊᑦ ᖃᓄᐃᓕᖓᓂᖏᓐᓄᑦ ᖃᐅᔨᓴᐃᓂᐅᔪᑦ ᑕᒪᐃᓐᓄᑦ ᐱᖓᓱᓄᑦ ᐃᓂᒋᔭᐅᔪᓄᑦ ᐱᔭᕇᖅᑕᐅᓯᒪᓕᖅᐳᑦ. ᑕᒪᕐᒥᑦᓯᐊᖅ ᐊᖏᖅᑕᐅᓯᒪᓕᖅᐳᑦ ᐸᕐᓇᐃᓂᕐᒧᑦ, ᐱᒋᐊᕐᓗᓂ ᑕᕝᕙᓂ ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓂᑦ. ᐸᕐᓇᐃᓂᖅ ᑐᓴᖅᑎᑦᓯᓂᐊᖅᑐᖅ ᐊᖏᓪᓕᒋᐊᖅᑕᐅᑐᐃᓐᓇᕆᐊᓕᓐᓂᑦ ᐅᖅᓱᖅᑑᒥᑦ ᐃᒡᓗᓕᒻᒥᓪᓗ ᐅᓄᖅᓯᑎᑦᓯᓂᕐᒧᑦ ᓄᓇᕗᒻᒥᑦ ᐃᓐᓄᒍᓐᓇᖕᓂᖏᑦ. ᐅᓪᓗᒥᒧᑦ ᑎᑭᓪᓗᒍ, ᐊᑭᒋᓕᐊᕋᓱᒋᔭᐅᔪᖅ D−ᒥ ᖃᑦᓯᑐᕐᓂᐊᕋᓱᒋᔭᐅᔪᑦ ᐱᖓᓱᓄᑦ ᐃᓂᒋᔭᐅᔪᓄᑦ ᐋᖅᑦᒃᓱᖅᑕᐅᓯᒪᓕᖅᐳᑦ ᓴᓇᔭᐅᑲᓐᓂᕈᑎᑦᓴᓄᑦ ᓄᑖᙳᕆᐊᖅᑎᑕᐅᔪᓄᓪᓗ ᐃᑲᔪᖅᑐᐃᔪᒪᓂᕐᒧᓪᓗ ᐱᒋᐊᓕᓵᖅᑎᓪᓗᒋᑦ ᐊᖏᓪᓕᒋᐊᖅᑎᑦᓯᓂᕐᒧᑦ ᐸᕐᓇᐃᓂᕐᒧᑦ. ᐸᕐᓇᐃᓂᕐᒧᑦ ᐱᓇᓱᐊᕐᓂᐅᔪᖅ ᐱᐅᓯᒋᐊᖅᑎᑦᓯᒃᑲᓐᓂᕐᓂᐊᖅᐳᑦ ᖃᓄᖅ ᐊᖏᑎᒋᓂᖓᓂᒃ, ᖃᖓᒃᑰᕋᔭᕐᓂᖏᓐᓂᒃ, ᑮᓇᐅᔭᖃᖅᑎᑕᐅᓂᕐᒧᓪᓗ ᐱᔭᐅᔭᕆᐊᓕᓐᓂᒃ. ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᖃᖅᑎ: ᐅᖃᐅᓯᒃᑯᑦ ᑭᐅᔾᔪᑎᕕᓂᕐᓄᑦ ᐃᓚᒋᐊᕈᑏᑦ. ᐃᓪᓗᓕᕆᔨᕐᔪᐊᑯᓐᓄᑦ ᒥᓂᔅᑕ ᓚᐃᔪᓪ. ᑭᐅᔾᔪᑎ ᐅᖃᐅᓯᒃᑯᑦ ᐊᐱᖅᑯᑕᐅᓚᐅᖅᑐᒧᓐ 34– 7(2): ᐱᓕᕆᓂᖏᑦ ᓄᓇᕘᑉ ᐃᒡᓗᓕᕆᔨᕐᔪᐊᒃᑯᑦ ᑎᒥᖓᑕ (ᓚᐃᔪᓪ) ᐊᖓᔪᖅᑳᖅ ᓯᓯᐅᓪ ᓚᐃᔪᓪ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐅᓪᓗᒥ ᓇᖏᖅᓯᔪᖓ ᐃᓚᒋᐊᕈᒪᓪᓗᒍ ᑭᐅᔾᔪᑎᒋᓚᐅᖅᑕᕋ ᐊᐱᖅᓱᕐᓇᐅᑎᓪᓗᒍ ᒪᐃ 26, 2026, ᑭᐅᓪᓗᒍ ᑲᐅᑕᐅᑉ ᐊᐱᖅᑯᑎᖓ ᖃᓄᐃᓕᐅᕈᑎᖏᑕ ᒥᑦᓵᓄᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ. ᒪᓕᒐᓕᐅᖅᑎ ᐊᐱᕆᓚᐅᖅᑐᖅ ᑐᑭᓯᒋᐊᒃᑲᓐᓂᕈᒪᓪᓗᓂ ᐸᕐᓇᑕᐅᓯᒪᔪᓂᒃ ᑭᒃᑯᑐᐃᓐᓇᐃᑦ ᐊᑐᖅᑐᐊᕋᑦᓴᖏᓐᓂᒃ ᐊᒻᒪᓗ ᐃᖅᑲᓇᐃᔭᖅᑎᓄᑦ ᐃᓪᓗᑦᓴᓂᒃ 2026-27 ᐃᓪᓗᓕᐅᕐᓇᒥ, ᐃᓚᒋᔭᐅᓪᓗᑎᒃ ᓇᒥ ᐃᓪᓗᓕᐅᖅᑕᐅᓂᐊᖅᑐᑦ ᐸᕐᓇᑕᐅᓯᒪᒻᒪᖔᑕ, ᑭᓇᒃᑯᓐᓄᑦ ᓴᓇᔭᐅᓂᐊᕐᒪᖔᑕ, ᐊᑐᖅᑕᐅᓂᐊᕐᓂᖏᓪᓗ ᑲᑎᖅᓱᒐᐃᑦ ᐃᓪᓗᑦᓴᐃᑦ. ᒪᓕᒐᓕᐅᖅᑏᑦ ᐃᖅᑲᐅᒪᓂᐊᖅᑐᑦ, ᒫᑦᓯᒥ, ᑐᓴᖅᑎᑦᓯᓚᐅᕋᒪ ᓄᓇᓕᓐᓂ ᐃᓪᓗᓕᕆᓂᕐᒧᑦ ᑐᑭᓯᒋᐊᖅᑎᑦᓯᓪᓗᖓ ᐊᑐᓂᑦ ᒪᓕᒐᓕᐅᖅᑎᓄᑦ. ᑐᓴᖅᑎᑦᓯᓚᐅᕐᒥᔪᖓ ᐊᑐᓂᑦ ᓄᓇᓕᓐᓂ ᐊᒡᒍᑐᖅᑕᐅᓯᒪᓪᓗᑎᒃ ᒪᓕᒐᓕᐅᖅᑎᓕᒫᓄᑦ ᒪᓕᒐᓕᐅᕐᕕᒻᒥ ᔫᓂ 2, 2026, ᓇᓗᓇᐃᔭᐃᓪᓗᖓ ᐸᕐᓇᑕᐅᓯᒪᔪᓂᒃ ᑭᒃᑯᑐᐃᓐᓇᕐᓄᑦ ᐊᑐᖅᑐᐊᒐᑦᓴᓂᒃ ᐊᒻᒪᓗ ᐃᖅᑲᓇᐃᔭᖅᑎᓄᑦ ᐃᓪᓗᑦᓴᓂᒃ ᓴᓇᔭᐅᓂᐊᖅᑐᓂᒃ 2026-27 ᐃᓪᓗᓕᐅᕐᓇᒥ. ᐃᒡᓗᓕᕆᔨᕐᔪᐊᒃᑯᑦ ᐱᒋᐊᕈᒪᔪᑦ ᐃᓪᓗᓕᐅᕐᓂᕐᒥᒃ 167-ᓂᒃ ᓄᑖᓂᒃ ᐃᓪᓗᑦᓴᓂᒃ ᐅᑭᐊᑦᓵᖅ 92 ᐃᓪᓗᐃᑦ ᐸᕐᓇᑕᐅᓯᒪᓪᓗᑎᒃ ᓴᓇᔭᐅᒐᔪᑦᑐᓂᒃ ᕿᔪᓐᓂᒃ ᐃᓪᓗᓕᐅᖅᑕᐅᓗᑎᒃ ᐊᒥᐊᒃᑯᖏᑦ 75 ᐃᓪᓗᐃᑦ ᑲᑎᖅᓱᒐᐅᓗᑎᒃ ᐃᓪᓗᐃᑦ. 157 ᐸᕐᓇᑕᐅᓯᒪᔪᑦ ᐃᓪᓗᓕᐅᖅᑕᐅᔪᑦᓴᐃᑦ ᑭᒃᑯᑐᐃᓐᓇᕐᓄᑦ ᐊᑐᖅᑐᐊᖅᑕᐅᔪᑦᓴᐃᑦ ᐊᓯᖏᑦ ᖁᓕᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐃᓪᓗᑦᓴᐅᓗᑎᒃ. ᐃᓚᖏᑦ ᐸᕐᓇᑕᐅᓯᒪᔪᑦ ᐃᓪᓗᓕᐊᑦᓴᐃᑦ ᓱᓕ ᐊᖏᖅᑕᐅᒋᐊᓖᑦ ᓄᓇᓕᓐᓂ ᐃᓪᓗᓕᕆᔨᒃᑯᓐᓄᑦ. ᓲᕐᓗ, 12 ᐃᓪᓗᐃᑦ ᐸᕐᓇᑕᐅᓯᒪᔪᑦ ᐊᕐᕕᐊᓂ ᐊᒻᒪᓗ 58 ᐃᓪᓗᑦᓴᐃᑦ ᐸᕐᓇᑕᐅᓯᒪᔪᑦ ᐃᖃᓗᓐᓂ ᓄᓇᓕᓐᓂ ᒐᕙᒪᓄᑦ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 10 ᐃᓪᓗᓕᐅᕐᓂᕐᒧᑦ ᐱᔪᓐᓇᐅᑎᑖᖅᐸᓪᓕᐊᒍᑕᐅᒐᓱᐊᖅᑐᑦ. ᑖᒃᑯᐊ ᐃᓪᓗᓕᐊᑦᓴᐃᑦ ᓯᕗᒧᒋᐊᕈᑕᐅᒐᔭᖅᑐᑦ ᑭᓯᐊᓂ 2026 ᐃᓪᓗᓕᐅᕐᓇᒥ ᓄᓇᖏᓐᓂ ᐊᖏᖅᑕᐅᓯᒪᓕᖅᑲᑕ. ᐅᖃᖅᑎᑦᑎᔩ, ᐃᒡᓗᓕᕆᔨᕐᔪᐊᒃᑯᑦ ᐊᑲᕐᕆᔮᖅᑐᒦᑦᓯᐊᖅᑐᑦ ᐃᓪᓗᓕᐅᕐᓇᐅᓂᐊᖅᑐᒥ ᐊᐅᔭᖅ. ᑲᑎᖅᓱᒐᕐᓄᑦ ᐃᓪᓗᑦᓴᓄᑦ, ᐃᓪᓗᑦᓴᓄᑦ ᑳᓐᑐᕌᑦ ᑐᓂᔭᐅᓯᒪᓕᖅᑐᑦ, ᐅᒥᐊᕐᔪᐊᒃᑯᓪᓗ ᐃᓂᑦᓴᓕᐅᖅᑕᐅᓯᒪᓕᖅᑐᑎᒃ ᐃᓪᓗᑦᓴᐃᑦ ᑎᑭᒍᓐᓇᓛᕐᖓᑕ ᓄᓇᓕᓐᓄᑦ ᐊᐅᔭᐅᓂᐊᖅᑐᖅ. ᐃᒡᓗᓕᕆᔨᕐᔪᐊᒃᑯᑦ ᐱᒋᐊᖅᓯᓯᒪᓕᖅᑐᑦ ᐊᑭᑦᑐᕋᐅᑎᑎᑦᓯᓂᕐᒥᒃ ᑲᑎᖅᓱᒐᕐᓂᒃ ᐃᓪᓗᑦᓴᓂᒃ ᐋᖅᑭᑦᑎᕆᓂᕐᒧᑦ ᑳᓐᑐᕌᓄᑦ ᓂᕆᐅᑦᑐᑎᓪᓗ ᐃᓪᓗᑦᓴᓂᒃ ᑲᑎᖅᓱᐃᓂᐊᖅᑐᓂᒃ ᐱᔭᕇᖅᑕᐅᓗᑎᒃ ᑎᑭᓚᐅᖏᓐᓂᖏᓐᓂ 2026 ᐅᒥᐊᕐᔪᐊᖃᕐᓇᒥ. ᑖᒃᑯᐊ ᖃᑦᓯᐅᓂᖏᑦ ᐃᒡᓗᓕᕆᔨᕐᔪᐊᒃᑯᑦ ᓇᓗᓇᐃᖅᓯᒪᔭᖏᑦ ᐅᓪᓗᒥᒧᑦ. ᐃᓪᓗᓕᐅᕐᓂᕐᒧᑦ ᐸᕐᓇᐃᑎᓪᓗᒋᑦ ᓱᓕ, ᖃᖓᒃᑰᕐᓂᐊᕐᓂᖏᑦ ᐱᓕᕆᐊᓪᓗ ᓇᓗᓇᐃᖅᑕᐅᒍᑎᖏᑦ ᐊᓯᔾᔨᑐᐃᓐᓇᕆᓖᑦ ᐊᖏᖅᑕᐅᒋᐊᖃᕐᓂᖏᓐᓄᑦ, ᑎᑭᑎᑕᐅᒋᐊᖃᕐᓂᖏᓐᓄᑦ, ᑳᓐᑐᕌᓕᕆᓂᕐᒧᑦ, ᓯᓚᒧᑦ, ᐃᓂᑦᓴᖏᑦ ᖃᓄᐃᓐᓂᖏᓐᓄᑦ, ᐅᕝᕙᓘᓐᓃᑦ ᑭᓱᑐᐃᓐᓇᕐᓄᑦ ᐊᐅᓚᑦᓯᓂᕐᒧᑦ ᐊᑦᑐᐃᓂᖃᑐᐃᓐᓇᕆᐊᓕᓐᓄᑦ. ᐃᒡᓗᓕᕆᔨᕐᔪᐊᒃᑯᑦ ᐅᖃᖃᑎᖃᕐᒥᔪᑦ ᐊᓯᒃᑲᓐᓂᖏᓐᓂᒃ ᐃᓪᓗᓕᐅᕐᓂᐅᒐᔭᖅᑐᑦ ᐱᓪᓗᒋᑦ, ᑲᑎᓕᒫᖅᑐᒋᑦ ᖃᑦᓯᐅᓂᖏᑦ ᐃᓪᓗᓕᐅᖅᑕᐅᓂᐊᖅᑐᑦ ᐊᓯᔾᔨᑐᐃᓐᓇᕆᐊᓖᑦ. ᑐᓴᖅᑎᑦᓯᒋᐊᖃᑦᑕᕐᓂᐊᖅᑐᖓ ᑐᓴᖅᑕᐅᒋᐊᓕᓐᓂᒃ ᒪᓕᒐᓕᐅᖅᑎᓄᑦ ᑐᓴᕋᑦᓴᐃᑦ ᓇᓗᓇᐃᖅᑕᐅᓯᒪᓕᕋᐃᑉᐸᑕ. (ᑐᓵᔨᑎᒎᕈᓐᓃᖅᑐᖅ) ᖁᐊᓇ, (ᑐᓵᔨᑎᒎᓕᖅᑐᖅ) ᐅᖃᖅᑎᑦᑎᔩ. ᐅᖃᖅᑎ: ᑲᑎᒪᔾᔪᑎᑦᑕ ᓈᓴᐅᑎᖓ 5. ᐳᓛᕆᐊᓯᒪᔪᓂᑦ ᐃᓕᑕᖅᓯᓂᖅ. ᑲᔪᓯᒃᑲᓂᕐᓗᑕ. ᑲᑎᒪᔾᔪᑎᒃᓴᖅ 6. ᐅᖃᐅᓯᒃᑯᑦ ᐊᐱᖅᑯᑏᑦ. ᒪᓕᒐᓕᐅᖅᑎ ᐅᖅᑯᕐᒥᐅᓄᑦ, ᒥᔅᑕ ᑲᐅᑐᒃ. ᑲᑎᒪᔾᔪᑎᒃᓴᖅ 6: ᐅᖃᐅᓯᒃᑯᑦ ᐊᐱᖅᑯᑎᑦ ᐊᐱᖅᑯᑦ 78 – 72): ᑭᒃᑯᓕᒫᓄᑦ ᐊᒻᒪ ᖁᑭᐅᑎᓄᑦ ᐅᓗᕆᐋᓇᔾᔭᐃᒃᑯᑎᓄᑦ (ᑲᐅᑐᖅ) ᑲᐅᑐᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᐱᖅᑯᑎᒃᑲ ᐅᓪᓗᒥ ᑐᕌᖅᑎᓂᐊᖅᑕᒃᑲ ᒥᓂᔅᑕᖓᓄᑦ ᒪᓕᒐᓕᕆᔨᒃᑯᑦ ᐱᔾᔪᑎᖃᖅᑐᖅ ᖁᑭᐅᓯᕆᓂᕐᒧᑦ ᐊᑦᑕᓇᔾᔭᐃᖅᓯᒪᔾᔪᑏᑦ ᕿᑭᖅᑕᕐᔪᐊᒥ ᑲᖏᖅᖢᒑᐱᒻᒥᓗ. ᒪᓕᒐᓕᐅᖅᑎᐅᓪᓗᖓ, ᐅᖃᖅᑏ, ᑭᒡᒐᖅᑐᐃᓪᓗᖓ ᐅᖅᑯᕐᒥᐅᓄᑦ, ᓴᙱᔪᒃᑯᑦ ᐊᔭᐅᖅᑐᐃᒐᒪ ᖁᑭᐅᑏᑦ ᐊᑦᑕᓇᔾᔭᐃᖅᓯᒪᖁᓪᓗᒋᑦ ᓄᓇᕗᑦ ᓄᓇᓕᖁᑎᖏᓐᓂ ᐱᖃᓯᐊᑐᓗᒋ ᑲᖏᖅᖢᒑᐱᒃ ᕿᑭᖅᑕᕐᔪᐊᕐᓗ. ᐅᖃᖅᑏ, ᒫᓐᓇᐅᓂᖓᓂ ᐱᕕᖃᕐᓂᓐᓂ, ᑎᓕᐅᕈᒪᔭᒃᑲ ᑕᐃᒃᑯᐊ ᓂᕈᐊᖅᑎᒋᓯᒪᔭᒃᑲ ᐱᓕᕆᐊᒃᓴᒥᓐᓂᒃ ᐱᓕᕆᓗᑎᑦ ᐊᑦᑕᓇᙱᑦᑐᒦᑐᐃᓐᓇᐅᖁᓪᓗᒋᑦ ᓄᓇᓖᑦ. ᑎᓕᐅᖅᐸᒃᑲ ᓄᓇᖃᖅᑐᑦ ᖁᑭᐅᑎᒧᑦ ᑮᒍᑎᓂᑦ ᐊᑐᖃᑦᑕᖁᓪᓗᒋᑦ ᐊᒻᒪ ᑮᔅᓯᒪᔪᓂ ᐃᓂᖃᖅᑎᑕᐅᖃᑦᑕᖁᓪᓗᒋᑦ ᖁᑭᐅᑏᑦ. ᒪᐃ 31, 2023-ᖑᑎᓪᓗᒍ, ᓄᓇᕗᑦ ᒥᓂᔅᑕᖓ ᒪᓕᒐᓕᕆᔨᒃᑯᑦ - ᐸᓖᓯᒃᑯᓪᓗ ᐊᖓᔪᖅᑳᖏᑦ ᐅᓂᒃᑳᓚᐅᕐᒪᑕ ᖃᓄᐃᓕᐅᕆᐊᖃᕐᒪᖔᑕ ᑎᑎᖅᑲᓂᑦ 2022-2025 ᒪᓕᒐᓕᐅᕐᕕᖕᒥ ᓴᖅᑭᑕᐅᓪᓗᑎ. ᑖᒃᑯᐊ ᓇᒧᙵᐅᓂᐊᕐᓂᖏᓐᓂ ᓇᓗᓇᐃᖅᓯᓯᒪᔪᑦ ᑕᓪᓕᒪᓂᑦ ᓯᕗᓪᓕᐅᔾᔭᐅᓯᒪᔪᓂᑦ, ᐱᕋᔭᒃᐸᑦᑐᓂᑦ ᐃᓄᐃᓴᓪᓕᒋᐊᖅᑎᑦᑎᖁᓪᓗᒍ. ᒥᓂᔅᑕ ᖃᖓᒃᑯᑦ ᓴᖅᑭᑦᑎᓂᐊᕐᒪᖔᖅ ᓄᑖᓂᑦ ᑕᒪᒃᑯᓂᖓ ᑎᓕᓯᔾᔪᑎᓂᑦ ᐅᓂᒃᑳᕈᓐᓇᕐᒪᖔᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᒪᓕᒐᓕᕆᔨᒃᑯᓐᓄᑦ, ᒥᓂᔅᑕ Hᒃᔅ. ᐊᖓᔪᖅᑳᖅ ᔪᐊᔾ Hᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓕᔭᕋ ᒪᓕᒐᓕᐅᖅᑎ ᑖᓱᒥᖓ ᖃᐅᔨᒍᒪᖕᒪᑦ. ᐱᒻᒪᕆᐊᓘᓱᒋᒐᒃᑯᑦᑕᐅᖏᓛᒃ ᑐᓴᖅᑕᐅᑎᖃᑦᑕᕈᑦᑎᒍ ᖃᓄᖅ ᓂᕆᐅᕝᕕᖃᕐᒪᖔᑕ ᐸᓖᓯᒃᑯᓐᓂᑦ ᐊᒻᒪᓗ ᖃᓄ ᐸᓖᓯᒃᑯᑦ ᓂᕆᐅᕝᕕᖃᕐᒪᖔᑕ ᐅᕙᑦᑎᓐᓂ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 11 ᐱᓕᕆᐊᕇᓇᖅᑕᕗᑦ ᑕᒪᓐᓇ ᐅᖃᖅᑏ, ᑕᐃᖕᓇ ᓯᕗᒧᑦ ᐊᑕᐅᑦᑎᑰᖃᑎᖃᕈᒪᓂᖅ. ᕿᒥᕐᕈᐊᖃᐊᖃᑦᑕᖅᑐᒍᑦ ᐊᒥᓱᐊᓗᖕᓂᑦ ᐃᓗᐊᓂ ᐊᓪᓚᕕᑦᑕ ᖃᓄᖅ ᐱᓕᕆᔨᐅᒋᐊᖃᒪᖔᑦᑕ ᑖᒃᑯᐊ ᑎᑎᕋᖅᑕᐅᓪᓗᑎᒃ ᓴᕿᕈᓐᓇᒡᓛᓕᖅᑕᕗᑦ ᑭᓯᐊᓂ ᖃᖓᐅᓛᕐᒪᖔᑦ ᐅᖃᕈᓐᓇᖏᑲᓚᐅᖅᑐᖓ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᒥᑦ ᐃᓚᒋᐊᕈᑎ, ᒪᓕᒐᓕᐅᖅᑎ ᑲᐅᑐᒃ. ᑲᐅᑐᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ, ᖁᔭᓐᓇᒦᒡᓗ ᒥᓂᔅᑖ ᑭᐅᒐᕕᖓ. ᐅᖃᖅᑏ, ᑖᓱᒪ ᐱᓕᕆᕕᐅᑉ ᖁᑭᐅᑎᓕᕆᑦᑎᐊᕐᓂ ᓄᓇᕗᒻᒥ, ᖁᑭᐅᓯᔭᑦᑎᐊᕐᓂᒧᑦ ᐃᓕᓴᑎᑦᑎᓂᐅᔪ ᓴᖅᑭᔮᖅᑎᑎᖃᑦᑕᕐᒪᑕ ᖃᓄ ᖁᑭᐅᓯᔭᑦᑎᐊᕈᓐᓇᕐᒪᖔᑕ ᓄᓇᕗᒻᒥᑦ. ᑐᑭᓯᒃᑲᕈᑎᒃᓴᐃᑦ, ᓴᕿᑕᐅᓯᒪᔪᑦ ᑖᓱᒧᖓ ᐱᓕᕆᕕᐅᔪᒧᑦ ᐅᖃᓕᒡᒪᕐᓗᒋᑦ: “ᖁᑭᐅᑎᓂᑦ ᐊᑦᑕᕐᓇᖅᑐᒦᑕᐃᓕᑎᑦᑎᓂ ᑲᑐᔾᔨᖃᑎᖃᕐᐸᖕᒪᑕᒡᒎ ᖁᑭᐅᑎᒥ ᐊᑦᑕᕐᓇᑐᒦᑦᑕᐃᓕᑎᑦᑎᔩᓄᑦ, ᐊᒻᒪᑦᑕᐅ ᐃᓵᒃᓯᒪᒋᑦ ᐃᓅᓯᒃᑯᓐᓄᑦ ᑲᑎᒪᔨᖏᓐᓄᑦ, ᓄᓇᓕᖕᓄᑦ ᐃᖅᑲᖅᑐᐃᔨᕋᓛᓄᑦ ᐊᒻᒪ ᐊᓐᓂᐊᖅᑕᐃᓕᕆᔨᒃᑯᓪᓗ ᐃᓕᓐᓂᐊᖅᑐᓕᕆᔨᒃᑯᓪᓗ, ᐱᕈᕐᕕᒃᑯᓪᓗ ᐃᓕᓐᓂᐊᕐᕕᐅᖃᑦᑕᕐᓯᒪᖕᒪᑕ, ᐃᓕᓴᑎᑦᑎᓯᓐᓈᑦ ᖃᐅᔨᑎᑦᑎᒐᓱᐊᖅᖢᑎᓪᓗ ᑭᓱᓂᑦ ᖃᐅᔨᒪᔭᕆᐊᖃᕐᒪᖔᑕ ᓄᓇᕗᒥᑦ ᓄᓇᓕᖕᓂᑦ.” ᒥᓂᔅᑕ ᓇᓗᓇᐃᖅᓯᔪᓐᓇᖅᐹ ᖃᖓ ᖁᑭᐅᑎᓕᕆᓂᕐᒧᑦ ᓚᐃᓴᑖᕈᓐᓇᓛᕐᒪᑕ ᐃᓕᓐᓂᐊᖅᑎᑕᐅᓛᖃᑦ ᑲᖏᖅᑐᒑᐱᖕᒥᑦ ᕿᑭᖅᑕᕐᔪᐊᒥᓗ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ Hᒃᔅ. ᐊᖓᔪᖅᑳᖅ ᔪᐊᔾ Hᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒪᓕᒐᓕᐅᕐᑏᑦ ᖃᐅᔨᒪᖕᒪᑕ, ᑖᓐᓇ ᐃᖃᓇᐃᔮ ᐅᖃᐅᓯᕆᔭᕗᑦ ᐃᑲᔪᕐᓂᐊᖅᑯᑐ ᖁᑭᐅᑎᓕᕆᓂᕐᒥᑦ ᐃᓕᓐᓂᐊᑎᑦᑎᓂᐅᖃᑦᑕᖅᑐᓄᑦ ᐃᓚᖃᕐᓗᒍᐃᓛ. ᑕᖅᑮᒃ ᒪᕐᕉ ᐊᓂᒍᓕᖅᑑᒃ, ᒫᔨᐅᑎᓪᓗᒍ, ᕿᑭᖅᑕᕐᔪᐊᒥᑦ ᐃᓕᓐᓂᐊᖅᑎᑕᐅᕋᑖᓚᐅᕐᒥᔪᑦ ᖁᑭᐅᑎᓕᕆᓂᕐᒥᑦ, ᖃᐅᔨᒋᐊᒃᑲᓐᓂᕆᐊᖃᕐᓂᐊᖅᑐᖓ ᖃᖓ ᐊᕿᒃᑕᐅᓯᒪᖕᒪᖔ ᑲᖏᖅᑐᒑᐱᖕᒧᓛᕐᓗᑎ, ᑕᐃᒫ ᖁᑭᐅᑎᑖᕈᓐᓇᐅᑎᑖᕋᓱᖃᑦᑕᖓᑕ ᑕᕝᕘᓇ, ᐊᒻᒪ ᓇᐃᒡᓇᕐᓯᒪᔪᓂᓂᒡᓚᒃ ᑐᓵᔩᑦ ᑐᓴᕈᒪᓗᐊᓲᖑᖏᒻᒪᑕ. ᐄᖑᒐᓗᐊᖅ ᖁᔭᓇ. ᐅᖃᖅᑏ, ᑲᔪᓯᒋᐊᖅᑎᓪᓗᑕ, ᐃᖃᓇᐃᔮᖅᑖᑐᖃᖅᓯᒪᓕᖅᑐ ᒫᓐᓇᕋᑖᖑᔪᔪ ᐃᖃᓇᐃᔮᖅᑕᖅᑐᖃᔪᔪ ᓄᓇᓕᓕᒫᓂ ᐃᑲᔪᕋᓱᖕᓂᐊᖅᑐ ᖃᐅᔨᒪᒋᐊᓕᖏᓐᓂ ᖁᑭᐅᑎᑖᑐᖅᓯᐅᑎᖏᓐᓂᓗ ᐸᐃᑉᐹᖏᓐᓂ. ᐱᒍᓐᓇᖅᓯᓛᖓᑕ ᒪᓕᒐᓕᐅᖅᑎ ᐅᖃᖃᑎᒋᒃᑲᓐᓂᕈᓐᓇᖅᑕᕋ ᐊᐱᖁᑎᒃᓴᖃᒃᑲᓐᓂᖃ ᐃᓱᒫᓗᑎᒃᓴᖃᒃᑲᓐᓂᕐᑲᓪᓘᓐᓃᑦ ᖃᓄ ᐃᖃᓇᐃᔮ ᐊᐅᓚᓂᐊᕐᒪᖔ, ᑭᓯᐊᓂ ᐃᓐᓄᒃᑕᐅᓯᒪᓕᖅᑐ, ᐊᑐᓕᕐᑎᑎᕙᓪᓕᐊᒐᓱᖕᓂᐊᓕᕐᑐᒍᑦ ᐱᔨᑦᑎᕋᐅᑎᒃᑲᓐᓂᐅᔪᓂᑦ ᓄᓇᕗᒻᒥᑦ ᖁᑭᐅᑎᑕᕈᓇᓂᕐᓴᐅᓛᖓᑕ ᐊᒻᒪ ᒪᓕᒐᕐᓂ ᒪᓕᑦᑎᐊᕐᓗᑎ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ (ᑐᓵᔨᑎᒍᑦ): ᖁᔭᓐᓇᒦᒃ. ᒪᓕᒐᓕᐅᖅᑎ ᑲᐅᑐᒃ. ᑲᐅᑐᒃ (ᑐᓵᔨᑎᒍᑦ): ᖁᔭᓐᓇᒦᒃ ᐅᖃᖅᑏ, ᒥᓂᔅᑕᓗ ᑭᐅᒐᕕᖓ. ᐅᖃᖅᑏ, ᒥᓂᔅᑕᑦᑕᐅᖅ ᐃᖃᐅᒪᖕᒪᑦ ᐊᐃᐳᕈᓪ 2ᖑᑎᓪᓗᒍ, 2026, ᐊᑎᓕᐅᓚᐅᖅᓯᒪᖕᒪᑦ ᑎᑎᖃᒥᑦ, ᑲᑐᔾᔨᖃᑎᖃᖅᑐᑎ ᒥᓂᔅᑕᐅᔪᒥ ᒪᓕᒐᓕᕆᓂᕐᒧᑦ ᓄᓇᑦᓯᐊᕐᒦ, ᓄᓇᑦᓯᐊᒧᑦ ᔫᑳᓐᒧᓪᓗ, ᑐᕋᖓᓪᓗᑎ ᒐᕙᒪᑐᖃᒃᑯ ᒥᓂᔅᑕᖓ ᐊᑦᑕᕐᓇᖅᑐᓕᕆᓂᕐᒧᑦ ᑳᓇᑕᒥᑦ. ᐅᖃᖅᑏ, ᑎᑎᖃᐃᑦ ᑕᐃᒃᑯᐊ ᐱᖓᓱᓂᖔᖅᑐᑦ ᒥᓂᔅᑕᓂᑦ ᒪᓕᒐᓕᕆᓂᕐᒧᑦ ᐅᖃᖅᓯᒪᔪᖕᒪᑕ ᐅᖃᓕᒫᕐᓗᒋᑦ:

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 12 “ᑎᑎᕋᖅᑯᒍᑦ ᐃᓱᒫᓗᓪᓚᕆᒃᑐᐊᓘᓂᕋᓗᑕ ᐅᖃᕈᒪᒐᑦᑕ ᑳᓇᑕᒥᑦ ᖁᑭᐅᑎᓕᕆᓂᕐᒧᑦ ᐊᑐᐊᒐᐅᔪᒥᒃ ᐅᑭᐅᖅᑕᑦᑐᒥᐅᑕᐃᓪᓗ ᐃᓅᓯᖏᓐᓂ ᐊᒃᑐᖅᓯᒪᑲᓂᐅᓴᖕᒪ ᑖᒃᑯᐊ ᖁᑭᐅᓯᔭᖏᑎᑦᑎᔪᐃᑦ ᓇᓗᓇᐃᕐᑕᐅᓯᒪᔪᓂᑦ ᐃᓱᒪᖏᒋᐊᓯᒪᖏᑦᑎᐊᖓᑕ ᐅᑭᐅᖅᑕᖅᑐᒥᐅᑕᓂ ᑳᓇᑕᒥ ᑕᐃᒫ ᑕᕙ ᐊᓯᐊᒎᕕᖃᖁᖏᓚᒍᑦ ᑖᓐᓇ ᒐᕙᒪᑐᖃᒃᑯᑦ ᖁᑭᐅᑎᓂ ᑐᓂᓯᔪᖃᕋᐃᑉᐸ ᐊᑭᓖᓂᕐᒧᑦ ᑲᔪᓯᖁᓪᓗᒋᑦ ᐊᒻᒪᑕᐅ ᐊᑦᑕᓇᑕᐃᓕᖁᓪᓗᒋᑦ ᐊᕿᑎᕈᖁᓪᓗᒋᑦ ᐊᑦᑕᓇᑐᒥᑕᐃᓕᖁᓪᓗᒋ ᐅᑭᐅᑕᖅᑐᒧᑦ ᒥᓂᔅᑕ ᓇᓗᓇᐃᓯᒍᓐᓇᖃ ᐱᓕᕆᕕᖓ ᓱᓂᐊᕐᒪᖔ ᑲᑐᔾᔨᖃᕐᓗᑎ ᒐᕙᒪᖓᓂᒃ ᔫᑳᓐ ᐊᒻᒪ ᓄᓇᑦᓯᐊᖅ ᐊᑦᑕᓇᖅᑐᓕᓂᕐᒧᑦ ᓇᓖᕌᕋᔅᓴᓂᒃ ᐊᑑᑎᖃᕐᓂᖅᓴᐅᔪᓂᒃ ᐅᑭᐅᖅᑕᖅᑐᒥᐅᑕᕐᓄᑦ ᓴᖅᑭᖅᓯᖁᓪᓗᒋᑦ?” ᖁᔭᓐᓇᒦᒃ ᐅᖃᖅᑎ. ᐅᖃᖅᑎ: ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ, ᖁᔭᓐᓇᒦᑦᑕᐅᖅ ᑲᑎᒪᔨ ᐊᐱᖅᓱᕐᖓᑦ ᑕᐃᒫᒃ. ᐃᓛᒃ ᐱᒻᒪᕆᐊᓘᒍᒋᒐᒃᑯᑦᑕᐅᖅ ᐃᓕᓴᖅᓯᒍᑦᑕ ᐋᖅᑭᔅᓯᔪᖃᕋᐃᒻᒪᑦ ᐊᑐᐊᒐᕐᓂᓗ ᐋᖅᑭᔅᓯᔪᖃᕋᐃᒻᒪᑦ ᖃᓪᓗᓈᓂ ᒐᕙᒪᖃᕐᕕᐅᔪᓂ. ᐃᓱᒪᖃᖅᓯᒪᓪᓚᕆᓲᖑᙱᒻᒪᑕ ᖃᓄᖅ ᐊᑦᑐᖅᓯᓂᐊᕐᒪᖔᑕ ᐅᑭᐅᖅᑕᖅᑐᕐᒥᐅᑕᕐᓂᒃ ᐊᒻᒪ ᐃᓚᒌᓂᒃ. ᑕᐃᒫᒃ ᐃᓛᒃ ᓇᓗᓇᙱᑦᑕᐅᑎᒋᒻᒪᑦ ᐅᓇᑕᖅᑐᖅᓯᐅᑎᐊᓘᔮᖅᑐᓂ ᖁᑭᐅᑎᑕᖃᕆᐊᖃᙱᒃᑲᓗᐊᕐᖓᑦ. ᑕᐃᒫᓪᓗ ᐃᓚᖏᑦ ᖁᑭᐅᑏᑦ ᐃᓱᒪᖅᓲᑕᐅᖃᑦᑕᕆᐊᖃᙱᒻᒪᑕ, ᑖᓐᓇᓗ ᒪᓕᒐᓕᐊᖑᓯᒪᔪᖅ ᐊᑦᑐᖅᓯᓪᓚᕆᑦᑐᐊᓘᓂᐊᖅᑐᖅ ᐊᖑᓇᓱᓲᓄᑦ ᐊᖏᔫᑎᓂᑦ ᓇᓄᕐᓂᑦ ᐊᐃᕕᕐᓂᑦ ᒪᑯᓂᖓᕈᓘᔭᖅ. ᐄ’, ᐊᖑᓇᓱᖁᑎᑦᑕ ᐊᑐᓪᓚᕆᑦᑖᓗᒋᖃᑦᑕᕐᖓᒋᑦ ᑕᐃᒃᑯᐊ. ᒥᓂᔅᑕ ᓵᓐᒍᕆᓗ ᐅᖃᖃᑎᒌᓯᒪᓪᓗᒍ ᐅᑭᐅᖅᑕᖅᑐᒥᓗ ᒪᓕᒐᓕᐅᖅᑎᐅᖃᑎᒃᑲ ᐊᖏᖃᑎᒋᓪᓗᒋᑦ. ᑲᓇᑕᓕᒫᒥ. ᑎᑎᖅᑲᐅᓯᐊᕋᑖᖅᑲᐅᒻᒥᒐ ᐅᓪᓛᖅ ᐊᓯᐊᓂᒃ ᒐᕙᒪᖃᕐᕕᐅᔪᒥ ᑕᐃᒪᐃᑦᓴᐃᓐᓇᖅᑐᓂᒃ ᐊᔾᔨᖏᓐᓂᒃ ᐃᓱᒫᓘᑎᓂᒃ ᐅᖃᐅᓯᖃᕋᓱᑦᑐᐃᑦ, ᐅᓇᓂ ᐱᕈᖅᓰᕕᒻᒥᐅᑕᐅᒐᓗᐊᖅᑎᓪᓗᒋᑦ. ᐅᖃᐅᓯᐅᕙᓪᓕᐊᖏᓐᓇᕐᖓᑦ ᑖᓐᓇ ᐊᒻᒪᓗᑦᑕᐅᖅ ᐃᓱᒪᒋᔪᓐᓇᐃᖅᑕᐅᕕᔅᓴᖓ ᓱᓕ ᐊᓂᒍᙱᒻᒪᑦ. ᖃᐅᔨᒪᑦᑎᐊᕈᒪᒐᑦᑕᐃᓛᒃ ᐱᕋᔭᑦᑐᒥᓂᐅᓕᖁᓇᒋᑦ ᐊᖑᓇᓱᑦᑎᖁᑎᕗᑦ ᖁᑭᐅᑎᖃᕐᓂᖏᓐᓄᑦ. ᑕᐃᒫᓪᓗ ᐃᓱᒪᒐᑦᑕ ᐃᓚᖏᑦ ᐃᓛᒃ ᖁᑭᐅᑏᑦ ᐱᒋᔭᐅᒋᐊᖃᙱᓐᓂᕋᖅᑕᐅᔪᐃᑦ ᐱᒋᔭᐅᒍᓐᓇᖅᑐᒋᒐᓗᐊᕋᑦᑎᒍᑦ ᒫᓂ. ᑕᐃᒫᓪᓗ ᑕᐅᒃᑯᐊ ᒪᓕᒐᓕᐅᕋᐃᑉᐸᑕ ᖃᓄᖅ ᐊᑦᑐᖅᓯᒻᒪᖔᑕ ᒫᓂᒥᐅᓂᒃ ᖃᐅᔨᒪᓂᖅᓴᐅᖃᑦᑕᖁᓇᖅᑑᒐᓗᐊᖅ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᐊᒡᒍᒧᑦ ᒪᓕᒐᓕᐅᖅᑎ, ᐊᑕᒍᑦᑖᓗᒃ. ᐊᐱᖅᑯᑦ 79 – 72): ᐃᓐᓇᑐᖃᓄᑦ ᐸᖅᑭᔭᐃᕝᕕᑦ ᐃᒡᓗᕐᔪᐊᖏᓄᑦ (ᐊᑕᒍᑦᑖᓗᒃ) ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᐱᖅᑯᑎᒃᑲ ᑐᕌᖓᙳᓱᑦᑐᐃᑦ ᐋᓐᓂᐊᖅᑕᐃᓕᓕᕆᔨᒃᑯᑦ ᒥᓂᔅᑕᖓᓄᑦ. ᐱᒋᐊᖅᑳᕈᒪᔪᖓ ᖁᔭᓐᓇᒦᖅᑳᕐᓗᒋᑦ ᐊᔅᓱᕈᖅᑐᐊᓘᓪᓗᑎᒃ ᐃᖅᑲᓇᐃᔭᖃᑦᑕᖅᑐᐃᑦ ᐃᓪᓗᓕᒻᒥ ᐸᖅᑭᑦᑎᕕᐅᔪᒥ. ᐊᔅᓱᕈᖅᐸᒻᒪᑕ ᐱᓕᕆᓪᓗᑎᒃ ᐃᓐᓇᑐᖃᓕᕆᓪᓗᑎᒃ. ᒥᓂᔅᑕᑦᑕᐅᖅ ᐃᖅᑲᐅᒪᒻᒪᑦ ᓄᓇᕗᑦ ᑐᙵᕕᒃᑯᑦ ᑐᓴᖅᑕᐅᑎᑦᑎᔪᒻᒪᑕ ᕕᕗᐊᕆ 2025ᒥ, ᐃᒪᐃᒃᑲᔭᕐᖓᑕᒎᖅ, “ᑐᓂᓯᓛᖅᑐᒎᖅ $500,000ᓂᒃ ᐃᓪᓗᓂᒃ ᖃᓄᐃᙱᒃᑲᓗᐊᕐᒪᖔᑕ ᖃᐅᔨᓴᕈᑎᔅᓴᐅᔪᓂᒃ ᒫᓐᓇᓕᓴᐅᓂᖅᓴᐅᔪᓂᒃ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 13 ᐸᖅᑭᑦᑎᕕᐅᕕᓐᓂ ᐅᖅᓱᖅᑑᕐᒥ ᐃᓪᓗᓕᒻᒥᓗ. ᐊᒻᒪᓗᑦᑕᐅᖅ ᓴᓇᒋᐊᖅᑐᖃᓚᐅᙱᓐᓂᖓᓂᒃ ᐋᖅᑭᒋᐊᖅᓯᖃᑦᑕᕐᓗᑎᒃ ᐊᓯᓐᓂᑦᑕᐅᒋᐊᖃᓛᖅᑐᓂᒃ. ᑮᓇᐅᔭᑦ ᐊᑐᖅᑕᐅᓂᐊᕐᒥᔪᒡᒎᖅ ᒪᑭᒪᒍᓐᓇᕋᔭᕐᒪᖔᑦ ᖃᐅᔨᓴᕈᑕᐅᓪᓗᑎᒃ ᐊᖏᓪᓕᒋᐊᖅᑕᐅᑉᐸᑕ ᑖᒃᑯᐊ ᐃᓪᓗᐃᑦ. ᓄᓇᕗᑦ ᑐᙵᕕᒃ ᑐᒥᖓ ᐊᒻᒪᓗ ᓄᓇᕗᑦ ᒐᕙᒪᖓ ᑕᒪᒃᑯᓂᖓᒎᖅ ᖃᐅᔨᓴᖃᑦᑕᓂᐊᕐᖓᑕ ᑲᑐᔾᔨᓗᑎᒃ ᐊᒻᒪᑦᑕᐅᖅ ᑲᑐᔾᔨᓗᑎᒃ ᑮᓇᐅᔭᐃᔭᕐᓂᕆᒐᔭᖅᑕᖏᓐᓄᑦ ᐊᒥᐊᒃᑯᖏᓐᓄᑦ $99.5-ᒥᓕᐊᓄᑦ ᐋᖅᑭᔅᓯᓗᑎᑦ.” ᒥᓂᔅᑕ ᐅᓪᓗᒥ ᓇᓗᓇᐃᖅᓯᒍᓐᓇᓕᖅᑳ ᖃᓄᐃᓕᖓᓕᕐᒪᖔᑦ ᑖᓐᓇ ᐱᓕᕆᐊᖑᔪᖅ ᐱᔾᔪᑎᒋᓪᓗᒍ ᐃᓪᓗᓕᒻᒥ ᐸᖅᑭᑦᑎᕕᐅᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎ. ᐃᓪᓗᑦ ᖃᓄᐃᒻᒪᖔᑕ ᖃᐅᔨᓴᕐᓂᐅᔪᑦ ᐱᖓᓱᓂᒃ ᖃᐅᔨᓴᕇᖅᑕᐅᓯᒪᓕᖅᑐᐃᑦ ᑕᐃᒃᑯᐊ. ᐸᕐᓇᑕᐅᓕᖅᑐᖅ ᑕᕝᕙᓂ ᑮᓇᐅᔭᓕᕆᔾᔪᑏᑦ ᐊᕐᕌᒍᖓᓂ ᓴᓇᒋᐊᖅᑕᐅᓂᐊᕐᓗᑎᒃ ᐊᖏᓪᓕᒋᐊᖅᑕᐅᓂᐊᕐᓗᑎᒃ ᐅᖅᓱᖅᑑᕐᒥ ᐃᓪᓗᓕᒻᒥ ᐸᖅᑭᑦᑎᕕᐅᔪᓂᒃ ᐊᒥᓲᓂᖅᓴᓄᑦ ᓇᔪᖅᑕᐅᒍᓐᓇᖃᑦᑕᓛᕐᖓᑕ. ᑖᒃᑯᐊ ᐸᕐᓇᐅᑎᓕᐅᕈᔾᔭᐅᓯᒪᓕᖅᑐᑦ ᓄᑖᕈᕆᐊᖅᑕᐅᓛᓕᕐᓗᑎᓪᓗ ᐊᖏᓪᓕᒋᐊᖅᑕᐅᓗᑎᓪᓗ. ᐊᒻᒪᑦᑕᐅᖅ ᐱᕕᖃᖅᑎᑕᐅᒃᑲᓐᓂᕐᒥᓗᑎᒃ ᖃᐅᔨᓴᖅᑕᐅᒍᓐᓇᕐᓗᑎᒃ ᐱᓕᕆᐊᖑᒃᑲᓐᓂᕆᐊᖃᙱᒃᑲᓗᐊᕐᒪᖔᑕ. $5,000,000 ᐊᑎᑦᑎᐊᖓᓂᑦ ᑐᕌᖅᑎᑦᑎᓯᒪᔪᒍᑦ ᑖᔅᓱᒧᖓ. ᖁᔭᓐᓇᒦᒃ, ᐅᖃᖅᑎ. ᐅᖃᖅᑎ: ᓯᕗᓪᓕᖅᐹᒥ ᐃᓚᒋᐊᕈᑏᑦ ᐊᐱᕆᒍᒃ, ᒥᔅᑕ ᐊᑕᒍᑦᑖᓗᒃ. ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒥᓂᔅᑕ ᓇᓗᓇᐃᖅᓯᒍᓐᓇᓕᖅᑲ ᐅᓪᓗᒥ ᖃᓄᐃᓕᖓᓕᕐᒪᖔᑦ ᐃᖅᑲᓇᐃᔭᖅᑎᑖᖅᑎᑕᐅᒐᓱᓐᓂᖓ ᐃᓪᓗᓕᒻᒥ ᐸᖅᑭᑦᑎᕕᐅᔪᖅ, ᐃᓐᓇᒃᑯᕕᐅᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᓪᓗᓕᒻᒥ 39-ᓂᒃ ᐃᖅᑲᓇᐃᔭᖅᑎᖃᖅᑐᑦ ᐊᒻᒪ 35 ᐃᓅᓪᓗᑎᒃ, 88%ᖑᔪᑦ ᐃᓅᔪᐃᑦ. ᖁᔭᓐᓇᒦᒃ, ᐅᖃᖅᑎ. ᐅᖃᖅᑎ: ᑐᒡᓕᐊᓂ ᐊᒻᒪᓗ ᑭᖑᓪᓕᖅᐹᖅ ᐃᓚᒋᐊᕈᑏᑦ ᐊᐱᕆᒍᒃ, ᒥᔅᑕ ᐊᑕᒍᑦᑖᓗᒃ. ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒥᓂᔅᑕᑦᑕᐅᖅ ᐃᖅᑲᐅᒪᒻᒪᑦ ᐱᓕᕆᕕᖓ ᑐᓴᖅᑕᐅᑎᑦᑎᔪᒻᒪᑦ ᑎᓴᒻᐸ 2025ᖑᑎᓪᓗᒍ ᐅᖃᐅᓯᖃᖅᑐᓂ ᓄᑖᖑᔪᓂᒃ ᐃᓐᓇᒃᑯᕕᐅᓂᐊᖅᑐᓂᒃ ᐊᑯᓂ. ᑐᓴᖅᑕᐅᑎᑦᑎᔾᔪᑎᖓ ᐅᖃᔪᒻᒪᑦ ᕿᑭᖅᑕᓂᒎᖅ ᐃᓪᓗᓕᐊᖑᓛᖅᑐᖅ 48ᓂᒃ ᓯᓂᕝᕕᖃᕋᔭᕐᖓᑦ. ᒥᓂᔅᑕ ᐅᓪᓗᒥ ᓇᓗᓇᐃᖅᓯᒍᓐᓇᓕᖅᑲ ᖃᐅᔨᒪᓕᕐᒪᖔᑦ ᖃᖓ ᓴᓇᒋᐊᖅᑕᐅᒐᔭᕐᒪᖔᑦ ᓄᑖᖅ ᐊᑯᓂ ᐸᖅᑭᑦᑎᕕᔅᓴᐅᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑖᓐᓇ ᐸᕐᓇᑕᐅᓂᔅᓴᖓ ᑳᓐᑐᕌᖑᓗᓂ ᐱᒐᓱᐊᕋᔅᓴᐅᓂᐊᕐᖓᑦ. ᒫᓐᓇ ᖃᖓᒃᑰᒐᔭᕐᒪᖔᑦ ᐅᖃᕈᓐᓇᙱᑲᓚᐅᖅᑐᖓ. ᖁᔭᓐᓇᒦᒃ, ᐅᖃᖅᑎ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᖁᕐᓗᖅᑑᕐᒧᑦ ᒪᓕᒐᓕᐅᖅᑎ, ᖁᓕᒃᑖᓇ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 14 ᐊᐱᖅᑯᑦ 80 – 72): ᒥᑦᑕᕐᕕᑦᑎᓐᓂ ᐱᖁᑎᕐᔪᐋᖏᓄᑦ (ᖁᓕᒃᑖᓇ) ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎ. ᐊᐱᖅᑯᑎᒃᑲ ᑐᕌᖓᙳᓱᑦᑐᐃᑦ ᐃᖏᕐᕋᔪᓕᕆᔨᒃᑯᑦ ᒥᓂᔅᑕᖓᓄᑦ. ᐱᔾᔪᑎᖃᖅᑐᑎᒃ ᒥᕝᕕᓐᓂᒃ ᐱᖁᑎᕐᔪᐊᓂ. ᒥᓂᔅᑕ ᐃᖅᑲᐅᒪᒻᒪᑦ ᖁᕐᓗᖅᑑᑉ ᓄᑖᖅ ᖃᖓᑕᓲᒃᑯᑦ ᐊᐅᓪᓚᕆᐊᖅᑐᕐᕕᖓ ᒪᑐᐃᖅᑕᐅᓂᖃᔪᒻᒪᑦ ᔫᓐ 2025ᖑᑎᓪᓗᒍ ᐊᕐᕌᒎᓕᖅᑐᖅ ᐊᓂᒍᖅᑐᖅ. ᒪᓕᒐᓕᐅᖅᑎᐅᓪᓗᖓ ᖁᕐᓗᖅᑑᕐᒧᑦ ᐊᑯᒥ ᐊᒥᓱᐊᖅᑎᑲᓪᓛᓗᒃ ᑕᐃᑰᓈᖃᑦᑕᖅᓯᒪᒐᒪ ᐅᑎᖅᑕᕋᐅᔭᖅᑐᖓ ᐃᖃᓗᓐᓄᑦ ᐊᖓᔪᖅᑳᖃᕐᕕᒻᒧᑦ. ᐅᖃᖅᑏ, ᑖᓐᓇ ᐃᓪᓗ ᐊᐅᓚᓕᕐᖓᑦ ᐊᕐᕌᒍᓪᓗᐊᐸᓗᑦᑐᒥᒃ, ᐊᕐᕌᒍᓪᓗᐊᐸᓗᒻᒥ ᐊᒻᒪᐃᓛᒃ ᒥᓂᔅᑕ ᖃᐅᔨᒪᒻᒪᑦ ᓯᕗᓪᓕᖅᐹᒥ ᐊᕐᕌᒍᒥ ᒪᑐᐃᖓᔪᖃᖅᑎᓪᓗᒍ ᐃᓪᓗᒥᒃ ᓇᐅᒃᑯᑦ ᐋᖅᑭᒋᐊᕐᕕᔅᓴᖃᕐᒪᖔᑦᑕ ᖃᐅᔨᓴᖅᑕᐅᔾᔮᓲᖑᒻᒪᑕ. ᒥᓂᔅᑕ ᓇᓗᓇᐃᖅᓯᒍᓐᓇᖅᑲ ᖃᓄᖅ ᐱᓕᕆᕕᖓ ᖃᐅᔨᓴᖅᓯᒪᒻᒪᖔᑦ, ᐊᐅᓚᑦᑎᐊᕋᓗᐊᕐᒪᖔᑦ ᓄᑖᖅ ᖃᖓᑕᓲᒃᑯᑦ ᐊᐅᓪᓚᕆᐊᖅᑐᕐᕕᐅᔪᖅ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᖏᕐᕋᔪᓕᕆᔨᒃᑯᓐᓄᑦ ᒥᓂᔅᑕ ᕼᐃᒃᔅ. ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᑦᑕᐅᖅ ᒪᓕᒐᓕᐅᖅᑎ ᖃᐅᔨᒋᐊᒃᑲᓐᓂᕐᖓᑦ ᑖᔅᓱᒥᖓ ᐊᓕᐊᓇᐃᒻᒪᕆᑦᑐᒥᒃ ᐱᓕᕆᐊᖑᔪᒥᒃ ᐱᔭᕇᖅᑕᐅᓚᐅᖅᑐᒥᒃ. ᑕᐃᒪ ᑐᓴᐅᒪᖃᑎᖃᕋᓱᑐᐃᓐᓇᖃᑦᑕᖅᑐᑕ ᐃᖅᑲᓇᐃᔭᖅᑎᖏᓐᓂᒃ ᐊᐅᓪᓚᕆᐊᖅᑐᕐᕕᐅᔪᖅ ᒥᕝᕕᓕᕆᔨᐅᓪᓗᑕ ᐊᖓᔪᖅᑳᖃᕐᕕᖏᓐᓂᓪᓗ ᐃᓱᒫᓘᑎᑕᖃᕐᒪᖔᑦ. ᑕᐃᒃᑯᐊ ᓈᕝᑳᓇᑕᓐᑯᑦ ᐊᐅᓪᓛᖅᓯᔪᒻᒪᑕ ᐊᐅᓪᓚᕆᐅᖅᑐᕐᕕᒥᓂᕐᒥᒃ ᓄᑖᒧᑦ. ᐊᐅᓚᑦᑎᐊᖅᓯᒪᔪᐊᓗᐃᑦ, ᐃᓱᒫᓘᑎᒥᒃ ᑐᓴᓚᐅᙱᑦᑐᒍᑦ ᐊᒻᒪᓗ ᓈᕝᑳᓇᑕᓐᑯᑦ ᓱᓇᒃᑯᑖᖏᑦ, ᐃᓛᒃ ᐱᓕᕆᐊᖏᓪᓗ ᓄᑖᒧᑦ ᐊᐅᓪᓛᖅᑕᐅᓪᓗᑎᒃ ᑕᐃᓐᓇ ᒪᑐᔭᐅᕙᓪᓕᐊᓂᐅᓴᓕᕐᖓᑦ ᐲᔭᖅᑕᐅᒋᐊᖃᓛᕐᓗᓂᓗ ᖃᖓᑕᓲᒃᑯᑦ ᐊᐅᓪᓚᕆᐊᖅᑐᕐᕕᒥᓂᖅ. ᐄ, ᒫᓐᓇ ᓱᕋᐃᔭᖅᑕᐅᓕᖅᑐᕉᖅ. ᑕᖅᑭᓂᒃ ᐱᓇᓱᐊᕈᓯᑦᑎᓐᓂ ᑖᓐᓇ ᐱᔭᕇᖅᑕᐅᓂᐊᖅᑐᖅ ᐲᔭᖅᑕᐅᓗᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᒥ ᐃᓚᒋᐊᕈᑏᑦ, ᒪᓕᒐᓕᐅᖅᑎ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᓪᓗ ᒥᓂᔅᑕ ᑭᐅᒐᕕᙵ. ᒥᓂᔅᑕᑦᑕᐅᖅ ᐃᖅᑲᐅᒪᒻᒪᑦ ᐱᓕᕆᕕᖓ ᑳᓐᑐᕌᒃᒥᒃ ᐱᒐᓱᐊᒐᔅᓴᒥᒃ ᓴᖅᑭᖅᓯᓚᐅᖅᓯᒪᒻᒪᑦ ᔮᓄᐊᕆᐅᑎᓪᓗᒍ ᑕᕝᕙᓂ ᐊᕐᕌᒍᒥ ᓴᓇᒐᔭᖅᑐᒥᒃ ᓱᓇᒃᑯᑖᖏᓐᓄᑦ ᑐᖅᑯᖅᓯᕕᔅᓴᒥᒃ ᖁᕐᓗᖅᑑᑉ ᒥᕝᕕᖓᓂ. ᑳᓐᑐᕌᒃ ᑐᓂᔭᐅᔪᒻᒪᑦ ᒫᑦᔅᖑᑎᓪᓗᒍ ᐊᕐᕌᒍᒥ ᑕᕝᕙᓂ. ᑐᑭᓯᐅᒪᔾᔪᑏᑦ ᑕᕝᕙᙶᖅᓯᒪᔪᐃᑦ ᐱᓕᕆᕕᖓᑦ ᐃᒪᐃᓕᖓᒻᒪᑕ, ᐱᓕᕆᕕᖓᒎᖅ ᑖᓐᓇᑦᑕᐅᖅ ᐱᕙᓪᓕᐊᔪᓕᕆᓂᕐᒧᑦ ᐃᓚᓕᐅᑎᓯᒪᒻᒪᑕ ᖃᖓᑕᓲᒃᑯᑦ ᑎᑭᑦᑐᓄᑦ ᐃᓂᒋᔭᐅᑲᐃᓐᓇᖃᑦᑕᕈᓐᓇᓂᐊᖅᑐᓂ ᐊᒻᒪᑦᑕᐅᖅ ᐊᑐᖅᑕᐅᓂᐊᖅᑐᕉᖅ ᓂᕿᔅᓴᖃᑦᑎᐊᑎᑦᑎᓗᑎᒃ ᐊᒻᒪᑦᑕᐅᖅ ᖃᖓᑕᓲᒃᑯᑦ ᐊᐅᓪᓚᖃᑦᑕᖅᑐᓂᒃ ᐊᐅᓚᑦᑎᔨᒧᑦ ᐃᖅᑲᓇᐃᔭᕐᕕᐅᒍᓐᓇᕋᔭᖅᑐᓂ ᑲᒪᖃᑦᑕᕋᔭᕐᖓᑕ ᒪᑯᓂᖓ ᓂᐅᕕᐊᔅᓴᑐᐃᓐᓇᕐᓂᒃ, ᖁᐊᕐᓂᒃ, ᓱᕋᓐᓂᐅᓴᔪᓂᓪᓗ. ᒥᓂᔅᑕ ᖃᓄᐃᓕᖓᒻᒪᖔᑦ ᓇᓗᓇᐃᖅᓯᒍᓐᓇᓕᖅᑳ ᑖᓐᓇ ᐱᓕᕆᐊᖑᔪᖅ ᐊᒻᒪᓗ ᓇᓗᓇᐃᖅᓯᒍᓐᓇᖅᑲ ᖃᖓ ᓇᒻᒥᓂᖃᐅᑎᓕᒻᒥᒃ ᐊᐅᓚᑦᑎᔪᖃᓛᓕᕐᒪᖔᑦ ᖃᖓᑕᓲᒃᑰᕆᐊᓕᓐᓄᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᖏᕐᕋᔪᓕᕆᔨᒃᑯᓐᓄᑦ ᐊᐅᓚᔪᓐᓇᐅᑎᓕᕆᔨᒃᑯᓐᓄᑦ, ᒥᓂᔅᑕ ᕼᐃᒃᔅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 15 ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓕᒃᑲᓂᖅᑲᕋ ᒪᓕᒐᓕᐅᖅᑎ ᐱᒻᒪᕆᐊᓗᒻᒥᒃ ᐊᐱᖅᑯᑎᖃᕐᖓᑦ. ᖃᖓᑐᐃᓐᓇᒃᑯᓂᓛᒃ ᓄᑖᒥᒃ ᐊᐅᓪᓚᕆᐊᖅᑐᕐᕕᑕᖃᓕᕋᐃᒻᒪᑦ ᓄᑖᓂᓪᓗ ᓱᓇᒃᑯᑖᖅᑖᕆᐊᖃᖅᑐᑎᒃ ᓴᓇᔭᐅᓂᔅᓴᖓ ᒫᔅᓯᐅᑎᓪᓗᒍ ᑳᑦᑐᕌᒃᑖᖑᔪᒻᒪᑦ. ᒫᓐᓇᓗ ᐃᓪᓗᔅᓴᖓ ᑎᑭᓛᖅᑐᓂ ᐅᒥᐊᕐᔪᐊᖃᕐᓇᐅᓕᖅᑲᑦ ᐊᐅᔭᖅ. ᑖᓐᓇᓗ ᓄᓇᖓ ᐊᑐᐃᓐᓇᕈᖅᓴᖅᑕᐅᓛᓕᖅᑐᓂ ᐃᓪᓗᓕᐅᕐᕕᔅᓴᕈᓛᕐᖓᑦ ᐊᕐᕌᒎᓛᖅᑐᒥ. ᒫᓐᓇ ᑭᓯᐊᓂ ᓇᓗᓇᐃᖅᓯᓪᓚᕆᒍᓐᓇᖏᑦᑐᒍᑦ ᖃᖓ ᑲᑐᔾᔨᖃᑎᑖᓛᕐᒪᖔᑦᑕ ᖃᖓᑕᓲᒃᑰᕆᐊᓖᑦ ᐊᐅᓪᓚᕆᐊᓖᑦ ᑎᑭᒋᐊᓖᓪᓗ ᑲᒪᔨᒋᖃᑦᑕᕋᔭᖅᑕᖓᓂᒃ. ᑲᔪᓰᓐᓇᓂᐊᖅᑐᒍᑦ ᖃᐅᔨᒋᐊᕐᕕᒋᖃᑦᑕᕐᓗᒍ ᑖᓐᓇ ᒪᓕᒐᓕᐅᕐᕕᒃ ᐃᓱᒫᓘᑎᖃᙱᒃᑲᓗᐊᕐᒪᖔᖅ ᐅᕝᕙᓘᓐᓃᑦ ᐃᒫᖔᓚᔾᔪᑎᖃᙱᒃᑲᓗᐊᕐᒪᖔᖅ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑐᓪᓕᐊ ᑭᖑᓪᓕᖅᐹᕐᓗ ᐃᓚᒋᐊᕈᑦ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ ᐊᒻᒪᓗ ᒥᓂᔅᑕ. ᒥᓂᔅᑕ ᖃᐅᔨᒪᒻᒪᑦ ᖁᓪᓗᖅᑑᖅ ᓱᐴᔫᖅᑕᐅᕙᓚᐅᖅᓯᒪᒐᓗᐊᕐᒪᑦ ᑎᒻᒥᓲᒧᑦ. ᑭᓯᐊᓂ ᓄᖅᑲᓚᐅᖅᓯᒪᒻᒪᑦ ᑲᓇᐃᑎᐊᓐ ᓄᐊᑦᑯᑦ 737 ᒥᑉᐸᒍᓐᓃᕋᒥᒃ ᑐᐊᐸᔮᒧᑦ ᒥᑦᑕᕐᕕᒻᒥᒃ. ᐅᖃᖅᑏ, ᐃᓕᑕᕆᓪᓗᒍ ᑕᒪᒃᑯᐊ ᖁᐊᖅᑎᑕᐅᕙᓐᓂᖏᑦ ᒥᑦᑕᕐᕖᑦ ᐊᑭᑭᑦᑑᔾᔭᖏᒻᒪᑕ. ᒥᓂᔅᑕ ᐅᖃᕈᓐᓇᖅᐹ ᖃᓄᖅ ᐸᕐᓇᐅᑎᖃᕐᒪᖔᑕ ᑕᒪᑐᒧᖓ ᖁᕐᓗᖅᑑᒥ ᒥᑦᑕᕐᕕᐊᓂ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕ ᕼᐃᒃᔅ. ᐊᖓᔪᖅᑳᖅ ᔪᐊᔾ ᕼᐃᒃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐄ’, ᐊᓕᐊᓇᐃᑦ ᐊᐱᖅᑯᑎᒋᒻᒪᒍ ᑕᒪᓐᓇ ᐃᓕᑕᖅᓯᒋᐊᖃᕋᑦᑕᐃᓛᒃ ᑕᒪᒃᑯᐊ ᑮᓇᐅᔭᐃᑦ ᐋᖅᑭᒋᐊᖅᓯᒪᔪᑦ ᒪᓕᑦᑐᒋᑦ ᐃᓱᒪᔅᓴᖅᓯᐅᕈᑎᒋᕙᑦᑕᕗᑦ ᐊᑦᑕᓇᖅᑕᐃᓕᒋᐊᖃᕐᓂᖏᑕ ᒥᑦᑕᕐᕖᑦ. ᑕᒪᓐᓇ ᐃᓱᒪᒋᓪᓗᒍ 2025-ᒥ ᐊᕐᕌᓂᐅᓚᐅᖅᑐᖅ ᐃᖅᑲᓇᐃᔮᕆᔭᐅᕙᓪᓕᐊᔪᖅ ᖁᕐᓗᖅᑐᖅ ᒥᑦᑕᕐᕕᖓ ᑕᒪᓐᓇ ᒥᑦᑕᕐᕕᖓᑕ ᖄᖓ. ᐊᐅᔭᖅ ᐱᔭᕇᖅᑕᐅᓂᐊᖅᑐᓂ ᓯᑎᐱᕆᐅᖅᑲᐃ ᓄᙳᐊᓂ. ᐊᒻᒪᓗ ᖃᓄᖅᑑᕈᑕᐅᕙᓛᕐᒥᔪᖅ ᑐᐊᕕᕐᓇᖅᑐᖃᕆᐊᖃᕌᖓᑦ. ᐄ’, ᐃᓕᑕᖅᓯᔅᓴᐃᓐᓇᕆᐊᖃᕋᓗᐊᖅᑐᒍᖏᓛᒃ ᖁᕐᓗᖅᑑᑉ ᒥᑦᑕᕐᕕᖓᓄᑦ ᑖᓐᓇ ᓄᑖᖅ ᐅᑕᖅᑭᕕᖓ ᐱᒐᓚᒃᑯᕕᖓ ᐊᒻᒪ ᒥᑦᑕᕐᕕᐅᑉ ᑕᒪᓐᓇ ᖄᖓ ᐃᖅᑲᓇᐃᔮᖑᓛᕐᓂᖓ. ᖁᕕᐊᒋᓪᓚᕆᑦᑕᕋ ᑕᒪᓐᓇ ᑲᒪᒋᕙᓪᓕᐊᒋᐊᖏᑦ ᐊᐅᓪᓚᖃᑦᑕᕐᔫᒥᒐᔭᓕᖅᑐᔅᓴᐅᕗᖓᑦᑕᐅᖅ ᓄᓇᓕᖓᓐᓄᑦ ᒪᓕᒐᓕᐅᖅᑎᐅᑉ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᐃᖃᓗᑦᑑᑦᑎᐊᕐᒧᑦ ᒪᓕᒐᓕᐅᖅᑎ, ᐲᑕᓴᓐ. ᐊᐱᖅᑯᑦ 81 – 72): ᓄᓇᕘᑉ ᒥᕐᖑᐃᖅᓯᕝᕕᕋᓛᖏᓄᑦ (ᐲᑕᓴᓐ) ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᐱᖅᑯᑎᒐ ᐅᓪᓗᒥ ᐊᕙᑎᓕᕆᔨᒃᑯᑦ ᒥᓂᔅᑕᖓᓄᑦ. ᑖᒃᑯᐊ ᓄᓇᕗᑦ ᒥᕐᖑᐃᖅᓯᕐᕕᒃ ᒪᓕᒋᐊᖃᕐᒪᖓᑕ ᓇᓗᓇᔭᖅᓯᒪᔪᑦ ᐃᓄᓐᓄᑦ ᐊᒃᑐᖅᑕᐅᓂᖏᓐᓄᑦ ᐊᖏᕈᑎᓕᐊᖑᓯᒪᔪᒧᑦ. ᑐᑭᓯᐅᒪᓪᓗᖓᓗ ᓄᓇᓖᑦ ᑲᑎᒪᔨᐊᓛᖃᓕᕐᒥᒻᒪᑕ ᒥᕐᖑᐃᓯᕐᕕᓕᕆᔨᐅᔪᓂᒃ. ᑖᒃᑯᐊ ᐊᑐᓕᖁᔭᓕᐅᖅᐸᑦᓱᑎᒃ ᒥᓂᔅᑕᒧᑦ ᐸᕐᓇᓂᕐᒧᑦ ᑕᐃᒪᐃᑦᑐᓅᓕᖓᔪᓂᒃ. ᐊᐱᖅᑯᑎᒐᓕ ᑕᒪᒃᑯᐊ ᓄᓇᓖᑦ ᑲᑎᒪᔨᐊᓛᓗᑦᑖᖏᑦ ᒥᕐᖑᐃᓯᕐᕕᓕᕆᔩᑦ ᐊᒻᒪ ᓄᓇᕗᑦ ᒥᕐᖑᐃᓯᕐᕕᓕᕆᔨᖏᑦ ᐱᐊᓂᒃᓯᓯᒪᓕᖅᐹᑦ ᐊᒻᒪᓗ ᐊᐅᓚᑦᑐᓐᓇᓕᕐᓗᑎᒃ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᕐᖑᐃᓯᕐᕕᓕᕆᔨᒃᑯᓐᓄᑦ ᒥᓂᔅᑕ, ᑯᓄ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 16 ᐊᖓᔪᖅᑳᖅ ᐳᕋᐃᔭᓐ ᑯᓄ: ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᔭᓐᓇᒦᒃ, ᒪᓕᒐᓕᐅᖅᑎ. (ᑐᓵᔨᑎᒎᓕᖅᑐᖅ) ᖃᐅᔨᒃᑲᕈᓐᓇᖅᐸᒋᑦ ᑕᒪᒃᑯᐊ ᒥᕐᖑᐃᓯᕐᕕᓕᕆᔨᖃᖅᑐᐃᓐᓇᐅᓕᖅᑐᑦ ᓄᓇᓖᑦ ᑎᒃᑯᐊᖅᑕᐅᓯᒪᔪᐃᓐᓇᐅᓪᓗᑎᒃ, ᑲᑎᒪᖃᑦᑕᓲᖑᓪᓗᑎᓪᓗ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᖅ ᐃᓚᒋᐊᕈᑎ ᐊᐱᕆᓗᒍ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖁᔭᓐᓇᒦᖅᐸᕋ ᑭᐅᒐᕕᑦ ᒥᓂᔅᑕ. ᐊᐱᖅᑎᒪ ᐊᐃᑉᐹ, ᓄᓇᓕᓐᓂ ᑲᑐᔾᔨᖃᑎᒌᑦ ᒥᕐᖑᐃᓯᕐᕕᓕᕆᔩᑦ ᐃᒻᒥᓐᓄᑦ ᐅᖃᖃᑎᒌᑉᐸᑉᐸᑦ ᒥᕐᖑᐃᓯᕐᕕᒻᒧᑦ ᐃᓱᒪᓕᐅᕈᑎᔅᓴᓂᒃ ᐅᕝᕙᓗ ᐊᑭᑐᔫᑎᓂᒃ ᓂᐅᕕᕈᑎᔅᓴᒧᑦ ᐱᐅᓛᒥᑦ ᒪᓕᒋᐊᓕᓐᓂᒃ ᒪᓕᑦᓯᐊᖃᑦᑕᖁᓪᓗᒋᑦ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐊᕙᑎᓕᕆᔨᒃᑯᓐᓄᑦ ᒥᓂᔅᑕ ᑯᓄ. ᐊᖓᔪᖅᑳᖅ ᑯᓄ: ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᔭᓐᓇᒦᒃ ᒪᓕᒐᓕᐅᖅᑎ. ᑖᓐᓇ ᑭᐅᑦᑎᐊᒃᑲᓐᓂᐊᕐᔪᓪᓗᒍ ᑕᐃᓐᓇ (ᑐᓵᔨᑎᒎᓕᖅᑐᖅ) ᐃᓐᓄᒋᐊᓖᑦ ᐱᓯᒫᕐᔪᒻᒥᒻᒪᑕ ᑲᑎᒪᔨᐊᓛᓃᑦᑕᕆᐊᓕᓐᓄᑦ ᐃᓐᓄᑦᑕᐅᑎᓐᓇᓱᓕᖅᑕᕗᑦ ᒫᓐᓇ. ᐊᐱᖅᑯᑎᕕᑦ ᐊᐃᑉᐹᓄᑦ, ᐊᐱᖅᑯᑏᑦ ᐊᐅᓚᑕᐅᕙᑦᑐᖅ ᑖᒃᑯᓇᙵᑦ ᐊᐅᓚᑦᓯᔨᓂᒃ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑐᒡᓕᐊᓂ ᐊᒻᒪ ᑭᖑᓪᓕᖅᐹᖅ ᐃᓚᒋᐊᕈᑎᒋᔭᐃᑦ ᐊᐱᕆᒍᒃ, ᒥᔅᑕ ᐲᑕᓴᓐ. ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᐱᖅᑯᑎᒪ ᑭᖑᓪᓕᖅᐹᖅ ᐅᓇ, ᑕᒪᓐᓇ ᐱᕙᓪᓕᐊᓂᖓ ᓄᓇᓕᓐᓄᑦ ᑲᑎᒪᔨᐊᓛᖏᓐᓄᑦ ᒥᕐᖑᐃᓯᕐᕕᓕᕆᔨᓄᑦ ᑲᒋᔭᐅᔪᔅᓴᐅᖏᑦᑑᒐᓗᐊᖅ. ᐃᓱᒪᓕᐅᕈᑕᐅᓪᓚᕆᒋᐊᖃᖅᑰᕐᒪᑦ ᐊᑭᑐᔪᓂᒃ ᐱᓚᐅᙱᓐᓂᖏᓐᓂᒃ $500,000-ᑖᓚᓂᒃ ᐊᑭᑦᑐᕈᔾᔨᒍᓐᓇᕐᒪᑦ ᐃᓚᖓᓐᓄᑦ ᐊᓯᖏᓐᓅᖏᑦᑐᖅ. ᑖᓐᓇ ᐊᑦᑐᐊᓪᓗᓂ ᐊᕙᑎᓕᕆᔨᒃᑯᑦ ᓂᐅᕕᓚᐅᖅᓯᒪᓂᖏᑦ ᐊᐳᑕᐃᔭᐃᔾᔪᑎᒥᒃ ᒥᕐᖑᐃᓯᕐᕕᒻᒧᑦ ᓄᓇᓕᐅᑉ ᐃᓗᐊᓃᑦᑐᒥᒃ ᐅᖓᑖ 10-ᑭᓛᒥᑐ ᐅᖓᑖᓃᙱᑦᑐᒥᒃ. ᖃᓄᖅ ᐃᓱᒪᓕᐅᕆᓲᖑᕙᑦ ᑕᒪᒃᑯᐊ ᐊᐅᓚᔪᓐᓇᐅᑏᑦ ᐱᒥᔾᔪᑎᒋᓪᓗᒋᑦ ᒥᕐᖑᐃᓯᕐᕕᐅᔪᓂᒃ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐊᕙᑎᓕᕆᔨᒃᑯᓐᓄᑦ ᒥᓂᔅᑕ, ᑯᓄ. ᐊᖓᔪᖅᑳᖅ ᐳᕋᐃᔭᓐ ᑯᓄ: ᖁᔭᓐᓇᒦᒃ, ᐅᖃᖅᑎᑦᑎᔩ. ᖁᔭᓐᓇᒦᒃ, ᒪᓕᒐᓕᐅᖅᑎ. (ᑐᓵᔨᑎᒎᓕᖅᑐᖅ) ᐊᔾᔨᒌᙱᓐᓂᖏᑦ ᒥᕐᖑᐃᓯᕐᕖᑦ ᒪᓕᑦᑐᒋᑦ ᐃᖃᓗᐃᑦ ᒥᕐᖑᐃᓯᕐᕕᖓ ᐊᖅᑯᑎᖓ ᒥᕐᖑᐃᓯᕐᕕᐅᑉ ᐃᓗᐊᓃᒻᒪᑦ. ᐊᓯᖏᓪᓕ ᒥᕐᖑᐃᓯᕐᕖᑦ ᐊᒻᒪᖄ ᓄᓇᓕᐅᑉ ᓯᓚᑖᓃᒍᓐᓇᖅᑐᓂ ᐃᒻᒪᖄ ᖃᑦᑎᒐᓚᓐᓄᑦ ᐅᖓᓯᓐᓂᖃᕐᓗᓂ ᑭᓛᒥᑐᓂᒃ. ᐊᕙᑎᓕᕆᔨᒃᑯᑦ ᐱᔪᓐᓇᐅᑎᖃᙱᒃᓱᑕ ᒥᕐᖑᐃᓯᕐᕕᐅᑉ ᓯᓚᑖᓃᑦᑐᓂᒃ ᐃᒡᓗᐃᑦ ᐊᖅᑯᑏᑦ ᐱᓕᕆᖃᑎᒋᑦᓴᐃᓐᓇᕆᐊᖃᕋᔭᖅᑕᕗᑦ ᐊᓯᕗᑦ ᑎᒥᐅᔪᑦ ᐊᖅᑯᒻᒥᒃ ᐸᕐᓇᒍᑎᑦᓴᒧᑦ. ᐊᐳᑕᐃᔭᐅᑏᑦ ᑖᒃᑯᐊ ᑲᑎᒪᔨᐊᓛᑎᒎᕆᐊᖃᓲᖑᔪᑦ ᐱᔭᐅᔪᒪᔪᑦ ᒪᓕᓪᓗᒋᑦ ᒥᕐᖑᐃᓯᕐᕕᒻᒥ. ᐊᒻᒪᓗ ᐊᐳᑕᐃᔭᐃᔾᔪᑎᖃᕐᓂᐊᕐᓗᓂ ᐱᒐᓚᒃᑯᕕᖃᑦᑎᐊᕆᐊᖃᕐᒪᑦ ᐃᓂᖃᑦᑎᐊᕆᐊᖃᕐᒪᑦ ᐃᓱᒪᒋᔭᐅᖃᓯᐅᑎᔭᕆᐊᖃᕐᒪᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᐊᐃᕕᓕᖕᒧᑦ ᒪᓕᒐᓕᐅᖅᑎ, ᐊᖑᑎᐊᓗᒃ. ᐊᐱᖅᑯᑦ 82 – 72): ᐋᓐᓂᐊᕕᓕᐊᖅᐸᒃᑐᓐ ᐊᐅᓪᓛᕈᑎᖏᓄᑦ (ᐊᖑᑎᐋᓗᒃ) ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. ᑖᓐᓇᓗ ᐊᐱᖅᑯᑎᒋᓚᖓᔭᕋ ᐋᓐᓂᐊᕐᓇᙱᑦᑐᓕᕆᔨᒃᑯᓐᓄᑦ. (ᑐᓵᔨᑎᒎᓕᖅᑐᖅ) ᓇᐅᔮᓅᕋᑖᓚᐅᖅᑎᓪᓗᖓ ᐅᖃᖃᑎᖃᕈᓐᓇᖅᓯᔪᒐᒪ ᓂᕈᐊᖅᑎᖁᑎᒋᔭᓐᓂᒃ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 17 ᐅᖃᐅᓯᐅᓗᐊᔪᕗᖅ ᐅᓇ ᐅᕙᓐᓄᑦ ᓴᖅᑭᑎᑦᓯᔪᖃᕋᔭᖅᐸᑦ ᓄᑖᒥᒃ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᒃᓴᒥᒃ ᑲᖏᖅᓯᓂᕐᒥ. ᒥᓂᔅᑕ ᐃᖅᑲᐅᒪᔪᒃᓴᐅᒻᒪᑦ ᑖᓐᓇ ᐅᖃᐅᓯᐅᖃᑦᑕᖅᓯᒪᓕᕐᒪᑦ ᑭᕙᓪᓕᕐᒥ ᒪᐃᔭᐅᔪᓄᑦ ᑲᑎᒪᖃᑦᑕᕋᑖᕐᓂᖏᓐᓂᒃ ᒫᓐᓇᓵᒃᑯᑦ. ᓄᑖᒥᒃ ᑐᔪᕐᒥᕕᖃᓕᖅᐸᑦ ᐋᓐᓂᐊᕕᓕᐊᖅᑐᓄᑦ ᑲᖏᖅᓯᓂᕐᒥ ᐱᕚᓪᓕᕈᑎᓪᓚᕆᐅᒐᔭᖅᑐᖅ ᐋᓐᓂᐊᕕᓕᐊᖅᐸᓪᓕᐊᔪᓂᒃ ᐱᓗᐊᖅᑐᒥᒃ ᐃᓐᓇᑎᓐᓄᑦ. ᒥᓂᔅᑕ ᑐᓴᖅᑎᑦᓯᔪᓐᓇᖅᐸ ᕿᒥᕐᕈᓂᕆᔭᖓᓂᒃ ᑕᒪᔅᓱᒪᙵᑦ? (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐅᖃᖅᑎᑦᑎᔩ. ᐅᖃᖅᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ, ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᖃᐅᔨᓴᕐᓂᖅ ᐱᔪᓐᓇᕋᔭᕐᒪᖔᖅ ᑲᔪᓯᓚᐅᖅᓯᒪᔪᖅ ᑐᔪᕐᒥᕕᖃᕈᓐᓇᕋᔭᕐᒪᖔᖅ ᑲᖏᖅᓯᓂᕐᒥ, ᐃᓱᒪᓕᐅᕈᑕᐅᔪᕗᖅ ᒫᓐᓇ ᐱᔪᓐᓇᕋᔭᙱᒻᒪᑦ. ᑕᒪᒃᑯᐊ ᐱᔨᑦᓯᕋᐅᑏᑦ ᐱᕚᓪᓕᕈᑎᑦᓴᖓᓄᑦ ᐅᐊᓂᐸᐃᒡᒧᐊᙱᑦᑐᑦ ᐱᔨᔅᓯᖅᑕᐅᒍᓐᓇᕐᓗᑎᒃ ᑲᖏᖅᓯᓂᕐᒥ, ᑕᐃᒪᐃᒻᒪᑦ ᒫᓐᓇᐅᔪᖅ. ᐊᒻᒪᓗ ᐋᖅᑭᒍᑎᐅᑲᐃᓐᓇᕈᓐᓇᓲᖑᒻᒥᔪᑦ ᐃᓪᓗᕈᓯᖃᖅᑎᑕᐅᑲᐃᓐᓇᓱᑎᒃ ᑲᖏᖅᓯᓂᕐᒥ. ᖁᓕᐅᓪᓗᑎᒃ ᐃᓪᓖᑦ 18- ᖑᓪᓗᑎᒃ. ᐃᓪᓖᑦ ᐊᑕᐅᓯᖅ ᒪᕐᕉᒃ ᐃᓪᓕᓖᒃ, ᒪᕐᕉᓪᓗᑎᒃ ᐊᑕᐅᓯᕐᒥᒃ ᐃᓪᓕᓖᑦ ᐊᒻᒪᓗ 8-ᖑᕙᓪᓚᐃᔪᑦ. ᐊᒻᒪ ᑲᖏᖅᓯᓂᕐᒦᑲᐃᓐᓇᑦᓴᕆᐊᖃᕌᖓᑕ ᐊᑐᖅᑕᐅᓲᑦ ᐊᒻᒪ ᐊᑐᖅᑕᐅᖃᑦᑕᖅᑎᒋᓂᖏᑦ ᖃᐅᔨᓴᔪᒻᒥᒐᑦᑕ 2025-ᒥ 2026-ᒧᑦ 3650 ᐅᓐᓄᒃᑯᑦ ᐊᑐᖅᑕᐅᒍᓐᓇᓚᐅᖅᑐᑦ ᐃᓪᓗᕈᓰᑦ 30−% ᐳᓴᑦ ᒪᓕᒻᒥᒻᒪᑦ ᖃᖓᑕᓲᖅ ᑭᖑᕙᕆᐊᖅᑕᐅᓐᓂᖏᒃᑯᓂ ᑭᖑᕙᕆᐊᖅᑕᐅᓐᓂᕈᓂᓘᓐᓃᑦ. ᐃᓘᓐᓈ ᐊᑐᖅᑕᐅᕙᓪᓕᐊᕌᕐᔪᔅᓯᒪᔫᒐᓗᐊᖅ ᐃᒡᓗᕈᓰᑦ ᑭᓯᐊᓂ ᐊᓯᔾᔨᔭᑦᑐᓂ. ᓈᒻᒫᓂᙱᒻᒪᑕ ᓱᓕ ᐊᑐᖅᑕᐅᖃᑦᑕᖅᑎᒋᓂᖏᑦ ᑕᒪᒃᑯᐊ ᑐᔪᕐᒥᕕᔅᓴᒧᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᓯᕗᓪᓕᖅᐹᒥᒃ ᐃᓚᒋᐊᕈᑎ ᐊᐱᕆᒍᒃ, ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. (ᑐᓵᔨᑎᒎᓕᖅᑐᖅ) ᐊᓯᐊᑦᑕᐅᖅ ᐅᖃᐅᓯᐅᓚᐅᕐᒥᔪᖅ ᐅᕙᓐᓄᑦ ᓇᐅᔮᓃᑎᓪᓗᖓ. ᑎᒻᒥᓲᖃᖃᑦᑕᑲᓐᓂᕆᐊᖃᕐᓂᖓᓂᒃ ᐋᓐᓂᐊᕕᓕᐊᖅᑐᓄᑦ ᑐᐊᕕᕐᓇᖅᑐᒃᑰᖅᑐᓄᑦ. ᑐᐊᕕᕐᓇᖅᑐᑦ ᐱᓕᕌᖓᑕ ᐱᕕᑭᑦᑑᔭᒻᒪᑦ. ᒥᓂᔅᑕ ᐅᖃᕈᓐᓇᐸ ᐅᓪᓗᒥ ᖃᓄᐃᓕᕐᓂᕆᔭᖓᑕ, ᑳᓐᑐᕌᒃ ᑐᓂᔭᐅᓚᐅᕐᓂᕆᔭᖓᓄᑦ ᑎᒻᒥᓲᒃᑯᑦ ᑐᐊᕕᕐᓇᖅᑐᓕᕆᓂᐅᔪᖅ ᐋᓐᓂᐊᕐᕕᑦᑎᒍᑦ? (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ, ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐋᔩᖃᑎᒌᓐᓂᐅᔪᖅ ᑲᔪᓯᔅᓴᐃᓇᖅᑐᑦ. ᒫᓐᓇ ᐋᖅᑭᒍᑎᐅᑲᐃᓐᓇᖅᑐᒥᒃ ᐱᑕᖃᖅᑐᒍᑦ ᑐᐊᕕᕐᓇᖅᑐᖅᓯᐅᑎᕗᑦ ᑳᓐᑐᕌᒃᖏᑦ ᕿᑲᑐᐃᓐᓇᓕᖁᓇᒋᑦ ᐋᔩᖃᑎᒌᓐᓂᑦᑎᓐᓂᒃ. ᐃᓛᒃ ᓱᕐᕋᑦᑕᐅᖁᓇᒋᑦ. ᐋᔩᖃᑎᒌᓐᓂᐅᔪᓪᓗ ᐱᐊᓂᓛᖁᒥᓇᓕᖅᑑᒐᓗᐊᑦ ᕿᓚᒥᒃᑯᑦ, ᐊᑯᓂᐅᓂᖅᓴᒃᑯᑦ ᑳᓐᑐᕌᖃᕈᓐᓇᓛᕋᑦᑕ ᑕᒪᑐᒧᖓ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑭᖑᓪᓕᖅᐹᖅ ᐊᒻᒪᓗ ᑐᒡᓕᐊ ᐊᐱᖅᑯᑎᒋᔭᐃᑦ, ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖁᔭᓐᓇᒦᒃ, ᐅᖃᖅᑎᑦᑎᔩ. ᐳᐃᒍᖃᑦᑕᕋᒪ ᖁᔭᓐᓇᒦᕆᐊᖓ ᒥᓂᔅᑕᒥᒃ. ᖁᔭᓐᓇᒦᒃ, ᒥᓂᔅᑖ ᑭᐅᒐᕕᙵ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 18 (ᑐᓵᔨᑎᒎᓕᖅᑐᖅ) ᑕᒪᓐᓇ ᐋᓐᓂᐊᕕᓕᐊᖅᐸᑦᑐᓄᑦ ᐊᑲᐅᙱᓕᐅᕈᑕᐅᔪᖅ ᐊᐅᓪᓚᕈᔾᔨᔪᑦ ᐅᖃᐅᓯᒪᒻᒥᒻᒪᑦ ᓇᐅᔮᓂᑦ ᑐᑭᓯᒍᒪᓪᓗᖓᓗ ᐱᔾᔪᑎᔅᓴᓗᐊᙱᒻᒥᒻᒪᑦ ᑐᒃᓯᕋᖅᑑᒐᓗᐊᓕᒫᑦ ᐊᖏᖅᑕᐅᑦᓴᐃᓐᓇᖅᐸᖏᒻᒪᑕ. ᒥᓂᔅᑕᐅᔪᖅ ᐅᖃᕈᓐᓇᖅᐹ ᕿᒥᕐᕈᕙᓪᓕᐊᒻᒪᖔᑕ ᐊᑐᐊᒐᕐᒥᓂᒃ ᑕᒪᒃᑯᐊ ᐋᓐᓂᐊᕕᓕᐊᕈᔾᔨᕙᑦᑐᐃᑦ ᐋᓐᓂᐊᔪᓂᒃ ᐱᓪᓗᒍ? (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᐳᕉᔅᑐ. ᐊᖓᔪᖅᑳᖅ ᔮᓇᑦ ᐳᕉᔅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐄ’, ᒫᓐᓇ ᕿᒥᕐᕈᔭᐅᔪᒍᑦ ᐊᑐᐊᒐᖁᑎᒋᔭᑦᑎᓐᓂᒃ ᐋᓐᓂᐊᕕᓕᐊᖅᑎᑦᓯᕙᑦᑐᓂᒃ ᐱᓗᐊᖅᑐᒥᒃ, ᓄᓇᕗᒻᒥᐅᓂᒃ ᐱᔨᑦᓯᕈᑎᐅᕙᑦᑐᓂᒃ. ᑕᒪᒃᑯᐊ ᐋᓐᓂᐊᕕᓕᐊᕈᔾᔨᕙᑦᑐᑦ ᕿᒥᕐᕈᔭᐅᒻᒪᑦ. ᑕᒪᑐᒪ ᐃᓚᒋᔭᐅᔪᖏᓛᒃ ᑕᒪᐃᓐᓂᒃ ᕿᒥᕐᕈᓂᐅᓯᒪᔪᒧᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᐊᕐᕕᐊᑦ ᓂᒋᐊᓄᑦ, ᒥᔅᑕ ᖃᑉᓗᑦᓯᐊᖅ. ᐊᐱᖅᑯᑦ 83 – 72): ᐱᓕᕆᕝᕕᑦ ᐱᖁᑎᔾᔪᐋᖏᑦ ᐊᕐᕕᐋᓂᑦ (ᖃᑉᓗᑦᓯᐊᖅ) ᖃᑉᓗᑦᓯᐊᖅ: ᒪ’ᓇ, ᐅᖃᖅᑎᑦᑎᔩ. ᑖᒃᑯᐊ ᐊᐱᖅᑯᑎᒃᑲ ᑐᕌᖓᓂᐊᖅᑐᑦ ᐃᓇᖏᕐᓂᒃᓯᒪᔪᒧᑦ ᐃᓕᓐᓂᐊᕐᑐᓕᕆᔨᕐᔪᐊᖅ ᒥᓂᔅᑕᖓᓄᑦ ᐃᓂᖓᓃᑲᐃᓐᓇᖅᑐᒧᑦ. ᐊᐱᖅᑯᑎᒪ ᓇᓛᒎᕐᓂᐊᖅᑐᖅ (ᑐᓵᔨᑎᒎᓕᖅᑐᖅ) ᐱᓕᕆᕝᕕᖕᒥ ᒪᑭᒪᔾᔪᑎᑦ (ᑐᓵᔨᑎᒎᕈᓐᓃᖅᑐᖅ) ᑕᐃᑲᓂ ᐊᕐᕕᐊᓂᑦ. ᑖᓐᓇ ᑎᑎᖅᑲᖅ ᑎᑎᕋᒐᐅᓚᐅᖅᑐᖅ ᒥᓂᔅᑕ ᖃᐅᔨᒪᔪᒃᓴᐅᕗᖅ ᓯᑎᐱᕆ 2023-ᖑᑎᓪᓗᒍ ᑖᒃᑯᐊ ᐃᓕᓐᓂᐊᓕᓵᖅᑐᑦ ᐅᓪᓗᑕᒫᑦ ᐅᓪᓗᓗᑦᑖᒧᑦ ᐃᓕᓐᓂᐊᕆᐊᖅᑐᒃᓴᐅᓪᓗᑎᒃ ᑖᒃᑯᓇᓂ ᓄᓇᓕᓐᓂ ᑕᓪᓕᒪᐅᔪᓂ: ᓇᓄᖅ ᐃᓕᓴᕕᒃ, ᓂᐊᖁᙴᒥ, ᖃᖅᑲᓕᒃ ᐃᓕᓐᓂᐊᕐᕕᒃ, ᑭᒻᒥᕈᕐᒥ, ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᒃ, ᐃᓪᓗᓕᒑᕐᔪᒻᒥ, ᐃᓄᒡᓚᒃ ᐃᓕᓐᓂᐊᕐᕕᒃ, ᑎᑭᕋᕐᔪᐊᕐᒥ, ᔨᒥ Hᐃᑯᒃ ᐃᓕᓐᓂᐊᕐᕕᑦ ᖁᓗᖅᑐᕐᒥᑦ, (ᑐᓵᔨᑎᒎᓕᖅᑐᖅ) ᖁᓴᕋᒃᓴᐅᔪᑦ ᐊᓪᓚᕕᖓᓐᓂᑦ ᐊᖏᓕᒋᐊᕈᒪᒻᒪᔾᔪᑦ ᑕᒻᒪᓐᓇ ᐱᓇᓱᑦᑕᐅᔪᖅ ᐃᓚᓕᐅᖅᑕᐅᓕᕐᓗᓂ ᓕᕙᐃ ᐊᖕᒪᒃ ᐃᓕᓐᓂᐊᖅᕕᐊ ᐊᕐᕕᐊᓂ. ᐅᖃᐅᓯᕆᒐᒃᑯ ᐅᑭᐅᖅ ᐃᒃᓯᕙᓂᖃᖅᑎᓪᓗᑕ ᒥᓂᔅᑕ ᑭᐅᔪᒻᒪᑦ ᐸᕐᓇᒪᑕᒎᖅ ᓄᑖᖑᕆᐊᖅᑕᐅᒋᐊᖓᓂ ᐱᓪᓗᒋ ᐃᖅᑲᓇᐃᔮᖑᓛᖅᑐᓂᓪᓗ 2027-2028-ᒥ. ᐅᖃᖅᑏ, ᒐᕙᒪᒃᑯ ᐊᑭᑐᔫᑎᓄ ᑮᓇᐅᔭᖅᑐᕈᑎᔅᓴᖏ ᓴᖅᑭᑕᐅᔪᒫᖅᐸ ᐃᒡᓗᒥ ᑕᖅᑭ ᐊᒡᒋᖅᑐᓂ. ᒥᓂᔅᑕ ᐅᖃᕈᓐᓇᖅᐸ ᑮᓇᐅᔭᐃᑦ ᑕᒪᑐᒧᖓ ᐱᖃᓯᐅᔾᔭᐅᓛᕆᐊᖏᓐᓂ ᑖᑯᓄᖓ ᑮᓇᐅᔭᖅᑐᕈᑎᔅᓴᖏᓄ ᐊᑭᑐᔫᑎᓄ? ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᒥᓂᔅᑕᐅᑲᐃᓐᓇᖅᑐᖅ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. ᒪ’ᓈᖅᑐᒍᓗ ᐊᐱᖅᓱᖅᑐᖅ. ᐄ’, ᑕᒃᑯᐊ ᐃᓕᓐᓂᐊᕐᕖᑦ ᐃᓚᖏᑦ ᐊᕐᕕᐊᓂ, ᓕᕙᐃ ᐊᒡᒫᒃ ᐃᓕᓐᓂᐊᖅᕕᐊ ᐃᓚᒋᔭᐅᓪᓗᓂ, ᐃᓕᓐᓂᐊᖅᑐ ᐊᒥᓲᓂᖏ ᑕᐅᑐᒃᑐᑭᑦ, ᐅᓪᓗᓗᒃᑖᑦ ᐃᓕᓐᓂᐊᓕᓵᖅᑐᑦ ᐅᑉᓗᓗᒃᑖᖅ ᐃᓕᓐᓂᐊᕐᓂᐊᓂᐊᓂᕐᐸᑕ, ᐃᓚᒋᐊᕐᓂᖅᑕᖃᕐᓗᓂ ᑭᓯᐊᓂᐅᓂᐊᕐᒪᑦ, ᑕᒪᒃᑯᐊ ᐃᓕᓐᓂᐊᕆᐊᖅᑕᑦᑐᑦ ᐊᒥᓲᓂᖏᑦ ᒪᓕᒃᑐᒋᑦ. ᐊᑭᑐᔪᖅᑐᕈᑎᓄᑦ ᑐᕌᖓᓂᐊᖅᑐᑦ ᐅᑭᐊᖅᓵᖅ, ᒪᓐᓇ ᐋᖅᑭᓱᖅᑕᐅᕙᓪᓕᐊᒻᒪᑕ ᓱᓕ, ᒫᓇ ᑮᓇᐅᔭᖅᑕᖃᕐᓂᐊᕐᒪᖓᑦ ᐊᐱᖅᑰᑕᐅᔫᑉ ᒥᒃᓵᓄᑦ, ᒫᓇ ᖃᐅᔨᒪᓇᖏᑦᑐᖅ, ᐃᓛ ᑭᐅᓂᖅ ᐊᔪᖅᖢᖓ. ᑭᓯᐊᓂ ᐃᓕᓐᓂᐊᖅᑐᓕᕆᔨᒃᑯ ᐊᐱᕆᓯᒪᔫᒐᓗᐃᑦ ᓇᓗᓇᐃᖅᓯᓯᒪᔫᒐᓗᐃᑦ ᐊᔾᔨᒌᖏᑦᑐᓂᒃ ᐸᕐᓇᑕᐅᓂᕐᒧᑦ ᓯᕗᒧᐊᑎᑦᑎᓂᒍᐊᖅᑑᒐᓗᐃᑦ ᐊᔾᔨᒌᖏᑦᑐᓂᒃ, ᑖᒻᓇ ᐊᕐᕕᐊᓂ ᓕᕙᐃ ᐊᖕᒪᒃ ᐃᓕᓐᓂᐊᕐᕕᐊ ᐃᓚᒋᔭᐅᒐᓗᐊᖅᑐᓂ ᑐᒃᓯᕋᐅᑕᐅᓯᒪᔪᒧᑦ. ᒪ’ᓇ, ᐅᖃᖅᑎᑦᓯᔩ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 19 ᐅᖃᖅᑎ: ᓯᕗᓪᓕᖅᐹ ᐃᓚᒋᐊᕈᑏᑦ ᐊᐱᕆᒍ, ᒥᔅᑕ ᖃᑉᓗᑦᓯᐊᖅ. ᖃᑉᓗᑦᓯᐊᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐃᖅᑲᐅᒪᓂᐊᖅᑐᒃᓴᐅᕗᑦ ᐃᓕᓐᓂᐊᖅᑐᓕᕆᔨᒃᑯᑦ 2026-2027 ᐊᑭᑐᔪᖅᑐᕈᑎᔅᓴᐃᒃ ᓄᑖᖑᕆᐊᖅᑎᑕᐅᓂᕐᓄᑦ ᑐᕌᖓᒻᒪᑕ ᐃᓕᓐᓂᐊᖅᕕᓕᒫᓄᑦ ᓄᓇᕗᒻᒥ. ᒥᓂᔅᑕᖃᐃ ᓇᓗᓇᐃᔭᐃᔪᓐᓇᖅᐸ ᑕᐃᓪᓕᑎᖅᓯᒪᓗᒋᑦ ᐃᓕᓐᓂᐊᖅᑐᓕᕆᔨᒃᑯᑦ ᐊᖏᓂᖅᐹ ᐱᓕᕆᐊᕆᓂᐊᖅᑕᖏ ᐱᓗᐊᕐᓗᒋᑦ ᑖᓇ ᐊᕐᕕᐊᑦ ᓕᕙᐃ ᐊᖕᒪᒃ ᐃᓕᓐᓂᐊᖅᕕᖓ, ᕿᑎᖅᓯᖅ ᐊᑯᓂᖅᓱᖅᑐᑦ ᐃᓕᓴᖅᕕᖓ, ᐊᒻᒪᓗ ᔮᓐ ᐊᕐᓈᓗᒃᔪᐊᖅ ᐃᓕᓂᐊᖅᕕᐊᓗᐊᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐃᓕᓐᓂᐊᖅᑐᓕᕆᔨᒃᑯᓐᓄᑦ ᒥᓂᔅᑕᐅᑲᐃᓐᓇᖅᑐᖅ, ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ, ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᑕᐃᓐᓇ ᓕᕙᐃ ᐊᖕᒫᖓ ᐃᓕᓂᐊᖅᕕᖓ, ᐊᒻᒪ ᔮᓐ ᐊᕐᓈᓗᒃᔪᐊᖅ ᐃᓕᓂᐊᕐᕕᐊᓗᒃ, ᐃᓗᓕᑯᓘᔭᖃᐅᖅᑐᓂ ᑖᑯᐊ ᐱᓯᒪᖏᓇᒃᑭ. ᐃᖅᑲᓇᐃᔮᒐᓛᖑᓂᐊᖅᑐᒃᓴᐅᔫᒐᓗᐊᖅ ᑭᓯᐊᓂ ᐅᑯᓇᓂ ᐸᐃᐹᖁᑎᓂ ᓇᓗᓇᐃᖅᓯᒪᖏᓇᑦᑕ. ᑭᓯᐊᓂ ᑕᐃᓐᓇ ᐊᑯᓂᖅᓱᖅᑐᖅ ᐃᓕᓐᓂᐊᖅᕕᒃ ᐃᒪᖃᐅᑎᖃᕕᐊ ᓄᑖᖑᕆᐊᖅᑎᑕᐅᓂᐊᕐᒪᑦ ᑕᐃᒃᑯᐊᓗ ᑲᓐᑐᕌᒃᑏᑦ ᑕᐃᒃᑯᐊ ᐃᓕᓐᓂᐊᖅᕕᒻᒥ ᓄᖅᑲᖓᓕᖅᐸᑕ ᐊᐅᔭᖅ ᑕᐃᔅᓱᒥᖓ ᐅᑕᖅᑭᔪᑦ, ᐃᒥᖃᐅᑎᖃᖅᕖᑦ. ᑕᐃᓐᓇ ᐅᐸᒃᓯᒪᖃᑦᑕᕋᒃᑭᑦ ᐊᐅᔭᒃᑯᑦ ᐃᖅᑲᓇᐃᔭᖅᓱᖓ ᑕᐃᓇᓃᖃᑦᑕᓚᐅᕋᒪ ᑕᑯᓐᓇᑎᐊᖅᑕᒃᑲ ᑕᐃᒪᖓᓕᒫᖅ ᓱᕐᕋᑦᑕᐅᓚᐅᓯᒻᒐᖏᑦᑐᑦ ᓄᑖᖑᕆᐊᖅᑎᑕᐅᓚᐅᓯᒪᖏᑐᑎᓪᓗ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐅᖃᖅᑎᑦᓯᔩ. ᐅᖃᖅᑎ: ᐃᒪᖃᐅᑎᖏ ᑕᑭᔪᐊᓘᕙᓪᓚᐃᔪᑦ. ᑐᒡᓕᐊ ᐊᒻᒪᓗ ᑭᖑᓕᖅᐹᖅ ᐊᐱᖅᑯᑎᒋᔭᐃᑦ, ᒥᔅᑕ ᖃᑉᓗᑦᓯᐊᖅ. ᖃᑉᓗᑦᓯᐊᖅ (ᑐᓵᔨᑎᒍᑦ): ᒪ’ᓇ, ᐅᖃᖅᑎᑦᑎᔩ. ᐅᑉᐱᕆᕙᒋᓪᓗ ᑕᐃᑲᓂᑦᑕᐅ ᐱᓕᕆᑕᕐᓂᑰᒐᒪ ᐊᐅᔭᒃᑯᑦ ᐃᖅᑲᓇᐃᔭᓚᐅᑲᒃᑎᒡᓗᖓ, ᓄᓇᓕᖕᓄᑦ ᒐᕙᒪᒃᑯᓐᓄᓪᓗ ᐱᔨᑦᑎᕋᖅᑎᐅᓚᐅᖅᑐᒧᑦ. ᐊᒡᒋᐅᓕᖅᑐᖅ 10 ᑭᓯᐊᓂ. (ᑐᓵᔨᑎᒎᓕᖅᑐᖅ) ᑕᐃᓐᓇ ᒥᓂᔅᑕ ᖃᐅᔨᒪᔪᒃᓴᐅᕗᖅ ᐃᓕᓐᓂᐊᖅᑐᓕᕆᔨᒃᑯᑦ 2026-2027 ᐊᑭᑐᔪᖅᑐᕈᑎᒃᓴᐃᑦ ᑮᓇᐅᔭᖁᑎᖃᖅᑐᑦ ᑕᒪᒃᑯᐊ ᓄᑖᙳᕆᐊᖅᑎᑕᐅᕙᓪᓕᐊᔪᑦ ᑮᓇᐅᔭᖃᖅᑎᑕᐅᖁᓪᓗᒋᑦ ᓄᓇᕗᒻᒥ. ᑖᒃᑯᐊ ᐃᖅᑲᓇᐃᔭᖅᑐᐃᑦ ᐊᒥᒐᙱᑦᑐᓂᒃ ᐃᓂᒃᓴᖃᕆᐊᓖᑦ ᐃᖅᑲᓇᐃᔭᕐᕕᒋᓂᐊᖅᑕᒥᖕᓂ. ᒥᓂᔅᑕᖃᐃ ᓇᓗᓇᐃᖅᓯᔪᓐᓇᖅᐸ ᖃᓄᐃᑦᑐᓂᒃ ᐃᖅᑲᓇᐃᔮᖃᕐᓂᐊᕐᒪᖔᑦ ᑕᒪᑐᒪᓂ ᑕᐃᒃᑯᐊᓗ ᓇᓗᓇᐃᔭᖅᑕᐅᓯᒪᔪᑦ ᒫᓐᓇ ᑎᑎᕋᕐᕕᐅᑉ ᐊᖏᓂᖓ? ᖁᔭᓐᓇᒦᒃ. ᐅᖃᖅᑎ: ᒥᓂᔅᑕᐅᑲᐃᓐᓇᖅᑐᖅ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᒪᐃᓐ. ᓯᕗᓕᖅᑎ ᐋᕐᓗᒃ ᒪᐃᓐ: ᒪ’ᓇ ᐅᖃᖅᑎᑦᓯᔩ. (ᑐᓵᔨᑎᒎᓕᖅᑐᖅ) ᑕᐃᓐᓇ ᑎᑎᕋᕐᕕᒃ ᐱᓪᓗᒍ ᐊᒻᒪᓗ ᐃᓕᓐᓂᐊᕈᑎᒃᓴᓂᒃ ᑕᐃᓐᓇ ᓴᓇᕕᒃ ᑕᐃᑲᓂ ᐊᕐᕕᐊᓂ, ᒪᒥᐊᓇᖅ ᐅᑯᐊ ᐃᓗᓕᑯᓘᔭᖃᐅᖅᑐᓂᒃ ᐱᓯᒪᙱᓐᓇᒪ. ᑕᕝᕙᓂ ᐅᕝᕙᓘᓐᓃᑦ ᐅᖃᓪᓚᖃᑎᒋᓗᑎᑦ ᑕᒪᒃᑯᐊ ᓇᓗᓇᐃᔭᕈᓐᓇᖅᑕᕗᑦ. ᐄ’, ᑕᒪᓐᓇ ᐃᓱᒫᓘᑎᒋᖕᒥᔭᕗᑦ 20 ᐊᕙᑏᑦ ᐃᓕᓐᓂᐊᕈᑎᒃᓴᓕᐅᕐᕕᖕᒥ ᐃᖅᑲᓇᐃᔭᖅᑐᑦ ᑎᓴᒪᐃᓐᓇᐃᑦ ᐃᓐᓄᒃᑕᐅᓯᒪᙱᒻᒪᑕ. ᐊᑭᑦᑐᕋᐅᑎᓂᒃ ᑕᒪᒃᑯᓂᖓ ᐋᖅᑭᒃᓱᐃᓯᒪᓕᖅᑐᒍᑦ, ᐱᐅᓯᕚᓪᓕᕐᓂᐊᖅᑐᒃᓴᐅᕗᑦ. ᐊᒻᒪᓗ ᐃᖅᑲᓇᐃᔭᖅᑎᑦ ᐃᒡᓗᖓᑦ ᐃᒡᓗᖃᖅᑎᑕᐅᓂᖓ ᑖᓐᓇ ᐃᓱᒫᓘᑎᒋᖕᒥᔭᕗᑦ ᐃᓐᓄᙱᔾᔪᑎᒋᔭᐅᒋᓪᓗᓂ. ᐃᓕᓐᓂᐊᖅᓯᒪᑦᑎᐊᕐᓗᑎᒃ ᑭᓯᐊᓂ ᐃᓕᓐᓂᐊᕈᑎᒃᓴᓕᐅᖃᑦᑕᕈᓐᓇᕐᒪᑕ ᐊᒻᒪᓗ ᓯᓚᑦᑐᒃᓴᕐᕕᒡᔪᐊᕐᒥ ᐃᓕᓐᓂᐊᖅᓯᒪᓂᑰᓗᑎᐅᔭᕆᐊᖃᕐᒪᑦ. ᐃᓐᓄᒃᑕᐅᓯᒪᑦᑎᐊᙱᒃᑲᓗᐊᖅᑎᓪᓗᒋᑦ ᐊᖏᖅᓯᒪᑦᑎᐊᖅᑐᒍᑦ ᑕᐃᓐᓇ ᐃᓕᓐᓂᐊᕈᑎᒃᓴᓕᐅᕐᕕᖕᒥ ᐃᖅᑲᓇᐃᔭᖅᑐᒃᓴᓂᒃ ᐃᓐᓄᐃᕙᓪᓕᐊᓗᑕ. (ᑐᓵᔨᑎᒎᕈᓐᓃᖅᑐᖅ) ᒪ’ᓇ, ᐅᖃᖅᑎᑦᓯᔩ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 20 ᐅᖃᖅᑎ: ᐅᖃᐅᓯᒃᑯᑦ ᐊᐱᖅᑯᑏᑦ. ᑲᔪᓯᒃᑲᓐᓂᕈᑦᑕ ᑲᑎᒪᔾᔪᑎᑦᑎᓐᓄᑦ. ᓈᓴᐅᑎᖓ 7. ᑎᑎᖅᑲᑎᒍᑦ ᐊᐱᖅᑯᑏᑦ. 8 ᑎᑎᖅᑲᑎᒍᑦ ᐊᐱᖅᑯᑎᕕᓂᕐᓄᑦ ᑭᐅᔾᔪᑏᑦ. ᑲᑎᒪᔾᔪᑎᒃᓴᖅ 9. ᒪᑐᐃᖅᓯᔾᔪᑎᓄᑦ ᑭᐅᔾᔪᑏᑦ. ᑲᑎᒪᔾᔪᑎᒃᓴᖅ 10. ᐊᑎᓕᐅᖅᓯᒪᔪᑎᒍᑦ ᑐᒃᓯᕋᐅᑏᑦ. ᑲᑎᒪᔾᔪᑎᒃᓴᖅ 11. ᐊᑎᓕᐅᖅᓯᒪᔪᑎᒍᑦ ᑐᒃᓯᕋᐅᑎᓄᑦ ᑭᐅᔾᔪᑏᑦ. ᑲᑎᒪᔾᔪᑎᒃᓴᖅ 12. ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᑦ ᐅᓂᒃᑳᖏᑦ ᕿᒥᕐᕈᓇᓚᐅᖅᑎᓪᓗᒋᑦ ᐱᖁᔭᒃᓴᓂᒃ ᐊᓯᖏᓐᓂᓪᓗ. ᐃᓕᑕᕆᕙᕋ ᒪᓕᒐᓕᕆᔨᒃᑯᑦ ᑲᑎᒪᔨᕋᓛᖓᑕ ᐃᒃᓯᕙᐅᑕᖓ ᖃᑉᓗᑦᓯᐊᖅ. ᑲᑎᒪᔾᔪᑎᒃᓴᖅ 12: ᐅᓂᒃᑳᖏᑦ ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᓪᓗ ᒪᓕᒐᒃᓴᓄᑦ ᐊᓯᖏᓄᓪᓗ ᑲᑎᒪᔨᕋᓛᑦ ᐅᓂᒃᑳᖓ 2 – 7(2): ᒪᓕᒐᒃᓴᖅ 4, ᒪᓕᒐᖅ ᐋᖅᑭᒋᐊᕆᔾᔪᑎᖓᓄᑦ ᐃᓐᑲᒪᑖᒃᔅᓄᑦ ᒪᓕᒐᓂᒃ (ᖃᑉᓗᑦᓯᐊᖅ) ᖃᑉᓗᑦᓯᐊᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑎ. ᓇᓗᓇᐃᖅᓯᔪᒪᓪᓗᖓ ᐱᖁᔭᒃᓴᖅ 4 ᐱᖁᔭᕐᔪᐊᖅ ᐋᖅᑭᒋᐊᖅᓯᔾᔪᑕᐅᓂᐊᖅᑐᖅ ᑖᒃᓰᔭᐃᔭᖅᑐᓕᕆᓂᕐᒧᑦ ᐱᖁᔭᕐᔪᐊᖅ ᕿᒥᕐᕈᓇᒃᑕᐅᕌᓂᒃᓯᒪᓕᕐᒪᑦ ᐱᖁᔭᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ ᐊᒻᒪ ᑲᑎᒪᑐᐃᓐᓇᕐᓂᕐᒥᒃ ᐃᓱᒪᒃᓴᓯᐅᕈᑎᒋᔭᐅᔪᓐᓇᖅᓯᓪᓗᓂ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᖁᔭᓐᓇᒦᒃ. ᒪᓕᒐᓕᐅᖅᑏᑦ, ᐊᖏᖅᐱᓰ ᑖᓐᓇ ᐱᖁᔭᒃᓴᖅ 4, ᐋᖅᑭᒋᐊᖅᑕᐅᓂᖓ ᑖᒃᓰᔭᐃᔭᖅᑐᓕᕆᓂᕐᒧᑦ ᐱᖁᔭᖅ ᑕᕝᕗᖓ ᐃᓪᓗᕐᔪᐊᕐᒧᑦ ᐅᓂᒃᑳᖅᑕᐅᒍᓐᓇᖁᓪᓗᒍ ᐊᒻᒪᓗ ᑲᑎᒪᔾᔪᑎᑦᑎᓐᓄᑦ ᐃᓕᔭᐅᓂᐊᕐᒪᑦ ᑲᑎᒪᑐᐃᓐᓇᓕᕐᓗᑎᒃ ᐃᓱᒪᒃᓴᖅᓯᐅᕈᑎᒋᔭᐅᓂᐊᕐᒪᑦ. ᐊᖏᖅᐱᓯ? ᖁᔭᓐᓇᒦᒃ. ᐃᓚᖏᑦ ᒪᓕᒐᓕᐅᖅᑏᑦ: ᐊᖏᖅᑐᑦ. ᐅᖃᖅᑎ: ᑲᑎᒪᔾᔪᑎᑦᑕ ᓈᓴᐅᑎᖓ 13. ᑎᑎᖅᑲᑦ ᓴᖅᑭᑕᐅᓂᖏᑦ. ᐃᖃᓗᒃᑑᑦᓯᐊᕐᒧᑦ ᒪᓕᒐᓕᐅᖅᑎ ᐲᑕᓴᓐ. ᑲᑎᒪᔾᔪᑎᒃᓴᖅ 13: ᓴᖅᑭᑕᐅᓂᖏᑦ ᑎᑎᖅᑲᐃᑦ ᓴᖅᑭᑕᐅᔪᖅ ᑎᑎᖅᑲᒃ 27 - 7(2): ᑎᑎᖅᑲᖓ ᒥᓂᔅᑑᑉ ᐋᓐᓂᐊᖅᑐᓕᕆᔨᒃᑯᑦ ᑭᖑᓂᐊᑕ ᑲᑎᒪᔨᑐᐃᓐᓇᐃᑦ ᕿᒥᕐᕈᔭᖃᓚᐅᖅᑎᓪᓗᒋᑦ 2026+-2027 ᓇᓚᐅᑦᑖᖅᑕᓄᑦ ᐊᑐᖅᑐᒃᓴᑦ ᑮᓇᐅᔭᖅᑑᑎᒃᓴᖏᑦ ᐱᓕᕆᕝᕕᐊ ᐋᓐᓂᐊᖅᑐᓕᕆᔨᒃᑯᑦ (ᐲᑕᓴᓐ) ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᐊᑕᐅᓯᕐᒥᒃ ᑎᑎᖅᑲᒥᒃ ᓴᖅᑭᑦᑎᔪᒪᓪᓗᖓ. ᑲᑎᒪᑐᐃᓐᓇᕐᓂᕐᒧᑦ ᐃᒃᓯᕙᐅᑕᐅᓂᕋ ᐊᑐᖅᖢᒍ ᐊᒻᒪᓗ ᑖᒃᑯᐊ ᑎᑎᖅᑲᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖏᓐᓂᙶᖅᑐᑦ ᐃᓱᒪᒃᓴᖅᓯᐅᕈᑎᒋᔭᐅᓚᐅᖅᑎᓪᓗᒋᑦ 2026=2027 ᐊᑐᕈᒫᕐᓂᐊᖅᑐᑦ ᑲᑎᒪᕐᔪᐊᕐᓂᕐᒥ ᑲᑎᒪᑐᐃᓐᓇᖅᑎᓪᓗᒍ ᐅᐱᕐᖔᖅᓯᐅᒻᒥᒃ 2026ᒥ. ᖁᔭᓐᓇᒦᕈᒪᕙᒃᑲ ᑖᓐᓇ ᒥᓂᔅᑕᕆᔭᐅᔪᖅ ᑕᒪᒃᑯᓂᖓ ᓴᖅᑭᑦᑎᔪᓐᓇᓚᐅᕐᒪᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᑲᑎᒪᔾᔪᑎᑦᑕ ᓈᓴᐅᑎᖓ 13. ᑎᑎᖅᑲᑦ ᓴᖅᑭᑕᐅᓂᖏᑦ. ᐱᑕᖃᕈᓐᓃᖅᐸᑦ, ᑲᑎᒪᔾᔪᑎᒃᓴᖅ 14. ᖃᐅᔨᒃᑲᐃᔾᔪᑏᑦ ᐱᖁᔨᕗᖔᕈᑕᐅᓂᐊᖅᑐᓂᒃ. ᑲᑎᒪᔾᔪᑎᒃᓴᖅ 15. ᖃᐅᔨᒃᑲᐃᔾᔪᑏᑦ ᐱᖁᔨᕗᖔᕈᑕᐅᓂᐊᖅᑐᓂᒃ ᓯᕗᓪᓕᖅᐹᒥ ᐅᖃᓕᒫᖅᑕᐅᖁᓪᓗᒋᑦ ᐱᖁᔭᒃᓴᑦ. ᑲᑎᒪᔾᔪᑎᒃᓴᖅ 16. ᐱᖁᔨᕗᖔᕈᑏᑦ. ᑲᑎᒪᔾᔪᑎᒃᓴᖅ 17. ᓯᕗᓪᓕᖅᐹᒥ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᑲᑎᒪᔾᔪᑎᒃᓴᖅ 18. ᑐᒡᓕᐊᓂ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᑲᑎᒪᔾᔪᑎᒃᓴᖅ 19. ᑲᑎᒪᑐᐃᓐᓇᕐᓂᒃ ᐃᓱᒪᒃᓴᖅᓯᐅᕈᑎᖃᕐᓗᑎᒃ ᐱᖁᔭᒃᓴᓂᒃ ᐊᓯᖏᓐᓂᒡᓗ. ᑖᑦᓱᒧᖓ ᑲᑎᒪᒋᐊᓚᐅᖅᑳᖅᑎᓐᓇᒋᑦ 20-ᒥᓂᑦᓯᒥᒃ ᓄᖅᑲᖓᑲᐃᓐᓇᕐᓂᐊᕋᑦᑕ. ᐃᖅᓱᖅᑎ. >>ᑲᑎᒪᓂᖅ ᓄᖅᑲᖅᑐᖅ 14:41 ᐊᒻᒪᓗ ᑲᑎᒪᑐᐃᓐᓇᕐᓂᖅ ᐱᒋᐊᖅᑐᖅ 15:14 ᑲᑎᒪᔾᔪᑎᒃᓴᖅ 20: ᑲᑎᒪᔨᕋᓛᑦ ᑲᑎᒪᑐᐃᓐᓇᖅᑎᓪᓗᒋᑦ ᐃᓱᒪᒃᓴᖅᓯᐅᖅᑕᐅᓂᖏᑦ ᒪᓕᒐᒃᓴᐃᑦ ᐊᓯᖏᓪᓗ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 21 ᐃᒃᓯᕙᐅᑕᖅ (ᒥᔅᑕ ᕗᕆᐊᑦ ᐲᑕᓴᓐ) (ᑐᓵᔨᑎᒍᑦ): ᑲᑎᒪᔩᑦ ᑲᑎᒪᑐᐃᓐᓇᕐᓂᖅ ᐱᒋᐊᕐᓂᐊᕐᒪᑦ. ᐃᓱᒪᒃᓴᖅᓯᐅᕈᑎᒋᓂᐊᖅᑕᕗᑦ ᐅᑯᐊ: ᐱᖁᔭᒃᓴᖅ 1 ᐊᒻᒪᓗ 2. ᖃᓄᐃᓕᐅᕈᒪᓕᕆᕕᓯ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᓱᒪᒃᓴᖅᓯᐅᕈᑎᒌᓐᓇᕈᒪᓪᓗᒍ ᐱᖁᔭᒃᓴᖅ 1, ᑮᓇᐅᔭᖅ ᐊᐅᓚᑕᐅᓂᖏᑦ ᐱᖁᔭᕐᔪᐊᖅ, 2026-2027, ᐊᒻᒪᓗ 2026-2027 ᑮᓇᐅᔭᑦ ᐊᑐᕈᒫᕐᓂᐊᖅᑐᑦ ᓄᓇᕗᑦ ᓯᓚᑦᑐᖅᓴᕐᕕᖓᓐᓄᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᑕᖅᑐ. ᐊᖏᖃᑎᒌᑉᐱᑕ ᓯᕗᓪᓕᖅᐹᖅ ᑲᒪᒋᔭᐅᖁᓪᓗᒍ ᐱᖁᔭᒃᓴᖅ 1? ᑲᑎᒪᔨᕋᓛᑦ ᐃᓚᖏᑦ: ᐊᖏᖅᑐᑦ. ᒪᓕᒐᒃᓴᖅ 1 - ᑮᓇᐃᔭᑦ ᐊᑐᖅᑕᐅᑲᐃᓐᓇᕐᓂᐊᖅᑐᑦ (ᐊᐅᓚᔾᔪᑏᑦ ᐋᖅᑭᐅᒪᐃᓐᓇᕈᑏᓪᓗ) ᒪᓕᒐᖅ, 2026- 2027 – ᑲᑎᒪᔨᕋᓛᓄᑦ ᐃᓱᒪᒃᓴᖅᓯᐅᖅᑕᐅᓂᖓ ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᒥᓂᔅᑕ ᕼᐄᓕ ᐊᕿᐊᕈᖅ, ᑕᑉᐹᓃᖃᑎᖃᕈᒪᕖᑦ? ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᕈᓐᓃᖅᑐᖅ) ᐄ’, ᐃᓚᖃᕈᒪᔪᖓ. ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᑲᑎᒪᔨᕋᓛᑦ ᐊᖏᖅᐹᑦ ᑖᒃᑯᐊ ᓵᔅᓯᓐᓅᖅᑕᐅᖁᓪᓗᒋᑦ? ᑲᑎᒪᔨᕋᓛᑦ ᐃᓚᖏᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᐃᖅᓱᖅᑏ, ᐅᑯᐊ ᐃᓯᖅᑎᑲᐃᓐᓇᒃᑭᑦ. ᑎᑎᕋᖅᑕᐅᓯᒪᓂᐊᕐᒪᑕ ᑭᒃᑰᒻᒪᖔᑦ ᑖᒃᑯᐊ ᓇᓗᓇᐃᑲᐃᓐᓇᒃᑭᑦ ᐊᒻᒪᓗ ᒪᑐᐃᖅᓯᔾᔪᑎᑎᑦ ᐅᖃᓕᒫᕆᐊᕐᓗᒋᑦ. ᐊᖓᔪᖅᑳᖅ ᕼᐄᓕ−ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᑕᒫᓃᖃᑎᒃᑲ ᓄᓇᕗᑦ ᓯᓚᑦᑐᖅᓴᕐᕕᒃᑯᓐᓄᑦ ᐊᖏᔪᖅᑳᖅ ᔮᑭ ᐳᕋᐃᔅ ᐊᒻᒪᓗ ᐳᓚ ᓗᐊᓪ ᑮᓇᐅᔭᓕᕆᔨ. ᓯᐅ ᔭᖕ ᑕᕝᕙᓃᒃᑭᓪᓗᓂ ᐊᑐᐊᒐᓕᕆᓂᕐᒧᑦ ᑐᑭᒧᐊᑦᑐᓕᕆᓂᕐᒧᓪᓗ ᐸᕐᓇᐅᑎᑦ ᐊᖓᔪᖅᑳᖓᑦ. ᖁᔭᓐᓇᒦᒃ, ᐃᒃᓯᕙᐅᑖᖅ ᒪᓕᒐᓕᐅᖅᑎᐅᖃᑎᒃᑲᓗ. ᖁᕕᐊᓱᒃᑐᖓ ᓄᓇᕗᑦ ᓯᓚᑦᑐᖅᓴᕐᕕᒃᑯᑦ 2026-2027 ᐊᑐᕈᒫᕐᓂᐊᖅᑐᑦ ᐅᖃᐅᓯᕆᔪᓐᓇᕋᒃᑭᑦ ᑖᒃᑯᐊ ᐊᐅᓚᑕᐅᖃᑦᑕᖅᑐᑦ ᐱᓕᕆᐊᖑᓂᐊᖅᑐᑦ ᐸᕐᓇᐅᑎᖏᑦ ᑐᙵᕕᒋᓪᓗᒋᑦ ᑮᓇᐅᔭᑦ ᐊᑐᕈᒫᕐᓂᐊᖅᑐᑦ. ᓯᓚᑦᑐᖅᓴᕐᕕᒃᑯᑦ ᐊᐅᓚᔾᔪᑏᑦ ᑮᓇᐅᔭᖅᑐᕈᑎᖏᑦ ᐊᔾᔨᒌᙱᑦᑐᓂᒃ ᑮᓇᐅᔭᓕᖅᑕᐅᓯᒪᖃᑦᑕᖅᑐᑦ ᐃᓚᓕᐅᒃᖢᒍ ᒐᕙᒪᒃᑯᑦ ᓯᓚᑖᓃᙶᖅᑐᑦ ᓇᒻᒥᓂᕐᓗ ᑮᓇᐅᔭᓕᐊᖏᑦ. ᓄᓇᕗᑦ ᒐᕙᒪᒃᑯᓐᓃᙶᖅᑐᑦ ᐱᓪᓗᒋᑦ ᑕᒪᑐᒪᓂ ᐊᕐᕌᒍᒥ ᓯᓚᑦᑐᖅᓴᕐᕕᒃᑯᑦ $52,201,000-ᓂᒃ ᑐᒃᓯᕌᓖᑦ. ᑖᒃᑯᓇᙵᑦ ᑖᒃᑯᐊ ᐃᓚᒃᑲᓐᓂᕐᓂᐊᖅᑐᑦ $4,076,000-ᑖᓚᓂᒃ ᐊᕐᕌᓂᓂᓴᐃᑦ ᑕᑯᓐᓇᕈᑦᑎᒃᑯ. ᑖᒃᑯᐊ ᐊᖏᓪᓕᒋᐊᕈᑎᖏᑦ ᐅᑯᓄᖓ ᐊᑐᕐᓂᐊᖅᑐᑦ: • ᓴᓇᔨᓪᓚᕆᙳᕆᐅᖅᓴᓂᕐᒧᑦ ᑐᕌᖓᔪᑦ ᐃᓕᓐᓂᐊᕈᑎᒃᓴᐃᑦ; ᐊᒻᒪᓗ • ᐃᖅᑲᓇᐃᔭᖅᑏᑦ ᐅᓄᖅᓯᒋᐊᖅᑕᐅᓂᖏᑦ ᑮᓇᐅᔾᔭᒃᓵᑦ, ᐃᑲᔫᓯᐊᓪᓗ. ᓯᓚᑦᑐᖅᓴᕐᕕᒃᑯᑦ ᑐᒃᓯᕌᓖᑦ $2,842,000 ᓴᓇᔨᓪᓚᕆᙳᕆᐅᖅᓴᕐᓂᕐᒧᑦ ᐃᓕᓐᓂᐊᕈᑎᒃᓴᑦ ᐱᓪᓗᒋᑦ. ᐃᓕᓐᓂᐊᓪᓚᕆᓚᐅᙱᓐᓂᖏᓐᓂ ᐅᐸᓗᖓᐃᔭᖅᑕᐅᓯᒪᓂᖏᑦ ᐊᒻᒪᓗ ᐃᓕᓐᓂᐊᓯᓐᓈᑦ ᑖᒃᑯᐊ ᐃᖅᑲᓇᐃᔭᖃᑦᑕᕐᓂᐊᖅᑐᑦ ᑕᓪᓕᒪᓪᓗᐊᑕᑦ ᐱᓪᓗᒋᑦ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 22 ᓴᓇᑐᓕᖅᓴᕐᕕᒻᒥ ᐃᓕᓐᓂᐊᕐᓂᐊᖅᑐᑦ ᐅᓄᖅᓯᑲᓐᓂᕐᓗᑎᓪᓗ ᑕᐃᒃᑯᐊ ᐃᓕᓐᓂᐊᕈᑎᒃᓴᖏᑦ. ᑲᑐᔾᔨᖃᑎᒌᓐᓂᒃᑰᕐᓗᑕ ᓲᕐᓗ ᐃᒡᓗᓕᕆᔨᕐᔪᐊᒃᑯᑦ ᓯᓚᑦᑐᖅᓴᕐᕕᒃᑯᑦ ᐃᒡᓗᓂᒃ ᓴᓇᕙᓪᓕᐊᓂᐊᖅᑐᑦ ᐃᓕᓴᖅᑏᑦ ᑖᒃᑯᐊ ᐊᑐᖅᑕᐅᓗᑎᒃ ᐊᑭᓕᖅᓱᖅᑕᐅᓗᑎᒃ ᐃᓕᓐᓂᐊᓯᓐᓈᑦ ᐃᒡᓗᓕᐅᖃᑕᐅᓗᑎᒃ, ᐃᒡᓗᑖᕆᐊᖃᓪᓚᕆᓐᓂᖅ ᐱᓪᓗᒍ. ᑕᒪᒃᑯᐊ ᐃᒡᓗᓕᐅᕈᑏᑦ ᐊᖏᔪᖅᑳᖃᕆᐊᓖᑦ ᐊᒻᒪᓗ ᐊᐅᐸᖅᑐᓂᒃ ᓇᓗᓇᐃᒃᑯᑕᓖᑦ ᑕᐃᑲᓂ ᐃᑲᔪᖅᑎᒋᔭᐅᒻᒥᓗᑎᒃ. ᐃᑲᕐᕋᖏᑦ ᑖᒃᑯᐊ ᓈᓴᖅᑕᐅᔪᑦ ᑕᐃᒪᐃᑦᑕᕆᐊᖃᖅᑎᑕᐅᒐᒥᒃ ᐃᓕᓐᓂᐊᓯᓐᓈᑦ ᐃᖅᑲᓇᐃᔭᖅᑏᑦ ᐱᖁᔭᕐᔪᐊᖓᒍᑦ. ᐊᑐᕈᒫᕐᓂᐊᖅᑐᑦ ᐅᑯᐊ ᐃᑲᔪᖅᓱᖅᑕᐅᖁᓪᓗᒋᑦ. ᓯᓚᑦᑐᖅᓴᕐᕕᒃᑯᑦ ᐅᐱᑦᑐᑦ ᐃᒡᓗᓕᐅᖅᐸᓪᓕᐊᔪᓐᓇᕐᓂᐊᕐᒪᑕ ᐱᔭᕇᖅᑕᐅᕙᓪᓕᐊᓪᓗᑎᓪᓗ ᐃᓕᓴᖅᑎᓄᑦ. ᒪᕐᕉᒃ ᑲᑎᙵᔫᒃ ᒫᔅᓯᐅᓚᐅᖅᑐᒥ ᐱᔭᕇᖅᑕᐅᓚᐅᖅᑑᒃ ᐊᒻᒪ ᒪᕐᕈᒃᑲᓐᓃᒃ ᐱᔭᕇᖅᑕᐅᓂᐊᖅᑑᒃ ᐊᐅᔭᖅ ᐃᓱᓕᓚᐅᖅᑎᓐᓇᒍ. ᑖᒃᑯᐊ ᐱᖓᓱᑦ ᑲᑎᙵᔪᑦ ᑲᑎᓕᒫᕐᓗᒋᑦ 6, ᐃᓕᓴᖅᑎᓄᑦ ᓯᓚᑦᑐᖅᓴᕐᕕᒻᒥ ᐃᓕᓴᖅᑎᓄᑦ ᐃᒡᓗᒋᔭᐅᓂᐊᖅᑐᑦ, ᐃᓕᓐᓂᐊᖃᑎᒌᓪᓗᑎᒃ ᐊᒻᒪᓗ ᐱᓕᒻᒪᒃᓯᒪᓪᓚᕆᑦᑐᓂᒃ ᓇᓗᓇᐃᒃᑯᑕᓄᑦ ᐃᑲᔪᖅᑕᐅᓗᑎᒃ. ᓯᓚᑦᑐᖅᓴᕐᕕᒃᑯᑦ ᖃᓄᖅᑑᕈᑎᖃᐃᓐᓇᖅᐳᑦ ᑖᓐᓇ ᒫᓐᓇ ᐊᑐᖅᑕᐅᔪᖅ ᐊᖏᓪᓕᒋᐊᖅᑕᐅᔪᓐᓇᕐᒪᑦ ᐊᓯᖏᓐᓄᑦ ᓄᓇᓕᓐᓄᑦ. ᑖᓐᓇ ᐃᓕᓐᓂᐊᓯᓐᓈᑦ ᐃᖅᑲᓇᐃᔭᓚᐅᙱᓐᓂᕐᒥᓂᒃ ᐱᓕᒻᒪᒃᓴᖅᑕᐅᖃᑦᑕᖅᑐᑦ ᐃᒡᓗᓕᐅᖅᐸᓪᓕᐊᔪᓐᓇᖁᓪᓗᒋᑦ. ᑕᒪᒃᑯᐊ ᐃᓕᓐᓂᐊᕆᐊᖃᖅᑕᖏᑦ ᓴᓇᖃᑕᐅᓗᑎᒃ ᑖᒃᑯᐊ ᓯᕗᕐᖓᓂ ᐱᓕᒻᒪᒃᓴᖅᑕᐅᓂᐊᖅᑐᑦ ᐃᒡᓗᓕᐅᓪᓚᕆᒃᑐᓂᓪᓗ ᐃᓚᐅᖃᑦᑕᕐᓗᑎᒃ, ᑐᑭᓯᓂᐊᕐᒪᑕ ᖃᓄᐃᓕᖓᒻᒪᖔᑦ. ᓯᓚᑦᑐᖅᓴᕐᕕᒃᑯᑦ ᐃᓕᓴᖅᑎᓂᒃ ᐃᓕᓐᓂᐊᓯᓐᓈᕐᓗᑎᒃ ᐃᖅᑲᓇᐃᔭᖅᑎᒃᓴᓂᒃ ᑕᒪᒃᑯᓂᖓ ᐱᕙᓪᓕᐊᔪᑦ. ᑐᖅᑲᖅᑕᕐᕕᐅᔪᑦ ᐃᑲᔪᖅᑐᐃᓂᐊᖅᑐᑦ ᓯᕗᒧᐊᑦᑎᐊᖁᓪᓗᒋᑦ ᐱᓕᕆᔾᔪᑏᑦ ᐊᒻᒪ ᑐᑭᒧᐊᑦᑎᑕᐅᑦᑎᐊᖁᓪᓗᒋᑦ ᑮᓇᐅᔭᖃᖅᑎᑦᑎᔾᔪᑏᑦ ᓯᓚᑦᑐᓴᕐᕕᒻᒥ. ᐊᐅᓚᑦᑎᔪᓐᓇᕐᓂᐊᕐᒪᑕ ᑐᑭᒧᐊᒃᑎᑕᐅᔪᓐᓇᑦᑎᐊᕐᓗᑎᒃ ᐱᓕᒻᒪᒃᓴᐃᓗᑎᒃ ᐃᒡᓗᓕᐅᖅᑎᓪᓗᒋᓪᓗ ᐊᒃᑐᖅᑕᐅᓯᒪᔪᓪᓗ ᐱᖃᓯᐅᓪᓗᒋᑦ. ᑭᖑᓪᓕᖅᐹᒥ, ᓴᓇᔭᕆᐅᖅᓴᓂᕐᒧᑦ ᑮᓇᐅᔭᐃᑦ ᑕᒪᒃᑯᓄᖓ ᐃᓘᓐᓇᖏᓐᓄᑦ ᓴᓇᕐᕈᑎᒋᔭᐅᓂᐊᕐᒪᑕ ᐃᓕᓐᓂᐊᖅᑎᓄᑦ ᐊᑦᑕᓇᖅᔭᐃᖅᓯᒪᔾᔪᑎᓄᑦ ᐃᒡᓗᓕᐅᖅᑎᓪᓗᒋᑦ. ᑖᒃᑯᐊ ᓯᓚᑦᑐᖅᓴᕐᕕᒻᒥ ᐊᖏᖅᓯᒪᑦᑎᐊᖅᑐᑦ ᐃᓕᓐᓂᐊᖅᑎᓂᒃ ᓴᓇᔨᕈᕆᐅᖅᓴᓂᕐᒧᑦ ᐱᓕᕆᔾᔪᑎᖃᑦᑎᐊᖁᓪᓗᒋᑦ ᓴᓇᕐᕈᑎᖃᑦᑎᐊᖁᓪᓗᒋᓪᓗ ᐃᓕᓴᐃᖃᑦᑕᖁᓪᓗᒋᓪᓗ. ᑕᐃᒪᓐᓇ ᐱᐅᔪᓂᒃ ᓄᓇᕐᔪᐊᕐᒥ ᐊᑐᖅᑕᐅᔪᓐᓇᖅᑐᓂᒃ ᐃᓕᓴᐃᔾᔪᑎᖃᕐᓗᑎᒃ ᐃᒡᓗᓕᐅᕐᓂᕐᒧᓪᓗ ᓄᓇᕗᒻᒥ ᑭᙴᒪᔭᐅᔪᑦ ᒪᓕᒡᓗᒋᑦ ᐃᓕᓐᓂᐊᖅᓯᒪᑦᑎᐊᕐᓗᑎᒃ. ᓯᓚᑦᑐᖅᓴᕐᕕᒃ ᑐᒃᓯᕋᖅᑐᖅ $1.276-ᒥᓕᐊᓐᓂᒃ ᐊᑭᓕᖅᑐᐃᔾᔪᑎᒃᓴᖏᓐᓂᒃ ᑮᓇᐅᔾᔭᒃᓵᑦ ᐊᑭᑦᑐᕆᐊᕈᑏᑦ ᒪᓕᒃᑐᒋᑦ ᐊᖏᖃᑎᒌᒍᑎᒋᓯᒪᔭᖏᑦ ᑲᑐᔾᔨᖃᑎᒌᑦ ᓄᓇᕗᒻᒥᓗ ᒐᕙᒪᒃᑯᑦ. ᒪᑐᓕᕐᓗᒍ, ᓇᓗᓇᐃᖅᓯᒪᔪᒪᔪᖓ ᓯᓚᑦᑐᓴᕐᕕᒃ ᐃᑲᔪᖅᑐᐃᒻᒪᑕ ᑎᓴᒪᐅᓕᖅᑲᖓᔪᓂᒃ ᑐᙵᕕᐅᔪᓂᒃ ᐃᑲᔪᖅᑎᒌᑦᑕ ᐱᓕᕆᐊᒃᓴᖏᓐᓂᒃ: • ᓴᙱᒃᑎᒋᐊᖁᓪᓗᒋᑦ ᐃᓚᒌᑦ ᐅᕿᓐᓂᖅᓴᒥᒃ ᑲᒪᖁᓪᓗᒋᑦ ᖁᕝᕙᒃᓯᕙᓪᓕᐊᖁᓪᓗᒋᑦ ᓄᓇᓕᐅᔪᑦ; • ᐊᒻᒪ ᑮᓇᐅᔭᓕᐅᕋᓱᖁᓪᓗᒋᑦ ᐱᕈᖅᓴᖁᓪᓗᒋᓪᓗ ᐃᖅᑲᓇᐃᔭᕐᓂᖅ ᓄᓇᓕᓐᓂ; • ᐊᐅᓚᑕᐅᓂᖓᓐᓂᒃ ᑕᐱᖃᕐᓗᑎᒃ ᐱᓕᕆᐊᖃᖁᓪᓗᒋᑦ; • ᐊᒻᒪ ᓯᕗᓂᔅᓴᖃᑦᑎᐊᖁᓪᓗᒋᑦ ᓄᓇᕗᒻᒥᐅᑦ. ᓯᓚᑦᑐᓴᕐᕕᒃ ᑕᐃᒪᓐᓇ ᑐᙵᕕᐅᕗᖅ ᑕᒪᒃᑯᓄᖓ ᐃᑲᔪᖅᑐᖅᑕᐅᓪᓗᑎᒃ ᐃᓛᒃ ᓴᓇᒪᓂᖏᑦ ᐊᒻᒪ ᐱᔨᔅᓯᕈᑎᒋᔭᖏᑦ ᐱᓕᕆᐊᖑᔪᑦ ᐱᔨᔅᓯᕈᑎᐅᔪᑦ ᓄᓇᕗᒻᒥ ᐱᑦᑎᐊᖁᓪᓗᒋᑦ. ᓯᓚᑦᑐᓴᕐᕕᓪᓗ ᐊᖏᖅᓯᒪᑦᑎᐊᖅᐳᖅ ᐱᖃᓯᐅᔾᔨᓯᒪᓗᓂ ᐃᓄᐃᑦ ᐅᖃᐅᓯᖏᓐᓂᒃ ᐃᓕᖅᑯᓯᖏᓐᓂᒃ ᐊᑐᖅᓯᒪᔭᖏᓐᓂᓪᓗ. ᑕᒪᒃᑯᐊ ᐱᓕᕆᖃᑎᒋᓗᒋᑦ ᐊᒃᑐᖅᑕᐅᓯᒪᔪᑦ ᐃᓗᐊᓂ ᓯᓚᑖᓂᓗ ᓄᓇᕗᒻᒥᐅᑦ ᑐᑭᖃᑦᑎᐊᖅᑐᒃᑯᑦ ᓇᓖᕌᕈᑎᖃᑦᑎᐊᖁᓪᓗᒋᑦ ᐃᓕᓐᓂᐊᕈᑎᒃᓴᖏᓐᓄᑦ ᐱᓕᒻᒪᒃᓴᖅᑕᐅᔾᔪᑎᒃᓴᓂᓪᓗ ᑭᙴᒪᔭᐅᔪᑦ. ᒪᓕᒐᓕᐅᖅᑎᓂᒃ ᐊᐱᖅᑯᑎᒃᓴᖃᕈᔅᓯ ᒪᑐᐃᕈᑎᓐᓄᑦ ᑭᐅᓇᓱᑦᑎᐊᕐᓂᐊᖅᐳᖓ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 23 ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᕼᐄᓕ ᐊᕿᐊᕈᖅ. ᐃᒃᓯᕙᐅᑕᖓ ᑲᑎᒪᔨᕋᓛᓄᑦ ᒪᑐᐃᕈᑎᒃᓴᖃᖅᐹ? ᒥᔅᑕ ᒪᐃᒃ, ᐊᑏ’. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᒫᓐᓇ ᒫᓐᓇᐅᔪᖅ ᒪᑐᐃᕈᑎᓂᒃ ᐅᖃᐅᓯᖃᑲᐃᓐᓇᕐᓂᐊᕋᒪ ᑖᒃᑯᐊ ᑭᒡᒐᑐᕐᓗᒋᑦ ᑲᑎᒪᔨᕋᓛᑦ, ᑖᔅᓱᒧᖓ ᓄᓇᓕᓐᓄᑦ ᐊᒻᒪ ᐱᕙᓪᓕᐊᔪᓕᕆᓂᕐᒧᑦ ᕿᒥᕐᕈᓂᖃᕐᓂᐊᑎᓪᓗᒋᑦ ᑭᙴᒪᔭᐅᔪᓂᒃ ᐱᔪᒪᔭᐅᔪᓂᒃ 2026-2027 ᐊᒻᒪᓗ 2026-2030 ᐸᕐᓇᐅᑕᓯᒪᔪᑦ ᐸᕐᓇᓯᒪᓂᖏᓐᓂᒃ ᑖᔅᓱᒪ ᓄᓇᕗᑦ ᐅᑭᐅᖅᑕᖅᑐᒥ. ᓯᓚᑦᑐᓴᕐᕕᒃᑯᑦ ᑐᒃᓯᕋᖅᑐᑦ 2026-2027 ᐊᐅᓚᔾᔪᑎᒃᓴᓂᒃ ᒪᑭᒪᐅᑎᔅᓴᓂᒃ ᑕᕝᕙᙵᑦ ᒪᓕᒐᓕᐅᕐᕕᒻᒥᑦ. ᐅᕝᕙᐅᔪᑦ ᑮᓇᐅᔭᑦ ᑐᒃᓯᕋᖅᑕᖏᑦ: $52,201,000. ᑖᓐᓇ ᐊᖏᓪᓕᒋᐊᖅᑐᖅ 8.4−ᐳᓴᒥᒃ. ᑕᕝᕙᙵᑦ ᐊᕐᕌᒍᖓᓂᑦ 2025- 2026. ᓯᓚᑦᑐᓴᕐᕕᒃᑯᑦ ᑲᑎᓕᒫᕐᓗᒋᑦ ᐊᐅᓚᔾᔪᑎᒋᔪᒪᓂᐊᖅᑕᖏᑦ ᑮᓇᐅᔭᖅᑐᕈᑎᒋᓂᐊᖅᑕᖏᑦ ᑕᒫᓃᑉᐳᑦ ᒥᔅᓵᓂ $75,100,000 (ᑐᓵᔨᑎᒎᓕᖅᑐᖅ) ᐱᖃᓯᐅᑎᓪᓗᒋᑦ ᑕᒪᒃᑯᐊ ᑮᓇᐅᔭᐃᑦ ᐱᔭᐅᓯᒪᔪᑦ ᑖᒃᑯᓇᙵᑦ ᐊᓯᖏᓐᓂᓪᓗ. ᓯᓚᑦᑐᓴᕐᕕᐅᑉ ᐃᖅᑲᓇᐃᔮᔅᓴᖏᑦ ᓱᓕ ᐊᓯᔾᔨᖅᓯᒪᙱᓚᑦ 315.8-ᖑᓪᓗᑎᒃ. (ᑐᓵᔨᑎᒎᕈᓐᓃᖅᑐᖅ) ᑖᒃᑯᐊ ᒪᓕᒐᓕᐅᖅᑏᑦ ᑖᒃᑯᓂᖓ ᐃᓱᒫᓘᑕᐅᔪᓄᑦ ᒥᓂᔅᑕᖏᑦ ᒪᒥᐊᓇᖅ ᓴᖅᑮᓚᐅᕐᒪᑕ ᐃᓱᒫᓘᑎᒥᓐᓂᒃ ᑖᔅᓱᒧᖓ ᒥᓂᔅᑕᒧᑦ, ᒫᓐᓇᖃᕐᒥᒃᑯᑦ ᓴᖅᑭᖅᓯᒪᑎᓪᓗᒍ ᑖᒃᑯᓄᖓ ᑲᑎᒪᔨᕋᓛᓄᑦ, ᑲᑎᒪᖃᑎᖃᖅᑎᓪᓗᒍ. ᓯᓚᑦᑐᓴᕐᕕᒃᑯᑦ 2023-2024 ᐊᕐᕌᒍᓕᒫᖅ ᐅᓂᒃᑳᓕᐊᖏᑦ ᑕᕝᕙᓂ ᒪᓕᒐᓕᐅᕐᕕᐅᑉ ᐃᓗᐊᓂ ᓴᖅᑭᑕᐅᓚᐅᖅᓯᒪᕗᑦ ᒫᔅᓯ 19, 2026. ᒪᓕᒐᓕᐅᖅᑏᑦ ᑖᔅᓱᒥᖓ ᓈᒻᒪᓈᕐᓂᖅᓴᒃᑯᑦ ᐊᕐᕌᒍᓕᒫᖅᓯᐅᑎᓂᒃ ᓴᖅᑮᖃᑦᑕᓂᕐᒧᑦ ᓴᖅᑭᑕᐅᒋᐊᓕᓐᓂᒃ ᒪᓕᒐᓕᐅᕐᕕᐅᑉ ᐃᓗᐊᓂ 2024-2025 ᐊᒻᒪᓗ 2025-2026 ᐊᕐᕌᒍᓕᒫᖅ ᐅᓂᒃᑳᓕᐊᕆᓯᒪᔪᓂᒃ. ᑖᒃᑯᐊ ᓴᖅᑭᕆᐊᖃᕐᓂᖏᓐᓄᑦ ᐅᖃᖅᑐᖅ ᑕᐃᒫᒃ ᓈᒻᒪᓈᖅᓯᒪᒃᑲᓐᓂᖁᓪᓗᒋᑦ. ᔮᓐᓄᐊᕆᒥ 2025-ᖑᑎᓪᓗᒍ ᓄᓇᕗᑦ ᒐᕙᒪᒃᑯᑦ ᐊᑐᕈᓐᓃᑎᑦᑎᓚᐅᖅᑐᑦ ᑖᒃᑯᓇᙵᑦ ᑎᑎᖅᑲᑎᒍᑦ ᓂᕆᐅᒋᔭᐅᔪᓂᒃ ᑕᕝᕙᙵᑦ ᑲᑎᒪᔨᓃᙶᖅᑐᓂᒃ ᑖᒃᑯᓇᙵᑦ ᑕᓪᓕᒪᓂᑦ ᑎᒥᖁᑕᐅᔪᓂᑦ ᒐᕙᒪᒃᑯᓐᓄᑦ. ᑖᓐᓇ ᐃᓚᒋᔭᐅᒻᒪᑦ ᓯᓚᑦᑐᓴᕐᕕᒃ. ᑮᓇᐅᔭᓕᕆᔨᒃᑯᑦ 2026-2030 (ᑐᓵᔨᑎᒎᓕᖅᑐᖅ) ᐸᕐᓇᐅᑎᖏᑦ ᐃᓚᖏᑦ ᓯᕗᓪᓕᐅᔾᔭᐅᓯᒪᔪᖅ 2026-2027 ᐊᕐᕌᒍᐊᓄᑦ “ᐃᑲᔪᖅᑐᐃᖁᓪᓗᒋᑦ ᓴᓇᔭᐅᓂᑦᓴᖏᓐᓂᒃ ᐊᖏᖃᑎᒌᒍᑏᑦ. ᑎᑎᕋᖅᓯᒪᓗᑎᒃ ᑕᓪᓕᒪᐅᔪᓂᒃ ᓄᓇᕗᒻᒥ ᑯᐊᐸᕇᔅᓴᖁᑎᒋᔭᐅᔪᓂᒃ ᐱᔾᔪᑎᒋᓪᓗᒍ ᐊᕐᕌᒍᒧᑦ ᑮᓇᐅᔭᓕᕆᔾᔪᑎᒃᓴᖏᓐᓄᑦ ᐊᒻᒪ ᒪᓕᒐᖏᑦ ᑲᒪᒋᔭᒃᓴᖏᓐᓄᑦ ᐱᓕᕆᐊᒃᓴᖏᓐᓄᑦ ᐱᓕᕆᖃᑎᖃᕐᓂᖏᓪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐊᕐᕌᒍᑕᒫᑦ ᐅᓂᒃᑳᓂᒃ ᓴᖅᑭᑦᑎᖃᑦᑕᓂᕐᒧᑦ ᒪᓕᒐᖏᑦ.” ᑲᑎᒪᔨᕋᓛᑦ ᑎᓕᐅᕆᕗᑦ ᒐᕙᒪᒃᑯᓐᓂᒃ ᑖᒃᑯᐊ ᓄᑖᑦ ᒪᓕᒐᐃᑦ ᓴᓇᕐᕈᑎᖏᑦ ᐱᖃᓯᐅᔾᔨᓯᒪᓗᑎᒃ ᐸᕐᓇᐃᔾᔪᑎᓄᑦ ᓇᒧᙵᐅᓂᐊᕐᒪᖔᑕ ᒐᕙᒪᒃᑯᑦ ᑎᒥᖁᑎᒋᔭᖏᑦ. ᐅᓂᒃᑳᖏᓪᓗ ᓴᖅᑭᑕᐅᖃᑦᑕᕐᓗᑎᒃ ᒪᓕᒐᓕᐅᕐᕕᒻᒥ. (ᑐᓵᔨᑎᒎᕈᓐᓃᖅᑐᖅ) ᕖᕝᕗᐊᕆᐅᑎᓪᓗᒍ 2026 ᐃᓄᐃᑦ ᑕᐱᕇᑦ ᑲᓇᑕᒥ ᓇᓗᓇᐃᖅᓯᓚᐅᖅᓯᒪᕗᑦ ᑖᓐᓇ ᓯᓚᑦᑐᓴᕐᕕᔾᔪᐊᖑᒐᔭᖅᑐᖅ ᐃᓄᐃᑦ ᓄᓇᖓᑦ ᓯᓚᑦᑐᓴᕐᕕᔾᔪᐊᖓ ᑕᕝᕙᓃᓐᓂᐊᖅᑐᖅ ᐊᕐᕕᐊᒥ. (ᑐᓵᔨᑎᒎᓕᖅᑐᖅ) ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕕᖓᑦᑕ 2026-2030 ᐸᕐᓇᐅᑎᖏᑦ ᐅᖃᖅᓯᒪᒻᒪᑕ ᐃᓚᖏᑦ ᐸᕐᓇᐅᑎᒋᔭᖏᑦ ᐊᐅᓚᔾᔭᑦᑕᐅᔪᒪᔪᑦ 2026-2027-ᒧᑦ ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓂ “ᕿᒥᕐᕈᓇᑉᐸᓪᓕᐊᓕᖁᓪᓗᒋᑦ ᓯᓚᑦᑐᓴᕐᕕᔾᔪᐊᖅ ᐊᒻᒪ ᐃᓕᓴᕆᔭᐅᔾᔪᑎᒃᓴᖏᓐᓄᑦ ᐃᓕᓐᓂᐊᖅᑐᑦ ᐱᖁᔭᕐᔪᐊᖓᓂᒃ.” ᑐᓴᒐᒃᓴᐃᑦ ᓴᖅᑭᑕᐅᓚᐅᖅᑐᑦ ᑎᑎᕋᖅᑕᐅᓯᒪᔪᑦ ITK-ᑯᓐᓄᑦ ᓇᓗᓇᐃᖅᓯᓚᐅᖅᑐᑦ ᐃᓄᐃᑦ ᓄᓇᖓᓐᓂ ᓯᓚᑦᑐᓴᕐᕕᔾᔪᐊᖅ ᐃᓕᓴᐃᔪᒪᒻᒪᑕ ᐊᖏᔫᑎᓂᒃ ᐊᑉᐸᓯᓐᓂᖅᓴᓂᓪᓗ ᐃᓕᓴᕆᔭᐅᔾᔪᑎᖃᖁᓪᓗᒋᑦ ᐊᔾᔨᒌᙱᑦᑐᑦ ᐃᓕᓴᐃᓂᕐᒧᑦ, ᐋᓐᓂᐊᓯᐅᑎᐅᓂᕐᒧᑦ, ᐃᕐᓂᓱᒃᓰᓂᕐᒧᑦ, ᐃᓄᓕᕆᔨᐅᓂᕐᒧᑦ, ᐃᓄᒃᑎᑐᓪᓗ ᑐᓵᔨᐅᓂᕐᒧᑦ ᑐᑭᓕᐅᕆᓂᕐᒧᓪᓗ, ᐊᒻᒪ ᓴᓇᐅᒐᐃᕐᓂᕐᒧᑦ, ᐊᕙᑎᓪᓗ ᑲᒪᒋᔭᐅᓂᖏᓐᓄᑦ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 24 ᑖᒃᑯᐊ ᐸᔾᔭᕐᓗᒃᓯᒪᒻᒪᑕ ᓄᓇᕗᑦ ᓯᓚᑦᑐᓴᕐᕕᒻᒥ ᒫᓐᓇ ᐃᓕᓴᐅᑎᖏᑦ ᓇᓗᓇᙱᑦᑐᖅ ᑖᒃᑯᐊ ᑲᑎᒪᔩᑦ ᖃᐅᔨᒪᓕᖅᑐᖅ ᑐᑭᒧᐊᒃᑎᑕᐅᑦᑎᐊᕆᐊᖃᕐᓂᖏᑦ ᓯᓚᑦᑐᓴᕐᕕᒻᒥ. ᑕᐃᓐᓇ ᓯᓚᑦᑐᓴᕐᕕᔾᔪᐊᒃᓴᖅ ᒪᑐᐃᖅᑕᐅᓚᐅᙱᓐᓂᖓᓂ ᐊᕐᕌᒍᐊᓂᒃ 2030. (ᑐᓵᔨᑎᒎᕈᓐᓃᖅᑐᖅ) ᓯᓚᑦᑐᓴᕐᕕᒃᑯᑦ 2026-2030 ᐸᕐᓇᓯᒪᔭᖓ ᓇᓗᓇᐃᖅᓯᓯᒪᒻᒪᑦ ᑖᓐᓇ ᐃᓚᖓᑦ ᐸᕐᓇᑕᐅᓯᒪᔪᖅ ᐊᐅᓚᔾᔭᒋᐊᕈᑎᒋᒐᔭᖅᑕᖓ ᑖᔅᓱᒧᖓ ᐊᕐᕌᒍᒧᑦ 2026-2027 (ᑐᓵᔨᑎᒎᓕᖅᑐᖅ) ᕿᒥᕐᕈᓇᖁᓪᓗᒋᑦ ᐱᓕᕆᔾᔪᑎᒃᓴᖏᓐᓂᒃ ᐅᖃᐅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐃᓕᓴᐅᑎᒃᓴᖏᓐᓂᒃ, ᐱᖃᓯᐅᑎᓪᓗᒋᑦ ᐱᓕᕆᔾᔪᑎᒃᓴᐃᑦ, ᖃᓄᐃᓕᖓᒻᒪᖔᑕ ᐃᓕᓐᓂᐊᕈᑎᒃᓴᓂᒃ, ᖃᓄᖅ ᓴᖅᑭᑦᑎᓂᐊᕐᒪᖔᑕ ᐃᓕᓴᐃᔾᔪᑎᒃᓴᐃᓪᓗ. ᐱᓕᕆᖃᑎᒌᓐᓂᖏᑦ ᓄᓇᕗᒻᒥ ᓯᓚᑦᑐᖅᓴᕐᕕᒃ ᐱᖅᑯᓯᓕᕆᕕᒻᒥᒃ ᐃᓕᖅᑯᓯᕐᓂᒃ ᐃᓕᓴᐃᕕᒃ ᓄᑖᕐᓗ ᐃᓄᐃᑦ ᓄᓇᖓᓐᓂ ᓯᓚᑦᑐᓴᕐᕕᔾᔪᐊᖅ ᑖᒃᑯᐊ ᑕᒪᕐᒥᒃ ᐃᒃᐱᒋᔭᐅᑦᑎᐊᕆᐊᓖᑦ ᑲᒪᒋᔭᐅᓗᑎᒃ. ᓄᓇᕗᑦ ᒐᕙᒪᒃᑯᖏᓐᓂᑦ ᑎᓯᐱᕆ 31, 2025-ᒥ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖓᓂᒃ ᐸᕐᓇᐅᑎ ᑕᖅᑭᑦ ᐱᖓᓱᑕᒫᑦ ᐅᓂᒃᑳᖓᑦ ᐅᖃᓚᐅᖅᑐᖅ ᓄᓇᕗᒻᒥ ᓯᓚᑦᑐᓴᕐᕕᓪᓗ 100-ᐳᓴᒥᒃ ᐃᓐᓄᒃᓯᒪᙱᒻᒪᑕ ᐃᖅᑲᓇᐃᔮᒃᓴᐃᑦ ᐅᖅᓱᖅᑑᒥ, ᐃᒡᓗᓕᒻᒥ, ᑰᒑᕐᔪᒻᒥ, ᓇᐅᔮᓂ, ᖃᐅᓱᐃᑦᑐᒥᓗ. ᐅᓂᒃᑳᑦ ᐅᖃᖅᓯᒪᓚᐅᖅᑐᖅ ᓄᓇᕗᒻᒥ ᓯᓚᑦᑐᓴᕐᕕᒻᒥ ᐃᓐᓄᒃᓯᒪᙱᑦᑐᑦ ᐃᖅᑲᓇᐃᔮᒃᓴᐃᑦ ᓯᓚᑖᓃᒻᒪᑕ ᐃᖃᓗᐃᑦ ᐅᓄᕐᓂᖃᖅᑐᑦ 61-ᐳᓴᒥᒃ. ᑲᑎᒪᔩᑦ ᐃᓱᒫᓘᑎᖃᖅᑐᑦ ᐊᒃᑐᐃᓂᕆᒐᔭᖅᑕᖓᓐᓂ ᐃᓐᓄᒃᓯᒪᙱᒻᒪᑕ ᐃᖅᑲᓇᐃᔮᒃᓴᐃᑦ ᐃᓕᓴᐃᔭᕆᐊᖃᕋᓗᐊᖅᑎᓪᓗᒋᑦ ᓄᓇᓕᓐᓂ. ᓄᓇᕗᒻᒥ ᓯᓚᑦᑐᖅᓴᕐᕕᒃ 2026-2030ᒧᑦ ᐸᕐᓇᐅᑎᖏᑦ ᐅᖃᖅᓯᒪᖕᒪᑕ ᐃᓚᖏᑦ ᐸᕐᓇᒃᑕᐅᓯᒪᔪᑦ ᐊᐅᓚᔾᔭᒃᑕᐅᔪᒪᓪᓗᑎᒃ 2026-2027 ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓄᑦ ᐊᖏᒡᓕᒋᐊᖅᑕᐅᖁᓪᓗᒋᑦ ᐃᓕᓴᐃᔾᔪᑎᒃᓴᐃᑦ ᐃᖅᑲᓇᐃᔭᖅᑏᑦ ᐃᑲᔪᖅᑎᐅᖃᑦᑕᕐᓂᐊᖅᑐᑦ ᐃᓕᓴᕆᔭᐅᔾᔪᑎᒃᓴᖏᓐᓄᑦ ᐃᓕᔭᐅᖁᓪᓗᒋᑦ ᒪᕐᕉᖕᓄᑦ ᓄᓇᓖᖕᓄᑦ. ᐃᓕᖅᑯᓯᕐᓄᑦ ᐊᑑᑎᖃᖅᑐᓂᒃ ᐃᓕᓴᐃᔾᔪᑎᖃᕐᓗᑎᒃ ᓄᓇᓕᖕᓂ. ᑲᑎᒪᔩᑦ ᑎᓕᐅᕆᕗᑦ ᓯᓚᑦᑐᖅᓴᕐᕕᖕᒥ ᓴᓇᖁᓪᓗᒋᑦ ᐃᓕᓴᐃᔾᔪᑎᓕᐅᖁᓪᓗᒋᑦ ᓄᓇᕗᒻᒥᐅᑦ ᐱᕕᖃᖁᓪᓗᒋᑦ ᐃᓄᐃᑦ ᐃᓕᑉᐹᓪᓕᕈᓐᓇᖁᓪᓗᒋᑦ ᐱᓕᒻᒪᒃᓴᖅᑕᐅᓗᑎᒃ ᐃᓕᓴᕆᔭᐅᔾᔪᑎᑖᕐᓗᑎᒡᓗ ᐃᖅᑲᓇᐃᔭᕈᓐᓇᖅᓯᓂᐊᕐᒪᑕ ᐃᓅᓯᓕᒫᑦ ᒐᕙᒪᒃᑯᑦ ᐊᑐᕐᓗᑎᒃ ᓄᓇᕗᒻᒥ ᒐᕙᒪᒃᑯᖏᓐᓂᒃ ᓯᕕᑐᔪᒧᑦ ᐸᖅᑭᒃᓯᕕᖕᓂᒃ ᐃᖅᑲᓇᐃᔭᕈᓐᓇᖅᓯᓂᐊᕐᒪᑕ ᑲᖏᖅᖠᓂᕐᒥ, ᐃᖃᓗᒃᑑᑦᑎᐊᕐᒥ, ᐃᖃᓗᖕᓂ, ᐊᖅᑯᓯᕆᐊᕐᒥᓗ ᑕᐃᑲᓂ ᐃᖅᑲᓇᐃᔭᕐᕕᒃᓴᐅᒐᔭᖅᑐᒥ. ᓄᓇᕗᒻᒥ ᓯᓚᑦᑐᒃᓴᕐᕕᒃ 2026-2030-ᒧᑦ ᐸᕐᓇᐅᑎᖓ ᐅᖃᖅᓯᒪᖕᒪᑕ ᐃᓚᖏᑦ ᐸᕐᓇᒃᑕᐅᓯᒪᔪᑦ ᐊᐅᓚᔾᔭᒃᑕᐅᔪᒪᓪᓗᑎᒃ 2026-2027 ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓄᑦ “ᖃᐅᔨᓴᐃᖁᓪᓗᒋᑦ ᑮᓇᐅᔭᓕᐅᕈᓐᓇᕐᒪᖔᑕ ᐃᓕᓴᐃᑎᓪᓗᒋᑦ ᐃᓕᓴᕆᔭᐅᔾᔪᑎᖃᕐᓗᑎᒃ ᖁᕝᕙᓯᖕᓂᕐᒥᒃ ᐃᓄᓕᕆᔨᐅᓂᕐᒧᑦ ᐱᖓᓱᓄᑦ ᐊᒡᒍᖅᑐᖅᓯᒪᓂᐅᑉ ᐃᓗᐊᓂ ᐃᓕᓴᖅᑕᐅᔪᓐᓇᕐᒪᖔᑕ ᐊᒻᒪ ᖃᐅᔨᓴᐃᓗᑎᒃ ᖃᓄᖅ ᖃᐅᔨᓴᐃᓂᐊᕐᒪᖔᑕ, ᑐᓴᐅᒪᑦᑎᐊᕐᓗᑎᒃ ᓯᕗᒧᐊᕈᓐᓇᕐᒪᖔᑦ ᓄᓇᕗᒻᒥ ᑖᓐᓇ ᐊᖏᒡᓕᒋᐊᕈᑕᐅᔪᖅ.” 2026-2030−ᒧᑦ ᐸᕐᓇᐅᑎᖏᓐᓂ ᐅᖃᖅᓯᒪᔪᑦ ᑎᓕᐅᕆᕕᒃ ᐃᓄᓕᕆᔨᒃᑯᑦ ᐱᓕᕆᕕᖏᓐᓄᑦ ᐃᓚᖓ ᐸᕐᓇᒃᑕᐅᓯᒪᔪᖅ ᐊᐅᓚᔾᔭᒃᑕᐅᔪᒪᔪᖅ, 2026- 2027−ᒥ ᐊᒡᓚᕝᕕᐅ ᐃᓗᐊᓂ ᐱᓕᕆᖃᑎᒋᓂᐊᖅᑕᖏᓐᓂᒡᓗ ᐅᖃᖃᑎᖃᕐᓗᑎᒃ ᑕᐱᕆᓗᒋᑦ ᓴᓇᓂᐊᕐᒪᑕ ᐊᖅᑯᑎᐅᓂᐊᖅᑐᓂᒃ, ᐃᓚᒌᑦ ᖃᓄᐃᙱᑦᑎᐊᕐᓂᕐᒧᑦ ᐃᑲᔪᖅᑐᖅᑕᐅᖁᓪᓗᒋᑦ ᐃᓄᐃᑦ ᐃᓅᓯᖏᓐᓄᑦ ᐃᓄᐃᑦ ᐃᓄᓕᕆᔨᐅᓂᕐᒧᑦ ᐃᓕᓐᓂᐊᖅᑐᑦ ᐱᔭᕇᖁᓪᓗᒋᑦ ᓄᓇᕗᑦ ᓯᓚᑦᑐᖅᓴᕐᕕᖕᒥ ᓱᕈᓰᑦ ᐸᖅᑭᔭᐅᓂᖏᓐᓄᑦ ᓴᐳᒻᒥᐅᓯᖅᑕᐅᓯᒪᓂᖏᓐᓄᑦ ᐃᖅᑲᓇᐃᔭᕐᓂᐊᖅᑐᓂᒃ ᐱᔪᒪᔪᓂᒃ. ᓄᓇᕗᒻᒥ ᓯᓚᑦᑐᖅᓴᕐᕕᒃ ᐃᓄᓕᕆᔨᒃᑯᓪᓗ ᐱᓕᕆᕕᖏᑦ ᐃᖅᑲᓇᐃᔭᖃᑎᒌᑦᑎᐊᖁᓪᓗᒋᑦ ᑭᐅᓂᐊᕐᒪᑕ ᑐᐊᕕᕐᓇᖅᑐᒃᑯᑦ ᑭᙴᒪᒃᓯᓂᖏᓐᓂᒃ ᓄᓇᕗᑦ ᐃᓄᖏᓐᓄᑦ ᐃᖅᑲᓇᐃᔮᒃᓴᐃᑦ ᐃᓐᓄᒃᑕᐅᖁᓪᓗᒋᑦ ᑖᒃᑯᐊ ᐱᒻᒪᕆᐅᔪᑦ. ᓄᓇᕗᑦ ᒐᕙᒪᒃᑯᖏᑕ ᐅᔭᕋᖕᓂᐊᕐᓂᕐᒧᑦ ᐸᕐᓇᐅᑎᖏᑦ ᓴᖅᑭᑕᐅᓚᐅᖅᑐᑦ ᓄᓇᕗᒻᒥ ᒪᓕᖓᓕᐅᕐᕕᖓᓂ ᒫᑦᓯ 1, 2024−ᖑᑎᓪᓗᒍ. ᓄᓇᕗᒻᒥ ᓯᓚᑦᑐᖅᓴᕐᕕᖕᒥ 2026-2030−ᒧᑦ ᐸᕐᓇᐅᑎᖓ ᐅᖃᖅᓯᒪᓚᐅᖅᑐᖅ ᐃᓚᖏᑦ ᐸᕐᓇᒃᑕᐅᓯᒪᔪᑦ ᐊᐅᓚᔾᔭᒃᑕᐅᔪᒪᓪᓗᑎᒃ 2026-2027 ᐊᕐᕌᒍᐊᓂ ᐃᒪᓐᓇᐃᖁᓪᓗᒋᑦ, “ᓴᓇᓗᑎᒃ ᐸᕐᓇᐅᑎᓂᒃ, ᖃᐅᔨᓴᐃᓗᑎᒃ ᑭᓱᒥᒃ ᑭᙴᒪᒃᓯᕐᒪᖔᑕ ᐊᖏᒡᓕᒋᐊᖅᑕᐅᔭᕆᐊᖃᕐᒪᖔᑦ ᐅᖁᒪᐃᑦᑐᓂᒃ ᓄᓇᓯᐅᑎᓂᒃ ᐊᖁᑦᑕᕆᐅᖅᓴᕈᑎᐅᔪᖅ ᐅᔭᕋᖕᓂᐊᕐᓂᕐᒥᓪᓗ ᐃᖅᑲᓇᐃᔭᕐᓂᕐᒥᒃ ᐃᓕᓐᓂᐊᕈᑎᒃᓴᐃᑦ.” ᒪᓕᒐᓕᐅᖅᑏᑦ ᑐᓴᐅᒪᑎᑕᐅᖏᓐᓇᕆᕈᒪᕗᑦ ᑖᔅᓱᒥᖓ ᖃᓄᖅ ᐊᑐᓕᖅᑎᑕᐅᕙᓪᓕᐊᖕᒪᖔᑕ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 25 ᓄᓇᕗᒻᒥ ᓯᓚᑦᑐᖅᓴᕐᕕᒃ 2025-2026-ᓄᑦ ᐱᓕᕆᐊᒃᓴᓂᒃ ᐸᕐᓇᐅᑎᖏᑦ ᐱᖃᓯᐅᔾᔨᓯᒪᓚᐅᕐᒪᑕ ᐃᓗᓕᑯᓘᔭᖃᖅᑐᓂᒃ ᑐᓴᕈᒥᓇᖅᑐᓂᒃ “ᐱᓕᕆᔾᔪᑎᒃᓴᓄᑦ ᐱᔨᑦᓯᕈᑎᐅᓂᐊᖅᑐᑦ ᓇᐃᓈᖅᓯᒪᓪᓗᑎᒃ” ᓇᓂᑦᑎᓯᖃᐅᖅᓯᒪᓪᓗᑎᒃ. ᑲᑎᒪᔨᕋᓛᑦ ᑎᓕᐅᕆᕗᑦ ᓯᓚᑦᑐᖅᓴᕐᕕᖕᒥᒃ ᐊᑐᐃᓐᓇᖁᓪᓗᒋᑦ ᐱᖃᓯᐅᔾᔨᓯᒪᓗᑎᒃ ᓇᐃᓈᖅᓯᒪᔪᓂᒃ ᐱᓕᕆᐊᒃᓴᕆᔭᖏᓐᓄᑦ ᐸᕐᓇᐅᑎᐅᓂᐊᖅᑐᑦ ᐃᓗᐊᓂ. ᑲᑎᒪᔨᕋᓛᑦ ᑎᓕᐅᕆᕗᑦ ᓯᓚᑦᑐᖅᓴᕐᕕᖕᒥ ᐱᖃᓯᐅᔾᔨᓯᒪᓗᑎᒃ ᑐᓴᒐᒃᓴᓂᒃ ᓯᕗᓂᒃᓴᒥ ᐊᕐᕌᒍᑕᒫᑦ ᐅᓂᒃᑳᓕᐊᖏᑕ ᐃᓗᐊᓂ ᖃᔅᓯᐅᖕᒪᖔᑕ ᐃᓕᓐᓂᐊᕐᓂᕐᒧᑦ ᐱᔭᕇᖅᓯᔪᑦ ᐊᒻᒪᓗᑦᑕᐅᖅ ᑐᓴᒐᒃᓴᖃᑦᑎᐊᕐᓗᑎᒃ ᖃᔅᓯᑦ ᐃᓕᓐᓂᐊᕐᓂᕐᒥᓂᒃ ᐱᔭᕇᖅᓯᔪᑦ ᐃᖅᑲᓇᐃᔭᓕᕐᒪᖔᑕ ᐃᓕᓐᓂᐊᓚᐅᖅᑎᓪᓗᒋᑦ ᐃᓕᓐᓂᐊᖅᑕᒥᓂᒃ ᐱᔭᕇᖅᓯᓚᐅᖅᑎᓪᓗᒋᑦ. ᑕᕝᕙ ᐃᓱᓕᑉᐳᑦ ᒪᑐᐃᕈᑎᒃᑲ ᑖᒃᑯᓄᖓ ᐊᑐᖅᑕᐅᔪᒪᔪᓄᑦ 2026-2027 ᐊᐅᓚᔾᔪᑎᒃᓴᖏᓐᓄᑦ ᐊᒻᒪ 2026- 2030-ᒧᑦ ᐸᕐᓇᐅᑎᖏᑦ ᐱᓕᕆᐊᒃᓴᕆᓂᐊᕐᓗᒋᑦ ᓄᓇᕗᒻᒥ ᓯᓚᑦᑐᖅᓴᕐᕕᖏᓐᓄᑦ. ᖁᔭᓐᓇᒦᒃ. ᐅᖃᖅᑎ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒪᓕᒐᓕᐅᖅᑏᑦ ᐅᖃᐅᓯᔅᓴᑐᐃᓐᓇᖃᖅᑲᑦ ᐊᐱᖅᓱᕆᐊᓚᐅᙱᓐᓂᑦᑎᓐᓂ? ᑕᑯᙱᓐᓇᒪ, ᒫᓐᓇ ᒪᑉᐱᖅᑐᒐᖏᑎᒍᑦ ᕿᒥᕐᕈᓕᕐᓚᕗᑦ 2026-2027-ᒥ ᑮᓇᐅᔭᖅᑐᕈᑎᔅᓴᖏᑦ ᐱᒋᐊᖅᑳᕐᓗᑕ M-iii-3. ᓄᓇᕗᒻᒥ ᓯᓚᑦᑐᓴᕐᕕᐅᑉ ᐊᖓᔪᖅᑳᖃᕐᕕᖓᑦ ᕿᒥᕐᕈᓂᐊᖅᑕᕗᑦ. ᒪᓕᒐᓕᐅᖅᑏᑦ ᐊᐱᖅᑯᑎᔅᓴᖃᖅᑳᑦ? ᒥᔅᑕ ᐊᑕᒍᑦᑖᓗᒃ. ᐱᒋᐊᕈᓐᓇᓕᖅᑐᑎᑦ. ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᔅᓯᕙᐅᑕᖅ. ᓄᓇᕗᑦ ᓯᓚᑦᑐᓴᕐᕕᐅᑉ 2023−2024−ᒧᑦ ᒪᓕᒐᓕᐅᕐᕕᒻᒨᖅᑕᐅᔪᒻᒪᑕ ᒫᑦᓯ 19, 2026−ᖑᑎᓪᓗᒍ. ᖃᖓᓕ ᑕᐃᒪ 2024-2025−ᒥ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐊᒥᓃᑦ ᐊᑐᐃᓐᓇᐅᓛᓕᖅᑲᑦ ᒪᓕᒐᓕᐅᕐᕕᒻᒨᖅᑕᐅᒍᓐᓇᖅᓯᓗᑎᒃ? ᖁᔭᓐᓇᒦᒃ, ᐃᔅᓯᕙᐅᑕᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᐊᑕᒍᑦᑖᓗᒃ. ᒥᔅ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᔅᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᓪᓗ ᑲᑎᒪᔨ ᐊᐱᕆᒻᒪᑦ. ᑕᐃᒃᑯᐊ 2024-2025−ᒧᑦ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐊᒥᓃᑦ ᐅᑭᐊᔅᓵᖅ ᐃᔅᓯᕙᓂᖃᓕᕈᑦᑕ ᐅᕗᙵᕈᓐᓇᖅᓯᓛᓕᖅᑕᕗᑦ, ᒪᓕᒐᓕᐅᕐᕕᒻᒨᕈᓐᓇᖅᓯᓛᓕᖅᑕᕗᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᒥᔅᑕ ᐊᑕᒍᑦᑖᓗᒃ, ᑲᔪᓯᒋᐊᕆᑦ. ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᔅᓯᕙᐅᑖᖅ. ᐱᓕᕆᕕᖓ ᑮᓇᐅᔭᓕᕆᔨᒃᑯᑦ 2026-2030−ᒧᑦ ᐱᓕᕆᐊᔅᓴᓄᑦ ᐸᕐᓇᐅᑎᖓ ᐅᖃᖅᓯᒪᒻᒪᑦ ᐃᓚᖓᒡᒎᖅ ᐱᓕᕆᐊᕆᓛᖅᑐᓂᐅᒃ ᐸᕐᓇᓯᒪᔭᖓ 2026-2027−ᒥ. ᐃᑲᔪᖅᓰᓗᑎᒃ ᓴᖅᑭᖅᑕᐅᓂᖏᓐᓂᒃ ᐊᖏᖃᑎᒌᒍᑏᑦ ᑕᓪᓕᒪᐅᔪᑦ ᓄᓇᕗᒻᒥ ᑯᐊᐸᕇᓴᐅᔪᓄᑦ ᐱᔾᔪᑎᖃᖅᑐᓂᑦ ᑮᓇᐅᔭᓕᒋᐊᖃᕐᓂᖏᓐᓂᒃ ᐊᐅᓚᑦᑎᑦᑎᐊᕆᐊᖃᕐᓂᖏᓐᓂᓪᓗ ᐊᒻᒪᓗ ᖃᓄᖅ ᐱᓕᕆᖃᑎᖃᖃᑦᑕᕆᐊᖃᕐᒪᖔᑕ ᓄᓇᕗᑦ ᒐᕙᒪᖓᓂᒃ ᐊᕐᕌᒍᑕᒫᖅᓯᐅᑎᓂᓗ ᐅᓂᒃᑳᖃᑦᑕᕆᐊᖃᕐᓂᕆᔭᖏᓐᓂᒃ. ᖃᓄᐃᓕᖓᓕᖅᑲ ᓄᓇᕗᑦ ᓯᓚᑦᑐᖅᓴᕐᕕᐅᑉ ᐊᖏᖃᑎᒌᒍᑎᓕᐅᕈᑕᐅᒐᓱᑦᑎᓪᓗᒍ ᐱᓕᕆᕕᔅᓯᓐᓄᑦ? ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᐊᑕᒍᑦᑖᓗᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᔅᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᑦᑕᐅᖅ ᒪᓕᒐᓕᐅᖅᑎ ᐊᐱᕆᒃᑲᓐᓂᕐᖓᑦ. ᓯᓚᑦᑐᓴᕐᕕᒃ, ᐃᓛᒃ ᐅᖃᕈᓐᓇᖅᑐᖓ ᑮᓇᐅᔭᓕᕆᔨᒃᑯᓐᓂᑦ ᐱᓕᕆᖃᑎᖃᕐᓂᐊᕋᑦᑕ ᑖᓐᓇ ᐱᓕᕆᐊᕆᓗᑎᒍᑦ ᑭᓯᐊᓂ ᐱᒋᐊᖅᓯᒪᙱᑦᑐᒍᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᑲᔪᓯᒋᐊᑐᐃᓐᓇᕆᑦ, ᒥᔅᑕ ᐊᑕᒍᑦᑖᓗᒃ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 26 ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᔅᓯᕙᐅᑖᖅ. ᖁᔭᓐᓇᒦᒃ, ᒥᓂᔅᑕ ᑭᐅᒐᕕᙵ. ᓄᓇᕗᑦ ᓯᓚᑦᑐᓴᕐᕕᐅᑉ 2026−2030−ᒧᑦ ᐱᓕᕆᐊᔅᓴᓄᑦ ᐸᕐᓇᐅᑎᖓ ᐅᖃᖅᓯᒪᒻᒪᑦ ᐃᓚᖓᒡᒎᖅ ᐸᕐᓇᔅᓯᒪᔭᖓ ᐱᓕᕆᐊᕆᓛᕐᓗᓂᐅᒃ 2026-2027 ᐊᕐᕌᒍᖓᓂ ᑕᒪᓐᓇᐅᒻᒪᑦ. ᐃᓗᓕᖅᑐᔪᒥᒃ ᑕᒻᒪᖅᓯᒪᔪᖅᓯᐅᕐᓗᑎᒃ ᐊᑐᐊᒐᖏᓐᓂᒃ ᓇᓗᓇᐃᖅᓯᒐᓱᓪᓗᑎᒃ ᐊᓪᓗᖅᑕᐅᓯᒪᔪᓂᒃ ᐱᖁᔭᖃᕆᐊᓕᓐᓂᒃ, ᑲᑎᒪᔨᓂᓪᓗᑦᑕᐅᖅ ᐊᐅᓚᑕᐅᓂᖏᓐᓄᑦ ᐅᓗᕆᐊᓇᕐᓂᕆᔭᖏᓐᓂᒃ ᐊᒻᒪ ᐱᓕᖅᑭᑦᑖᖃᑦᑕᙱᒃᑲᓗᐊᕐᒪᖔᑕ. ᖃᓄᓪᓚᑦᑖᖅ ᓄᓇᕗᑦ ᓯᓚᑦᑐᓴᕐᕕᐅᑉ ᐱᖁᔭᕐᔪᐊᖓ ᐊᑐᐊᒐᖏᓪᓗ ᐊᓯᔾᔨᖅᑕᐅᒋᐊᖏᑕ ᐃᓱᒪᔅᓴᖅᓯᐅᕈᑕᐅᕙᑦ? ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᐊᑕᒍᑦᑖᓗᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᔅᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐊᒻᒪ ᖁᔭᓐᓇᒦᒃ ᑲᑎᒪᔨ ᐊᐱᕆᒃᑲᓐᓂᕋᑖᕐᖓᑦ. ᓯᓚᑦᑐᓴᕐᕕᒃ ᐊᒥᓱᓂᒃ ᐊᑐᐊᒐᐊᕐᖓᑕ ᐊᐅᓚᑦᑎᒍᑕᐅᖃᑦᑕᖅᑐᓂᒃ. ᑕᐃᒃᑯᐊᓗ ᓄᑖᕈᖅᑕᐅᓚᐅᖅᓯᒪᒻᒪᑕ 2012- ᖑᑎᓪᓗᒍ. ᓯᓚᑦᑐᓴᕐᕕᒃ ᐃᖅᑲᓇᐃᔭᖅᑎᓂᒃ ᐃᓕᓐᓂᐊᖅᑎᓂᓪᓗ ᐱᓕᕆᖃᑎᖃᕐᓂᐊᖅᑐᖅ ᖃᐅᔨᒐᓱᓪᓗᑎᒃ ᐊᑐᐊᒐᖏᑦ ᐅᓪᓗᒥᒧᑦ ᐊᙳᑎᓯᒪᒐᓗᐊᕐᒪᖔᑕ ᐊᒻᒪ ᑐᑭᓯᔭᕐᓂᕐᒪᖔᑕ, ᒪᓕᒐᕐᓂᕐᒪᖔᑕ. ᐄ’, ᓯᓚᑦᑐᓴᕐᕕᒃ ᑕᐃᒪᐃᓕᐅᕋᓱᑦᑕᓂᐊᖅᑯᖅ ᐅᓪᓗᒥᐅᔪᖅ. ᐊᐱᖅᑯᑎᖓ ᐊᐃᑉᐸᖓ ᐊᐱᖅᑯᑎᖃᖅᑲᐅᔪᖅ ᐱᖁᔭᕐᓂᒃ ᐃᓚᑰᙱᒃᑲᓗᐊᕐᒪᖔᑕ. ᐊᑐᐊᒐᖏᑦ ᑖᒃᑯᐊ ᕿᒥᕐᕈᔭᐅᒐᔭᖅᑐᐃᑦ. ᐊᒻᒪ ᑕᐃᒃᑯᐊ ᐃᓯᕈᓐᓇᐅᑏᑦ ᑐᑭᓯᐅᒪᔾᔪᑎᓄᑦ ᑲᙳᓇᖅᑐᓕᕆᓂᕐᒧᑦ ᓴᐳᒻᒥᑦᑎᓂᕐᒧᑦ ᐱᖁᔭᕐᔪᐊᖅ ᐃᓱᒪᒋᔭᐅᒋᐊᕆᐊᖃᕐᒥᒻᒪᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ: ᖁᔭᓐᓇᒦᒃ ᒥᓂᔅᑕ. ᐊᐱᖅᑯᑎᔅᓴᖃᒃᑲᓐᓂᖅᑭᓯ? ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᔅᓯᕙᐅᑖᖅ. ᓄᓇᕗᑦ ᓯᓚᑦᑐᓴᕐᕕᐅᑉ 2026-2030−ᒧᑦ ᐱᓕᕆᐊᔅᓴᓄᑦ ᐸᕐᓇᐅᑎᖏᑦ ᐃᓚᖓᒡᒎᖅ ᐸᕐᓇᓯᒪᔭᖓ ᐱᓕᕆᐊᕆᓛᕐᓗᓂᐅᒃ 2026-2027−ᒥ ᑕᒪᓐᓇᐅᒻᒪᑦ. ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓂᕐᒧᑦ ᐃᓕᓐᓂᐊᑎᑦᑎᓂᕐᒥᒃ ᐸᐃᑉᐹᖅᑖᕋᓱᐊᕐᓗᑎᒃ ᐱᔭᕇᕈᑎᑖᕋᓱᐊᕐᓗᑎᒃ ᐊᒻᒪ ᖃᓄᓪᓚᑦᑖᖅ ᑐᕌᒐᕆᔭᖏᓐᓂᒃ ᐃᓕᓴᑎᑕᐅᓗᑎᒃ. ᓄᑖᑦ ᓯᓚᑦᑐᓴᕐᕕᒃ ᑕᒪᒃᑯᓂᖓ ᐃᓕᓴᕕᐅᒐᔭᖅᑳ? ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖁᓕᒃᑖᓇ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᔅᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᒃ, ᑲᑎᒪᔨ ᐊᐱᕆᒻᒪᑦ ᑕᐃᒫᒃ. ᒫᓐᓇ ᓯᓚᑦᑐᓴᕐᕕᒃ ᑲᑐᔾᔨᖃᑎᖃᙱᑦᑐᖅ ᑖᔅᓱᒧᖓ ᐃᓄᑑᔾᔭᐅᓛᖅᑐᖅ ᓄᓇᕗᒻᒥ ᓯᓚᑦᑐᓴᕐᕕᒃᑯᓐᓄᑦ ᐱᓕᕆᖃᑎᖃᙱᓪᓗᑎᒃ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖁᓕᒃᑖᓇ. ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᔅᓯᕙᐅᑖᖅ. ᖃᖓᓕ ᑕᐃᒪ ᓄᓇᕗᑦ ᓯᓚᑦᑐᓴᕐᕕᒃ ᑖᒃᑯᓂᖓ ᖃᖓ ᐃᓕᓐᓂᐊᖅᑕᐅᑎᑦᑎᒋᐊᓛᖅᑲ? ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖁᓕᒃᑖᓇ. ᒥᓂᔅᑕ ᕼᐄᓕ ᐊᕿᐊᕈᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 27 ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᔅᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᓪᓗ ᐊᐱᕆᒃᑲᓐᓂᕐᖓᑦ. ᑕᐃᓐᓇ ᒫᓐᓇᐅᓛᖑᒐᔭᖅᑐᖅ 2027-2028 ᐃᓕᓐᓂᐊᕐᓇᐅᓕᖅᑲᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᑭᖑᓪᓕᐅᓕᕐᒥᔪᖅ ᑕᐃᒪ ᒥᔅ ᐊᖑᑎᐊᓗᒃ. ᐊᖑᑎᐊᓗᒃ: ᖁᔭᓐᓇᒦᒃ, ᐃᔅᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᕕᕗᐊᕆᐅᑎᓪᓗᒍ 2026 ᐃᓄᐃᑦ ᑕᐱᕇᑦ ᑲᓇᑕᒥ ᑐᓴᖅᑕᐅᑎᑦᑎᔪᒻᒪᑕ ᑕᐃᓐᓇᒎᖅ ᐃᓕᓐᓂᐊᕕᓪᓚᕆᖓ ᓄᑖᖑᔪᖅ ᐃᓄᐃᑦ ᓄᓇᖓᓂ ᓯᓚᑦᑐᓴᕐᕕᔾᔪᐊᑉ ᐃᓂᖃᓛᕐᖓᑦ ᐊᕐᕕᐊᓂ. ᑕᐃᒪᓕ ᖃᓄᑎᒋᒃ ᓄᓇᕗᑦ ᓯᓚᑦᑐᓴᕐᕕᒃ ᐱᖃᑕᐅᓂᖃᓛᖅᑲ ᐸᕐᓇᑎᓪᓗᒋᑦ ᓄᑖᖑᔪᒥᒃ ᓯᓚᑦᑐᓴᕐᕕᔾᔪᐊᔅᓴᒥᒃ? ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᐊᖑᑎᐊᓗᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᔅᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᑦᑕᐅᖅ ᒪᓕᒐᓕᐅᖅᑎ ᐊᐱᕆᒻᒪᑦ ᑕᐃᒫᒃ. ᐅᖃᖃᑎᒌᓪᓚᕆᓚᐅᖅᓯᒪᙱᑦᑐᒍᑦ ᓱᓕ ᐅᓪᓗᒥᒧᑦ ᑭᓯᐊᓂ ᓂᕆᐅᑦᑎᐊᖅᑐᒍᑦ ᓯᕗᓂᑦᑎᓐᓂ ᐅᖃᖃᑎᒌᒋᐊᖃᓛᕋᑦᑕ ᖃᓄᖅ ᐊᐅᓚᑕᐅᒐᔭᕐᒪᖔᑦ ᑕᐃᓐᓇ ᓯᓚᑦᑐᓴᕐᕕᔾᔪᐊᖑᒐᔭᖅᑐᖅ. ᓯᓚᑦᑐᓴᕐᕕᒻᒥᐅᑕᐃᑦ ᐊᕐᕕᐊᓂ ᑐᓴᖅᑕᐅᑎᑕᐅᑎᓪᓗᒍ ᒥᓂᔅᑕ ᐊᕿᐊᕈᕐᓗ ᑕᐅᓇᓃᖃᑕᐅᔪᓪᓗᓂ. ᐊᕐᕕᐊᕐᒥᐅᑦ ᑐᙵᓇᓪᓚᕆᑦᑐᐊᓘᔪᔪᐃᑦ ᐊᒻᒪ ᓯᓚᑦᑐᓴᕐᕕᒃ ᓂᕆᐅᑦᑎᐊᖅᑐᖅ ᓯᕗᓂᑦᑎᓐᓂᒃ ᐅᖃᖃᑎᖃᖃᑦᑕᓛᕐᖓᑕ ᑖᓐᓇ ᐱᔾᔪᑎᒋᓪᓗᒍ. ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᐱᔭᕇᖅᑮᑦ? ᐊᐱᖅᑯᑎᔅᓴᓕᑦᑕᖃᒃᑲᓂᖅᑲ? ᒥᔅᑕ ᖃᒪᓂᖅ. ᖃᒪᓂᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒍᑦ) ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕕᖓᑕ 2026-2030−ᒧᑦ ᐱᓕᕆᐊᔅᓴᓄᑦ ᐸᕐᓇᐅᑎᖓ ᐅᖃᖅᓯᒪᒻᒪᑦ ᐃᓚᖓᒡᒎᖅ ᐸᕐᓇᓯᒪᔭᖓ ᐱᓕᕆᐊᕆᓛᕐᓗᓂᐅᒃ 2026-2027 ᐊᕐᕌᒍᖓᓂ ᑕᒪᓐᓇᐅᓛᕐᖓᑦ ᐱᒋᐊᕐᓗᑎᒃ ᕿᒥᕐᕈᓂᕆᔭᖏᓐᓂᑦ ᓯᓚᑦᑐᓴᕐᕕᔾᔪᐊᒥ ᐊᒻᒪ ᐱᔭᕇᕈᑎᑖᖅᑎᑦᑎᓲᑦ ᐱᖁᔭᕐᔪᐊᖓᓂ. ᖃᓄᑎᒋᒃ ᓄᓇᕗᑦ ᓯᓚᑦᑐᓴᕐᕕᒃ ᐱᖃᑕᐅᓛᖅᑲ ᕿᒥᕐᕈᓂᐅᔪᒧᑦ? ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖃᒪᓂᖅ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᒃ ᒪᓕᒐᓕᐅᖅᑎ ᐊᐱᕆᒻᒪᑦ ᑕᐃᒫᒃ. ᑖᓐᓇ ᐱᒋᐊᓕᕋᑖᕐᓂᕐᒦᓕᑕᐃᓐᓇᕐᖓᑦ, ᓯᓚᑦᑐᓴᕐᕕᒻᒥᐅᑕᐃᓪᓗ ᐃᓕᓐᓂᐊᖅᑐᓕᕆᔨᒃᑯᓐᓂᒃ ᐱᓕᕆᖃᑎᖃᕈᒪᑦᑎᐊᖅᑐᑦ ᑖᔅᓱᒧᖓ. ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᐊᐱᖅᑯᑎᔅᓴᓕᑦᑕᖃᒃᑲᓐᓂᖅᑲ ᐊᖓᔪᖅᑳᖃᕐᕕᖓᑕ ᒥᔅᓵᓄᑦ? ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᔅᓯᕙᐅᑖᖅ. ᒥᓂᔅᑕ, ᑐᙵᓱᒋᑦ, ᐃᖅᑲᓇᐃᔭᖅᑎᑎᓪᓗ. ᒪᓕᒐᓕᐅᖅᑎᐅᖃᑎᒪ ᐊᑕᒍᑦᑖᓘᑉ ᐊᐱᖅᑯᑎᒋᖅᑰᖅᑲᐅᔭᕋᓗᐊᖓ ᑖᓐᓇ (ᑐᓵᔨᑎᒎᓕᖅᑐᖅ) ᑮᓇᐅᔭᓕᕆᔨᒃᑯᑦ 2026-2030−ᒧᑦ ᐱᓕᕆᐊᔅᓴᓄᑦ ᐸᕐᓇᐅᑎᖏᑦ ᐃᓚᖓᒡᒎᖅ ᐱᓕᕆᐊᕆᓛᕐᓗᓂᐅᒃ ᐸᕐᓇᔅᓯᒪᔭᖓ 2026-2027 ᑮᓇᐅᔭᓕᕆᔾᔪᑏᑦ ᐊᕐᕌᒍᖓᓂ. ᑕᒪᓐᓇᐅᒻᒪᑦ “ᐃᑲᔪᖅᓰᓂᖅ ᐊᖏᖃᑎᒌᒍᑎᓕᐅᕐᓂᕐᒥᒃ ᑕᓪᓕᒪᐅᔪᑦ ᓄᓇᕗᒻᒥ ᑯᐊᐳᕇᓴᐅᔪᓄᑦ ᐱᔾᔪᑎᖃᕐᓗᑎᒃ ᑮᓇᐅᓕᕆᒋᐊᖃᕐᓂᕆᕙᑦᑕᖏᓐᓂᒃ ᐊᒻᒪ ᐊᐅᓚᑦᑎᓂᕆᒋᐊᖃᖅᐸᑦᑕᖏᓐᓂᒃ. ᖃᓄᕐᓗ ᐱᓕᕆᖃᑎᖃᕆᐊᖃᕐᒪᖔᑕ ᓄᓇᕗᑦ ᒐᕙᒪᖓᓂᒃ ᐊᒻᒪᓗ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐅᕆᐊᖃᕐᓂᕆᔭᖏᓐᓂᒃ.”

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 28 ᑕᐃᒫᖑᓇ ᑕᐃᒫᒃ ᑎᑎᕋᖅᓯᒪᔪᖅ ᑕᐃᒃᑯᐊ ᖃᓄᖅ ᓂᕆᐅᕝᕕᖃᕐᒪᖔᑕ ᑎᑎᖅᑲᐅᓯᐊᖃᑦᑕᔾᔮᓛᕈᓐᓃᕐᖓᑕ ᑐᓴᓚᐅᕋᑦᑕ. ᒥᓂᔅᑕ ᐊᐱᕆᒍᒪᔭᕋ, ᒥᓂᔅᑕ ᖃᐅᔨᓯᒪᒻᒪᖔᖅ ᐊᐅᓚᑦᑎᒍᓯᓯ ᐊᓯᔾᔨᖅᓯᒪᓕᕐᒪᖔᖅ ᑎᑎᖅᑲᐅᓯᐊᖃᑦᑕᕈᓐᓃᑎᓪᓗᓯ ᒥᓂᔅᑕᒥᒃ ᖃᓄᖅ ᓂᕆᐅᕝᕕᖃᕐᒪᖔᖅ ᐱᓕᕆᐊᔅᓯᓐᓂᒃ, ᑐᑭᓯᐅᒪᖃᑎᒌᓐᓂᕐᒧᑦ ᐊᖏᖃᑎᒌᒍᑎᖃᑐᐃᓐᓇᖃᑦᑕᕐᓂᐊᓕᕐᖓᑕᒎᖅ ᓄᓇᕗᑦ ᒐᕙᒪᖓᓂ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᑦᑕᐅᖅ ᒪᓕᒐᓕᐅᖅᑎ ᐊᐱᕆᒻᒪᑦ ᐱᒻᒪᕆᐊᓗᒻᒥᒃ. ᓯᓚᑦᑐᓴᕐᕕᒃ ᐱᓕᕆᖃᑎᖃᑦᑎᐊᓪᓚᕆᑉᐸᑦᑐᖅ ᓄᓇᕗᑦ ᒐᕙᒪᖓᓂᒃ. ᑮᓇᐅᔭᖃᖅᑎᑦᑎᔨᐅᖃᑦᑕᕐᖓᑕ. ᑲᔪᓰᓐᓇᖃᑦᑕᖅᑐᒍᑦ ᑖᒃᑯᐊ ᑎᑎᖅᑲᐅᓯᐊᖃᑦᑕᕈᓐᓃᕋᓗᐊᖅᑎᓪᓗᒋᑦ ᖃᓄᖅ ᒥᓂᔅᑕ ᓂᕆᐅᕝᕕᖃᕐᒫᖔᖅ. ᑖᓐᓇ ᐱᔭᔅᓴᖅᑖᕆᓯᒪᔭᕗᑦ ᒪᓕᖃᑦᑕᓕᖅᑕᕗᑦ, ᓯᕗᒧᑦ ᐃᖏᕐᕋᐃᓇᖅᑎᒐᓱᑦᑐᒍ ᓯᓚᑦᑐᓴᕐᕕᒃ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᑲᔪᓯᒋᐊᕆᑦ ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᓪᓗ ᒥᓂᔅᑕ. ᐃᓛᒃ ᑖᓐᓇ ᑕᒪᒃᑯᓂᖓ ᐊᑦᑐᐃᒻᒪᑦ ᐅᓂᒃᑳᓂᓪᓗ ᐅᓂᒃᑳᖑᖃᑦᑕᕆᐊᓖᑦ ᐊᕐᕌᒍᑕᒫᑦ ᐊᒻᒪᓗ ᑕᒪᒃᑯᐊ ᐱᒻᒪᕆᒐᓚᐃᑦ ᑖᔅᓱᒧᖓᓗ ᓯᓚᑦᑐᓴᕐᕕᒻᒧᑦ ᑮᓇᐅᔭᐃᑦ ᐅᕝᕙᓘᓐᓃᑦ ᒪᓕᒐᐃᑦ ᐊᐅᓚᑦᑎᔾᔪᑎᖏᑦ. ᑐᑭᓯᕋᑖᖅᑕᕋᓗᐊᕋ ᖃᓄᐃᒍᑎᖃᓚᐅᖅᓯᒪᙱᑦᑑᔮᕐᓂᕋᖅᑐᒍ ᑖᓐᓇ ᓯᓚᑦᑐᓴᕐᕕᒃ ᒐᕙᒪᒃᑯᓐᓂᒃ. ᑖᓐᓇ ᑐᑭᓯᑦᑎᐊᕆᐊᖃᓪᓚᕆᒃᑲᑦᑎᒍ ᑖᓐᓇ ᓯᓚᑦᑐᓴᕐᕕᒃ ᐃᒻᒥᒃᑰᕐᓂᕋᖅᑕᐅᒐᓗᐊᕐᖓᑦ ᑕᕝᕙᙵᑦ ᒐᕙᒪᒃᑯᓐᓂᒃ ᐊᖏᖃᑎᒌᒍᑎᖃᓕᕐᓂᖅᑲᑦ ᖃᓄᐃᑦᑐᓂᒃ ᓴᖅᑭᐸᓪᓕᐊᔪᓂᒃ ᑖᔅᓱᒧᖓ ᑐᕌᖓᓂᔪᓂᒃ ᑐᓴᖅᑎᑕᐅᖃᑦᑕᕆᐊᖃᕐᓂᐊᖅᑰᖅᑐᒍᑦ ᐱᕙᓪᓕᐊᓂᖓᓂᑦ ᐊᐅᓚᔾᔭᒋᐊᕐᓂᖏᓐᓂᒃ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᐅᖃᐅᓯᔅᓴᓗᐊᑐᐃᓐᓇᐅᒐᓗᐊᖅ. ᓂᓪᓕᐅᑎᒋᔪᓐᓇᕐᒥᔭᐃᑦ, ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᓪᓗ ᐅᖃᕋᕕᑦ ᑕᐃᒫᒃ, ᐸᓐᓂᖅᑑᒧᑦ ᒪᓕᒐᓕᐅᖅᑎ. ᑲᑎᒪᔨᕋᓛᑦ ᒪᓕᒐᓕᐅᕐᕕᓪᓗ ᑐᓴᐅᒪᑎᖃᑦᑕᕈᓐᓇᑎᐊᕐᓂᐊᖅᑕᕗᑦ ᖃᓄᐃᓕᕙᓪᓕᐊᓂᑦᑎᓐᓂ ᐱᔪᓐᓇᕐᓂᓕᒫᑦᑎᒍᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ−ᐊᕿᐊᕈᖅ. ᒥᔅ ᐊᖑᑎᐊᓗᒃ, ᐊᐱᖅᑯᑎᔅᓴᖃᒃᑲᓐᓂᕋᑖᖅᑮᑦ? ᐊᖑᑎᐊᓗᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐅᕙᓐᓃᙶᖑᓱᑦᑐᖅ ᐊᑐᐃᓐᓇᕈᖅᓯᒪᙱᑦᑐᒥᒃ ᑭᐅᔪᓐᓇᖏᒃᑯᕕᐅᒃ ᑕᐃᕕᑎᐅᖅᑲᐃ ᑭᐅᔪᓐᓇᓛᖅᑕᖓ ᖃᖓᑭᐊᖅ. ᑕᒪᒃᑯᓄᖓ ᑮᓇᐅᔭᓕᐅᕋᓱᑦᑎᐅᖏᑦᑐᓄᑦ ᑎᒥᐅᔪᓄᑦ ᐃᓕᓴᑎᑦᑎᔪᕕᔾᔪᐊᕌᓘᖃᑦᑕᕐᖓᑕ ᐃᓕᖅᑯᓯᕐᓄᑦ ᑐᕌᖓᔪᓂᒃ ᐃᓄᐃᑦ ᐊᓄᕌᓕᐅᕈᓯᖏᓐᓂᒃ ᑲᒥᓕᐅᕈᓯᖏᓐᓂᒃ ᖃᒧᓯᐅᕈᓯᖏᓐᓂᒃ. ᓯᓚᑦᑐᓴᕐᕕᑯᓐᓄᑦ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 29 ᑮᓇᐅᔭᖃᖅᑎᑕᐅᖃᑦᑕᖅᑳᑦ? ᐃᒃᑯᐊ ᑐᒃᓯᕋᐅᑎᓕᐅᖃᑦᑕᑐᖅᑲᐃ ᑕᐃᒫᒃ ᐃᓕᓐᓂᐊᑎᑦᑎᕙᑦᑐᐃᑦ ᓯᓚᑦᑐᓴᕐᕕᒻᒥ? ᐊᐱᕆᑐᐃᓐᓇᖅᑐᖓ ᖃᓄᖅ ᐱᕙᒻᒪᖔᑕ ᐊᐅᓚᒍᑎᔅᓴᓂᒃ. ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᐊᖑᑎᐊᓗᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᒃ, ᑲᑎᒪᔨ ᐊᐱᕆᒻᒪᑦ. ᓄᓇᕗᑦ ᓯᓚᑦᑐᓴᕐᕕᒃ ᑮᓇᐅᔭᖃᖅᑎᑦᑎᕙᙱᑦᑐᖅ ᑮᓇᐅᔭᓕᐅᕋᓱᑦᑎᐅᖏᑦᑐᓂᒃ ᓄᓇᓕᓐᓂ ᐃᓕᓐᓂᐊᖅᑕᐅᕙᑦᑐᓄᑦ. ᐊᓯᖔᖏᓐᓂᒃ ᑐᔅᓯᕌᔅᓴᖅᑕᖃᖃᑦᑕᕐᖓᑦ ᒐᕙᒪᒃᑯᑦ ᐱᓕᕆᕕᖏᓐᓂ. ᓯᓚᑦᑐᓴᕐᕕᒃ ᐊᑐᐃᓐᓇᐅᑎᑦᑎᕙᑦᑐᖅ ᐃᓄᓐᓄᑦ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕐᓂᐅᔪᓂᒃ ᓯᓚᑦᑐᓴᕐᕕᐅᑉ ᐃᓗᐊᒍᑦ. ᑮᓇᐅᔭᑦ ᑕᐃᑲᙶᖃᑦᑕᖅᑐᐃᑦ ᐊᔾᔨᒌᙱᑦᑐᓂᒃ ᐱᖃᑕᐅᓪᓗᑎᒃ ᓄᓇᕗᑦ ᒐᕙᒪᖓᓂᒃ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᒥᔅᑕ ᒪᐃᒃ, ᐊᐱᖅᑯᑎᔅᓴᖃᒃᑲᓂᖅᑮᑦ? ᒪᐃᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᒥᓂᔅᑕ ᐸᕐᓇᐅᑎᑦᓴᖏᓐᓄᑦ 2026-2027-ᒥᑦ, ᐋᖅᑮᓗᑎᒃ ᐋᖅᑭᐅᒪᒍᑎᐅᓂᐊᖅᑐᒥᒃ ᓇᕝᕚᕐᓗᑎᒃ ᓈᓴᖅᑕᐅᓯᒪᔪᓂᒃ ᖃᓄᑎᒋᓪᓗ ᐱᑎᒋᔪᓂᒃ ᑐᓴᕈᑎᔅᓴᐅᔪᓐᓇᖅᑐᓂᒃ ᖃᓄᖅ ᐃᓚᐅᑎᒋᕙᓐᓂᖏᑕ ᐃᓐᓇᒻᒪᕇᑦ ᓯᓚᑦᑐᓴᕐᕕᒻᒥ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒍᑦ) ᖁᔭᓐᓇᒦᖅᐸᕋ ᐊᐱᖅᑯᑎᒋᒻᒪᒍ. ᐊᒥᓱᑦ ᓯᓚᑦᑐᓴᕐᕕᐅᑉ ᐱᓕᕆᐊᔅᓴᖏᑦ ᐱᔨᔅᓯᕋᐅᑎᖏᑦ ᐃᓐᓇᕐᓂᒃ ᐃᓚᖃᓯᐅᑎᓲᖑᔪᑦ ᐊᑕᐅᓯᐅᙱᑦᑐᓂᒃ ᓇᐅᑦᓯᖅᑐᖅᐸᓪᓕᐊᔪᒪᓪᓗᑎᒍ ᐊᓪᓚᐸᓪᓕᐊᓗᒋᑦ ᐃᓐᓇᐃᑦ ᐃᓄᐃᑦ ᐃᓚᐅᕙᑦᑐᑦ ᐃᓕᓐᓂᐊᖅᑎᖁᑎᑦᑎᓐᓄᑦ ᐱᓕᕆᐊᔅᓴᑎᓐᓂ ᐊᕐᕌᒍᑕᒫᖅᓯᐅᑎᓂᓪᓗ ᑎᑎᕋᖃᓯᐅᑎᒍᓐᓇᓕᕐᓗᒋᑦ. ᑖᓐᓇ ᐱᓇᓱᓐᓂᕆᔭᕗᑦ ᓯᓚᑦᑐᓴᕐᕕᒃᑯᓐᓄᑦ ᑕᑯᑎᑦᓯᒍᑎᐅᑦᓯᐊᒃᑲᓐᓂᕐᓂᐊᖅᑐᖅ ᐃᓐᓇᐃᑦ ᐃᓚᐅᕙᓐᓂᖏᓐᓂᒃ ᓄᓇᕗᒻᒥ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ−ᐊᕿᐊᕈᖅ. ᒥᔅᑕ ᒪᐃᒃ ᓱᓕᓘ? ᒪᐃᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐄ’, ᐸᕐᓇᐅᑎᖏᓐᓄᖅᑲᐃ ᓱᓕ 2026-2027-ᒥ, ᐅᖃᖃᑎᖃᕐᓂᐊᕐᓗᑎᒃ ᓯᕗᓕᖅᑎᐅᔪᓂᒃ, ᐃᓕᓐᓂᐊᖅᑎᒻᒪᕆᓐᓂᒃ, ᐃᓕᓴᐃᔨᒻᒪᕇᑦ, ᐃᓕᓐᓂᐊᖅᑏᑦ, ᐃᓐᓇᐃᓪᓗ ᐊᑐᐊᒐᐃᑦ ᑐᑭᓯᓇᑦᓯᐊᖁᓪᓗᒋᑦ ᑐᑭᒧᐊᑦᑎᐊᕐᓂᖃᖁᓪᓗᒋᓪᓗ ᐃᓄᐃᑦ ᖃᐅᔨᒪᔭᑐᖃᖏᑦᑕ ᐅᑉᐱᕆᔭᖏᓐᓂᒃ. ᐅᓂᒃᑳᕆᒋᐊᒃᑲᓐᓂᕉᒃ ᑖᓐᓇ ᒥᓂᔅᑖ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒍᑦ) ᖁᔭᓐᓇᒦᖅᐸᕋ ᐊᐱᖅᑯᑎᒋᒃᑲᓂᕐᒪᒍ ᒪᓕᒐᓕᐅᖅᑎᐅᑉ. ᐃᒃᓯᕙᐅᑖᖅ, ᖃᓄᐃᔅᓴᖏᒃᑯᕕᑦ ᐊᖏᔪᖅᑳᖅ ᐳᕋᐃᔅ ᑭᐅᒋᐊᓪᓚᑲᓐᓂᕈᓐᓇᕈᓂᐅᒃ ᑐᓴᕈᑎᔅᓴᒧᑦ ᑕᒪᑐᒧᖓ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᐊᑏ ᑲᔪᓯᒋᑦ, ᒥᔅ ᐳᕋᐃᔅ. ᐳᕋᐃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᖁᔭᓐᓇᒦᖅᐸᕋᓗ ᐊᐱᖅᑯᑎᒋᒻᒪᒍ ᒪᓕᒐᓕᐅᑎᐅᑉ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 30 ᒥᓂᔅᑕ ᐅᖃᖅᑲᐅᒻᒪᑦ ᐅᐊᑦᑎᐊᖅ ᓯᓚᑦᑐᓴᕐᕕᐅᑉ ᐊᑐᐊᒐᖓᑕ ᐃᓚᖓᑦ ᐱᑐᖃᐅᓗᐊᓕᕐᒪᑦ ᓄᑖᙳᕆᐊᖅᑕᐅᓯᒪᒋᐊᖃᕐᒪᑦ. ᐊᒥᓱᑦ ᐊᐅᓚᓂᕐᒨᓕᖓᔪᑦ ᐊᖏᓪᓕᒋᐊᖅᓯᒪᒻᒪᑕ ᓯᓚᑦᑐᓴᕐᕕᒃᑯᓪᓗ ᐃᓚᐅᑎᑦᑎᑲᓐᓂᖅᓯᒪᓂᖏᑦ ᓄᓇᓕᐊᖅᑕᓂᕐᒧᑦ ᐅᖃᐅᓯᕐᒥᓗ ᐃᓕᓐᓂᐊᓂᕐᒧᑦ. ᓯᓚᑦᑐᓴᕐᕕᒃᑯᑦ ᐊᑐᐊᒐᖏᓐᓂᒃ ᑕᑯᑎᑦᓯᒐᓗᐊᕐᒪᖔᖅ ᐱᒍᒪᔪᒍᑦ ᐊᑐᐊᒐᕆᔭᐅᔪᓄᑦ ᐊᐅᓚᔾᔪᑎᓄᑦ ᑕᕝᕙ ᐊᑕᐅᓯᐅᙱᑦᑐᑦ ᐊᑐᐊᒐᐃᑦ ᐃᓱᒪᒋᕙᓪᓕᐊᔪᒪᔭᕗᑦ ᑕᒪᒃᑯᓇᙵᑦ ᐃᑲᔪᖅᑐᐃᒃᑲᓐᓂᕈᑎᐅᒐᔭᖅᑐᓂᒃ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᐳᕋᐃᔅ. ᐊᓯᖏᓪᓗ ᐊᐱᖅᑯᑎᑦᓴᑦ ᑖᒃᑯᐊ ᐊᖏᔪᖅᑳᖃᕐᕕᖓᓄᑦ? ᒪᓕᒐᓕᐅᖅᑏᑦ ᓯᓚᑦᑐᓴᕐᕕᒃᑯᑦ ᐊᖏᔪᖅᑳᖃᕐᕕᐊᓅᖓᔪᖅ ᓈᒻᒪᒋᕕᓯᐅᒃ? ᑲᑎᒪᔨᕋᓛᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᒪᑉᐱᒐᕐᒨᕐᓗᑕ M-iii-4. ᕿᒥᕐᕈᓂᐊᓕᕐᒥᔭᕗᑦ ᓯᓚᑦᑐᓴᕐᕕᒃᑯᑦ ᖃᐅᔨᓴᖅᑎᖏᑦ ᓄᓇᕗᒻᒥ. ᐊᐱᖅᑯᑎᑦᓴᖃᖅᐸᑦ ᒪᓕᒐᓕᐅᖅᑏᑦ? ᑲᔪᓯᓗᑎᑦ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᓄᓇᕗᑦ ᓯᓚᑦᑐᓴᕐᕕᒃᑯᑦ 2026-2030 ᐸᕐᓇᐅᑎᐊ, ᐸᕐᓇᒍᒫᕐᓂᐊᖅᑐᒡᒎᖅ ᐱᓕᕆᐊᔅᓴᒧᑦ 2026-2027-ᒥ ᐅᖃᖃᑎᖃᖅᐸᓪᓗᑎᒃ ᓄᓇᕗᒻᒥ ᖃᐅᔨᓴᖅᑎᐅᔪᓂᒃ ᐱᓕᕆᖃᑎᒌᑦᑐᓂᒃ. ᑕᒪᒃᑯᐊ ᑲᑎᑕᐅᓗᑎᒃ ᒪᓕᒐᓕᐅᖅᐸᑦᑐᑦ ᑐᑭᒧᐊᒃᑎᑦᑎᓂᕐᒧᑦ ᓴᙱᓕᒋᐊᕐᓗᑎᒃ ᐊᖏᖅᑕᐅᕙᓐᓂᖏᓪᓗ ᐋᖅᑭᒋᐊᕐᓗᒋᑦ ᖃᐅᔨᓴᕈᒪᔪᑦ. ᑭᓱᑦ ᑕᐃᒪ ᐊᑐᖅᑕᐅᕙᓪᓕᐊᕙᑦᑐᓂᒃ ᐊᓯᔾᔨᖅᑕᐅᒍᒪᕙᓪᓕᐊᕙᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᑕᖅᑐ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒍᑦ) ᖁᔭᓐᓇᒦᖅᐸᕋ ᒪᓕᒐᓕᐅᖅᑎ ᐊᐱᖅᑯᑎᒋᒻᒪᒍ. ᒪᐃ 2026-ᖑᑎᓪᓗᒍ ᐃᖃᓗᓐᓂ ᓄᓇᕗᒻᒥ ᖃᐅᔨᓴᖅᑎᓄᑦ ᑲᑎᒪᓂᖃᓚᐅᖅᓯᒪᕗᖅ ᑕᒪᑐᒧᖓ ᐱᓇᓱᐊᕋᔅᓴᒧᑦ ᐃᓚᒋᔭᐅᓪᓗᓂ ᒪᓕᒐᓕᐅᖅᐸᑦᑐᓂᒃ ᐅᖃᖃᑎᖃᖅᐸᓪᓗᑎᒃ ᐊᖏᖃᑎᒌᓚᐅᖅᐳᑦ ᐊᓯᔾᔩᒍᒪᓪᓗᑎᒃ ᓚᐃᓴᑖᖅᐸᓐᓂᕐᒧᑦ ᖃᐅᔨᓴᖅᑐᑦᓴᓂᒃ ᑐᑭᒧᐊᑦᑎᐊᖅᔫᒥᓕᖁᓪᓗᒋᑦ ᐅᓐᓂᖅᓯᐅᖅᐸᓪᓗᑎᓪᓗ ᑐᓴᕋᔅᓴᓂᒃ ᐊᖏᕈᑎᐅᕙᑦᑐᓂᓪᓗ ᐱᕙᓪᓕᐊᕈᑎᐅᔪᓐᓇᖅᑐᓂᒃ, ᐱᓕᖅᑭᑦᑕᐃᓕᒪᔾᔫᒥᓕᕐᓗᑎᒃ. ᓄᓇᓕᓐᓂᓪᓗ ᐅᖃᖃᑎᖃᖅᐸᔅᓯᓐᓈᑦ. ᑕᒪᒃᑯᐊ ᑕᒪᕐᒥᒃ ᓴᖅᑭᑕᐅᔪᒫᖅᑐᑦ ᐃᓕᓐᓂᐊᕐᓂᕆᔭᑦᑎᓐᓄᑦ ᐅᓂᒃᑳᓕᐅᓛᖅᑐᒥᒃ ᓴᖅᑭᓛᓕᖅᑐᓂᓗ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᒥᔅᑕ ᑕᖅᑐ, ᐊᑏᒎᖅ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᓄᓇᕗᑦ ᓯᓚᑦᑐᓴᕐᕕᒃᑯᑦ 2026-2030 ᐸᕐᓇᐅᑎᐊᑦ ᐅᖃᖅᓯᒪᕗᖅ ᐸᕐᓇᐅᑎᐅᔪᒫᕐᓂᐊᖅᑐᓂᒃ 2026-2027-ᒥ ᑐᙵᓱᑦᑎᑦᑎᓂᖃᓚᐅᕐᓗᑎᒃ ᐋᓐᓂᐊᖅᑕᐃᓕᓂᕐᒧᑦ ᑲᑎᒪᕐᔪᐊᓂᕐᒥ ᐃᖃᓗᓐᓂ ᓄᓇᕗᑦ ᑐᙵᕕᒃᑯᑦ ᐃᓚᒋᓗᒋᑦ. ᐅᑭᐅᖅᑕᖅᑐᒥ ᐆᒪᔪᐃᑦ ᖃᓄᐃᑦᓯᐊᖅᑎᒋᓂᖏᓐᓄᑦ ᖃᐅᔨᓴᕐᓂᐅᔪᒥ ᐊᒻᒪ ᐱᕚᓪᓕᔭᐅᖁᓪᓗᒋᑦ ᖃᐅᔨᓴᖅᑕᐅᕙᑦᑐᑦ ᐆᒪᔪᒥᓃᑦ. ᑭᓱᑦ ᑕᐃᒪ ᐃᓱᒪᔅᓴᖅᓯᐅᕈᑕᐅᕙᑦ? ᐃᒃᓯᕙᐅᑖᖅ, ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᑕᖅᑐ. ᑭᐅᓚᙱᓐᓂᕐᓂ ᒥᓂᔅᑕ ᑐᓵᔨ ᐃᑉᐱᒋᒋᐊᕐᓗᒍ ᓱᒃᑲᓕᓗᐊᙱᔾᔫᒥᕙᓪᓗᑎᑦ. ᖁᔭᓐᓇᒦᒃ, ᒥᔅ ᕼᐄᓕ ᐊᕿᐊᕈᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 31 ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᒪᒥᐊᑉᐳᖓᓗ ᑐᓵᔨᖁᑎᒋᔭᑦᑎᓐᓄᑦ. ᐊᒻᒪ ᓱᒃᑲᐃᒋᐊᕐᔫᒥᓂᐊᖅᐳᖓ. ᐊᐱᖅᑯᑎᐅᔪᖅ ᐊᑕᐅᓯᖅ ᑖᓐᓇ ᑲᑎᒪᓂᐅᒋᐊᓚᐅᖅᓯᒪᔪᖅ ᒫᔅᓯᒥ ᑲᔪᓯᔪᔪᖅ ᐅᑭᐅᖅ. ᑲᑎᒪᓂᖓᑦ ᑐᕌᒐᖃᓚᐅᕐᒪᑕ ᓯᕗᒧᐊᑦᓴᐃᓐᓇᕈᒪᓪᓗᑎᒃ ᐃᓄᓐᓄᑦ ᓯᕗᓕᐅᖅᑕᐅᓗᓂ ᖃᐅᔨᓴᕐᓂᕐᒧᑦ ᐅᖃᖃᑎᒌᑉᐸᓐᓂᖅ ᐊᒻᒪᓗ ᐋᓐᓂᐊᑕᐃᓕᓂᕐᒧᑦ ᖃᓄᐃᙱᑦᑎᐊᓂᒃᓴᖓᓄᑦ ᐃᓄᐃᑦ ᓴᐳᔾᔭᐅᖁᓪᓗᒋᑦ ᓂᕐᔪᑏᓪᓗ ᐊᕙᑎᕗᑦ. ᐅᖃᐅᓯᐅᕙᓚᐅᖅᐳᑦ ᒪᑯᐊ, ᐆᒪᔪᓂᒃ ᖃᐅᔨᓴᖅᐸᓐᓃᑦ, ᐃᓄᐃᓪᓗ ᖃᓄᐃᙱᓐᓂᖏᑦ ᐊᒻᒪᓗ ᖃᐅᔨᓴᕐᕕᒻᒥ ᓄᑖᑦ ᖃᐅᔨᓴᐅᑎᐅᒍᓐᓇᖅᑐᑦ ᖃᓄᕐᓗ ᐊᑦᑐᐃᒍᓐᓇᕐᒪᖔᑕ ᓂᕿᑦᓴᓂᒃ. ᐊᑐᖅᑕᐅᑦᓴᐃᓐᓇᕈᓐᓇᕐᓂᖏᓐᓂᓪᓗ ᓄᓇᖃᕐᓂᐅᔪᒥᓪᓗ. ᖃᓄᕐᓗ ᑕᒪᒃᑯᐊ ᐊᑦᑐᐊᖃᑎᒌᑦᑐᐃᓐᓇᐅᕙᑉᐸᑦ. ᖄᒃᑲᓐᓂᐊᒍᓪᓗ ᐊᒃᓱᕈᕈᑕᐅᔪᑦ ᐊᒥᒐᕈᑕᐅᔪᓪᓗ ᐅᖃᐅᓯᐅᕙᓚᐅᕐᒥᔪᑦ, ᖃᓄᕈᓘᔮᓗᒃ ᐃᓱᒪᓕᐅᕈᓘᔭᙳᐊᖅᑐᑎᓪᓗ ᐋᖅᑭᒍᑎᒃᓴᐅᒐᔭᙳᐊᖅᑐᓂᒃ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᒥᔅᑕ ᑕᖅᑐ, ᓱᓕᓘ? ᐊᓯᖏᑦ ᐊᐱᖅᑯᑎᑦᓴᖃᖅᑐᖃᖅᐸᑦ ᓄᓇᕗᒻᒥ ᖃᐅᔨᓴᖅᑎᒃᑯᑦ ᐱᓪᓗᒋᑦ? ᑕᑯᙱᑕᐃᓐᓇᕋᒪ, ᓄᓇᕗᑦ ᓯᓚᑦᑐᓴᕐᕕᒃᑯᑦ ᐊᖏᕈᑎᒋᕕᓯᐅᒃ? ᑲᑎᒪᔨᕋᓛᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᒪᑉᐱᒑᓅᓕᕐᒥᓗᑕ, M-iii-5. ᕿᒥᕐᕈᓂᐊᓕᕐᒥᔭᕗᑦ ᓄᓇᕗᑦ ᓯᓚᑦᑐᓴᕐᕕᒃᑯᑦ ᐊᕕᒃᑐᖅᓯᒪᓂᐅᔪᓂᒃ ᐃᓕᓴᕐᕕᖏᓐᓂ. ᐊᐱᖅᑯᑎᔅᓴᖃᕐᕕᐅᕙ? ᑲᔪᓯᒋᑦ, ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᓄᓇᕗᑦ ᒐᕙᒪᒃᑯᑦ ᑎᓯᐱᕆ 31, 2025-ᒥ ᐃᓄᐃᑦ ᐃᓄᓐᓂᒃ ᐃᖅᑲᓇᐃᔭᖅᑎᑦᓯᓂᕐᒧᑦ ᐸᕐᓇᐅᑦ ᐅᓂᒃᑳᖅ ᑕᑯᑎᑦᓯᓚᐅᖅᐳᖅ ᓄᓇᕗᑦ ᓯᓚᑦᑐᓴᕐᕕᒃᑯᑦ 100%-ᐳᓴᖏᑦ ᐃᓐᓄᑦᑕᐅᓯᒪᓂᕋᓚᐅᙱᓚᑦ ᐃᖅᑲᓇᐃᔮᓂᒃ ᐅᖅᓱᖅᑑᒥ, ᐃᒡᓗᓕᒻᒥ, ᑰᕌᕐᔪᒻᒥ, ᓇᐅᔮᓂᓪᓗ ᐊᒻᒪ ᖃᐅᓱᐃᑦᑐᒥ. ᑭᓱᑦ ᐊᓯᔾᔨᕈᑏᑦ ᐊᒃᓱᕈᕈᑕᐅᓯᒪᔪᑦ ᓱᖅᑯᐃᖅᑕᐅᓯᒪᕙᑦ ᑖᒃᑯᐊ ᐃᓐᓄᑦᑕᐅᖁᓪᓗᒋᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᑕᖅᑐ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒍᑦ) ᖁᔭᓐᓇᒦᖅᐸᕋ ᒪᓕᒐᓕᐅᖅᑎ ᐊᐱᕆᒻᒪᑦ. ᐊᑦᑎᓛᒥᖅᑲᐃ, ᐊᑐᓂᒃ ᓄᓇᓖᑦ ᐃᓐᓇᕐᓄᑦ ᐃᓕᓴᐃᒍᓐᓇᖅᑐᒥᒃ ᐱᑕᖃᓲᑦ. ᓄᓇᓕᓐᓂ ᐊᑕᐅᓯᑑᒑᖓᑦ ᐃᖅᑲᓇᐃᔮᖑᔪᖅ ᓯᓚᑦᑐᓴᕐᕕᒻᒥ ᐃᓐᓄᑦᑕᐅᙱᒑᖓᓪᓗ 100%−ᐳᓴᒥᒃ ᐃᓐᓄᑦᑕᐅᓯᒪᙱᑦᑑᓛᕈᑎᐅᓲᖅ ᐊᑕᐅᓯᐅᒐᓗᐊᖅᑐᓂ. ᑭᖑᕙᕈᑕᐅᓗᐊᖅᓯᒪᔪᖅ ᐃᖅᑲᓇᐃᔭᖅᑐᓕᕆᔨᒃᑯᑦ ᓯᓚᑦᑐᓴᕐᕕᒻᒥ ᐊᓯᔾᔨᐸᓪᓕᐊᓚᐅᕐᒪᑕ ᐅᖃᐅᓯᐅᓯᒪᓕᖅᖢᓂᓗ. ᐃᖅᑲᓇᐃᔮᖑᕙᓪᓕᐊᓯᕗᑦ ᑖᒃᑯᐊ ᑭᖑᕙᖅᓯᒪᔪᑦ ᐃᖅᑲᓇᐃᔮᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᑦᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᕼᐄᓕ ᐊᕿᐊᕈᖅ. ᒥᔅᑕ ᑕᖅᑐ, ᑲᔪᓯᒋᑦ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᖃᓄᖅ ᓄᓇᕗᑦ ᓯᓚᑦᑐᓴᕐᕕᒃᑯᑦ ᐱᓕᕆᐊᑦᓴᖃᖅᑎᑦᓯᕙᓐᓂᖏᑦ ᐃᓕᓴᐅᑎᓂᒃ ᓄᓇᓕᓐᓂ ᖃᓄᕐᓕ ᐱᔭᐅᓲᖑᕙᑦ 100% ᐃᓘᓐᓇᑎᒃ ᐃᓐᓄᑦᑕᐅᓯᒪᙱᑦᑎᓪᓗᒋᑦ? ᖁᔭᓐᓇᒦᒃ, ᐃᒃᓯᕙᐅᑖᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 32 ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᑕᖅᑐ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ (ᑐᓵᔨᑎᒍᑦ) ᖁᔭᓐᓇᒦᖅᐸᕋ ᐊᐱᖅᑯᑎᒋᒋᐊᕐᒪᒍ. ᓱᓕᔪᖅ ᐃᓐᓇᕐᒥᒃ ᐃᓕᓴᐃᔨᖃᙱᑎᓪᓗᒍ ᓄᓇᓕᒻᒥ ᐊᔪᓐᓇᐸᓗᒍᓐᓇᖅᑐᖅ ᐃᓕᓴᐃᒋᐊᒥ ᓄᓇᓕᒻᒥ. ᐊᔪᕐᓇᙱᑦᑕᕌᖓᑦ ᐃᓕᓐᓂᐊᕈᑎᑦᓴᖃᒃᑲᓐᓂᕈᓐᓇᓲᖑᒻᒥᔫᒐᓗᐊᑦ ᐊᓯᖏᑦ ᐃᓕᓴᐃᔨᓂᒃ ᐊᖅᑯᑎᖃᕐᓗᑎᒃ. ᓯᓚᑦᑐᓴᕐᕕᒃᑯᑦ ᐊᖏᖅᓯᒪᑦᑎᐊᖅᐳᑦ ᐃᓐᓄᒃᑕᐅᖁᓪᓗᒋᑦ ᑖᒃᑯᐊ ᐃᖅᑲᓇᐃᔮᑦ. ᑕᕝᕙᐅᑲᐅᑎᒋᔪᓐᓇᙱᒻᒪᑦ ᑭᓯᐊᓂ ᐃᖅᑲᓇᐃᔮᕆᕙᕗᑦ ᐃᓐᓄᑦᑕᐅᖁᓪᓗᒋᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᐊᑎᖁᑎᓐᓃᒻᒥᔪᖅ ᒥᔅᑕ ᖃᑉᓗᑦᓯᐊᖅ. ᖃᑉᓗᑦᓯᐊᖅ: ᒪ’ᓇ ᐅᖃᖅᑎᑦᓯᔨ, ᐃᒃᓯᕙᐅᑕᖅ. ᐊᐱᕆᒋᐊᖅᑳᖅᑎᓐᓇᖓ ᐅᓇ ᐱᒋᐊᕈᑎᖓᓄᑦ ᐅᖃᖅᑲᐅᔭᖓ ᑎᑎᕋᖅᓯᒪᔪᑦ (ᑐᓵᔨᑎᒎᓕᖅᑐᖅ) “ᑮᓇᐅᔭᖅᑐᕈᑎᐅᓛᖅᑐᒧᑦ ᐊᕐᕌᒍᒧᑦ ᐊᖏᑎᖅᑕᐅᒐᓱᑉᐳᑦ ᓯᓚᑦᑐᓴᕐᕕᒃᑯᑦ $52,201,000−ᓂᒃ.” (ᑐᓵᔨᑎᒎᕈᓐᓃᖅᑐᖅ) ᑖᒃᑯᐊ ᑮᓇᐃᔭᐃᑦ ᐃᓄᖕᓄᑦ ᐃᓕᓐᓂᐊᕐᓂᐅᑉ ᒥᒃᓵᓄᑦ ᑐᕌᖓᖦᖢᑎᒃ. ᓲᕐᓗ ᐃᓕᑕᕆᔭᐅᓯᒪᔪᑦ, ᐆᒃᑑᑎᒋᓗᒍ ᓯᓚᑦᑐᖅᓴᕐᕕᒡᔪᐊᕐᒥᑦ ᐱᐊᓂᒃᓯᒪᓂᕋᖅᑕᐅᔾᔪᑎᑖᖅᑐᑦ, ᓴᓇᓂᕐᒧᑦ ᐃᓕᓴᕆᔭᐅᔾᔪᑎᑖᖅᑐᑦ, ᓱᓇᓂᒃ ᐃᓕᓐᓂᐊᒐᕐᒥᒃ ᐃᓕᓚᔫᑎᑖᖅᑐᑦ. ᑭᓯᐊᓂ ᓱᓕ ᐊᔭᐅᖅᑐᕆᐊᖃᒃᑲᓐᓂᕋᑉᑎᒍᑦ ᐅᕙᒍᑦ ᒪᓕᒐᓕᐅᖅᑎᐅᔪᑎᒍᑦ ᑖᓐᓇ ᑐᙵᔾᔪᑎᒋᓗᒍ ᑎᑎᕋᖅᓯᒪᔪᖅ 23. ᐊᐱᖅᑯᑎᒋᓂᐊᓕᖅᐸᕋ ᑖᓐᓇ ᖃᑉᓗᓈᑐᑦ ᐊᐱᕆᓂᐊᖅᐸᕋ: (ᑐᓵᔨᑎᒍᑦ) ᐃᓐᓄᑦᑕᐅᓯᒪᒐᔪᙱᑦᑐᑦ ᓄᓇᕗᑦ ᓯᓚᑦᑐᓴᕐᕕᒻᒥ ᐃᖅᑲᓇᐃᔮᖑᔪᓂᑦ ᐃᖃᓗᐃᑦ ᓯᓚᑖᓂ. 60%−ᓪᓗᐊᒦᑦᑕᕐᒪᑦ. ᖃᓄᖅᑑᓪᓚᑦᑖᕈᑎᖃᖅᓯᒪᕕᓯ ᓯᓚᑦᑐᓴᕐᕕᒃᑯᑦ ᐃᓐᓄᑦᓯᒪᙱᑦᑐᑦ ᐃᖅᑲᓇᐃᔮᑦ ᐅᓄᓗᐊᕐᓂᖏᓐᓄᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖃᑉᓗᑦᓯᐊᖅ. ᑲᔪᓯᓗᑎᑦ, ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑕᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᒃ ᐊᐱᖅᑯᑎᒋᖕᒪᒍ ᐱᒻᒪᕆᐊᓗᒃ. ᐃᓐᓄᒃᓯᒪᙱᑦᑐᑦ ᑕᑯᑎᑦᓯᕗᑦ ᐃᖅᑲᓇᐃᔮᖑᔪᑦ ᐃᓐᓄᑦᑕᐅᓯᒪᙱᑦᑐᐃᑦ ᐃᖅᑲᓇᐃᔭᖅᑎᒻᒪᕆᓐᓄᑦ. ᑕᕝᕙ ᐃᓐᓄᑦᑕᐅᖃᑦᑕᖅᓯᒪᕗᑦ ᐃᖅᑲᓇᐃᔭᑲᐃᓐᓇᖅᑐᓄᑦ. ᐃᓐᓄᑦᑕᐅᓇᓱᑦᓴᐃᓐᓇᖅᑑᒐᓗᐊᑦ ᐊᑭᑦᑐᕋᑕᐅᑕᐅᕙᓐᓂᒻᒥᒍᑦ ᑕᒪᒃᑯᐊ ᐃᖅᑲᓇᐃᔮᑦ. ᖁᔭᓐᓇᒦᒃ, ᐃᑦᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᕼᐄᓕ ᐊᕿᐊᕈᖅ. ᑲᔪᓯᒋᑦ, ᖃᑉᓗᑦᓯᐊᖅ. ᖃᑉᓗᑦᓯᐊᖅ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᓄᓇᕗᑦ ᓯᓚᑦᑐᓴᕐᕕᒃᑯᑦ 2026-2027 ᐸᕐᓇᐅᑎᖏᑦ ᐸᕐᓇᐅᑎᖃᖅᓯᒪᔪᑦ ᐃᓚᖓ 2026-2027−ᒥ ᓯᓚᑦᑐᓴᕐᕕᒃᑯᑦ ᐃᓕᓐᓂᐊᖅᑎᓂᒃ ᑲᒪᔨᖏᑦ ᐃᖅᑲᓇᐃᔭᖃᑎᒋᔭᐅᓗᑎᒃ ᐃᓚᒋᐊᕈᑕᐅᔪᓐᓇᕋᔭᕐᒪᖔᑦ ᐱᔨᑦᓯᕋᐅᑎᖃᕈᓐᓇᕋᔭᕐᒪᖔᑦ ᐃᓕᓐᓂᐊᖅᑐᓄᑦ ᓄᓇᓖᑦ ᐃᓐᓇᕐᓄᑦ ᐃᓕᓴᕐᕕᖏᓐᓂ. ᖃᓄᖅ ᓯᓚᑦᑐᓴᕐᕕᒃᑯᑦ ᑕᒪᑐᒪᙵᑦ ᐊᙳᒪᓂᐊᖅᐸᑦ 60%−ᖑᑎᓪᓗᒋᑦ ᐃᖅᑲᓇᐃᔮᑦ ᐃᖃᓗᐃᑦ ᓯᓚᑖᓃᑦᑐᑦ ᐃᓐᓄᑦᑕᐅᓯᒪᙱᑎᓪᓗᒋᑦ? ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖃᑉᓗᑦᓯᐊᖅ. ᒥᓂᔅᑕ ᕼᐄᓕ ᐊᕿᐊᕈᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 33 ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᒃ ᑖᓐᓇ ᐊᐱᖅᑯᑎᒋᒐᖕᓂ. ᓄᓇᕗᒻᒥ ᓯᓚᑦᑐᖅᓴᕐᕕᒃᑯᑦ ᐃᓕᓴᖅᑎᓄᑦ ᐱᔨᑦᑎᕈᑎᓂᒃ ᐱᑕᖃᐅᕐᒪᑕ ᐊᕕᒃᑐᖅᓯᒪᔪᑦ ᐃᓕᓐᓂᐊᕐᕕᖏᓐᓂ ᐊᒻᒪᓗ ᒫᓐᓇ ᖃᓄᖅᑑᕈᑎᖃᖅᑐᑦ ᐊᓯᖏᓐᓂᒃ ᐱᑕᖁᓪᓗᒍ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᐊᓯᖏᑦ ᐊᐱᖅᑯᑎᒃᓴᐃᑦ, ᐊᕕᒃᑐᖅᓯᒪᔪᑦ ᐃᓕᓐᓂᐊᕐᕕᖏᑦᑕ ᒥᒃᓵᓄᑦ? ᒥᔅᑕ ᒪᐃᒃ. ᒪᐃᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᑲᔪᖃᑎᒌᑦ ᑎᓕᓯᔾᔪᑎ ᓄᓇᕗᑦ ᓯᓚᑦᑐᖅᓴᕐᕕᒃᑯᓐᓄᑦ ᐃᖅᑲᓇᐃᔭᖃᑎᖃᕐᓂᐊᖅᑐᒡᒎᖅ ᑕᒪᒃᑯᓂᖓ ᑎᒥᐅᔪᓂᒃ ᐊᒻᒪᓗ ᐊᒃᑐᖅᑕᐅᓯᒪᔪᓂᒃ ᐱᔾᔪᑎᒋᓪᓗᒋᑦ ᐃᓄᐃᑦ ᐅᖃᐅᓯᖓᑦ, ᐃᓕᖅᑯᓯᑐᖓᖏᑦ ᐊᒻᒪᓗ ᒐᕙᒪᒃᑯᓐᓄᑦ ᓴᖅᑭᑕᐅᓯᒪᔪᑦ ᐱᓕᕆᐊᙳᖅᑎᑕᐅᓯᒪᔪᑦ ᐱᔨᑦᑎᕈᑏᓪᓗ. ᑕᐃᒪᓐᓇ ᑎᑎᕋᖅᓯᒪᖕᒪᑦ ᐃᒻᒪᖄ ᑖᓐᓇ ᒥᓂᔅᑕᕆᔭᐅᔪᖅ ᓇᓗᓇᐃᖅᓯᔪᓐᓇᖅᐸ ᖃᓄᖅ ᑕᒪᓐᓇ ᐱᔭᒃᓴᖅᑖᕆᔭᐅᓯᒪᔪᖅ ᐱᓪᓗᒍ ᖃᓄᐃᓕᐅᖅᑎᒋᔭᐅᖕᒪᖔᑦ? (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᒃ ᑖᓐᓇ ᐊᐱᖅᑯᑎᒋᒐᖕᓂ. ᐄ’, ᖁᕕᐊᓱᒃᑐᖓ ᐃᓄᐃᑦ ᐅᖃᐅᓯᖏᑦ ᐃᓕᖅᑯᓯᖏᓪᓗ ᓯᓚᑦᑐᖅᓴᕐᕕᖕᒥ ᐃᓚᖃᖅᑐᑦ. ᐱᖅᑯᓯᓕᕆᕝᕕᒃ ᑕᐃᓐᓇ ᑲᖏᖅᖢᒑᐱᖕᒥ ᐃᓕᓐᓂᐊᕐᕕᒃ ᐊᒻᒪᓗ ᑎᓴᒪᑦ ᑕᐃᒃᑯᐊ ᖄᒃᑲᓐᓂᐊᒍᑦ ᐃᓄᐃᑦ ᐃᓕᓴᖅᑎᖏᑦ ᑎᑭᓕᐅᕆᔩᑦ ᐃᓄᒃᑎᑑᓕᕆᔩᑦ, ᒥᖅᑯᓕᖕᓂᒃ ᐊᓐᓄᕌᔾᔨᐅᖃᑦᑕᕐᓂᖅ ᐊᒻᒪ ᒪᑯᐊ ᐱᐅᓴᐅᑏᑦ ᓯᐅᑎᕈᑏᑦ ᓇᒡᒍᐊᕐᒦᑦ ᑕᒪᒃᑯᐊᓗ ᓴᓇᔭᐅᖃᑦᑕᖅᑐᑦ ᓴᕕᕋᔭᖕᓂᑦ. ᐊᒻᒪᓗ ᐃᓄᐃᑦ ᐅᖃᐅᓯᖅᑕᖏᑦ, ᐃᓄᐃᑦ ᖃᐅᔨᒪᔭᑐᖃᖏᑦ ᑕᒪᒃᑯᐊ ᐃᓚᓕᐅᔾᔭᐅᓯᒪᖃᑦᑕᖅᑐᑦ ᑕᒪᒃᑯᓄᖓ ᑐᕌᖓᔪᑦ ᓵᙵᓂᐊᕐᒪᑕ ᐃᓕᑉᐸᓪᓕᐊᕕᒋᓯᓐᓈᖅᖢᒍ ᐊᒻᒪᓗ ᐊᓯᖏᑦ ᐃᓕᓐᓂᐊᕈᑎᒃᓴᐃᑦ. ᓯᓚᑦᑐᖅᓴᕐᕕᒃᑯᑦ ᖃᓄᖅᑑᕈᑎᖃᖅᑐᑦ ᐃᓄᐃᑦ ᖃᐅᔨᒪᔭᖏᑦ ᑖᒃᑯᐊ ᑐᙵᕕᒋᔭᐅᑎᓪᓗᒍ ᐊᒻᒪᓗ ᖃᓄᖅ ᑕᒪᒃᑯᐊ ᐃᓕᓐᓂᐊᕈᑎᒃᓴᐃᑦ ᐃᓄᖕᓄᑦ ᑐᕌᖓᔪᑦ ᓴᖅᑭᑕᐅᖃᑦᑕᕐᒪᖔᖏᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᒥᔅᑕ ᒪᐃᒃ, ᐊᑏ. ᒪᐃᒃ: ᖁᔭᓐᓇᒦᒃ ᐃᔅᓯᕙᐅᑕᖅ, ᖁᔭᓐᓇᒦᒃ ᒥᓂᔅᑕ. ᑕᐃᒪ ᐃᓐᓇᐃᑦ ᐱᖃᑕᐅᕙᑦ ᑕᕝᕙᓂ ᐃᕝᕕᑦ ᐅᖃᐅᓯᕆᕋᑖᖅᑕᖓᓂᒃ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᐊᑎᖁᑎᓐᓂ, ᒥᔅᑕ ᖁᓕᑉᑖᓇ. ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑕᖅ. (ᑐᓵᔨᑎᒎᓕᖅᑐᖅ) ᑖᓐᓇ ᐊᐱᖅᑯᑦ ᑐᓴᖅᑲᐅᙱᓐᓇᒃᑯ. ᐅᖃᑦᑎᐊᒃᑲᓐᓂᑲᐃᓐᓇᕈᒃ. ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᒥᔅᑕ ᒪᐃᒃ, ᐊᑏᓗ, ᐊᐱᕆᒃᑲᓐᓂᐊᓪᓚᒍᒃ. ᒪᐃᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᐊᐱᖅᑯᑎᒋᖅᑲᐅᒐᒃᑯ ᑖᓐᓇ ᐱᔭᒃᓴᖅᑖᕆᔭᐅᓯᒪᔪᖅ ᒐᕙᒪᒃᑯᓐᓄᑦ ᐊᖏᖅᑕᐅᓯᒪᓪᓗᑎᒡᓗ ᓯᓚᑦᑐᖅᓴᕐᕕᒃᑯᓐᓄᓪᓗ. ᐃᓕᖅᑯᓰᑦ ᐅᖃᐅᓯᓕᕆᓂᖅ ᑕᒪᓐᓇ ᑕᐃᖅᑲᐅᒐᖕᓂ ᒪᑯᐊᓗ ᐃᖅᑲᓇᐃᔭᖃᑎᒋᔭᑎᑦ ᐊᒻᒪᓗ ᐊᒃᑐᖅᑕᐅᓯᒪᔪᑦ ᐃᖅᑲᓇᐃᔭᖃᑎᒋᔭᐅᓂᖏᑦ. ᐊᐱᕆᔪᒪᓪᓗᖓ ᖃᔅᓯᓂᒃ ᐃᓐᓇᕐᓂᒃ ᐊᑐᖃᑦᑕᖅᐱᓯ ᑕᒪᒃᑯᐊ ᐱᔾᔪᑎᐅᑎᓪᓗᒋᑦ? ᖁᔭᓐᓇᒦᒃ, ᐃᒃᓯᕙᐅᑖᖅ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 34 ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᔅ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᒃ ᑖᓐᓇ ᑐᑭᓯᓇᖅᓯᑎᓵᕐᒪᒍ. ᐃᒃᓯᕙᐅᑖᖅ, ᐊᔪᕐᓇᙱᑉᐸ ᐊᖓᔪᖅᑳᕆᔭᐅᔪᖅ ᓯᓚᑦᑐᖅᓴᕐᕕᖕᒧᑦ ᑭᐅᖁᓪᓗᒍ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᒥᔅ ᐳᕋᐃᔅ. ᐳᕋᐃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ, ᐊᒻᒪᓗ ᖁᔭᓐᓇᒦᕌᓗᒃ ᑖᓐᓇ ᐊᐱᖅᑯᑎᒋᖕᒪᒍ. ᒥᓂᔅᑕ ᐅᐊᑦᑎᐊᒃᑲᓐᓂᖅ ᐅᖃᖅᑲᐅᖕᒪᑦ ᑖᒃᑯᐊ ᓯᓚᑦᑐᖅᓴᕐᕕᒃᑯᑦ ᐱᔨᑦᑎᕈᑎᓂᒃ ᐃᓐᓇᕐᓂᒃ ᐃᖅᑲᓇᐃᔭᖃᑎᒋᖃᑦᑕᖅᑕᕗᑦ. ᐃᑲᔪᖅᓲᑎᒋᖃᑦᑕᖅᑕᕗᑦ ᓄᓇᓕᖕᓂ, ᐃᓐᓇᕐᓂ ᓯᓚᑦᑐᖅᓴᕐᕕᖕᓂ ᑕᐃᑲᓂ ᐃᓕᓐᓂᐊᕐᕕᒻᒦᑦᑐᖃᖃᑦᑕᖅᑐᖅ ᐃᖅᑲᓇᔭᖅᑎᓄᑦ ᐊᒻᒪᓗ ᐃᓕᓴᖅᑎᓄᑦ ᐃᑲᔪᖅᑎᒋᔭᐅᓪᓗᑎᒃ. ᒪᑯᐊ ᒪᓕᒋᐊᓖᑦ ᐊᑐᐊᒐᓪᓗ ᐊᒻᒪ ᐃᓚᓕᐅᖦᖢᒋᑦ ᐃᓄᐃᑦ ᐅᖃᐅᓯᖓᑦ ᐃᓕᖅᑯᓯᖓᓪᓗ. ᐊᒃᓱᐊᓗᒃ ᑖᒃᑯᐊ ᐃᓐᓇᐃᑦ ᐃᑲᔪᖃᑦᑕᖅᑐᑦ. ᐃᕕᖅᑎᖅᐸᓪᓕᐊᔪᖅ ᑖᒃᑯᐊ ᖃᐅᔨᒪᔨᑕᕆᔭᐅᔪᖅ ᖃᐅᔨᒪᔨᑕᕆᔭᐅᖃᑦᑕᖅᑐᖅ ᓯᓚᑦᑐᖅᓴᕐᕕᒃᑯᓐᓄᑦ ᖃᓄᕐᓗ ᐃᓄᐃᑦ ᐅᒃᐱᕆᔭᖏᑦ ᐃᓕᐅᖅᑲᖅᑕᐅᖃᓯᐅᔾᔭᐅᔪᓐᓇᕐᒪᖔᖏᑦ ᐊᑐᐊᒐᓂ. ᐄ’, ᐃᓐᓇᕐᓂᒃ ᑕᒪᒃᑯᓂᖓ ᐃᖅᑲᓇᐃᔭᖃᖅᑎᖃᖃᑦᑕᖅᑐᒍᑦ ᓄᓇᕗᓕᒫᒥ ᑕᒪᒃᑯᐊ ᐱᕐᔪᐊᕌᓘᖕᒪᑕ ᐃᖅᑲᓇᐃᔮᕆᔭᐅᖃᑦᑕᖅᑐᑦ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᐳᕋᐃᔅ. ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐄ’, ᐅᖃᖅᓯᒪᓂᖓ ᐱᐅᒋᓪᓗᒍ, ᐃᓅᖃᑎᒌᒃᑕ, ᐃᓐᓇᕐᒥᒃ ᐃᓚᐅᔪᖃᖅᑎᓪᓗᒍ ᐅᖃᐅᔾᔪᖅᑎᒋᔭᐅᑎᓪᓗᒍ, ᐃᓕᓴᖅᑏᑦ ᐃᓄᐃᑦ ᐱᖅᑯᓯᖏᑦ ᐅᖃᐅᓯᖅᑕᓪᓗ ᐃᓐᓇᕐᓄᑦ ᐃᓐᓇᖅ ᐃᓕᓐᓂᐊᖅᑎᑦᑎᑎᓪᓗᒍ ᐃᓕᓐᓂᐊᖅᑐᑦ ᖃᓅᖃᑦᑕᖅᐸᑦ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᔅ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ, (ᑐᓵᔨᑎᒍᑦ) ᐊᒻᒪᓗ ᖁᔭᓐᓇᒦᖅᖢᒍ ᑖᓐᓇ ᐊᐱᖅᑯᑎᒋᒐᖕᓂ. ᐃᓕᓐᓂᐊᖅᑐᑦ ᐃᓕᓐᓂᐊᕐᕕᑦᑎᓐᓃᑎᓪᓗᒋᑦ ᑕᐃᒃᑯᓄᖓ ᐃᓕᓐᓂᐊᕈᑎᒃᓴᓄᑦ ᓈᓴᐅᓯᖅᓱᖅᑕᐅᖃᑦᑕᕐᒪᑕ ᖃᐃᖁᔭᐅᓯᒪᔪᓪᓘᓐᓃᑦ ᐅᕝᕙᓘᓐᓃᑦ ᖃᐃᖁᔭᐅᓯᒪᓪᓗᑎᒃ ᐃᓕᓴᖅᑐᑦ. ᐱᐅᓯᕚᓪᓕᐅᑎᒋᔭᐅᖃᑦᑕᖅᑐᑦ ᐊᒻᒪᓗ ᓈᓴᐅᓯᖅᑕᐅᖃᓯᐅᔾᔭᐅᖃᑦᑕᖅᖢᑎᒃ ᑕᐃᒃᑯᐊ ᐃᓕᓴᖅᑏᑦ ᐃᓚᐅᔪᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᒥᔅᑕ ᒪᐃᒃ. ᒪᐃᒃ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᐃᓐᓇᐃᑦ ᐃᓕᓴᖅᑏᑦ ᖃᓄᖅ ᐅᓄᙱᓛᓂᒃ ᓈᓴᐅᓯᖅᑕᐅᖃᑦᑕᖅᐸᑦ ᑕᐃᒃᑯᐊ ᐃᓐᓇᕐᓄᑦ ᐃᓕᓐᓂᐊᖅᑎᑕᐅᑎᓪᓗᒋᑦ? ᖁᔭᓐᓇᒦᒃ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᓂᔅᑕ ᕼᐄᓕ ᐊᕿᐊᕈᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 35 ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᒃ ᑖᓐᓇ ᐊᐱᖅᑯᑎᒋᒐᖕᓂ. ᓇᐅᒃᑯᓕᒫᖅ ᐃᑲᔪᖅᑎᒋᖃᑦᑕᖅᑕᕗᑦ −− ᑐᑭᓯᑦᑎᐊᕈᒪ ᐊᐱᖅᑯᑎᓐᓂᒃ −− ᓇᓗᓇᐃᒃᑯᑦᑎᖅᑕᐅᖃᑦᑕᖅᑐᑦ, ᓇᐅᒃᑯᑐᐃᓐᓇᖅ ᐃᑲᔪᖃᑦᑕᖅᑐᒍᑦ ᑕᐃᒃᑯᐊ ᐸᐃᑉᐹᑖᖅᑐᑦ ᑕᐃᒃᑯᐊᓗ ᖁᕝᕙᓯᖕᓂᖅᓴᒥᒃ ᐃᓕᓴᕆᔭᐅᓯᒪᔪᑦ. ᐆᒃᑑᑎᒋᓗᒋᑦ ᓄᓇᕗᒻᒥ ᐃᓕᓴᐃᔨᙳᕆᐅᖅᓴᕐᓂᕐᒥᒃ ᐃᓕᓐᓂᐊᖅᑐᑦ ᐃᓐᓇᕐᓄᑦ ᐃᑲᔪᖅᑕᐅᓪᓚᕆᖃᑦᑕᖅᑐᑦ ᐃᓕᓴᖅᑏᑦ ᐃᑲᔪᒃᑲᓐᓂᖁᓪᓗᒋᑦ ᐊᒻᒪᓗ ᐊᓯᖏᑦ ᐃᓚᐅᖃᑦᑕᖅᑐᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ. ᐊᑏ, ᒥᔅᑕ ᒪᐃᒃ. ᒪᐃᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ ᐊᒻᒪᓗ ᖁᔭᓐᓇᒦᖅᖢᒍ ᒥᓂᔅᑕ. ᓄᓇᕗᑦ ᓯᓚᑦᑐᖅᓴᕐᕕᒃᑯᑦ 2026- 2030 ᐱᓕᕆᐊᖑᓂᐊᖅᑐᑦ ᐸᕐᓇᐅᑎᖏᑦ ᐅᖃᖅᓯᒪᔪᑦ 2026-2027 ᐊᐅᓚᔾᔭᒃᑕᐅᓂᐊᖅᑐᖅ ᑕᒪᒃᑯᐊ ᐱᓕᕆᐊᙳᖅᑎᑕᐅᓯᒪᔪᑦ ᕿᒥᕐᕈᓇᒃᑕᐅᓗᑎᒃ ᑐᕌᖓᒃᐸᑕ ᐅᖃᐅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐊᒻᒪᓗ ᐱᓕᕆᐊᙳᖅᑎᑕᐅᓲᑦ ᐋᖅᑭᐅᒪᔾᔪᑎᖏᑦ ᐃᓕᑕᐅᕙᓪᓕᐊᔪᑦ ᖃᓄᐃᓕᖓᖕᒪᖔᑦ ᐊᒻᒪᓗ ᒪᑯᐊ ᐃᓕᓐᓂᐊᕈᑎᒃᓴᐃᑦ ᓱᓇᒃᑯᑖᓪᓗ ᓄᑖᕈᕆᐊᖅᑎᑕᐅᓯᒪᖁᓪᓗᒋᑦ ᑖᒃᑯᐊ ᐱᓕᕆᐊᙳᖅᓯᒪᔪᑦ ᐊᖏᒡᓕᒋᐊᖅᑕᐅᓗᑎᒡᓗ ᐃᓄᐃᑦ ᐅᖃᐅᓯᖓᑦ ᐃᓕᖅᑯᓯᓕᕆᔨᖓᑦ, ᖃᓄᖅ ᐱᕙᓪᓕᐊᓯᒪᓂᑰᖕᒪᖔᑦ ᐊᒻᒪ ᐅᓪᓗᒥᐅᓕᖅᑐᖅ ᐊᑐᖅᑕᐅᔪᑦ. ᑕᒪᓐᓇ ᕿᒥᕐᕈᓇᖕᓂᖅ ᓯᓚᑦᑐᖅᓴᕐᕕᖕᒥ ᐃᖅᑲᓇᐃᔭᖅᑎᓄᑦ ᐊᐅᓚᑕᐅᓂᐊᖅᐸ ᐅᕝᕙᓘᓐᓃᑦ ᖃᐅᒪᔨᑕᕆᔭᐅᔪᓂᒃ ᒐᕙᒪᐅᙱᑦᑐᓂᒃ ᐊᑐᕐᓂᐊᖅᐱᓯ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᒪᐃᒃ. ᒥᔅ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᖅᖢᒍ ᑖᓐᓇ ᐊᐱᖅᑯᑎᒋᖕᒪᒍ. ᐅᓇ ᐃᓕᓐᓂᐊᕈᑎᒃᓴᐃᑦ ᑖᒃᑯᐊ ᐊᑐᖅᑕᐅᖏᓐᓇᖃᑦᑕᕐᒪᑕ ᕿᒥᕐᕈᓇᐃᓐᓇᖃᑦᑕᖅᖢᑎᒡᓗ ᑕᒪᒃᑯᓂᖓ ᓴᖅᑭᔮᖅᑎᑕᒥᖕᓂᒃ ᐅᓪᓗᒥᒧᑦ ᐊᙳᑎᓯᒪᒐᓗᐊᕐᒪᖔᑦ ᐊᑑᑎᖃᑦᑎᐊᕋᓗᐊᕐᒪᖔᓪᓗ. ᐄ’, ᓯᓚᑦᑐᖅᓴᕐᕕᒃᑯᓐᓄᑦ ᑕᐃᒃᑯᓄᖓ ᑲᒪᒋᔭᐅᖃᑦᑕᖅᑐᑦ. ᐊᓯᖏᓐᓂᒃ ᐊᑐᕆᐊᖃᕌᖓᒥᒃ ᐊᑐᖃᑦᑕᖅᖢᑎᒃ ᑭᓯᐊᓂ ᓯᕗᒃᑲᖅᑕᖅᑎᒋᔭᐅᖏᓐᓇᖅᑐᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᕼᐄᓕ ᐊᕿᐊᕈᖅ. ᒥᔅᑕ ᖁᓕᒃᑖᓇ, ᐊᐱᖅᑯᑎᖃᖅᐱᑦ? ᖁᓕᒃᑖᓇ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᑖᔅᓱᒪ ᐊᐱᖅᑯᑎᒋᔭᖓ ᒥᔅᑕ ᖃᑉᓗᑦᓯᐊᑉ ᐊᐱᖅᑯᑎᒋᖅᑲᐅᔭᖓ ᐅᐃᒍᒃᑲᓐᓂᕈᒪᓪᓗᒍ ᐱᔾᔪᑎᒋᓪᓗᒋᑦ ᒪᑯᐊ ᐃᓕᓴᖅᑎᓄᑦ ᐃᑲᔪᖅᓯᐅᑏᑦ. 60−ᐳᓴᖏᓐᓃᑉᐸᑕ ᑖᒃᑯᐊ ᓯᓚᑦᑐᖅᓴᕐᕕᒃᑯᑦ ᐃᖅᑲᓇᐃᔭᖅᑎᖏᑦᑕ ᐃᓐᓄᒃᑕᐅᓯᒪᙱᑦᑐᖅ. ᖃᓄᖅ ᑕᒪᓐᓇ ᓴᖅᑭᑕᐅᓛᖅᐸ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᖁᓕᒃᑖᓇ. ᒥᓂᔅᑕ ᕼᐄᓕ ᐊᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᖅᖢᒍ ᑖᓐᓇ ᐊᐱᖅᑯᑎᒋᒃᑲᓐᓂᕐᒪᒍ. ᐅᐃᒍᕐᒪᒍᐃᓛᒃ, ᐃᒃᓯᕙᐅᑖᖅ, ᐃᓗᓕᑯᓘᔭᖃᐅᖁᓪᓗᒍ ᑖᓐᓇ ᐊᖓᔪᖅᑳᕆᔭᐅᔪᖅ ᓯᓚᑦᑐᖅᓴᕐᕕᖕᒧᑦ ᑭᐅᖁᓪᓗᒍ. ᖁᔭᓐᓇᒦᒃ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 36 ᐃᒃᓯᕙᐅᑕᖅ (ᑐᓵᔨᑎᒍᑦ): ᐊᑏ, ᒥᔅ ᐳᕋᐃᔅ. ᐳᕋᐃᔅ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ ᐊᒻᒪᓗ ᖁᔭᓐᓇᒦᒃ ᑖᓐᓇ ᐊᐱᖅᑯᑎᒋᒐᖕᓂ. ᓯᓚᑦᑐᖅᓴᕐᕕᒃᑯᑦ ᐊᒃᓱᕈᖅᖢᑎᒃ ᐃᓐᓄᒃᑕᐅᓯᒪᙱᑦᑐᓂᒃ ᐃᓐᓄᐃᓇᓱᒃᑐᑦ. ᐄ’, ᑕᐃᒪ ᑭᖑᕙᖅᓯᒪᖕᒪᑕᐃᒃᑯᐊ ᐃᖅᑲᓇᐃᔭᖅᑐᓕᕆᔨᒃᑯᑎᒍᑦ ᐊᑭᑦᑐᕋᐅᑎᑎᒎᖅᑎᑕᐅᓯᒪᔪᑦ. ᐊᒻᒪᓗ ᑕᐃᒃᑯᐊ ᓇᖕᒥᓂᖅᐳᑦ ᐃᖅᑲᓇᐃᔭᖅᑐᓕᕆᔩᑦ ᐃᑲᔪᖅᑕᐅᔪᑦ ᐊᓯᖏᓐᓄᑦ ᑭᖑᕙᖅᓯᒪᓂᕗᑦ ᐱᓪᓗᒋᑦ, ᐄ’, ᓯᓚᑦᑐᖅᓴᕐᕕᒃᑯᑦ ᐅᖃᓪᓚᖃᑎᖃᕈᒪᒃᐸᑕ. ᓲᕐᓗ ᐃᓐᓇᕐᓄᑦ ᐃᓕᓴᐃᔨᖃᙱᒃᑯᑎᒃ ᑐᓴᐅᒪᔪᑎᓕᕆᔨᒃᑯᑦ ᓲᕐᓗ ᐃᑭᐊᖅᑭᕕᒃᑯᑦ ᑎᑎᕋᖅᑐᖃᖅᐸᑦ ᐅᖄᓚᔪᖃᖅᐸᓪᓘᓐᓃᑦ ᑕᒪᒃᑯᓄᖓ ᑐᕌᖓᔪᓂᒃ ᐱᓕᕆᔨᖃᖃᑦᑕᖅᑐᒍᑦ ᐊᒻᒪᓗ ᒪᑯᐊ ᐃᓱᒪᒃᓴᖅᓯᐅᕈᑎᒃᓴᐃᑦ ᐃᓱᒫᓘᑎᒋᔭᐅᔪᓪᓘᓐᓃᑦ ᐱᑕᖃᖅᐸᑕ ᑕᐃᒃᑯᐊ ᐊᑐᖃᑦᑕᖅᑕᕗᑦ. ᖃᓄᖅ, ᐃᓛᒃ ᓇᐅᒃᑯᕈᓘᔭᖅ ᑐᓴᖃᑦᑕᖅᑐᒍᑦ ᑕᖅᑳᙵᑦ. ᑖᒃᑯᐊ ᓯᓚᑦᑐᖅᓴᕐᕕᒃᑯᑦ ᐃᓐᓄᐃᓇᓱᒃᑎᓪᓗᒋᑦ ᐃᓐᓇᐃᑦ ᐃᓕᓴᐃᔨᖏᓐᓂᒃ ᐅᖃᓪᓚᖃᑎᖃᕈᓐᓇᖅᑐᓂᒃ ᓱᓕ ᐱᑕᖃᖃᑦᑕᖅᑐᑦ ᖃᓄᖅᑑᕈᑎᒃᓴᐃᑦ ᐃᓱᒫᓘᑎᒋᔭᐅᔪᓪᓘᓐᓃᑦ ᐃᓕᑉᐹᓪᓕᐅᑎᒋᖃᑦᑕᖅᑕᕗᑦ. ᖁᔭᓐᓇᒦᒃ, ᐃᔅᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᐳᕋᐃᔅ. ᒥᔅᑕ ᖁᓕᒃᑖᓇ, ᐊᑏᓗ? ᒥᔅᑕ ᐊᑕᒍᑦᑖᓗᒃ, ᐊᑎᖁᑎᓐᓃᒃᑲᕕᑦ. ᐊᑕᒍᑦᑖᓗᒃ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᓯᓚᑦᑐᖅᓴᕐᕕᒃᑯᑦ ᖃᓄᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᐃᖅᑲᓇᐃᔭᖃᑎᖃᖅᐸᑦ ᐃᓅᓕᓴᐃᓂᖅ ᐃᖅᑲᓇᐃᔮᖃᕈᓐᓇᕐᓂᐊᕐᒪᑕ ᐃᓐᓇᒃᑯᕕᖕᓂ ᐃᖃᓗᖕᓂ, ᐃᖃᓗᒃᑑᑦᑎᐊᕐᒥ, ᑲᖏᖅᖠᓂᕐᒥᓗ? ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅᑕ ᐊᑕᒍᑦᑖᓗᒃ. ᒥᔅ ᕼᐄᓕ ᐊᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ, (ᑐᓵᔨᑎᒎᓕᖅᑐᖅ) ᐊᒻᒪᓗ ᖁᔭᓐᓇᒦᖅᖢᒍ ᑖᓐᓇ ᐊᐱᖅᑯᑎᒋᖕᒪᒍ. ᐄ’, ᐃᖅᑲᓇᐃᔭᖃᑎᒋᑦᑎᐊᖅᑖᓗᒋᔭᕗᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ. ᐊᒻᒪᓗ ᐃᖅᑲᓇᐃᔭᖃᑎᒌᓲᖑᓪᓗᑕ ᐃᓕᓐᓂᐊᕈᑎᒃᓴᐃᑦ ᑕᒪᒃᑯᐊ ᐱᓕᕆᐊᕆᔭᐅᑎᓪᓗᒋᑦ ᒪᑯᐊᓗ ᐃᓕᓐᓂᐊᕈᑎᒃᓴᐃᑦ ᑭᙴᒪᔭᐅᔪᓪᓗ ᑖᔅᓱᒪ ᒪᓕᒐᓕᐅᖅᑎᐅᑉ ᐅᖃᐅᓯᕆᖅᑲᐅᔭᖏᑦ ᐱᓪᓗᒋᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᔅ ᕼᐄᓕ ᐊᕿᐊᕈᖅ. ᐊᑎᖁᑎᖃᕈᓐᓃᖅᖢᖓ. ᐊᖏᖅᐱᓰ ᐊᕕᒃᑐᖅᓯᒪᔪᑦ ᐃᓕᓐᓂᐊᕐᕕᓪᓗᐊᑕᖓᓄᑦ? ᑲᑎᒪᔨᕋᓛᑦ ᐃᓚᖏᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᒪᑉᐱᒐᕐᒨᕐᓗᓯ, M-i-3. ᑲᑎᒪᔩᑦ ᐊᖏᖅᐹᑦ ᓄᓇᕗᒻᒥ ᓯᓚᑦᑐᖅᓴᕐᕕᒻᒧᑦ 2026-2027-ᒧᑦ ᐊᑐᕈᒫᖅᑕᖏᑦ ᑖᒃᑯᓄᖓ $52,201,000-ᑖᓚᑦ ᐊᖏᖅᐱᓯᐅᒃ? ᑲᑎᒪᔨᕋᓛᑦ ᐃᓚᖏᑦ: ᐊᖏᖅᑐᑦ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 37 ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᑲᑎᒪᔩᑦ ᐊᖏᖅᐸᑦ ᐱᔭᕇᕋᑦᑎᒍᑦ ᑖᒃᑯᐊ ᓄᓇᕗᒻᒥ ᓯᓚᑦᑐᓴᕐᕕᒻᒥ ᐊᑐᒐᒃᓴᖏᑦ? ᑲᑎᒪᔨᕋᓛᑦ ᐃᓚᖏᑦ: ᐊᖏᖅᑐᑦ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᒪᑐᔾᔪᑎᒃᓴᓄᑦ ᐅᖃᐅᓯᒃᓴᖃᖅᐲᑦ? ᒥᓂᔅᑕ ᕼᐄᓕ ᐊᕿᐊᕈᖅ. ᐊᖓᔪᖅᑳᖅ ᒍᐊᐃᓐ ᕼᐄᓕ ᐊᕿᐊᕈᖅ: ᖁᔭᓐᓇᒦᒃ, ᐃᒃᓯᕙᐅᑖᖅ. (ᑐᓵᔨᑎᒎᓕᖅᑐᖅ) ᖁᔭᓐᓇᒦᕈᒪᔭᒃᑲ ᑲᑎᒪᔨᕋᓛᑦ ᑖᒃᑯᓂᖓ ᑲᒪᕋᑖᕐᒪᑕ ᓯᓚᑦᑐᓴᕐᕕᐅᑉ ᐊᑐᕈᒫᖅᑕᖏᓐᓂᒃ ᐊᐱᖅᑯᑎᒋᔭᖏᓐᓄᓗ. ᐊᒻᒪᓗᑦᑕᐅᖅ ᐃᓕᓐᓂᐊᕐᓂᓕᕆᓂᕐᒧᑦ ᑐᕌᖓᔪᓂᒃ ᐃᖅᑲᓇᐃᔮᖅᑖᕈᑕᐅᖃᑦᑕᕐᒪᑕ. ᖁᔭᓐᓇᒦᕐᒥᔭᒃᑲ ᑕᒫᓃᑦᑐᓐᓇᖅᑲᐅᖏᒻᒪᑦ ᒥᓂᔅᑕ ᐊᕿᐊᕈᖅ ᐊᒻᒪ ᐃᖅᓇᐃᔭᖅᑎᒃᑲ ᑕᒫᓃᑦᑐᑦ ᖁᔭᓐᓇᒦᕈᒪᔭᒃᑲ ᐊᓯᖏᓪᓗ ᐃᖅᑲᓇᐃᔭᖅᑐᑦ ᓄᓇᕗᑦ ᓯᓚᑦᑐᓴᕐᕕᐊᓂ ᑕᑯᒃᓴᐅᙱᑦᑑᒐᓗᐊᖅ. ᑭᓯᐊᓂ ᖁᔭᓐᓇᒦᕈᒪᔭᒃᑲ ᐃᓕᓐᓂᐊᖅᑏᑦ ᐊᒃᓱᕈᖅᖢᑎᒃ ᐃᖅᑲᓇᐃᔭᖃᑦᑕᕐᒪᑕ ᐱᔭᕇᖅᓯᕙᓪᓕᐊᔪᑦ ᐃᓕᓐᓂᐊᕐᓂᕐᒥᓂᒃ, ᐱᓇᓱᐊᕈᓰᒃ ᒪᕐᕉᒃ ᐃᓗᐊᓂ. ᐊᒻᒪ ᑐᓴᖅᑎᑦᑎᔪᒪᓪᓗᖓ ᑭᖑᕙᓗᐊᕈᓐᓇᖏᑦᑐᖅ ᐃᓕᓐᓂᐊᕆᐊᒃᓴᖅ ᓄᑖᒥᒃ. ᓯᓚᑦᑐᓴᕐᕕᒃ ᑐᙵᓱᒃᑎᑦᑎᔪᖅ ᖃᓄᖅ ᐅᑭᐅᖃᖅᑎᒋᒐᓗᐊᕈᕕᑦ ᐃᓕᓐᓂᐊᕆᐊᖃᑦᑕᖁᓪᓗᑎᑦ, ᑐᙵᓱᒃᑎᑕᕗᑦ ᐃᓕᓐᓂᐊᕈᒪᔪᓕᒫᑦ ᓯᓚᑦᑐᓴᕐᕕᒻᒥ ᑐᙵᓱᒃᑎᑕᕗᑦ. (ᑐᓵᔨᑎᒎᕈᓐᓃᖅᑐᖅ) ᖁᔭᓐᓇᒦᒃ, ᐃᒃᓯᕙᐅᑖᖅ. >>ᐸᒃᑕᖅᑐᖅᑐᑦ ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ, ᒥᓂᔅᑕ ᒪᑐᓯᔾᔪᑎᓐᓂᒃ ᐅᖃᕋᑖᕋᕕᑦ. ᐃᖅᓱᒃᑏ, ᐅᑯᐊ ᐊᓂᑎᑲᐃᓐᓇᒃᑭᑦ. ᖃᓄᐃᓕᐅᕈᒪᓕᖅᐸᑦ ᑲᑎᒪᔨᕋᓛᑦ? ᒥᔅᑕ ᑕᖅᑐ. ᑕᖅᑐ (ᑐᓵᔨᑎᒍᑦ): ᖁᔭᓐᓇᒦᒃ, ᐃᒃᓯᕙᐅᑖᖅ. ᓅᑦᑎᕗᖓ ᐱᖁᔨᕗᖔᕈᑎᒥᒃ ᓄᖅᑲᖅᐸᓪᓕᐊᔪᒪᓕᖅᖢᖓ. ᖁᔭᓐᓇᒦᒃ, ᐃᒃᓯᕙᐅᑖᖅ. ᐃᒃᓯᕙᐅᑕᖅ (ᑐᓵᔨᑎᒍᑦ): ᖁᔭᓐᓇᒦᒃ. ᐱᖁᔨᕗᖔᖅᑐᖃᕐᒪᑦ ᑲᑎᒪᔾᔪᑕᐅᔪᓐᓇᖏᑦᑐᖅ, ᓈᒻᒪᒃᓴᖅᑐᑦ ᐱᖁᔨᕗᖔᕐᒥᒃ? ᐱᖁᔨᕗᖔᖅ ᑲᔪᓯᔪᖅ. ᒫᓐᓇ ᓂᑯᕕᓐᓂᐊᓕᖅᐳᖓ ᐅᓂᒃᑳᕐᓂᐊᕋᒪ ᐱᕙᓪᓕᐊᓂᕆᔭᑦᑎᓐᓂᒃ. >>ᑲᑎᒪᔨᕋᓛᑦ ᓄᖅᑲᖅᑐᑦ 16:24 ᐊᒻᒪᓗ ᐃᒡᓗᒥ ᐃᒃᓯᕙᓂᖅ ᐱᒋᐊᖅᑐᖅ 16:25-ᒥ ᐅᖃᖅᑎ: ᑲᑎᒪᔾᔪᑎᑦᑕ ᓈᓴᐅᑎᖓ 20, ᑲᑎᒪᑐᐃᓐᓇᓚᐅᖅᑎᓪᓗᒋᑦ ᐅᓂᒃᑳᑦ, ᒥᔅᑕ ᐲᑕᓴᓐ. ᑲᑎᒪᔾᔪᑎᒃᓴᖅ 20: ᑲᑎᒪᔨᕋᓛᑦ ᑲᑎᒪᑐᐃᓐᓇᓚᐅᖅᑎᓪᓗᒋᑦ ᐅᓂᒃᑳᖓᑦ ᐲᑕᓴᓐ (ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᑲᑎᒪᔨᕋᓛᑦ ᑲᑎᒪᔾᔪᑎᖃᖅᑲᐅᒻᒪᑕ ᐱᖁᔭᒃᓴᖅ 1-ᒥ ᓄᖅᑲᖅᐸᓪᓕᐊᔪᒪᓕᖅᑐᑎᒃ ᐅᖃᖅᐳᑦ. ᓄᐃᑦᑎᕗᖓ ᑲᑎᒪᑐᐃᓐᓇᕐᓂᕐᒧᑦ ᐱᓕᕆᔭᐅᖅᑲᐅᔪᑦ ᐊᖏᖅᑕᐅᖁᓪᓗᒋᑦ. ᖁᔭᓐᓇᒦᒃ, ᐅᖃᖅᑏ. ᐅᖃᖅᑎ: ᐱᖁᔨᕗᖔᕈᑦ ᓈᒻᒪᒻᒪᑦ, ᐊᐃᑉᐱᖅᑕᐅᕚ? ᒥᔅᑕ ᒪᐃᒃ. ᐱᖁᔨᕗᖔᕈᑎᒥᒃ ᓈᒻᒪᒃᓴᖅᑐᑦ, ᐃᓵᓪᓕᑦ. ᓈᒻᒪᒃᓴᙱᑦᑐᑦ? ᑲᔪᓯᕗᖅ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 38 ᑲᑎᒪᔾᔪᑎᑦᑕ ᓈᓴᐅᑎᖓ 21, ᐱᖓᔪᐊᓂᒃ ᐅᖃᓕᒫᖅᑕᐅᓂᖏᑦ ᐱᖁᔭᒃᓴᑦ. ᓈᓴᐅᑎ 22, ᑲᑎᒪᔾᔪᑎᕗᑦ. ᒥᔅ ᑎᑎᕋᖅᑎᐅᑉ ᑐᖏᓕᖓ, ᒥᔅ ᐱᐊᓐᔅ. ᑲᑎᒪᔾᔪᑎᒃᓴᖅ 22: ᑲᑎᒪᔾᔪᑎᒃᓴᐃᑦ ᑎᑎᕋᖅᑎ (ᑯᐊᒃ)(ᑐᓵᔨᑎᒍᑦ): ᖁᔭᓐᓇᒦᒃ, ᐅᖃᖅᑏ. ᒫᑦᓯ 7-ᒥᑦ ᑲᑎᒪᔾᔪᑎᔅᓴᐃᑦ: 1. ᑐᒃᓯᐊᕐᓂᖅ 2. ᐊᖓᔪᖅᑳᑦ ᐅᖃᐅᓯᖏᑦ 3. ᒪᓕᒐᓕᐅᖅᑏᑦ ᐅᖃᐅᓯᖏᑦ 4. ᑭᐅᔾᔪᑎᑦ ᐅᖃᐅᓯᒃᑯᑦ ᐊᐱᖅᑯᑎᓄᑦ 5. ᐃᓕᑕᖅᓯᓂᖅ ᐳᓛᖅᑎᓂᑦ 6. ᐅᖃᐅᓯᒃᑯᑦ ᐊᐱᖅᑯᑎᑦ 7. ᑎᑎᖅᑲᒃᑯᑦ ᐊᐱᖅᑯᑎᑦ 8. ᑭᐅᔾᔪᑎᑦ ᑎᑎᖅᑲᒃᑯᑦ ᐊᐱᖅᑯᑎᓄᑦ 9. ᑭᐅᔾᔪᑎᑦ ᒪᑐᐃᕈᑎᒧᑦ 10. ᐊᑎᓕᐅᕈᑕᐅᓯᒪᔪᑦ 11. ᑭᐅᔾᔪᑎᑦ ᐊᑎᓕᐅᕈᑕᐅᓯᒪᔪᓄᑦ 12. ᑲᑎᒪᔨᕋᓛᑦ ᑲᑎᒪᔨᕋᓛᖑᑲᐃᓐᓇᖅᑐᓪᓗ ᒪᓕᒐᒃᓴᓂᑦ ᐊᓯᖏᓐᓂᓪᓗ ᐅᓂᒃᑳᖏᑦ 13. ᑎᑎᖅᑲᓂᑦ ᓴᖅᑭᑎᕆᓂᖅ 14. ᖃᐅᔨᒃᑲᐃᒍᑎᑦ ᐱᒋᐊᖅᑎᑕᒃᓴᓂᑦ 15. ᖃᐅᔨᒃᑲᐃᒍᑎᑦ ᐱᒋᐊᖅᑎᑕᒃᓴᓂᑦ ᒪᓕᒐᒃᓴᐃᑦ ᐅᖃᓕᒫᕐᓂᒃᓴᒥᒃ ᓯᕗᓪᓕᖅᐹᖓᓐᓂᒃ 16. ᐱᒋᐊᖅᑎᑕᐃᑦ 17. ᓯᕗᓪᓕᖅᐹᒥᒃ ᐅᖃᓕᒫᕐᓂᖅ ᒪᓕᒐᒃᓴᓂᑦ. 18. ᐊᐃᑉᐹᓂᒃ ᐅᖃᓕᒫᕐᓂᖅ ᒪᓕᒐᒃᓴᓂᑦ 19. ᑲᑎᒪᔨᕋᓛᑦ ᑕᒪᐃᓐᓄᑦ ᒪᓕᒐᒃᓴᓄᑦ ᐊᓯᖏᓐᓂᓪᓗ ᐃᓱᒪᖅᓴᖅᓯᐅᕐᓂᖏᑦ 20. ᑲᑎᒪᔨᕋᓛᑦ ᑕᒪᐃᓐᓄᑦ ᐅᓂᒃᑳᖓᑦ 21. ᐱᖓᔪᐊᓐᓂᒃ ᐅᖃᓕᒫᕐᓂᖅ ᒪᓕᒐᒃᓴᓂᑦ 22. ᑲᑎᒪᔾᔪᑎᒃᓴᐃᑦ ᖁᔭᓐᓇᒦᒃ. ᐅᖃᖅᑎ: ᒪᓕᒐᓕᐅᕐᕕᒃ ᓄᖅᑲᖔᓚᐅᑲᓐᓂᐊᖅᐳᖅ ᐅᓪᓗᑐᐃᓐᓇᙳᕋᓱᓐᓂᖓᓂ, ᐅᑐᐱᕆ 25ᒥ, 9:00ᒨᖅᑲᑦ ᐅᓪᓛᒃᑯᑦ. ᐃᖅᓱᖅᑎ.

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 39 >>ᑲᑎᒪᓂᖅ ᓄᖅᑲᖅᑐᖅ 17:59ᒧᐊᖅᑎᓪᓗᒍ

ᐱᖓᔪᐊ, ᔫᓂ 03, 2026 ᓄᓇᕗᒥ ᒪᓕᒐᓕᐅᕐᕕᒻᒧᑦ ᑲᑎᒪᔾᔪᑏᑦ 40 ᐅᐃᒍᖓ, ᔫᓂ 03, 2026

ᓄᓇᕗᑦ ᒪᓕᒐᓕᐅᕐᕕᐊ Nunavut Maligaliurvia Legislative Assembly of Nunavut Assemblée législative du Nunavut ᑭᐅᔾᔪᑎ ᐅᖃᐅᓯᒃᑯᑦ ᐊᐱᖅᑯᑎᒧᑦ ᐆᒪ ᐊᐱᖅᑯᑎᒋᔮ: ᒪᓕᒐᓕᐅᖅᑎ ᖁᕐᓗᖅᑐᕐᒧᑦ, ᓴᐃᒪᓐ ᖁᓕᑦᑖᓇ ᐊᐱᖅᑯᑕᐅᔪᖅ ᐆᒧᖓ: ᒥᓂᔅᑕ ᐅᖃᐅᓯᕐᓄᑦ, ᐳᕋᐃᐊᓐ ᑯᓄᒃ ᓇᐃᓴᐅᑖ: 28 − 7(2) ᐃᓄᐃᓐᓇᖅᑐᓐ ᐅᖃᐅᓯᖅ ᐅᓪᓗᖓ: ᒪᐃ 25, 2026 ᐱᔾᔪᑖ: ᐃᓄᐃᓐᓇᖅᑐᓐ ᐅᖃᐅᓯᖅ ᐊᑐᓕᖅᑎᑕᐅᒃᑲᓐᓂᕐᓂᖓ ᐅᖃᖅᑎᑦᓯᔩ, ᐅᓪᓗᒥ ᓇᖏᖅᓯᕗᖓ ᐃᓚᒋᐊᕈᒪᓪᓗᒍ ᑭᐅᔾᔪᑎᒐ ᐅᖃᐅᓯᒃᑯᑦ ᐊᐱᖅᑯᑎᒧᑦ 28-7(2), ᐊᐱᖅᑯᑕᐅᓚᐅᖅᑐᖅ ᒫᑦᓯ 25, 2026-ᒥ ᒪᓕᒐᓕᐅᖅᑎᒧᑦ ᖁᕐᓗᖅᑑᕐᒧᑦ, ᓴᐃᒪᓐ ᖁᓕᑦᑖᓇᒧᑦ. ᖁᔭᓐᓇᒦᕈᒪᕙᕋ ᒪᓕᒐᓕᐅᖅᑎ ᐊᐱᖅᑯᑎᖓᓄᑦ ᐃᓄᐃᓐᓇᖅᑐᓐ ᐅᖃᐅᓯᖅ ᐱᔾᔪᑎᒋᓪᓗᒍ. ᐅᖃᖅᑎᑦᓯᔩ, ᑭᐅᔾᔪᑎᒋᖅᑲᐅᔭᕋ, ᓇᓗᓇᐃᖅᓯᖅᑲᐅᒐᒪ ᐱᓕᕆᐊᖑᐃᓐᓇᖅᑐᒥᒃ ᒐᕙᒪᒃᑯᑦ ᑐᑭᓕᐅᕆᓂᕐᒧᑦ ᐊᑐᐊᒐᖓᓂᒃ, ᐱᓕᕆᖃᑎᖃᕐᓂᑦᑎᓐᓂᒃ ᐅᖃᐅᓯᕐᓄᑦ ᐱᖃᖃᑕᐅᔪᓂᒃ, ᑮᓇᐅᔭᖃᑦᑎᑦᓯᖃᑕᕐᒪᑦ ᐱᓕᕆᕝᕕᒋᔭᑦᑕ ᐊᑐᐃᓐᓇᐅᑎᑦᓯᓂᕐᒧᑦ ᐃᑲᔪᖅᑐᐃᔪᒪᓪᓗᑎᒃ ᐃᓄᐃᓐᓇᖅᑐᓐ ᐆᒻᒪᕆᐊᖅᑎᑦᓯᒃᑲᓐᓂᕐᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ. ᐅᖃᖅᑎᑦᓯᔩ, ᓇᓗᓇᐃᖅᓯᒃᑲᓐᓂᕈᒪᕗᖓ ᑖᓐᓇ ᐱᓕᕆᕝᕕᒋᔭᐅᔪᖅ ᓯᕗᒻᒧᐊᒃᑎᑦᓯᕙᓪᓕᐊᖏᓐᓇᕐᓂᖓᓂᒃ ᐊᖏᖅᓯᒪᓂᖃᕐᓂᕐᒧᑦ ᐃᓄᐃᓐᓇᖅᑐᑦ ᐅᖃᐅᓯᕐᒥᒃ ᐆᒻᒪᖅᑎᑦᓯᒃᑲᓐᓂᕐᓂᕐᒥᒃ ᓄᓇᕘᓕᒫᒥ. ᐋᖅᑭᑦᓱᐃᕙᓪᓕᐊᕗᒍᑦ ᓄᑖᙳᕆᐊᖅᓯᒪᔪᒥᒃ ᑐᑭᓕᐅᕆᓂᕐᒧᑦ ᐊᑐᐊᒐᕐᒥᒃ ᓅᑎᑦᓯᓂᐊᖅᑐᒥᒃ ᐃᓄᐃᓐᓇᖅᑐᓐ ᐱᓇᓱᐊᑦᑕᐅᒥᖓ ᐊᑕᖏᐅᒪᔪᓂᒃ, ᑭᒃᑯᑐᐃᓐᓇᓄᑦ ᓴᖅᑭᑎᑕᐅᕙᑦᑐᓂᒃ ᑐᕌᖔᓕᕐᓗᑎᒃ ᖃᓄᐃᓕᐅᖅᑕᐅᕙᓪᓕᐊᔪᒪᔪᓄᑦ, ᐊᑦᑐᖅᓯᕐᔪᐊᖅᑐᓄᑦ ᓯᕗᓪᓕᖅᐸᐅᔾᔭᐅᓯᒪᔪᓄᑦ. ᑖᓐᓇ ᐱᓕᕆᐊᖑᔪᖅ ᑐᙵᕕᖃᖅᑎᑕᐅᕗᖅ ᒪᓕᒐᑎᒍᑦ ᐱᓕᕆᐊᕆᔭᕆᐊᖃᖅᑕᑦᑎᓐᓄᑦ, ᐊᑐᓕᖅᑎᑕᐅᒃᑲᓐᓂᕐᓂᖓ ᑐᕌᕆᔭᑦᑎᓐᓄᑦ, ᐊᒻᒪᓗ—ᐱᒻᒪᕆᐅᓂᖅᐹᖅ— ᑐᑭᒧᐊᑦᑎᑦᓯᓂᕐᒧᑦ ᐊᑐᐃᓐᓇᐅᑎᑕᐅᔪᖅ ᐃᓄᐃᓐᓇᖅᑐᓐ−ᐅᖃᐅᓯᓕᓐᓄᑦ ᓄᓇᓕᓐᓄᑦ.

ᓯᕗᒻᒧᐊᒃᑎᑦᑐᒪᓪᓗᒍ ᑖᓐᓇ ᐱᓕᕆᐊᖅ, ᐅᖃᖅᑎᑦᓯᔩ, ᐱᓕᕆᕝᕕᐅᔪᖅ ᐱᓕᕆᖃᑎᖃᑦᓯᐊᕈᒪᕗᑦ ᓄᓇᕗᑦ ᑐᙵᕕᒃᑯᓐᓂ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐊᒻᒪᓗ ᐃᓄᐃᓐᓇᖅᑐᓐ ᐅᖃᐅᓯᓕᓐᓂᒃ ᓄᓇᓕᓐᓂᑦ ᓇᓗᓇᐃᖅᓯᔪᒪᓪᓗᑎᒃ ᓯᕗᓪᓕᐅᔾᔭᐅᔭᕆᐊᓕᓐᓂᒃ ᐋᖅᑭᑦᓯᒪᓂᕆᔭᖓ. ᑖᓐᓇ ᐱᓕᕆᐊᑦᓴᖅ ᓂᕆᐅᒋᔭᐅᔪᖅ ᐱᔭᕇᖅᑕᐅᓂᐊᕐᓂᖓᓂᒃ 2026-2027 ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ, ᐊᑕᐅᑦᓯᒃᑰᖃᑎᖃᕐᓗᓂ ᐃᑲᔪᖅᑎᒌᒃᑕ ᐱᓕᕆᑦᒃᓴᖏᓐᓂ ᐸᕐᓇᐅᑭ ᓯᕗᓪᓕᐅᔾᔭᐅᔭᕆᐊᓕᓐᓄᑦ. ᐅᖃᖅᑎᑦᓯᔩ, ᐃᑉᐱᒋᑦᓯᐊᕐᓗᒍ ᐱᖃᖃᑕᐅᔪᑦ ᐃᓚᐅᑎᑕᐅᓂᖏᑦ, ᐃᓄᒃᑐᑦ ᐆᒻᒪᖅᑎᑦᓯᒃᑲᓐᓂᖅᑐᓕᕆᔨᕗᑦ ᖁᕐᓗᖅᑐᕐᒦᑦᑐᖅ ᐱᓕᕆᐊᑦᓴᖃᖅᑎᑕᐅᕗᖅ ᑐᓴᐅᒪᖃᑎᒌᑦᓯᐊᖏᓐᓇᕐᓂᕐᒥᒃ ᓄᓇᓕᓐᓂ ᐱᓕᕆᖃᑎᒋᔭᐅᔪᓂᒃ. ᐅᔾᔨᕆᔪᒪᒻᒥᔭᕋ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑕ ᐃᓗᓕᖏᑦᑎᒍᑦ, ᑲᓇᑕᒥ ᐃᓄᒃᑐᑦ ᑮᓇᐅᔭᐃᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᐊᖅᑕᐅᕙᑦᑐᐃᖅ ᑲᑎᓪᓗᒋᑦ ᖄᖏᐅᑎᓯᒪᒻᒪᑕ ᒐᕙᒪᒃᑯᑦ ᐱᖃᑦᑕᖅᑕᖏᓐᓂᒃ ᓈᒻᒪᑦᓯᓕᕈᑎᒃᓴᓂᒃ ᒪᓕᒐᖅᑎᒍᑦ ᐱᓕᕆᐊᑦᓴᖏᓐᓄᑦ. ᑖᓐᓇ ᐊᐅᓚᑦᓯᓂᖅ ᐱᓕᕆᖃᑎᒌᓐᓂᕐᓗ ᐱᔭᕆᐊᖃᒻᒪᕆᓕᖅᐳᖅ. ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓂᕐᒧᑦ ᐱᓕᒻᒪᑦᓴᕐᓂᕐᒧᑦ, ᐅᖃᖅᑎᑦᓯᔩ, ᐱᖓᓱᑦ ᑐᑦᓯᕋᐅᑎᐅᔪᑦ ᑐᑦᓯᕋᐅᑎᓂᑦ ᒫᓐᓇᐅᔪᖅ ᑭᖑᓪᓕᖅᐹᒥᑦ ᕿᒥᕐᕈᔭᐅᕙᓪᓕᐊᕗᑦ ᑐᓂᔭᐅᓚᐅᙱᓐᓂᖏᓐᓂ ᓂᐅᕕᕐᓂᕐᒧᑦ. ᐃᓚᖓᑦ ᐋᖅᑭᑦᑕᐅᓯᒪᓪᓗᐊᑕᖅᐳᖅ ᓇᓗᓇᐃᖅᓯᔾᔪᑕᐅᔪᒪᓪᓗᓂ ᐊᔪᙱᑦᑐᓂᒃ ᐊᖏᖃᑎᒌᒍᑎᒃᑯᑦ ᐃᖅᑲᓇᐃᔮᖅᑖᑎᑕᕐᓂᑦ ᑲᔪᓯᑎᑦᓯᓂᐊᕐᓗᑎᒃ ᑐᕌᕆᔭᐅᔪᓂᒃ ᐃᓄᐃᓐᓇᖅᑐᓐ ᐆᒻᒪᕆᐊᖅᑎᑦᓯᒃᑲᓐᓂᕐᓂᕐᒧᑦ ᐱᓕᕆᐊᖑᓂᐊᑦᑐᓂᒃ. ᒫᓐᓇᐅᔪᕐᓕ, ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑏᑦ ᐊᑐᐃᓐᓇᖃᐃᓐᓇᖅᐳᑦ ᐱᕈᕐᕕᐅᑉ ᐱᒋᐊᕐᕕᖓᓂ ᐊᒻᒪᓗ ᕿᒫᕝᕕᒻᒥ ᐱᓕᕆᐊᑦᓴᓂᒃ. ᐅᖃᖅᑎᑦᓯᔩ, ᐃᓕᑕᕆᔪᒪᒻᒥᔭᕋ ᐱᒻᒪᕆᐅᓂᖓ ᑭᖑᕚᕆᓂᐊᖅᑕᑎᓐᓄᑦ ᑮᓇᐅᔭᓕᐅᕋᓱᐊᕐᓂᕐᒧᑦ. ᐊᖏᓂᖅᓴᒥᒃ ᑮᓇᐅᔭᖃᖅᑎᑦᓯᓂᕗᑦ ᐱᖃᓯᐅᔾᔨᔪᖅ $1.35 ᒥᓕᐊᓐᓂᒃ ᐊᕐᕌᒍᑕᒫᑦ ᓄᓇᕗᒻᒥ ᓯᓚᑦᑐᓴᕐᕕᒻᒧᑦ, ᐃᑲᔪᖅᑐᐃᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᑦ ᓲᕐᓗ ᐃᓄᐃᓐᓇᖅᑐᓐ ᐅᖃᐅᓯᕐᒥᒃ ᐆᒻᒪᕆᐊᖅᑎᑦᓯᓂᕐᒧᑦ ᓇᓗᓇᐃᒃᑯᑕᖅᑖᕐᓂᕐᒧᑦ ᐱᓕᕆᐊᕐᒥᒃ. ᐊᒻᒪᓗᒃᑲᓐᓂᖅᑕᐅᖅ, ᐱᑎᑦᓯᕙᒃᑭᕗᒍᑦ $6.9 ᒥᓕᐊᓂᒃ ᐊᕐᕌᒍᑕᒫᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐃᓄᒃᑐᑦ ᐃᑲᔫᑎᑦᓴᓄᑦ ᐋᖅᑭᑦᓱᐃᕙᓪᓕᐊᓂᕐᒧᑦ, 20%−ᖓ ᓴᓇᔭᐅᓚᐅᖅᓱᓂ ᓱᖏᐅᑕᐅᓯᒪᔪᓂᓪᓘᓐᓃᑦ ᐃᓄᐃᓐᓇᖅᑐᓐ 2025-2026−ᒥ. ᑭᖑᓪᓕᖅᐹᒥ, ᐅᖃᖅᑎᑦᓯᔩ, ᓇᓗᓇᐃᖅᓯᔪᒪᕗᖓ $487,602 ᐊᖏᖅᑕᐅᓯᒪᓕᕐᓂᖓᓂᒃ ᐊᐃᑦᑑᑎᓄᑦ ᐃᑲᔫᑎᓄᓪᓗ ᐃᓄᐃᓐᓇᖅᑐᓐ ᐱᓕᕆᐊᑦᓴᓄᑦ 2026-2027−ᒥ. ᑖᓐᓇ ᑭᒡᒐᖅᑐᐃᔪᖅ 22.6%-ᓂ ᐃᓄᓕᒫᓄᑦ ᓴᙵᔭᐅᔪᓂᒃ ᐃᓄᒃᑐᑦ ᐆᒻᒪᕆᐊᖅᑎᑦᓯᒃᑲᓐᓂᕐᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎᓂᒃ. ᐅᖃᖅᑎᑦᓯᔩ, ᐃᓕᑕᖅᓯᓯᒪᕗᒍᑦ ᑐᐊᕕᕐᓇᕐᓂᖓᓂᒃ ᑕᒪᓐᓇ ᐱᓕᕆᐊᖅ ᐊᒻᒪᓗ ᐊᖏᖅᓯᒪᑦᑎᐊᖅᑐᒍᑦ ᒪᑐᐃᖓᑦᓯᐊᖅᑐᒥᒃ ᐅᖃᖃᑎᖃᖃᑦᑕᕈᒪᓪᓗᑕ ᒪᓕᒐᓕᐅᖅᑎᓂᒃ ᑕᒪᒃᑯᐊ ᐱᓇᓱᐊᖅᑕᐅᔪᑦ ᑲᔪᓯᕙᓪᓕᐊᑎᓪᓗᒋᑦ. ᓇᑯᕐᒦᒃ, ᐅᖃᖅᑎᑦᓯᔩ

Document details

Collection	Nunavut — Debates (Hansard)
Citation	2026-06-03 Blues Inuktitut
Type	statute
Volume / chapter	20260603 Blues Inuktitut 0
Language	en
Format	pdf
Source	TERRITORIAL
Identifier	4b76cddb371a175225d9691f90d835360198ec03

Source file is stored in the law ingest library (pdf).